Chapit nèf
Fòs nou jwenn nan esperans rezirèksyon an
1. San esperans rezirèksyon an, ki espwa ki t ap genyen pou mò yo ?
ÈSKE w gen moun pa w ki mouri ? San rezirèksyon, pa t ap gen okenn espwa pou w janm wè yo ankò. Yo t ap rete nan kondisyon Bib la dekri yo ye a lè l di : “ Men kanta pou moun ki mouri yo, yo pa konn anyen ditou, [...] paske pa gen ni travay, ni pwojè, ni konesans, ni sajès, nan cheyòl [tonm nan], kote w prale a. ” — Eklezyas 9:5, 10.
2. Ki mayifik espwa rezirèksyon an rann posib ?
2 Avèk mizèrikòd, grasa rezirèksyon, Jewova kreye yon posiblite ki san parèy pou yon bann moun ki mouri reviv ankò e pou yo jwenn lavi etènèl. Sa vle di ou kapab gen espwa rekonfòtan, yon jou, nan monn nouvo Bondye a, ou pral reyini ak moun ou yo k ap dòmi nan lanmò kounye a. — Mak 5:35, 41, 42 ; Travay 9:36-41.
3. a) Nan ki sans rezirèksyon se yon bagay ki enpòtan nan reyalizasyon objektif Jewova ? b) Ki lè sitou nou jwenn fòs nan esperans rezirèksyon an ?
3 Grasa rezirèksyon an, nou pa bezwen gen yon krent egzajere pou lanmò. Jewova kapab, san pa gen domaj dirab pou sèvitè fidèl li yo, kite Satan rive jis nan dènye limit nan efò l ap fè pou l eseye pwouve akizasyon malveyan li fè a. Akizasyon sa a fè kwè “ tout sa yon moun posede, l ap bay li pou nanm li ”. (Jòb 2:4.) Jezi te rete fidèl devan Bondye jiskaske l mouri, e se sa k fè Bondye te resisite l pou l viv nan syèl la. Konsa, Jezi te kapab prezante valè sakrifis li a kòm òm pafè devan twòn Papa l nan syèl la, sakrifis k ap pèmèt nou benefisye lavi. Grasa rezirèksyon, moun ki fè pati “ ti twoupo ” a, antanke eritye avèk Kris, gen esperans pou yo ini avèk li nan Wayòm selès la (Lik 12:32). Pou lòt moun yo, gen esperans rezirèksyon pou lavi etènèl nan Paradi sou tè a (Sòm 37:11, 29). Tout kretyen jwenn fòs “ ki depase sa ki nòmal la ” nan esperans rezirèksyon an lè yo anba eprèv ki mete yo fasafas ak lanmò. — 2 Korentyen 4:7.
Rezon ki fè li fondamantal pou lafwa yon kretyen
4. a) Nan ki sans rezirèksyon se yon “ doktrin fondamantal ” ? b) Pou monn nan an jeneral, ki sa rezirèksyon vle di ?
4 Selon Ebre 6:1, 2, rezirèksyon se yon “ doktrin fondamantal ”. Li se yon pati nan baz lafwa nou. San baz sa a nou pa t ap ka janm rive gen matirite antanke kretyen (1 Korentyen 15:16-19). Sepandan, ansèyman Bib la sou rezirèksyon se yon bagay ki pa ale nan menm sans ak panse monn nan an jeneral. Pou moun ki pa espirityèl, se sèlman lavi kounye a ki lavi reyèl, e kantite moun ki wè l konsa ap vin pi plis chak jou. Se sa k fè, se dèyè plezi y ap kouri. Ansuit, moun ki manm relijyon tradisyonèl yo, kit se relijyon ki nan lakretyente, kit se sa ki pa ladan l, yo panse yo gen yon nanm imòtèl. Men, kwayans sa a pa ka mache ak ansèyman Bib la bay sou rezirèksyon, piske si moun te gen yon nanm imòtèl, yon rezirèksyon pa t ap nesesè. Eseye fè de kwayans yo mache ansanm bay plis konfizyon pase pou l pote espwa. Kòman nou kapab rive ede moun sensè ki vle konnen laverite sou kesyon an ?
5. a) Anvan pou yon moun kapab konprann rezirèksyon an, ki sa l bezwen konnen ? b) Ki tèks nan Bib la ou ta ka itilize pou w esplike sa nanm nan ye e nan ki kondisyon mò yo ye ? c) Ki sa nou kapab fè si yon moun itilize yon tradiksyon Bib ki sanble bouche laverite ?
5 Anvan pou moun sa yo kapab konprann bèl dispozisyon rezirèksyon an, yo bezwen gen yon konpreyansyon ki kòrèk ni sou nanm ni sou sitiyasyon mò yo. Souvan, kèk tèks sèlman sifi pou fè pwen sa yo vin klè pou yon moun ki anvi konnen verite ki nan Bib la (Jenèz 2:7 ; Sòm 146:3, 4 ; Ezekyèl 18:4). Sepandan, gen kèk tradiksyon Bib modèn ak kèk edisyon Bib ki itilize parafraz ki bouche laverite konsènan nanm nan. Pou rezon sa a, li ka nesesè pou nou egzamine ekspresyon yo itilize nan lang orijinal yo te ekri Bib la.
6. Ki jan nou ka ede yon moun konprann ki sa nanm nan ye ?
6 Pou nou rive fè sa, vèsyon Bib Traduction du monde nouveau a sitou gen tout valè l, paske mo ebre nèphèsh la ak mo grèk ki koresponn ak li a psukhê, li tradui yo menm jan tout kote, li mete “ âme ” (nanm). Konsa, li montre li rete konsekan. Nan apendis tradiksyon sa a, yo bay lis anpil tèks biblik kote n ap jwenn mo sa yo. Anpil lòt vèsyon Bib pa tradui mo sa yo menm jan tout kote. Okontrè, menm mo orijinal sa yo, non sèlman yo tradui yo kòm “ nanm ” men tou, yo tradui yo kòm “ kreyati ”, “ pèsonn ” ak “ vi ”. Konsa, yo tradui “ nèphèsh mwen ” kòm “ mwen menm ” e “ nèphèsh ou ” kòm “ ou menm ”. Yon konparezon ant lòt tradiksyon Bib ak Traduction du monde nouveau a ap ede yon etidyan ki sensè rann li kont, mo nan lang orijinal ki bay “ nanm ” lè yo tradui yo gen rapò ni ak moun ni ak bèt. Men, mo sa yo pa janm transmèt ide kòmkwa nanm nan se yon bagay ki envizib, yon bagay abstrè ki kite kò a lè yon moun mouri, e ki kontinye egziste yon lòt kote nan yon eta konsyan.
7. Pandan w ap sèvi ak Bib la, ki jan w ta esplike sitiyasyon moun ki nan cheyòl yo ? moun ki nan adès yo ? moun ki nan jeyèn yo ?
7 Anplis de sa, nan itilizasyon mo “ cheyòl ” pou transkri mo ebre she’ôhl la, mo “ adès ” pou transkri mo grèk haïdês la ak “ jeyèn ” pou transkri mo grèk géénna a, Traduction du monde nouveau a toujou rete konsekan nan fason li itilize mo yo. “ Cheyòl ” se ekivalan mo “ adès ” la (Sòm 16:10 ; Travay 2:27). Bib la montre klè cheyòl ak adès se tonm ki la pou moun ale a e li gen rapò ak lanmò, non pa ak lavi (Sòm 89:48 ; Revelasyon 20:13). Ekriti yo atire atansyon tou sou espwa pou yon moun soti nan tonm nan grasa rezirèksyon (Jòb 14:13 ; Travay 2:31). Yon lòt bò, yon moun ki ale nan jeyèn pa gen espwa lavi pou li alavni, e yo pa janm pale de nanm nan kòmkwa li egziste nan andwa sa a nan yon eta konsyan. — Matye 10:28.
8. Lè yon moun byen konprann sa rezirèksyon an ye, ki jan sa ka enfliyanse atitid li ak aksyon li ?
8 Yonfwa pwen sa yo fin klè pou yon moun, lè sa a nou kapab ede l konprann ki sa rezirèksyon an ka siyifi pou li. Li kapab kòmanse gen rekonesans pou lanmou Jewova genyen lè l pran yon bèl dispozisyon konsa. Lapèn moun genyen lè yo pèdi moun pa yo ka diminye grasa espwa sa a ki bay kè kontan, espwa yo genyen pou yo reyini ansanm avèk yo nan monn nouvo Bondye a. Anplis de sa, li trèzenpòtan tou pou pwen sa yo klè nan lespri yon moun pou l rive konprann siyifikasyon lanmò Kris. Kretyen premye syèk yo te rann yo kont rezirèksyon Jezi Kris la te fondamantal pou lafwa yon kretyen. Li te ouvri chemen rezirèksyon an pou lòt moun. Avèk zèl, yo te preche konsènan rezirèksyon Jezi ansanm ak esperans sa pote. Konsa tou, moun jodi a ki gen rekonesans pou rezirèksyon an anvi pataje verite presye sa a ak lòt moun. — Travay 5:30-32 ; 10:42, 43.
Itilizasyon ‘ kle adès la ’
9. Ki premye itilizasyon Jezi fè ak ‘ kle lanmò a ansanm ak kle adès la ’ ?
9 Tout moun ki pral asosye ak Kris nan Wayòm selès la dwe mouri finalman. Men, yo byen konnen asirans Jezi te bay lè l te di : “ Mwen te mouri, men, gade ! Mwen vivan pou tout tan gen tan, e mwen gen kle lanmò ak kle adès. ” (Revelasyon 1:18). Ki sa li te vle di ? Li te atire atansyon sou sa li menm li te viv. Li menm tou li te mouri. Men, Bondye pa t abandone l nan adès. Sou twazyèm jou a, Jewova li menm te leve l pou lavi antanke espri e li akòde l imòtalite (Travay 2:32, 33 ; 10:40). Anplis de sa, Bondye ba li “ kle lanmò ak kle adès ” pou l itilize yo pou l libere lòt moun ki nan tonm kote moun ale a, e pou l libere yo anba konsekans peche Adan an. Piske Jezi gen kle sa yo, li anmezi pou l leve disip li yo ki fidèl sot nan lanmò. Toudabò, li resisite manm kongregasyon l lan, yo menm ki wen ak lespri. Li fè yo yon kado estrawòdinè, lavi imòtèl nan syèl la, menm jan Papa l te akòde l sa tou. — Women 6:5 ; Filipyen 3:20, 21.
10. Ki lè rezirèksyon kretyen wen fidèl yo fèt ?
10 Ki lè kretyen wen fidèl yo t apral jwenn rezirèksyon selès sa a ? Bib la fè konnen li deja kòmanse. Apot Pòl esplike yo ta gen pou yo leve ‘ diran prezans Kris ’, prezans ki kòmanse nan ane 1914 (1 Korentyen 15:23). Lè wen fidèl yo fini kous yo sou tè a kounye a, diran prezans Kris la, yo pa gen pou yo ret tann nan lanmò jiskaske Seyè yo a retounen. Menm kote yo mouri a, yo leve ann espri, yo “ chanje, nan yon moman, nan yon batje ”. Ala kontan yo kontan, piske bon travay yo te fè “ akonpaye yo ” ! — 1 Korentyen 15:51, 52 ; Revelasyon 14:13.
11. Ki rezirèksyon ki pral fèt pou lèzòm an jeneral, e ki lè l ap kòmanse ?
11 Men, se pa rezirèksyon moun ki eritye Wayòm nan pou lavi nan syèl la ki sèl rezirèksyon k ap genyen. Lefètke yo rele l “ premye rezirèksyon ” nan Revelasyon 20:6, sa lese konprann gen yon lòt ki dwe vin apre. Moun k ap benefisye lòt rezirèksyon sa a ap gen espwa pou yo viv etènèlman nan Paradi sou tè a, yon espwa ki bay kè kontan. Ki lè sa pral fèt ? Liv Revelasyon an montre sa pral fèt apre destriksyon “ tè a ak syèl la ”, sa vle di sistèm de choz mechan ki la kounye a avèk otorite k ap dirije l yo. Lafen an trè pwòch pou vye sistèm de choz la. Apre sa, nan lè Bondye fikse a, rezirèksyon terès la pral kòmanse. — Revelasyon 20:11, 12.
12. Ki moun ki pral pami fidèl k ap leve pou lavi sou tè a, e poukisa se yon esperans ki touchan ?
12 Ki moun k ap pami moun ki pral resisite pou yo viv sou tè a ? Pami moun sa yo ap gen sèvitè fidèl Jewova nan tan lontan yo, gason kou fi, yo menm ki, akoz fwa solid yo te genyen nan rezirèksyon an, “ pa t aksepte liberasyon pou yon ranson kèlkonk ”. Sa vle di, yo pa t fè konpwomi ak entegrite yo anvè Jewova pou yo chape anba yon lanmò vyolan, oubyen pou yo pa mouri anvan lè. Ala kontan n ap kontan pou nou rankontre moun sa yo pèsonèlman e pou n ap koute yo k ap rakonte an detay evènman Bib la sèlman rapòte yon tikal ladan yo ! Pami moun k ap resisite pou lavi sou tè a ap gen Abèl, premye Temwen Jewova fidèl la. Ap gen Enòk ak Noye ki t ap pwoklame mesaj avètisman Bondye a san krent anvan delij la. Ap gen Abraram ak Sara ki te resevwa zanj. Ap gen Moyiz, ki te sèvi antanke entèmedyè pou transmèt Lalwa sou mòn Sinayi a. Ap gen pwofèt yo ki te gen kouraj, tankou Jeremi ki te wè destriksyon Jerizalèm nan ane 607 anvan epòk nou an. Epitou, ap gen Jan Batis ki te tande Bondye li menm k ap idantifye Jezi antanke Pitit Li. Anplis de sa, ap gen anpil gason fidèl ak fi fidèl ki mouri diran dènye jou sistèm de choz mechan sa a. — Ebre 11:4-38 ; Matye 11:11.
13, 14. a) Ki sa k pral rive adès ak mò ki ladan l yo ? b) Kiyès ki pral pami moun ki resisite yo, e poukisa ?
13 Avèk letan, lòt moun ki pa t sèvitè fidèl Bondye pral resisite tou jiskaske pa gen pyès moun ki rete nan tonm ankò. Nou ka wè jis nan ki pwen tonm sa a pral vid san l pa gen mò ladan l ankò nan itilizasyon Jezi pral fè ak ‘ kle adès la ’ an favè limanite. Yo te montre apot Jan sa nan yon vizyon, kote li te wè yo ‘ jete adès nan letan dife a ’. (Revelasyon 20:14.) Ki sa sa vle di ? Sa vle di, adès, tonm ki la pou moun ale a, pral detwi nèt. Li pap egziste ankò, etandone li pap gen mò menm ladan l, paske, nonsèlman Jezi pral resisite tout adoratè fidèl Jewova yo, avèk mizèrikòd li pral fè menm moun ki enjis yo soti ladan l tou. Pawòl Bondye a ban nou asirans “ pral gen yon rezirèksyon ni pou moun ki jis ni pou moun ki enjis ”. — Travay 24:15.
14 Pa gen okenn nan moun enjis yo ki pral leve senpleman pou yo jije l kòm moun ki merite lanmò ankò. Nan anviwònman jis ki pral egziste sou tout tè a anba dominasyon Wayòm Bondye a, moun ki enjis yo pral jwenn èd pou yo konfòme vi yo ann amoni ak chemen Jewova yo. Vizyon an montre “ woulo lavi a ” pral ouvri. Konsa, y ap gen posiblite pou non yo enskri ladan l. Yo pral “ jije yo chak apa selon aksyon yo ” fè apre rezirèksyon yo (Revelasyon 20:12, 13). Kidonk, selon rezilta final la, rezirèksyon yo kapab “ yon rezirèksyon lavi ” e li pap nesesèman “ yon rezirèksyon jijman [sètadi kondanasyon] ”. — Jan 5:28, 29.
15. a) Ki moun ki pap resisite ? b) Ki jan konesans verite sou rezirèksyon an ta dwe enfliyanse lavi nou ?
15 Sepandan, se pa tout moun nèt ki t ap viv e ki mouri ki pral resisite. Gen yon seri peche kèk moun te komèt se peche ki pa gen padon pou yo. Moun sa yo pa nan adès, men yo nan jeyèn kote yo sibi destriksyon etènèl. Pami moun sa yo tou ap gen moun yo egzekite nan “ gwo tribilasyon ” ki toupre kounye a (Matye 12:31, 32 ; 23:33 ; 24:21, 22 ; 25:41, 46 ; 2 Tesalonisyen 1:6-9). Kidonk, byenke Jewova montre li gen yon mizèrikòd estrawòdinè lè l libere mò ki nan adès yo, esperans rezirèksyon an pa otorize nou pou nou montre nou ensousyan nan fason n ap viv kounye a. Pap gen rezirèksyon pou moun ki fè espre yo rebele kont souvrènte Jewova. Konesans sa a ta dwe pouse nou montre yon pwofon rekonesans pou bonte Bondye moun pa merite a lè nou viv ann akò ak volonte l.
Nou fòtifye grasa esperans rezirèksyon an
16. Nan ki sans nou kapab jwenn anpil fòs nan esperans rezirèksyon an ?
16 Moun pami nou ki fè esperans rezirèksyon an tounen esperans pa yo ap jwenn anpil fòs ladan l. Kounye a, si nou fin granmoun, nou konnen nou pa ka retade lanmò nètale, kèlkeswa tretman medikal nou suiv (Eklezyas 8:8). Si nou sèvi Jewova fidèlman nan òganizasyon l lan, nou kapab anvizaje lavni avèk yon konfyans total. Nou konnen grasa rezirèksyon an, nou pral pwofite lavi a ankò, nan moman Bondye fikse a. E ala yon bèl vi sa pral ye ! Se “ lavi toutbon an ”, tankou apot Pòl te rele l. — 1 Timote 6:19 ; Ebre 6:10-12.
17. Ki sa k kapab ede nou rete entèg devan Jewova ?
17 Lè nou konnen ap gen yon rezirèksyon e nou konnen Moun ki alabaz dispozisyon sa a, sa pèmèt nou rete solid nan lafwa. Sa fòtifye nou pou nou kenbe fidelite nou devan Bondye, menmsi nou anfas pèsekitè vyolan ki menase pou touye nou. Satan gen lontan depi l ap sèvi ak krent moun genyen pou yo pa mouri anvan lè, kòm mwayen pou l kenbe yo nan esklavaj. Men, Jezi pa t gen krent konsa. Li te pwouve li fidèl devan Jewova jiskaske li mouri. Grasa sakrifis Jezi a, ranson an, Jezi founi mwayen pou libere lòt moun anba krent sa a. — Ebre 2:14, 15.
18. Ki sa ki ede sèvitè Jewova yo bati yon bèl repitasyon antanke moun ki kenbe entegrite yo ?
18 Lafwa sèvitè Jewova yo nan sakrifis Kris la ansanm ak lafwa yo nan rezirèksyon an fè yo bati yon bèl repitasyon antanke moun ki kenbe entegrite yo. Lè yo anba presyon, yo pwouve ‘ yo pa renmen nanm yo ’ plis pase yo renmen Jewova (Revelasyon 12:11). Avèk sajès, yo pa abandone prensip kretyen yo pou yo sove lavi yo gen kounye a (Lik 9:24, 25). Yo konnen menmsi yo pèdi lavi yo kounye a poutèt y ap soutni souvrènte Jewova fidèlman, l ap rekonpanse yo pa mwayen rezirèksyon. Èske w gen jan de fwa sa a ? W ap genyen l si w vrèman renmen Jewova e si w pran oserye sa esperans rezirèksyon an siyifi toutbonvre.
Revizyon
• Poukisa yon moun bezwen konprann sa nanm nan ye e nan ki sitiyasyon mò yo ye anvan pou l rive konprann rezirèksyon an ?
• Ki moun ki pral resisite, e ki efè konesans sa a ta dwe genyen sou nou ?
• Ki fason esperans rezirèksyon an fòtifye nou ?
[Foto nan paj 84, 85]
Jewova pwomèt ap gen yon rezirèksyon ni pou moun ki jis ni pou moun ki enjis.