Se ‘ Bondye ki fè plant lan pouse ’ !

“ Moun ki plante a pa anyen, moun ki wouze a pa anyen tou. Se Bondye [...] ki fè plant lan pouse. ” — 1 KOR. 3:7.

 1. Nan ki sans nou se “ konpayon travay Bondye ” ?

“ KONPAYON travay Bondye. ” ​(NW) Se konsa apot Pòl dekri privilèj nou tout ka genyen an. (Li 1 Korentyen 3:5-9.) La a, Pòl ap pale de travay fè disip la. Li konpare l ak lè yon moun ap plante semans e lè l ap wouze l. Pou nou reyisi nan travay enpòtan sa a, nou bezwen èd Jewova. Pòl fè nou sonje se ‘ Bondye ki fè plant lan pouse ’.

 2. Lefètke nou konnen se ‘ Bondye k ap fè plant lan pouse ’, ki jan sa ede nou gen yon bon pwennvi sou ministè nou ?

² Sa se yon bagay ki fè nou santi nou piti e ki ede nou gen yon bon pwennvi sou ministè nou. Nou ka patisipe nan travay predikasyon an ak nan travay ansèyman an avèk dilijans, men finalman, kèlkeswa bon rezilta nou ta ka jwenn, tout glwa se pou Jewova. Poukisa ? Paske kèlkeswa jan nou ta fè efò pou n eseye konprann sa, pa gen youn nan nou ki anmezi pou l byen konprann ki jan yon moun grandi pou l vin yon disip, ni pa gen nou youn ki ka kontwole sa. Wa Salomon te pale de verite sa a lè l te ekri pawòl sa yo : “ Ou pa ka konprann travay Bondye, li menm ki fè tout bagay. ” — Ekl. 11:5.

 3. Nan ki sans plante semans nan tè sanble ak travay fè disip la ?

³ Lefètke nou pa ka konprann ki jan yon moun grandi pou l vin yon disip, èske sa fè nou pa jwenn satisfaksyon nan travay n ap fè a ? Non. Okontrè, sa fè travay la vin enteresan anpil. Men sa wa Salomon te di : “ Nan maten, plante jaden ou. Aswè rive, plante jaden ou ankò. Ou pa janm konnen kilès nan de yo ap bay plis rannman. Ou pa janm konnen si tou de p’ap pran, si tou de p’ap bay menm rannman. ” ​(Ekl. 11:6). Anfèt, lè nou plante semans nan yon tè, nou pa menm konnen si l ap boujonnen ni ki kote l ap boujonnen. Gen anpil bagay nou pa ka kontwole. Nou ka di menm bagay la pou travay fè disip la. Jezi te atire atansyon sou pwen sa a nan de egzanp li te bay nou jwenn nan 4^yèm chapit Evanjil Mak la. Annou wè ki sa nou kapab aprann nan de egzanp sa yo.

Divès kalite tè

4, 5. Rezime egzanp nonm ki soti pou l al simen Jezi te bay la.

⁴ Nan Mak 4:1-9, Jezi pale de yon nonm ki soti pou l al simen grenn oswa semans, e semans lan al tonbe nan divès kalite tè. Men sa l di : “ Koute ! Yon nonm soti pou li al simen grenn nan jaden li. Pandan li t’ap simen grenn yo, kèk grenn tonbe bò chemen an. Zwazo vini, yo manje yo. Yon pati tonbe nan mitan wòch, kote ki pa t’ gen anpil tè. Grenn sa yo leve byen vit, paske tè a pa t’ fon. Men, lè solèy la chofe, li boule ti plant yo. Yo cheche paske rasin yo pa t’ fon. Yon lòt pati tonbe nan mitan pye pikan. Pikan yo grandi, yo toufe bon ti plant yo, kifè yo pa t’ ka donnen. Men, yon lòt pati ankò tonbe nan bon tè. Plant yo leve, yo grandi, yo donnen. Gen ladan yo ki bay trant grenn, lòt bay swasant, lòt ankò bay san (100). ”

⁵ Nan tan biblik yo, lè yo t ap simen semans, an jeneral yo te konn voye semans lan yon fason pou l gaye nan tè a. Moun k ap simen an konn pote semans lan nan rad li oswa nan yon sak oubyen yon veso epi li fè yon gwo mouvman ak men li lè l ap voye semans lan. Se sa k fè nan egzanp sa a, se pa nonm k ap simen an ki chèche fè semans lan tonbe nan divès kalite tè yo, men piske l ap voye semans lan, semans lan al tonbe divès kote.

 6. Ki esplikasyon Jezi te bay pou egzanp nonm k ap simen an ?

⁶ Nou pa oblije chèche devine sans egzanp sa a, paske Jezi te esplike l nan Mak 4:14-20. Li di : “ Nonm k’ap simen an, se pawòl Bondye a l’ap simen. Gen moun, yo sanble ak tè bò chemen kote pawòl la tonbe a. Kou yo tande l’, Satan vini, li rache pawòl ki te simen nan kè yo a. Konsa tou, gen lòt ki resevwa grenn yo tankou tè ki gen anpil wòch la. Lè yo fèk tande pawòl la, yo resevwa l’ ak kè kontan. Men, yo pa kite l’ pouse rasin nan kè yo. Yo pa kenbe l’ pou lontan. Lè yo tonbe anba tèt chaje ak pèsekisyon akòz pawòl Bondye a, lamenm yo jwenn okazyon pou yo tonbe nan peche. Gen lòt moun ankò, yo resevwa grenn yo tankou nan mitan pye pikan : yo tande pawòl la, men, traka lavi, anvi gen lajan ak tout lòt anvi yo antre nan kè yo, toufe pawòl la. Kifè yo pa bay anyen menm. Pou fini, gen moun ki tankou bon tè a ; yo tande pawòl la, yo resevwa l’ epi yo donnen. Gen ladan yo ki bay trant pou yonn, lòt bay swasant pou yonn, lòt ankò bay san (100) pou yonn. ”

 7. Ki sa semans lan reprezante e ki sa divès kalite tè yo reprezante ?

⁷ N ap remake Jezi pa di nonm k ap simen an te itilize plizyè kalite semans. Okontrè, li pale de yon sèl kalite semans ki te tonbe nan divès kalite tè, e chak kalite tè sa yo bay yon rezilta diferan. Premye kalite tè a se yon tè ki di oswa yon tè yo danmen. Dezyèm nan se yon tè ki pa fon, twazyèm nan se yon tè ki chaje ak pye pikan, e katriyèm nan se yon tè ki bèl, ki bon e ki donnen byen (Lik 8:8). Ki sa semans lan ye ? Se mesaj Wayòm nan nou jwenn nan Pawòl Bondye a (Mat. 13:19). Ki sa divès kalite tè yo reprezante ? Yo reprezante moun ki pa gen menm kondisyon kè. — Li Lik 8:12, 15.

 8. a) Kiyès nonm k ap simen an reprezante ? b) Ki sa k fè moun yo pa reyaji menm jan devan travay predikasyon Wayòm nan ?

⁸ Kiyès nonm k ap simen an reprezante ? Li reprezante konpayon travay Bondye yo, yo menm k ap preche bon nouvèl Wayòm nan. Menm jan ak Pòl ansanm ak Apolòs, yo plante e yo wouze. Sepandan, menmsi yo travay di pou yo fè sa, rezilta yo pa menm. Poukisa ? Paske kondisyon kè moun k ap koute mesaj la pa menm. Nan egzanp lan, nonm k ap simen an pa gen kontwòl sou rezilta li jwenn. Se pa ti rekonfòtan pwen sa a rekonfòtan, sitou pou frè ak sè fidèl ki gen anpil ane depi y ap preche, pafwa menm plizyè dizèn ane, e ki sanble pa jwenn twò bon reziltaa ! Sa k fè li rekonfòtan pou yo konsa ?

 9. Sou ki verite ki rekonfòtan ni Pòl ni Jezi te mete aksan ?

⁹ Se pa rezilta moun k ap simen an jwenn k ap montre si li fidèl. Pòl te touche pwen sa a lè l te di : “ Bondye va ba yo sa yo merite dapre travay yo fè. ” ​(1 Kor. 3:8). Se travay yon moun fè k ap fè l jwenn rekonpans lan, se pa rezilta travay sa a. Jezi te mete aksan sou pwen sa a tou lè disip li yo te retounen sot fè yon toune predikasyon. Disip yo te kontan anpil paske demon yo te soumèt devan yo lè yo te sèvi ak non Jezi. Menmsi sa te dwe fè yo kontan anpil, Jezi te di yo : “ Nou pa bezwen kontan dapre move lespri yo soumèt devan nou. Fè kè n’ kontan pito dapre non nou ekri nan syèl la. ” ​(Lik 10:17-20). Menm lè yon moun k ap simen pa jwenn anpil rezilta pou travay li fè, sa pa vle di li manke dilijan oswa li manke fidèl an konparezon ak yon lòt moun. An jeneral, rezilta yo depann de kondisyon kè moun k ap koute yo. Men, finalman, se Bondye k ap fè semans lan pouse.

Responsablite moun ki tande Pawòl la genyen

10. Ki sa k detèmine si yon moun k ap koute pawòl la sanble ak bon tè a oswa si l pa sanble ak li ?

¹⁰ Ki sa nou kapab di konsènan moun k ap koute pawòl la ? Èske Bondye te deside davans ki jan y ap reyaji ? Non. Se yo menm k ap chwazi si yo vle sanble ak bon tè a oswa si yo pa vle sanble ak li. Anfèt, kondisyon kè yon moun kapab chanje swa pou byen swa pou mal (Wom. 6:17). Nan egzanp Jezi te bay la, li te di gen moun “ kou yo tande ” pawòl la, Satan vini, li rache l. Men, sa pa oblije rive. Nan Jak 4:7, yo ankouraje kretyen yo pou yo “ opoze ak Dyab la ” e l ap kouri pou yo. Jezi te pale de lòt moun ki te aksepte pawòl la okòmansman avèk jwa, men ki trebiche akoz “ yo pa kite l’ pouse rasin nan kè yo ”. Sepandan, sèvitè Bondye yo jwenn ankourajman pou yo ‘ pouse rasin, pou yo chita byen fèm nan renmen ’, yon fason pou yo ka konprann ‘ jan renmen Kris la laj, jan li long, jan li fon, jan li wo, pou yo rive konnen kalite renmen Kris la gen pou yo, atout pesonn p’ap janm ka rive konnen l’ nèt ’. — Efe. 3:17-19 ; Kol. 2:6, 7.

11. Ki jan yon moun kapab anpeche traka lavi a ak lanmou pou lajan toufe pawòl la ?

¹¹ Jezi te di gen lòt moun ki koute pawòl la, men ki kite “ traka lavi, anvi gen lajan ” antre nan kè yo e konsa bagay sa yo toufe pawòl la (1 Tim. 6:9, 10). Ki jan yo kapab anpeche sa rive yo ? Men sa Pòl reponn : “ Pa kite renmen lajan pran nanm nou. Se pou nou kontan ak sa nou genyen. Paske Bondye te di : Mwen p’ap janm vire do ba ou, mwen p’ap janm lage ou. ” — Ebre 13:5.

12. Sa k fè moun ki reprezante bon tè pa pote menm kantite fwi ?

¹² Finalman, Jezi di moun ki se bon tè kote semans lan tonbe a “ bay trant grenn, lòt bay swasant, lòt ankò bay san (100) ”. Menmsi nan moun ki koute pawòl la, genyen ki gen bon kondisyon kè e ki pote fwi, sa yo kapab fè nan preche bon nouvèl la varye selon sitiyasyon yo. Pa egzanp, gen moun ki ka limite nan sa yo ka fè nan travay preche bon nouvèl la akoz yo aje oubyen yo gen yon maladi k ap febli yo. (Konpare ak Mak 12:43, 44.) Nan ka sa a tou, moun k ap plante a prèske pa gen kontwòl sou sa oswa li pa gen kontwòl sou sa menm, men li kontan lè l wè Jewova fè semans lan grandi. — Li Sòm 126:5, 6.

Nonm ki simen e ki dòmi an

13, 14. a) Rezime egzanp mesye k ap simen semans lan. b) Kiyès nonm k ap simen an reprezante e ki sa semans lan reprezante ?

¹³ Nan Mak 4:26-29, nou jwenn yon lòt egzanp konsènan yon nonm k ap simen : “ Men ki jan sa ye nan Peyi kote Bondye Wa a. Se tankou yon nonm ki simen grenn nan jaden li. Apre sa, lannwit li dòmi, lajounen li leve fè zafè li. San l’ pa konnen ki jan pa ki jan, grenn yo pouse, yo grandi. Tou sa, paske se tè a menm ki fè plant yo grandi pou yo donnen. Pou kòmanse yo pouse fèy, answit yo pouse flèch, apre sa grenn plen flèch la. Lè grenn yo mi se lè sa a nonm lan mete manchèt ladan l’, paske sezon rekòt la rive. ”

¹⁴ Kiyès nonm ki simen an ye ? Gen kèk moun nan lakretyente ki panse se Jezi. Men, èske Jezi te ka ap dòmi pou l pa menm konnen ki jan semans lan grandi ? Pa gen dout nan sa, Jezi konnen ki jan semans lan grandi. Donk, menm jan ak nonm k ap simen nou te site anvan an, nonm sa a reprezante chak pwoklamatè Wayòm nan, yo menm k ap simen semans Wayòm nan grasa aktivite predikasyon y ap fè avèk zèl la. Semans ki tonbe nan tè a se pawòl y ap preche ab.

15, 16. Nan egzanp nonm k ap simen an, ki verite Jezi te bay anrapò ak plant k ap grandi e anrapò ak moun k ap pwogrese nan domèn espirityèl ?

¹⁵ Jezi te esplike nonm k ap simen an ‘ dòmi lannwit, lajounen li leve fè zafè li ’. Sa pa vle di li neglijan. An jeneral, se konsa lavi pifò moun ye. Mo yo itilize nan vèsè sa a montre ki jan, pandan yon peryòd tan, yon moun travay lajounen epi li dòmi lannuit. Jezi te esplike sa k pase pandan tan sa a. Li di : “ Grenn yo pouse, yo grandi. ” Apre sa, li di : “ San l’ pa konnen ki jan pa ki jan. ” Donk, yo montre sa k fè plant yo grandi se tè a menm.

¹⁶ Ki sa Jezi te vle montre la a ? Remake li mete aksan sou grandi semans lan te grandi e sou fason sa te fèt tikras pa tikras. Li te di se “ tè a menm ki fè plant yo grandi pou yo donnen. Pou kòmanse yo pouse fèy, answit yo pouse flèch, apre sa grenn plen flèch la ”. (Mak 4:28.) Sa vle di li grandi tikras pa tikras e li pase plizyè etap. Yo pa ka fòse l ni yo pa ka fè l ale pi vit. Se menm bagay la tou lè moun ap pwogrese nan domèn espirityèl. Sa fèt etap pa etap, ofiramezi Jewova pèmèt laverite grandi nan kè moun ki nan dispozisyon kòrèk yo. — Tra. 13:48 ; Ebre 6:1.

17. Kiyès ki kontan lè semans verite a pote fwi nan yon moun ?

¹⁷ Ki jan nonm k ap simen an patisipe nan rekòt la “ lè grenn yo mi ” ? Lè Jewova fè verite Wayòm nan grandi nan kè moun ki vin nouvo disip yo, rive yon lè, lanmou yo gen pou Bondye vin pouse yo fè bonjan pwogrè, yo vwe lavi yo ba li e yo batize pou yo montre sa. Frè ki kontinye chèche gen matirite yo vin anmezi pou yo gen plis responsablite nan kongregasyon yo. Ni pwoklamatè ki te simen semans lan, ni lòt pwoklamatè ki pa t simen semans ki bay disip sa a rekòlte fwi Wayòm nan. (Li Jan 4:36-38.) Konsa, “ moun k’ap simen an kontan ; moun k’ap ranmase a kontan tou ansanm avèk li ”.

Leson pou nou jodi a

18, 19. a) Ki ankourajman ou jwenn pèsonèlman apre nou fin egzamine egzanp Jezi te bay yo ? b) Ki sa nou pral egzamine nan atik ki vin apre a ?

¹⁸ Ki sa nou aprann apre nou fin egzamine de egzanp sa yo nou jwenn nan Mak chapit 4 la ? Nou kapab wè byen klè nou gen yon travay pou nou fè : se simen. Nou pa dwe janm kite okenn rezon, ni pwoblèm, ni difikilte nou kapab jwenn fè nou sispann fè travay sa a (Ekl. 11:4). Anmenmtan, nou konnen nou gen yon privilèj san parèy, privilèj pou nou konpayon travay Bondye. Se Jewova ki fè moun yo grandi nan domèn espirityèl, se konsa li beni efò nou fè ak efò moun ki resevwa mesaj la fè. Nou konprann nou pa kapab fòse okenn moun grandi nan domèn espirityèl. Nou konprann tou, nou pa bezwen dekouraje si yon moun pa pwogrese rapid oswa li manke fè pwogrè. Sa vrèman rekonfòtan pou nou konnen Jewova konsidere nou reyisi nan sèvis li a si nou fidèl ak li e nou fidèl nan privilèj li ban nou pou nou preche bon nouvèl konsènan wayòm nan, kòm temwayaj pou tout nasyon. — Mat. 24:14.

¹⁹ Ki lòt bagay Jezi te anseye nou konsènan fason nouvo disip yo pwogrese e konsènan travay Wayòm nan ? N ap jwenn repons kesyon sa a nan lòt egzanp Jezi te bay nan Evanjil yo. Nou pral egzamine kèk ladan yo nan atik ki vin apre a.

Nou pa konnen kilès k ap bay rannman !

“ Nan maten, plante jaden ou. Aswè rive, plante jaden ou ankò. Ou pa janm konnen kilès nan de yo ap bay plis rannman. ” — EKL. 11:6.

 1. Poukisa lè n ap gade fason yon plant pouse, sa ka fè nou sezi e anmenmtan sa ka fè nou santi nou vrèman piti ?

YON kiltivatè bezwen pasyan (Jak 5:7). Lè l fin simen yon semans, li bezwen tann li boujonnen e li bezwen tann li grandi. Tikras pa tikras, lè kondisyon yo pèmèt sa, boujon yo kòmanse sòt nan tè a. Apre sa, semans lan devlope pou l tounen yon plant k ap pwodui fwi. Finalman, kiltivatè a gen yon jaden ki pare pou l rekòlte l. Èske se pa estrawòdinè pou nou wè mirak sa a ! Nou santi nou vrèman piti tou lè nou konprann kiyès ki fè sa posib. Nou ka fè tout sa ki posib pou plant lan devlope, nou kapab wouze l, men, se sèl Bondye ki ka fè l pouse. — Konpare ak 1 Korentyen 3:6.

 2. Nan egzanp nou te egzamine nan atik anvan an, ki sa Jezi te anseye konsènan moun k ap pwogrese nan domèn espirityèl ?

² Jan nou te di sa nan atik ki vin anvan an, Jezi te konpare travay predikasyon Wayòm nan ak travay yon nonm k ap simen semans. Nan egzanp konsènan divès kalite tè a, li te montre menmsi nonm k ap simen an simen bon semans, se kondisyon kè moun k ap koute a k ap detèmine si semans lan ap pouse pou l bay fwi oswa si li pap pouse (Mak 4:3-9). Nan egzanp nonm ki simen e ki dòmi an, Jezi te montre nonm nan pa byen konprann fason plant lan grandi, paske se Bondye ki fè l grandi, se pa efò l fè yo (Mak 4:26-29). Kounye a, annou egzamine twa lòt egzanp Jezi te bay : Egzanp grenn moutad la, egzanp ledven an ak egzanp privye a, yon filè pou fè lapècha.

Egzanp grenn moutad la

3, 4. Anrapò ak mesaj Wayòm nan, sou ki aspè egzanp grenn moutad la mete aksan ?

³ Nou jwenn egzanp grenn moutad la nan Mak chapit 4 la tou. Egzanp sa a mete aksan sou de pwen : premyèman, fason mesaj Wayòm nan touche anpil moun, dezyèmman, pwoteksyon moun ki aksepte mesaj la jwenn. Men sa Jezi te di : “ Kisa m’ ta di Peyi kote Bondye Wa a [“ wayòm Bondye a ”, NW] sanble ankò ? Ki parabòl mwen ta ban nou pou fè nou konprann sa li ye ? Enben, li menm jan ak yon ti grenn moutad. Lè ou simen l’, se yon ti grenn tou piti. Se li ki pi piti nan tout grenn ki sou latè. Men, lè ou fin simen l’, li pran grandi : li depase tout plant menm kalite avè l’, li pouse gwo branch. Konsa, zwazo nan syèl la ka fè nich nan lonbraj yo. ” — Mak 4:30-32.

⁴ La a, yo dekri fason “ wayòm Bondye a ” grandi. Nou kapab wè sa lè nou konsidere nan ki pwen yo te simaye mesaj Wayòm nan e lè nou konsidere jan kongregasyon kretyen an ki te pran nesans nan Pannkòt ane 33 te vin gen anpil moun ladan l. Yon grenn moutad se yon ti semans ki reprezante yon bagay ki toupiti. (Konpare ak Lik 17:6.) Sepandan, lè yon pye moutad fin grandi, li ka mezire 3 a 5 m wotè e branch li yo vin solid. Nan yon sans, se kòmsi l te tounen yon pyebwa. — Mat. 13:31, 32.

 5. Ki akwasman kongregasyon kretyen premye syèk la te jwenn ?

⁵ Nan ane 33 epòk nou an, lè kongregasyon kretyen an te fèk fòme, li te gen anviwon 120 disip yo te wenn ak lespri sen. Nan yon ti tan, ti kongregasyon sa a te vin gen plizyè milye kwayan ladan l. (Li Travay 2:41 ; 4:4 ; 5:28 ; 6:7 ; 12:24 ; 19:20.) Nan trant an, kantite moun ki t ap travay nan rekòt la te tèlman ogmante, apot Pòl te kapab di frè nan kongregasyon Kolòs yo yo te deja anonse bon nouvèl la “ bay tout moun sou latè ”. (Kol. 1:23.) Se yon akwasman ki te estrawòdinè !

6, 7. a) Ki akwasman ki genyen depi 1914 ? b) Ki lòt akwasman ki pral genyen ?

⁶ Depi lè Wayòm Bondye a fin etabli nan syèl la an 1914, branch “ pye ” moutad la etann yo pi lwen pase sa nou te ka espere. Pèp Bondye a wè akonplisman literal pwofesi Izayi te ekri a, kote l te di : “ Fanmi ki pi piti nan mitan nou an pral gen mil (1.000) moun. Fanmi ki pa vo anyen an pral tounen yon gwo nasyon. ” ​(Iza. 60:22). Ti gwoup kretyen wen ki t ap fè travay Wayòm nan nan kòmansman 20^yèm syèk la pa t ap janm ka imajine nan ane 2008 t ap gen anviwon sèt milyon Temwen k ap patisipe nan travay sa a nan plis pase 230 peyi. Vrèmanvre, akwasman estrawòdinè sa a sanble ak grenn moutad nan egzanp Jezi a.

⁷ Men, èske akwasman an rete la ? Non. Finalman, moun k ap viv anba Wayòm Bondye a pral ranpli tout tè a nèt. Tout moun ki te opoze ak Wayòm nan pral detwi. Se pa lèzòm ki pral fè sa, men se Jewova, Souvren Seyè a, ki pral entèvni nan sa k ap fèt sou tè a. (Li Dànyèl 2:34, 35.) Lè sa a, gen yon lòt pwofesi Izayi te bay ki pral akonpli. Men sa l te di : “ Kè tout moun nan peyi a pral plen konesans Bondye, menm jan fon lanmè a plen dlo. ” — Iza. 11:9.

 8. a) Kiyès zwazo nan egzanp grenn moutad Jezi te bay la reprezante ? b) Anba ki sa nou jwenn pwoteksyon depi kounye a ?

⁸ Jezi te di zwazo nan syèl la ap jwenn kote pou yo rete anba lonbray Wayòm nan. Zwazo sa yo pa reprezante ènmi Wayòm nan k ap eseye manje bon semans yo jan zwazo ki nan egzanp nonm ki simen semans k al tonbe nan divès kalite tè a fè sa (Mak 4:4). Okontrè, nan egzanp grenn moutad la, yo reprezante moun ki gen kè dwat k ap chèche pwoteksyon nan kongregasyon kretyen an. Depi kounye a, moun sa yo jwenn pwoteksyon anba yon seri abitid degradan ki anpeche moun gen bon relasyon ak Bondye e anba yon seri bagay ki pa pwòp moun yo ap pratike nan monn nan. (Konpare ak Izayi 32:1, 2.) Menm jan an tou, Jewova te konpare Wayòm Mesi a ak yon pyebwa, e men sa l te di nan yon pwofesi : “ M’ap plante l’ [...] sou tèt mòn ki pi wo nan peyi Izrayèl la. L’ap fè branch, l’ap donnen. L’ap vin fè yon bèl bèl pye sèd. Tout kalite zwezo pral rete ladan l’. Y’ ap pare solèy nan lonbraj branch li yo. ” — Eze. 17:22, 23.

Egzanp ledven an

9, 10. a) Sou ki pwen Jezi te mete aksan nan egzanp ledven an ? b) Nan Bib la, souvan, ki sa ledven reprezante, e ki kesyon nou pral egzamine anrapò ak mo ledven an Jezi te itilize a ?

⁹ Moun pa toujou wè ki jan akwasman fèt. Nan yon lòt egzanp Jezi te bay, li mete aksan sou pwen sa a. Men sa l te di : “ Wayòm syèl la sanble ak ledven yon dam pran epi li mete ak twa mezi farin, ki fè tout pat la leve. ” ​(Mat. 13:33, Bib Kreyòl La). Ki sa ledven sa a reprezante, e ki rapò l genyen ak Wayòm nan k ap grandi ?

¹⁰ Nan Bib la, souvan yo itilize ledven pou reprezante peche. Apot Pòl te pale de ledven nan sans sa a lè l te pale konsènan move enfliyans yon moun k ap fè peche te gen nan kongregasyon Korent lan lontan (1 Kor. 5:6-8). Èske la a Jezi te sèvi ak mo ledven an pou reprezante yon bagay negatif ?

11. Ki jan yo te konn sèvi ak ledven nan Izrayèl tan lontan an ?

¹¹ Anvan nou reponn kesyon sa a, nou bezwen reflechi sou twa aspè fondamantal. Premyèman, se vre, Jewova pa t pèmèt Juif yo sèvi ak ledven nan peryòd fèt Pak la, men, nan lòt moman, li te aksepte sakrifis ki gen ledven ladan yo. Yo te sèvi ak ledven nan sakrifis kominyon yo te konn fè kòm remèsiman. Moun ki t ap prezante sakrifis sa yo te fè sa ak tout kè l yon fason pou l te montre rekonesans li genyen pou Jewova pou tout benediksyon li te resevwa nan men l. Se yon repa ki te dwe pote kè kontan pou moun ki patisipe ladan l. — Lev. 7:11-15.

12. Ki sa nou aprann nan fason Bib la itilize yon seri mo kòm senbòl ?

¹² Dezyèmman, byenke nan yon kontèks yon mo gendwa gen yon sans negatif nan Ekriti yo, men, nan yon lòt kontèks, yo kapab itilize menm mo sa a pou reprezante yon bagay pozitif. Pa egzanp, nan 1 Pyè 5:8, yo konpare Satan ak yon lyon pou montre jan li mechan e jan l fewòs. Sepandan, nan Revelasyon 5:5, yo konpare Jezi ak yon lyon, “ lyon ki soti nan fanmi Jida a ”. Nan ka sa a, yo itilize lyon an kòm senbòl kouraj ak jistis.

13. Ki sa egzanp ledven Jezi te bay la montre sou fason yon moun pwogrese nan domèn espirityèl ?

¹³ Twazyèmman, nan egzanp Jezi te bay la, li pa t di ledven an gate tout pat la pou l fè l vin yon bagay moun pa ka itilize. Sèlman li te pale konsènan fason moun yo te konn fè pen an jeneral. Fi a te chwazi mete ledven an nan pat la, epi sa te bay bon rezilta. Ledven an te kache nan farin nan, sa vle di fi a pa t wè travay ledven an t ap fè a. Sa fè nou sonje nonm ki simen semans lan e k al dòmi lè lannuit rive. Jezi te di “ san [nonm nan] pa konnen ki jan pa ki jan, grenn yo pouse, yo grandi ”. (Mak 4:27.) Vrèman, se yon fason senp pou demontre lè moun yo ap fè pwogrè espirityèl nou ka pa menm wè sa ! Okòmansman, nou ka pa t wè l ap pwogrese, men finalman, rezilta yo vin parèt aklè.

14. Lefètke ledven an fè tout farin nan leve, ki aspè nan predikasyon Wayòm nan sa reprezante ?

¹⁴ Moun pa wè lè pwogrè ap fèt nan domèn espirityèl e pwogrè sa a fèt toupatou sou tè a. Sa se yon lòt aspè egzanp ledven an mete aksan sou li. Ledven an fè tout farin nan, sètadi tout “ twa mezi farin ” nan, leve (Lik 13:21). Menm jan ak ledven an, travay predikasyon Wayòm nan ki fè gen akwasman nan domèn espirityèl la tèlman etann li, kounye a y ap anonse Wayòm nan “ jouk nan dènye bout latè ”. (Tra. 1:8 ; Mat. 24:14.) Ala yon gwo privilèj nou genyen pou nou patisipe nan bèl travay Wayòm nan, yon travay ki gaye sou tout tè a !

Privye a

15, 16. a) Fè rezime egzanp privye a. b) Ki sa privye a reprezante, e sou ki aspè li atire atansyon ki gen rapò ak Wayòm nan k ap grandi ?

¹⁵ Yon bagay ki pi enpòtan pase kantite moun ki di yo se disip Jezi Kris, se kalite moun ki vin disip yo genyen. Jezi atire atansyon sou aspè sa a anrapò ak Wayòm nan k ap grandi lè l te bay yon lòt egzanp, egzanp yon privye. Men sa l te di : “ Peyi Wa ki nan syèl la, se tankou yon privye yo voye nan lanmè. Li pran tout kalite pwason. ” — Mat. 13:47.

¹⁶ Privye a reprezante travay predikasyon Wayòm nan e li rasanble tout kalite pwason. Men sa Jezi te di ankò : “ Lè li fin plen, pechè pwason yo rale l’ sou bò rivaj la. Yo chita, yo triye pwason yo : yo mete bon pwason yo nan panyen, yo jete sa ki pa bon yo nan lanmè ankò. Se konsa sa pral rive tou lè tout bagay va fini. Zanj Bondye yo va vini, y’ap mete mechan yo yon bò, moun ki fè sa ki byen yo yon bò. Y’a jete mechan yo nan gwo founo k’ap boule a. Se la va gen rèl, se la moun va manje dan yo. ” — Mat. 13:48-50.

17. Separasyon yo pale de li nan egzanp privye a, nan ki epòk l ap fèt ?

¹⁷ Èske separasyon sa a gen rapò ak jijman mouton ak kabrit Jezi te di ki gen pou fèt lè l vin nan glwa l la (Mat. 25:31-33) ? Non. Jijman sa a pral fèt lè Jezi vini, pandan gwo tribilasyon an. Yon lòt bò, separasyon sa a yo pale de li nan egzanp privye a ap rive nan epòk kote “ tout bagay va fini nèt la ”b. Se nan epòk sa a n ap viv kounye a. Se yon epòk k ap mennen nan gwo tribilasyon an. Donk, ki jan travay separasyon sa a ap fèt kounye a ?

18, 19. a) Ki jan yon travay separasyon ap fèt kounye a ? b) Ki etap moun ki gen kè sensè yo dwe franchi ? (Gade nòt anba paj la ki nan paj 21.)

¹⁸ Jewova atire plizyè milyon moun, li fè yo soti nan lanmè ki reprezante limanite a pou yo vin nan kongregasyon an nan epòk nou an. Genyen ki asiste Memoryal, gen lòt ki vin nan reyinyon nou yo e gen lòt tou ki aksepte pou nou etidye Labib ak yo. Men, èske yo tout demontre yo se vrè kretyen ? Se vre, nou “ rale [yo] sou bò rivaj la ”, men Jezi di se sèlman “ bon pwason yo ” yo mete nan panyen oswa nan veso. Veso sa yo reprezante kongregasyon yo. Yo jete pwason ki pa bon yo, e finalman y ap lage yo nan yon founèz dife ki reprezante destriksyon k ap vini an.

¹⁹ Gen anpil moun ki te konn etidye ak Temwen Jewova yo lontan ki kanpe etid la. Yo sanble ak pwason ki pa bon yo. Gen kèk moun tou ki fèt nan yon fanmi kote paran yo se kretyen, men ki pa janm vle vin disip Jezi toutbonvre. Yo pa dispoze pran desizyon pou yo sèvi Jewova. Gen nan yo ki te kòmanse sèvi l pandan yon ti tan, men yo pa kontinye fè sac. (Eze. 33:32, 33.) Sepandan, li vrèman nesesè pou tout moun ki gen kè sensè kite yo rasanble yo nan veso yo, sètadi nan kongregasyon yo, anvan dènye jou jijman an rive e pou yo rete kote yo an sekirite a.

20, 21. a) Ki sa nou aprann nan egzamen nou te fè sou egzanp Jezi te bay konsènan akwasman ? b) Ki sa w detèmine pou w fè ?

²⁰ Kounye a, ki sa nou sot aprann nan egzamen tou kout nou te fè sou egzanp Jezi te bay konsènan akwasman an ? Premyèman, menm jan ak yon grenn moutad k ap grandi, gen yon kokenn akwasman nan kantite moun ki tande mesaj Wayòm nan. Pa gen anyen ki ka anpeche travay Jewova a kontinye etann li sou tè a (Iza. 54:17) ! Anplis, moun ki chèche “ pare solèy nan lonbraj branch [pye bwa a] ” jwenn pwoteksyon nan domèn espirityèl. Dezyèmman, se Bondye ki fè plant lan grandi. Menm jan ledven an ki te kache te gaye nan tout pat la, se konsa tou, moun pa toujou wè pwogrè ki fèt nan domèn espirityèl e yo pa toujou konprann ki jan l fèt, epoutan, li fèt kanmenm. Twazyèmman, se pa tout moun ki te gen yon bon reyaksyon ki demontre yo se bon pwason. Gen moun ki sanble ak pwason ki pa bon Jezi te pale nan egzanp li a.

²¹ Men, se pa ti ankourajan sa ankourajan pou nou wè jan Jewova atire anpil bon pwason (Jan 6:44) ! Sa fè gen gwo akwasman nan yon peyi apre yon lòt. Se Jewova Dye ki merite tout glwa pou akwasman sa a. Piske nou wè sa, sa ta dwe pouse nou chak obeyi ankourajman nou pral site la a, yon ankourajman yo te ekri depi plizyè syèk : “ Nan maten, plante jaden ou. Aswè rive, plante jaden ou ankò. Ou pa janm konnen kilès nan de yo ap bay plis rannman. Ou pa janm konnen si tou de p’ap pran, si tou de p’ap bay menm rannman. ” — Ekl. 11:6.