Èske w gen konfyans nan fason Jewova aji?

1-2. a) Poukisa anpil moun jodi a twouve l difisil pou yo fè moun ki gen otorite konfyans? b) Ki sa nou pral wè nan atik sa a?

JODI A, anpil moun twouve l difisil pou yo fè moun ki gen otorite konfyans. Yo wè gouvènman yo ak lajistis gen tandans pwoteje moun ki rich ak moun ki gen pouvwa, men, yo pa vrèman ede moun ki pòv yo. Bib la gen rezon lè l di: “Moun ap domine sou moun pou fè yo soufri.” ​(Ekl. 8:9). Anplis de sa, gen kèk chèf relijye k ap fè sa k pa bon, sa ki lakòz kèk moun pèdi konfyans nan Bondye. Se sa k fè, lè yon moun dakò pou n etidye Labib avè l, nou bezwen ede l aprann fè Jewova konfyans, epi aprann fè moun ki reprezante Jewova sou tè a konfyans tou.

² Nòmalman, se pa sèlman etidyan Labib yo ki bezwen aprann fè Jewova ak òganizasyon l lan konfyans. Menm moun ki gen anpil ane nan laverite pa dwe janm bliye fason Jewova aji toujou pi bon. Pafwa, gen sitiyasyon ki ka teste konfyans nou gen nan Jewova. Nan atik sa a, nou pral wè twa sitiyasyon kote lafwa nou ka pase anba eprèv: 1) lè n ap li kèk istwa nan Bib la, 2) lè òganizasyon Jewova a ban nou enstriksyon, e 3) lè nou jwenn difikilte alavni.

 3. Ki jan kèk istwa nan Bib la kapab teste konfyans nou gen nan Jewova?

³ Pandan n ap li Pawòl Bondye a, nou ka poze tèt nou kesyon sou fason Jewova te aji ak kèk moun e sou kèk desizyon l te pran. Pa egzanp, nan liv Nonb lan, nou wè Jewova te mande pou yo touye yon Izrayelit paske l t ap ranmase bwa nan jou saba a. Kèk syèk annapre, nan dezyèm liv Samyèl la, nou aprann Jewova te padone wa David apre l te fin fè adiltè e l te touye moun (Nonb 15:32, 35; 2 Sam. 12:9, 13). Nou ta ka mande tèt nou: ‘Poukisa Jewova te padone David, ki te touye moun e ki te fè adiltè, alòske li te mande pou yo touye lòt mesye a ki te fè yon peche ki te parèt mwens grav?’ Pou n jwenn repons kesyon sa a, gen twa bagay nou bezwen sonje lè n ap li Bib la.

 4. Ki jan Jenèz 18:20, 21 ak Detewonòm 10:17 fè n gen plis konfyans nan jijman Jewova yo?

⁴ Labib pa toujou bay tout detay sou yon istwa. Pa egzanp, nou konnen David te repanti toutbon pou sa l te fè yo (Sòm 51:2-4). Men, kiyès mesye ki te vyole lwa sou saba a te ye? Èske l te regrèt sa l te fè a? Èske l te abitye dezobeyi lwa Jewova yo? Èske l te meprize avètisman l te jwenn oswa li pa t menm bay sa regle anyen pou li? Labib pa di anyen sou sa. Sepandan, gen yon bagay ki sèten, Jewova “pa janm fè enjistis”. (Det. 32:4.) Lè l ap pran desizyon, li chèche gen tout enfòmasyon yo. Li pa kite sa lòt moun di, prejije oswa nenpòt lòt bagay ki konn fè moun fè move jijman aji sou desizyon l ap pran. (Li Jenèz 18:20, 21; Detewonòm 10:17.) Plis nou aprann konn Jewova ak prensip li yo, se plis n ap fè jijman l yo konfyans. Menmsi yon istwa nan Bib la ta fè n ap poze tèt nou kesyon nou pa gen repons pou yo kounye a, nou konn anpil bagay sou Bondye nou an ki fè nou sèten li “toujou fè sa ki jis”. — Sòm 145:17.

 5. Lefètke nou enpafè, ki jan sa konn fè nou mal jije? (Gade kare ki gen tit “Enpèfeksyon fè n pa toujou ka wè yon sitiyasyon jan n ta dwe wè l”.)

⁵ Piske nou enpafè, nou pa ka toujou jije yon fason ki jis. Bondye fè nou pòtre ak li, se sa k fè nou vrèman ta renmen wè moun aji ak lòt moun yon fason ki jis (Jen. 1:26). Men, piske nou enpafè, nou kapab fè move jijman, menm lè n panse nou gen tout enfòmasyon yo. Pa egzanp, sonje jan Jonas te fache lè Jewova te deside fè moun Niniv yo mizèrikòd (Jon. 3:10–4:1). Epoutan, gade sa k te rive. Te gen plis pase 120 000 moun Niniv ki te repanti e ki pa t pèdi lavi yo! Alafen, se Jonas ki te bezwen korije fason l panse, se pa t Jewova.

 6. Poukisa Jewova pa oblije ban n esplikasyon pou desizyon l pran?

⁶ Jewova pa oblije bay lèzòm esplikasyon pou desizyon l pran. Se vre, Jewova te kite sèvitè l nan tan lontan yo bay opinyon yo sou desizyon l te pran oswa sou desizyon l t ap gen pou l pran (Jen. 18:25; Jon. 4:2, 3). E pafwa, li te esplike desizyon l pran (Jon. 4:10, 11). Sepandan, Jewova pa oblije esplike nou rezon ki fè l pran yon desizyon. Antanke Kreyatè nou, li pa bezwen nou dakò avè l anvan l aji oswa apre l fin aji. — Eza. 40:13, 14; 55:9.

 7. Ki difikilte nou ka jwenn, e poukisa?

⁷ Se sèten nou dakò ak tout kè nou Jewova toujou fè sa ki dwat. Men, pwoblèm nou ta ka genyen se fè moun ki reprezante Jewova yo konfyans. Nou ta ka mande tèt nou si moun ki gen kèk otorite nan òganizasyon Jewova a vrèman aji ann amoni ak enstriksyon Jewova bay oswa si se afè pa yo y ap fè. Petèt, gen kèk moun ki t ap viv nan epòk yo t ap ekri Bib la ki te konn panse konsa. Ann reflechi sou egzanp nou te site nan paragraf 3 a. Yon moun nan fanmi mesye ki te dezobeyi lwa sou saba a te ka mande tèt li si Moyiz te vrèman chèche konn sa Jewova panse anvan l te kondane mesye a pou l mouri. Epitou, yon zanmi Ouri, desandan Èt madanm li te fè adiltè ak David la, te ka panse David te sèvi ak pozisyon l antanke wa pou l pa t jwenn pinisyon li te vrèman merite. Alaverite, nou pa ka di nou gen konfyans nan Jewova si nou pa gen konfyans nan moun ki reprezante l sou tè a, yon seri moun Jewova fè konfyans.

 8. Ki rapò ki gen ant pawòl nou jwenn nan Travay 16:4, 5 lan ak fason òganizasyon an ap fonksyone jodi a?

⁸ Jodi a, Jewova ap dirije pati òganizasyon l lan ki sou tè a pa mwayen “esklav fidèl ki prevwayan an”. (Mat. 24:45.) Menm jan ak kolèj santral nan premye syèk la, esklav sa a ap pran swen pèp Bondye a sou tout tè a e l ap bay ansyen nan kongregasyon yo direksyon. (Li Travay 16:4, 5.) Ansyen yo, bò kote pa yo, aplike enstriksyon yo nan kongregasyon yo. Nou montre nou gen konfyans nan fason Jewova aji lè nou suiv enstriksyon òganizasyon an ak ansyen yo ban nou.

 9. Ki lè nou ka twouve l difisil pou n soutni yon desizyon ansyen yo pran, e poukisa?

⁹ Pafwa, nou ka twouve l difisil pou n aksepte desizyon ansyen yo pran. Pa egzanp, sa pa gen lontan depi yo te reyòganize plizyè kongregasyon ak plizyè sikonskripsyon. Nan kèk ka, ansyen yo te mande pwoklamatè yo pou y al soutni yon lòt kongregasyon nan objektif pou n pi byen itilize plas pou moun chita nan Sal Wayòm nou yo. Si yo mande nou al nan yon lòt kongregasyon, nou ka twouve l difisil pou nou kite zanmi nou ak fanmi nou. Èske se Bondye ki fè ansyen yo konnen nan ki kongregasyon pou yo voye chak pwoklamatè? Non. E lefètke nou konn sa, li ka difisil pou n suiv enstriksyon nou resevwa. Men, Jewova fè ansyen yo konfyans lè y ap pran desizyon sa yo, e nou bezwen fè yo konfyans tou.b

10. Selon Ebre 13:17, poukisa nou dwe kolabore ak ansyen yo?

¹⁰ Poukisa nou ta dwe kolabore ak ansyen yo e nou ta dwe soutni desizyon yo pran, menm lè nou pa fin renmen desizyon sa yo? Paske, lè nou fè sa, nou kolabore pou kontinye gen lapè nan mitan pèp Bondye a (Efe. 4:2, 3). Frè ak sè nan kongregasyon yo santi yo byen lè tout moun kontan soutni desizyon gwoup ansyen yo pran. (Li Ebre 13:17.) Sa k pi enpòtan an, nou montre Jewova nou fè l konfyans lè nou kolabore ak moun li fè konfyans pou pran swen nou. — Tra. 20:28.

11. Ki sa k ka ede n fè enstriksyon ansyen yo ban nou yo plis konfyans?

¹¹ Nou ka fè enstriksyon ansyen yo ban nou yo plis konfyans lè nou sonje yo priye pou lespri sen ka ede yo lè y ap egzamine kesyon ki gen rapò ak kongregasyon an. Epitou, yo byen reflechi sou prensip biblik ki gen rapò ak enstriksyon y ap bay yo, e yo egzamine enstriksyon òganizasyon Jewova a bay. Se ak tout kè yo yo vle fè Jewova plezi e yo vle byen pran swen pèp li a. Mesye fidèl sa yo konnen Bondye ap mande yo kont pou fason yo aji ak pèp li a (1 Pyè 5:2, 3). Ann fè yon ti reflechi: Nan yon monn ki gen divizyon akoz ras, relijyon ak politik, pèp Jewova a ap adore sèl vrè Dye a ansanm nan lapè. Sa rive fèt, sèlman paske Jewova beni òganizasyon l lan!

12. Sou ki sa ansyen yo dwe byen reflechi lè y ap chèche wè si yon moun repanti?

¹² Jewova bay ansyen yo gwo responsablite pou yo kenbe kongregasyon an pwòp. Si yon kretyen fè yon peche grav, Jewova vle pou ansyen yo chèche wè si moun sa a kapab rete nan kongregasyon an. Youn nan bagay ansyen yo bezwen chèche konnen se si moun nan vrèman regrèt sa l te fè a. Moun nan ka fè konnen li repanti, men, èske l vrèman rayi sa l te fè a? Èske l pran detèminasyon pou l pa refè menm peche a? Si se move zanmi ki te fè l tonbe nan pwoblèm sa a, èske l vle sispann fè zanmi ak moun sa yo? Lè konsa, ansyen yo priye, yo reflechi sou sitiyasyon an sou baz sa Bib la di, epi yo gade fason moun nan reyaji parapò ak sa k te rive a. Apre sa, yo deside si moun ki fè peche a ka rete nan kongregasyon an. Nan kèk ka, yo dwe eskominye l. — 1 Kor. 5:11-13.

13. Ki sa nou ka ap mande tèt nou si yon zanmi nou oswa yon fanmi nou eskominye?

¹³ Ki sa k ka fè n gen dout sou yon desizyon ansyen yo pran? Si moun ki eskominye a se pa yon zanmi pwòch nou oswa yon fanmi nou, nou ka aksepte desizyon ansyen yo pran an byen fasil. Men, ann sipoze moun ki eskominye a se yon bon zanmi n. Nou ka ap mande tèt nou si ansyen yo te egzamine tout enfòmasyon yo, oubyen si yo te vrèman jije ka a fason Jewova t ap jije l. Ki sa k ka ede nou kontinye gen bon atitid anrapò ak desizyon yo pran an?

14. Ki sa k ka ede nou si ansyen yo ta pran desizyon pou yo eskominye yon fanmi n oswa yon zanmi n?

¹⁴ Nou bezwen sonje se Jewova ki mande pou yo eskominye moun e sa bon pou kongregasyon an, epitou, sa ka ede moun ki peche a. Si yo kite yon moun ki peche e ki pa repanti fè pati kongregasyon an, sa kapab gen move enfliyans sou lòt moun nan kongregasyon an (Gal. 5:9). Anplis de sa, li ka pa aksepte jan peche l fè a grav, e l ka pa wè rezon pou l chanje fason l panse ak fason l aji pou l ka vin gen favè Jewova ankò (Ekl. 8:11). Nou kapab sèten, lè ansyen yo ap deside si yon moun dwe eskominye, yo pran responsablite yo genyen an oserye. Menm jan ak jij nan Izrayèl tan lontan an, yo konnen “se pa pou lòm [y] ap jije, men, se pou Jewova”. — 2 Kwo. 19:6, 7.

15. Poukisa nou bezwen fè enstriksyon Jewova bay yo konfyans jodi a plis pase nenpòt lòt lè?

¹⁵ Tank fen monn mechan sa a ap pwoche, nou bezwen gen plis konfyans toujou nan fason Jewova aji. Poukisa? Pandan gwo tribilasyon an, nou ka resevwa enstriksyon ki kapab parèt dwòl, ki ka difisil pou nou aplike oswa ki pa lojik. Nòmalman, Jewova pa pral pale avè n pèsonèlman. Se sèten li pral bay enstriksyon pa mwayen moun li chwazi pou reprezante l yo. Se pap moman pou n gen dout sou enstriksyon nou resevwa oswa pou n ap mande tèt nou: ‘Èske se Jewova vrèman ki bay yo, oubyen èske se frè ki responsab yo k ap fè afè pa yo?’ Ki jan w pral aji nan moman kritik sa a nan istwa lèzòm? Fason w konsidere enstriksyon moun ki reprezante Bondye yo bay jodi a ap ede w jwenn repons lan. Si w fè enstriksyon nou resevwa jodi a konfyans e w dispoze obeyi yo, sandout w ap fè menm bagay la pandan gwo tribilasyon an. — Lik 16:10.

16. Ki sa k pral rive talè konsa ki kapab montre si nou fè jijman Jewova yo konfyans?

¹⁶ Nou dwe byen reflechi tou sou fason nou pral reyaji nan moman Jewova pral fè jijman l yo lè monn mechan sa a rive nan bout li. Kounye a, nou gen espwa anpil moun ki pap sèvi Jewova, san wete fanmi nou ki pa Temwen, ap deside sèvi l anvan lafen an rive. Men, nan Amagedon, Jewova pral sèvi ak Jezi pou l pran yon dènye desizyon sou avni moun sa yo (Mat. 25:31-33; 2 Tes. 1:7-9). Se pa nou menm k ap deside kiyès Jewova ap fè mizèrikòd ak kiyès li pap fè mizèrikòd (Mat. 25:34, 41, 46). Èske n ap fè jijman Jewova yo konfyans, oswa èske y ap yon obstak ki fè nou bite? Li klè, nou bezwen fè Jewova plis konfyans depi kounye a pou n kapab fè l konfyans nèt alavni.

17. Ki byenfè n ap jwenn apre Jewova fin fè jijman l yo lè monn sa a rive nan bout li?

¹⁷ Imajine jan nou pral santi nou nan monn nouvo Bondye a lè nou wè sa k rive apre jijman Jewova yo. Fo relijyon pap la ankò, sistèm komèsyal ak sistèm politik ki konn eksplwate moun e ki lakòz yo soufri pandan anpil syèk pap la ankò. Nou pap gen pwoblèm sante, nou pap vin granmoun e moun nou renmen yo pap mouri. Yo pral fèmen Satan ak demon l yo pou mil an. Tout bagay mal ki te rive akoz rebelyon yo te fè yo pap la ankò (Rev. 20:2, 3). Lè sa a, se pa ti kontan n ap kontan dèske n te gen konfyans nan fason Jewova aji!

18. Selon Nonb 11:4-6 ak 21:5, ki leson nou ka aprann nan egzanp Izrayelit yo?

¹⁸ Èske nan monn nouvo a nou ta kapab jwenn kèk difikilte ki ta ka teste konfyans nou genyen nan fason Jewova aji? Pa egzanp, ann wè sa k te rive yon ti tan apre Izrayelit yo te sot nan esklavaj nan peyi Ejip. Kèk ladan yo te kòmanse plenyen paske yo te sonje bon manje yo te konn manje, e yo te meprize lamàn Jewova te ba yo a. (Li Nonb 11:4-6; 21:5.) Èske menm bagay la ka rive nou apre gwo tribilasyon an? Nou pa konn ki kantite travay n ap gen pou n fè pou n netwaye tè a e pou n fè l vin yon paradi tikras pa tikras. Sandout, nou pral gen anpil travay pou n fè, e lavi a ka pa fasil okòmansman. Èske n ap tonbe plenyen pou sa Jewova ban nou lè sa a? Yon bagay ki sèten, sèke plis nou gen rekonesans pou sa Jewova ban nou kounye a, se plis n ap gen rekonesans pou sa l pral ban nou lè sa a.

19. Ki pwen enpòtan nou ta dwe sonje nan atik sa a?

¹⁹ Jewova toujou fè afè l dwat. Nou bezwen kwè sa. Epitou, nou bezwen gen konfyans nan moun Jewova fè konfyans pou bay enstriksyon l yo. Pa janm bliye pawòl Jewova te di pa mwayen pwofèt Ezayi a: “Si nou ret dousman e nou montre nou gen konfyans, se sa k ap fòs nou.” — Eza. 30:15.