Gen moun ki pi siperyè pase nou

MWEN sèten w ap dakò avè m, gen moun ki pi siperyè pase nou, sa vle di yo pi enpòtan pase nou, yo gen plis fòs pase nou. Kiyès pa egzanp? — Jewova Dye. E Pitit Gason l lan menm, gran Anseyan an? Èske li pi siperyè pase nou tou? — Wi, natirèlman.

Lè Jezi t ap viv nan syèl la avèk Bondye, li te yon pitit espirityèl, sa vle di li te yon zanj. Èske Bondye te fè lòt zanj oswa lòt pitit espirityèl ankò? — Wi. Li te fè plizyè milyon zanj. Zanj sa yo tou, yo pi siperyè pase nou e yo gen plis fòs pase nou. — Sòm 104:4; Danyèl 7:10.

Èske w sonje non zanj ki te pale ak Mari a? — Se te Gabriyèl. Li te fè Mari konnen tibebe li t apral fè a se t ap Pitit Bondye. Bondye te mete lavi Pitit Gason l lan anndan vant Mari, yon fason pou Jezi te ka fèt kòm yon tibebe sou tè a. — Lik 1:26, 27.

Èske w kwè nan mirak sa a? Èske w kwè Jezi t ap viv nan syèl la ak Bondye? — Jezi te di sa. Men, ki jan l te fè konnen? Ebyen, siman lè l te timoun, Mari te rakonte l sa zanj Gabriyèl te di l. Sandout, Jozèf te di Jezi tou se Bondye ki vrè Papa l.

Lè Jezi t ap batize, Bondye li menm ret nan syèl la, epi li di pawòl sa a: “Se Pitit Gason m.” ​(Matye 3:17). E lannuit anvan Jezi mouri a, li te priye konsa: “Papa, glorifye mwen bò kote w ak laglwa mwen te gen bò kote w anvan monn nan te egziste.” ​(Jan 17:5). Wi, Jezi te mande pou l retounen al viv nan syèl la bò kote Bondye. Ki jan l t ap fè al viv nan syèl la? — Se sèlman si Jewova Dye ta fè l vin tounen yon espri envizib ankò, sa vle di yon zanj.

Kounye a, mwen ta renmen poze w yon kesyon ki enpòtan: èske tout zanj se bon zanj yo ye? Sa w panse? — Te gen yon lè, yo tout te bon, paske se Jewova ki te kreye yo, e tout sa Jewova fè, yo bon. Men, gen youn nan zanj yo ki te vin yon move zanj. Kòman sa fè rive?

Pou nou jwenn repons lan, ann fè yon ti retounen nan epòk Bondye te fè Adan ak Èv, de premye mesyedam yo. Gen moun ki di istwa ki pale de Adan ak Èv la se tou senpleman yon lejann. Men, gran Anseyan an te konnen se laverite.

Lè Bondye te fè Adan ak Èv, li te mete yo nan yon bèl jaden, yon kote ki rele Edenn. Se te yon paradi. Yo t ap ka fè anpil pitit, yo t ap ka gen yon fanmi ki gran anpil, e yo t ap ka viv nan Paradi a pou toutan. Men, gen yon leson enpòtan yo te bezwen aprann. Nou te deja pale de sa. Ann wè si nou sonje leson sa a.

Jewova te di Adan ak Èv yo te ka manje nenpòt fwi yo te vle nan pyebwa ki nan jaden an. Men, te gen yon pyebwa yo pa t dwe manje ladan l. Bondye te di yo sa k t ap rive yo si yo ta fè sa. Men sa l te di: “W ap mouri san mank.” ​(Jenèz 2:17). Donk, ki leson Adan ak Èv te bezwen aprann? —

Se te obeyisans. Annefè, pou nou viv, fòk nou obeyi Jewova Dye. Adan ak Èv pa t ka sèlman annik di nan bouch y ap obeyi Bondye. Yo te dwe montre sa nan fason y ap aji. Obeyisans yo pou Bondye t ap montre yo renmen l e yo vle l pou Chèf yo. Konsa, yo t ap ka viv pou toutan nan Paradi a. Men, e si yo ta manje nan pyebwa yo te entèdi yo manje ladan l lan, ki sa sa t ap montre? —

Sa t ap montre yo pa t vrèman gen rekonesans pou sa Bondye te ba yo. E ou menm, si w te la, èske w t ap obeyi Jewova? — Okòmansman, Adan ak Èv te obeyi. Men apre, yon moun ki pi siperyè pase yo vin twonpe Èv. Li fè l dezobeyi Jewova. Kiyès sa a? —

Bib la fè konnen gen yon sèpan ki pale ak Èv. Men, ou konnen sèpan pa konn pale! Donk, ki jan l te fè pale? — Te gen yon zanj ki te fè kòmsi se te sèpan an ki t ap pale. Men an reyalite, se te zanj lan. Zanj sa a te kòmanse gen move lide nan tèt li. Li te vle pou Adan ak Èv vin adore l. Li te vle pou yo obeyi l. Li te vle pran plas Bondye.

Donk, zanj sa a ki te vin mechan mete move lide nan tèt Èv. Li sèvi ak sèpan an pou l di Èv konsa: ‘Bondye pa t di w laverite. Ou pap mouri si w manje fwi nan pyebwa sa a. W ap vin gen anpil konesans, menm jan ak Bondye.’ Si se te ou, èske w t ap kwè? —

Èv te kòmanse anvi yon bagay Bondye pa t ba li. Li manje fwi nan pyebwa yo te entèdi l manje ladan l lan. Apre sa, li bay Adan ladan l. Adan pa t kwè sa sèpan an te di a. Men, anvi l te genyen pou l rete avèk Èv te pi fò pase lanmou li te genyen pou Bondye. Se sa k fè li manje nan fwi a tou. — Jenèz 3:1-6; 1 Timote 2:14.

Ki rezilta sa te bay? — Adan ak Èv vin enpafè, yo vin vyeyi epi yo mouri. E kòm yo te vin enpafè, tout pitit yo vin enpafè tou, e finalman, yo menm tou yo vin vyeyi epi yo mouri. Bondye pa t bay manti! Vrèmanvre, pou nou viv, fòk nou obeyi Bondye (Women 5:12). Bib la di nou zanj sa a ki te bay Èv manti a, yo rele l Satan Ledyab, e lòt zanj ki te vin mechan yo, yo rele yo demon. — Jak 2:19; Revelasyon 12:9.

Di m non, kòman sa fè posib pou Bondye fè yon bon zanj epi apre sa, zanj sa a vin mechan? — Se paske li te kòmanse reflechi sou move bagay. Li te vle pou se li ki anlè tèt tout moun. Li te konnen Bondye te di Adan ak Èv pou yo fè pitit, e li te vle pou yo tout vin adore l. Dyab la vle fè tout moun dezobeyi Jewova. Donk l ap eseye mete move lide nan tèt nou. — Jak 1:13-15.

Dyab la fè konprann pèsonn pa renmen Jewova toutbon. Li di ou menm avè m, nou pa renmen Bondye e nou pa vrèman anvi fè sa Bondye di. Li di se sèlman lè tout bagay mache byen pou nou nou obeyi Jewova. Èske Dyab la gen rezon? Èske se konsa nou ye vre?

Gran Anseyan an fè konnen Dyab la se yon mantè. Jezi te obeyi Jewova, e konsa, li te montre li renmen l toutbonvre. E Jezi pa t konn obeyi Bondye sèlman lè sa fasil. Li te konn fè sa toutan, menm lè lòt moun te konn ap ba l pwoblèm. Li te montre l fidèl ak Jewova jiskaske l mouri. Se poutèt sa Bondye te resisite l pou l viv pou toutan.

Donk, kiyès ou ta di ki pi gwo ènmi nou? — Wi, se Satan Ledyab. Èske w ka wè li? — Natirèlman ou pa kapab! Men, nou konnen li egziste, li pi siperyè e li pi pisan pase nou. Sepandan, kiyès ki pi siperyè pase Dyab la? — Se Jewova Dye. Donk, nou sèten Jewova ka pwoteje nou.