Jezi gen plis pouvwa pase demon yo

ÈSKE w sonje sa k fè youn nan zanj Bondye yo te vin Satan Ledyab? — Se anbisyon li te genyen pou moun adore l ki te fè l vire kont Bondye. Èske gen lòt zanj ki te suiv Satan? — Wi. Bib la rele yo ‘zanj Satan’ oswa demon. — Revelasyon 12:9.

Èske zanj mechan sa yo oswa demon sa yo kwè nan Bondye? — Bib la di ‘demon yo kwè Bondye egziste’. (Jak 2:19.) Men, yo pè, paske yo konnen Bondye pral pini yo pou move bagay yo fè. Èske w konn ki sa yo fè ki mal? —

Bib la di zanj sa yo te kite kote yo rete nan syèl la e yo te vin viv kòm gason sou tè a. Yo te fè sa pou yo te ka vin gen relasyon seksyèl ak bèl fi sou tè a (Jenèz 6:1, 2; Jid 6). Èske w konnen ki sa relasyon seksyèl ye? —

Relasyon seksyèl, se lè yon gason ak yon fi pwoche youn bò kote lòt yon fason ki trè espesyal. Apre sa, yon tibebe ka devlope anndan vant manman an. Men, se yon bagay ki mal pou zanj gen relasyon seksyèl. Bondye vle se sèlman yon gason ak yon fi ki marye youn ak lòt ki gen dwa gen relasyon seksyèl. Konsa, si yon tibebe vin fèt, mari a ak madanm nan kapab pran swen l.

Lè zanj yo te pran kò moun e yo te vin gen relasyon seksyèl ak fi sou tè a, tibebe yo te fè yo te vin tounen yon seri jeyan ki mechan anpil, e yo te konn fè moun mechanste. Donk, Bondye te fè yon gwo inondasyon oswa yon delij vin detwi jeyan yo ansanm ak tout moun ki mechan yo. Men, li te fè Noye bati yon lach, oswa yon gwo bato, pou l sove tikras moun ki t ap fè sa ki dwat yo. Gran Anseyan an di li enpòtan pou n sonje sa k te pase nan delij la. — Jenèz 6:3, 4, 13, 14; Lik 17:26, 27.

Lè delij dlo a te vini, èske w konnen sa k te rive zanj mechan yo? — Yo te sispann sèvi ak kò moun yo te genyen an, epi yo te retounen nan syèl la. Men, yo pa t kapab kontinye sèvi kòm zanj Bondye. Donk, yo vin tounen zanj Satan, oswa demon. E pitit yo te fè yo, jeyan yo, sa k te rive yo? — Yo mouri nan delij la ansanm ak tout moun ki pa t konn obeyi Bondye yo.

Apre delij la, Bondye pa kite demon yo tounen moun ankò. Men, menmsi nou pa ka wè demon yo, yo toujou ap eseye fè moun aji mal. E kounye a, y ap fè plis mal toujou, paske Bondye chase yo sot nan syèl la vin sou tè a.

Ou konn poukisa nou pa ka wè demon yo? — Se paske yo envizib. Men, nou sèten yo vivan. Bib la fè konnen Satan ‘ap twonpe moun nan lemonnantye’, e demon l yo ap ede l fè sa. — Revelasyon 12:9, 12.

Èske Dyab la ak demon l yo ka twonpe nou tou? — Wi, yo ka fè sa, si nou pa vijilan. Men, nou pa bezwen pè. Men sa gran Anseyan an te di: ‘Dyab la pa gen pouvwa sou mwen.’ Si nou rete pwòch Bondye, l ap pwoteje nou kont Dyab la ak demon l yo. — Jan 14:30.

Li enpòtan pou nou konnen ki move bagay demon yo ap eseye pouse nou fè. Fè yon ti reflechi: ki move bagay demon yo te fè lè yo te vin sou tè a? — Anvan delij la, yo te gen relasyon seksyèl ak fi, yon bagay zanj pa gen dwa fè. Jodi a, demon yo kontan lè moun pa obeyi lwa Bondye bay konsènan relasyon seksyèl. Èske w sonje ki sèl moun ki gen dwa gen relasyon seksyèl? — Ou gen rezon, se sèl moun ki marye.

Jodi a, gen tigason ak tifi ki gen relasyon seksyèl, men, se yon bagay ki grav. Bib la pale de “pati jenital” gason an ki rele peni (Levitik 15:1-3). Pati jenital fi a rele vajen. Jewova te kreye pati sa yo nan kò a pou yon sèvis espesyal ki rezève sèlman pou moun ki marye. Demon yo kontan lè moun ap fè sa Jewova entèdi. Pa egzanp, demon yo kontan lè yon tigason ak yon tifi ap jwe ak pati jenital youn lòt. Nou pa vle fè demon yo plezi, pa vre? —

Gen yon lòt bagay demon yo renmen e Jewova rayi bagay sa a. Ou konn ki sa? — Se vyolans (Sòm 11:5). Lè yon moun mechan e l ap fè lòt moun mechanste, se vyolans sa rele. Pa bliye, se sa jeyan yo, pitit demon yo, te konn fè.

Epitou, demon yo renmen fè moun pè. Pafwa, yo konn pran pòz yo se moun ki mouri. Yo menm konn imite vwa moun ki mouri. Se konsa demon yo twonpe anpil moun: yo fè yo kwè moun ki mouri yo vivan, e yo ka pale avèk nou. Se demon yo ki lakòz anpil moun kwè nan fantom.

Se sa k fè fòk nou veye pou Satan ak demon l yo pa twonpe nou. Bib la fè nou konnen ‘Satan ap eseye fè tèt li pase pou bon zanj, e sèvitè l yo ap eseye fè menm jan an tou’. (2 Korentyen 11:14, 15.) Men, an reyalite, demon yo mechan. Annou wè ki jan y ap eseye fè nou vin menm jan avèk yo.

Ki kote moun aprann anpil bagay konsènan vyolans, relasyon seksyèl Bondye entèdi, movèzespri ak fantom? — Èske se pa nan fim yo pase nan televizyon, nan sinema, nan jwèt videyo, sou Entènèt ak nan liv ki gen ti komik? Si se bagay sa yo n ap gade, èske n ap vin pi pwòch Bondye oswa pi pwòch Dyab la ak demon l yo? Sa w panse? —

Dapre ou menm, kiyès ki ta renmen nou koute oswa gade move bagay? — Se Satan ak demon l yo. Donk, ki sa ou menm avè m nou bezwen fè? — Nou bezwen li, nou bezwen koute, nou bezwen gade bagay ki bon pou nou e k ap ede nou sèvi Jewova. Ki bagay konsa? —

Si n ap fè sa ki byen, nou pa gen rezon pou nou pè demon yo. Jezi gen plis fòs pase yo, e yo pè l. Yon jou, men sa demon yo te mande Jezi: “Èske w vini pou w detwi nou?” ​(Mak 1:24). Ou pa panse n ap kontan anpil lè jou a rive kote Jezi pral detwi Satan ak tout demon l yo? — Annatandan, nou mèt sèten Jezi ap pwoteje nou kont demon yo, si nou rete pwòch avèk li ak Papa li ki nan syèl la.