“ Se pou sa yo te voye m ”

1-4. a) Ki jan, avèk ladrès, Jezi anseye yon Samaritèn, e ki rezilta sa bay ? b) Ki jan apot Jezi yo reyaji ?

JEZI ak apot li yo gentan fè plizyè èdtan ap mache. Y ap vwayaje nan direksyon nò, soti Jide pou y al Galile. Yo pran wout ki pi kout la, sa fè yon vwayaj anviwon twa jou, kote yo pase pa Samari. Li fè anviwon midi. Yo pwoche bò yon ti vil ki rele Sicha, e yo fè yon kanpe la pou yo pran yon ti kichòy.

² Pandan apot Jezi yo al achte manje, Jezi fè yon poze bò kote yon pi ki andeyò vil la. Gen yon dam ki pwoche pou l tire dlo. Jezi te ka chwazi pa okipe dam nan piske l “ te fatige anba vwayaj la ”. (Jan 4:6.) Moun t ap ka konprann li si l te annik fèmen je l epi li kite Samaritèn nan mennen aktivite l san l pa okipe l. Jan nou te wè sa nan chapit 4 la, sandout, dam nan t ap atann li pou nenpòt Juif trete l avèk mepri. Epoutan, Jezi kòmanse yon konvèsasyon ansanm avè l.

³ Li kòmanse avèk yon egzanp, yon egzanp li pran nan lavi dam nan ap mennen chak jou, nan sa dam nan ap fè nan moman an menm. Li vini pou l tire dlo. Jezi pale konsènan dlo ki bay lavi a, e ki pral pase swaf espirityèl dam nan. Plizyè fwa, dam nan soulve pwen ki ta kapab antrene diskisyona. Avèk tak, Jezi evite pwen sa yo e li kontinye kenbe konvèsasyon an sou sijè l te vle pale a. Li konsantre l sou bagay espirityèl : adorasyon ki pa kontamine a, ak Jewova Dye. Pawòl li yo te gen anpil efè, paske dam nan al rapòte yo bay mesye ki nan vil la, e yo menm tou, yo vle vin koute Jezi. — Jan 4:3-42.

⁴ Lè apot yo retounen, ki reyaksyon yo devan bèl temwayaj yo jwenn Jezi ap bay la ? Pa gen okenn siy ki montre yo chofe bò kote pa yo. Yo sezi pou yo wè Jezi rive menm ap pale ak dam sa a, e aparamman, yo pa di dam nan yon mo. Apre l fin ale, yo cho nan kò Jezi pou l manje manje yo vin avèk li a. Sepandan, Jezi di yo : “ Mwen gen yon manje pou m manje nou pa konnen. ” Sa twouble apot yo, e okòmansman yo panse se de manje toutbon Jezi ap pale. Lè sa a, li esplike : “ Manje pa m se fè volonte sila ki voye m nan epi fin fè travay li. ” ​(Jan 4:32, 34). Konsa, Jezi anseye yo prensipal travay li nan lavi a pi enpòtan pou li pase manje. Li vle yo gen menm santiman an konsènan travay sa a. Ki travay li ye ?

 5. Ki sa ki te prensipal okipasyon Jezi, e ki sa nou pral egzamine nan chapit sa a ?

⁵ Yon lè, Jezi te di : “ Fòk mwen al anonse bon nouvèl wayòm Bondye a, paske se pou sa yo te voye m. ” ​(Lik 4:43). Wi, yo te voye Jezi pou l preche e pou l anseye bon nouvèl Wayòm Bondye ab. Disip Jezi yo jodi a gen menm travay la pou yo fè. Donk, li esansyèl pou nou reflechi sou rezon ki te pouse Jezi preche, sou sa Jezi t ap preche e sou fason li te konsidere asiyasyon l lan.

6, 7. Ki jan Jezi te vle pou “ chak anseyan ” santi l konsènan kesyon pataje bon nouvèl la ak lòt moun ? Bay yon egzanp.

⁶ Annou reflechi sou fason Jezi te santi l konsènan verite li te konn anseye yo. Apre sa, nou pral pale sou fason li te konsidere moun li te konn anseye yo. Jezi te sèvi avèk yon egzanp frapan pou l montre ki jan li santi l anrapò ak pataje verite Jewova te anseye l yo ak lòt moun. Men sa l te di : “ Chak anseyan, lè yo fin anseye l anrapò ak wayòm ki nan syèl la, li tankou yon moun, yon mèt mezon, ki retire nan trezò l bagay ki nèf ak bagay ki la lontan. ” ​(Matye 13:52). Poukisa mèt mezon nan egzanp Jezi a retire bagay nan trezò li ?

⁷ Se pa yon senp etalaj mèt mezon an ap fè anrapò ak sa l posede menm jan wa Izkiya nan tan lontan te fè sa, sa ki te gen konsekans terib (2 Wa 20:13-20). Ki sa ki motive mèt mezon an ? Annou pran yon egzanp : W ap vizite yon anseyan lakay li, yon anseyan moun byen apresye. Li ouvri yon tiwa biwo, e li rale de lèt. Youn ladan yo gentan joni, tèlman l la lontan, e lòt la pa gen twò lontan depi l la. Se papa l ki te voye lèt sa yo ba li. Gen youn ladan yo li te resevwa sa gen plizyè dizèn ane, lè sa a, se yon tigason l te ye. Lòt lèt la, li resevwa l sa pa gen twò lontan. Lajwa briye nan je l pandan l ap di w ki jan lèt sa yo gen enpòtans pou li e ki jan konsèy ki ladan yo chanje lavi l. E li di w konsèy sa yo ta ka ede w tou. Li klè anseyan an bay lèt sa yo anpil enpòtans, e li cheri yo ak tout kè l (Lik 6:45). Li pataje lèt sa yo avè w, non pa pou l vante tèt li oswa pou l tire pwofi yon fason oswa yon lòt, men pou l fè w tire pwofi, e pou l fè w santi valè lèt sa yo.

 8. Sa k fè nou gen bonjan rezon pou nou cheri verite nou aprann nan Pawòl Bondye a tankou trezò ?

⁸ Jezi, gran Anseyan an, te gen motivasyon ki sanble ak motivasyon sa a lè l t ap pataje verite Bondye yo ak lòt moun. Pou li menm, verite sa yo se te trezò ki pa gen pri. Li te renmen yo e li te chofe pou l pataje yo. Li te vle pou tout disip li yo, “ chak anseyan ”, gen menm santiman an tou. Èske se konsa nou santi nou ? Nou gen bon rezon pou nou renmen chak verite nou aprann nan Pawòl Bondye a. Nou renmen verite presye sa yo, kit se verite nou cheri depi lontan, kit se eklèsisman ki fèt sa pa gen twò lontan. Lè nou pale avèk yon antouzyas ki soti nan kè nou, e lè nou demontre lanmou nou pou sa Jewova anseye nou, n ap transmèt lanmou sa a, menm jan Jezi te fè sa.

 9. a) Ki santiman Jezi te genyen pou moun li te konn anseye yo ? b) Ki jan nou ka imite fason Jezi te konsidere moun ?

⁹ Jezi te renmen moun li te konn anseye yo tou, jan nou pral pale de sa afon nan seksyon 3 a. Selon sa yo te pwofetize, Mesi a t apral “ gen pitye pou moun ki piti a ak moun ki pòv la ”. (Sòm 72:13.) Vrèmanvre, Jezi te gen sousi pou moun. Li te konn sousye l konsènan panse ak etadespri ki te motive moun yo. Li te enkyete l anrapò ak fado ki t ap peze sou yo, e anrapò ak obstak ki te ka anpeche yo pran laverite (Matye 11:28 ; 16:13 ; 23:13, 15). Pa egzanp, sonje Samaritèn nan. Sandout, sa te fè yon gwo enpresyon sou li dèske Jezi te enterese nan li. Disènman Jezi te demontre nan sitiyasyon pèsonèl Samaritèn nan te pouse Samaritèn nan aksepte Jezi kòm yon pwofèt, e sa te pouse l pale ak lòt moun de Jezi (Jan 4:16-19, 39). Se vre, moun k ap suiv Jezi yo pa ka li nan kè moun y ap preche yo. Sepandan, nou ka enterese nan yo, menm jan Jezi te fè a, nou ka demontre nou sousye nou de yo, nou ka chèche pale de sa ki enterese yo an patikilye, de difikilte y ap rankontre e de bezwen yo.

10, 11. a) Ki sa Jezi te konn preche ? b) Poukisa li te vin nesesè pou Wayòm Bondye a egziste ?

¹⁰ Ki sa Jezi te konn preche ? Si w ta eseye jwenn repons kesyon sa a lè w egzamine ansèyman anpil legliz ki pretann yo reprezante Jezi, petèt ou ta ka tire konklizyon Jezi te konn pwoklame yon evanjil sosyal. Oswa petèt ou ta ka gen enpresyon li te konn defann refòm politik oswa li te konn mete aksan sou delivrans pèsonèl kòm bagay ki pi enpòtan. Sepandan, jan nou te fè remak la anvan sa, Jezi te di aklè : “ Fòk mwen al anonse bon nouvèl wayòm Bondye a. ” Ki sa sa te enplike egzakteman ?

¹¹ Pa bliye, Jezi te prezan nan syèl la lè, pou premye fwa, Satan te defye dwa Jewova genyen antanke Souvren. Ala sa dwe te fè Jezi lapenn pou l wè y ap bay manti sou do Papa l ki jis, kote y ap fè konprann li se yon dirijan ki enjis, k ap anpeche kreyati l yo jwenn sa ki bon pou yo ! Ala sa dwe te fè Pitit Gason Bondye a mal lè Adan ak Èv, ki t apral paran limanite, te kwè manti Satan te bay yo ! Pitit Gason an te wè limanite te vin enfekte ak peche ak lanmò kòm rezilta rebelyon sa a (Women 5:12). Men, ala sa dwe te fè l rejwi pou l aprann Papa l pral mete bagay yo annòd yon jou !

12, 13. Ki enjistis Wayòm Bondye a pral repare, e ki jan Jezi te santre ministè l sou Wayòm nan ?

¹² Plis pase tout lòt bagay, ki kesyon ki te dwe regle ? Non Jewova, yon non ki sen, te bezwen sangtifye, li te bezwen lave anba tout tras repwòch Satan ansanm ak tout moun ki te pran pozisyon bò kote l yo te lage sou li. Dwa Jewova genyen antanke Souvren, sa vle di fason li dirije, te bezwen jistifye. Jezi te pi byen konprann kesyon esansyèl sa yo plis pase nenpòt lòt moun. Nan priyè modèl la, li te anseye disip li yo pou yo mande toudabò pou non Papa l sangtifye, apre sa, pou Wayòm Papa l la vini, e apre sa, pou volonte Bondye fèt sou tè a (Matye 6:9, 10). Wayòm Bondye a, ki gen Kris Jezi kòm Dirijan, pral debarase tè a talè konsa anba sistèm kòwonpi Satan an, e li pral jistifye dominasyon jis Jewova a pou toutan. — Dànyèl 2:44.

¹³ Wayòm sa a, se te tèm ministè Jezi a. Tout pawòl li te di, tout aksyon l te poze te sèvi pou l ede moun konprann aklè ki sa Wayòm sa a ye, e pou l ede yo konprann ki jan li pral sèvi objektif Jewova. Jezi pa t pèmèt anyen detounen l nan misyon l te genyen pou l preche bon nouvèl Wayòm Bondye a. Nan epòk li a, te gen pwoblèm sosyal grav, te gen anpil enjistis, epoutan, Jezi te konsantre l sou mesaj li a e sou travay li a. Èske sa te vle di li te gen yon pwennvi ki limite ? Èske fason l te akonpli misyon l lan te fè lòt moun wè l raz ? Jamè !

14, 15. a) Nan ki sans Jezi te “ yon bagay ki plis pase Salomon ” ? b) Ki jan nou ka imite Jezi nan sa n ap preche ?

¹⁴ Jan nou pral wè sa nan seksyon sa a, Jezi te varye ansèyman l lan, li te rann li enteresan e li te rann li atiran. Li te konn touche kè moun yo. Nou ka raple nou Salomon, yon wa ki saj, ki t ap chèche pawòl ki agreyab, pawòl laverite ki kòrèk, pou l ka transmèt panse Jewova te enspire l pou l ekri (Eklezyas 12:10). Jewova te bay mesye sa a, ki te enpafè, “ yon kè ki laj ”, e sa te pèmèt li pale sou anpil bagay, soti nan zwazo, rive nan pwason san wete pyebwa ak bèt. Moun te konn soti byen lwen pou yo tande Salomon k ap pale (1 Wa 4:29-34). Epoutan, Jezi te “ yon bagay ki plis pase Salomon ”. (Matye 12:42.) Li te pi saj lontan pase Salomon, li te gen yon kè ‘ ki pi laj lontan ’ pase pa Salomon an. Lè Jezi t ap anseye moun yo, li te konn sèvi ak konesans siperyè li gen nan Pawòl Bondye a, ak konesans li genyen sou zwazo, sou bèt, sou pwason, sou agrikilti, sou tan an, sou evènman k ap pase, sou listwa ak sou sitiyasyon sosyal moun yo. Anmenmtan, Jezi pa t janm fè egzibisyon avèk konesans li pou l enpresyone lòt moun. Li te kenbe mesaj li a senp e li te kenbe l klè. Nou pa bezwen mande jan moun yo te pran plezi tande l k ap pale ! — Mak 12:37 ; Lik 19:48.

¹⁵ Kretyen yo jodi a eseye suiv menm chemen ak Jezi. Nou pa gen kokenn sajès ak kokenn konesans Jezi te genyen, men nou tout, nou gen kèk konesans ak kèk eksperyans nou ka itilize lè n ap pataje verite ki nan Pawòl Bondye a ak lòt moun. Paran yo, pa egzanp, kapab sèvi ak eksperyans yo fè nan leve timoun pou yo ede moun konprann lanmou Jewova pou pitit Li yo. Gen lòt moun ki kapab sèvi ak egzanp yo pran nan travay pwofàn yo, nan lekòl yo oswa ak konesans yo genyen sou moun e sou evènman k ap pase. Anmenmtan, nou pridan pou nou pa kite anyen detounen atansyon nou sou mesaj nou an, anpalan de bon nouvèl Wayòm Bondye a. — 1 Timote 4:16.

16, 17. a) Ki jan Jezi te konsidere ministè l ? b) Ki jan Jezi te demontre ministè l se bagay ki te pi enpòtan nan lavi l ?

¹⁶ Jezi te gen santiman ministè li se te yon trezò ki gen anpil valè. Li te pran plezi ede moun yo wè Papa li ki nan syèl la jan Li ye toutbonvre, li pa t kite konfizyon ki soti nan doktrin ak tradisyon lèzòm fè enfliyanse l. Jezi te renmen ede moun yo pou yo vin gen bonjan relasyon avèk Jewova e pou yo gen espwa lavi etènèl. Li te pran plezi fè moun yo jwenn rekonfò ak kè kontan bon nouvèl la bay. Ki jan li te demontre li te gen santiman sa yo ? Nou pral wè twa fason li te fè sa.

¹⁷ Premyèman, Jezi te fè ministè l tounen bagay ki pi enpòtan nan lavi l. Prensipal okipasyon l, sa ki te plis enterese l nan lavi a, se te pale ak lòt moun konsènan Wayòm nan. Se poutèt sa, jan nou te wè sa nan chapit 5 lan, avèk sajès, Jezi te kenbe lavi l senp. Toutpandan l ap konseye lòt moun, li te kenbe je l fikse sou sa ki te gen plis enpòtans lan. Li pa t kite yon pakèt bagay li ta ka achte, antretni, repare oswa ranplase avèk letan distrè l. Li te viv yon fason senp, pou anyen pa t detounen l initilman sou ministè li. — Matye 6:22 ; 8:20.

18. Ki jan Jezi te bay tout li menm nan ministè l ?

¹⁸ Dezyèmman, Jezi te bay tout li menm nan ministè l. Li te depanse yon pakèt enèji ladan l, li te konn mache plizyè santèn kilomèt nan tout Palestin, li t ap chèche moun li ta ka pataje bon nouvèl la avèk yo. Li te konn pale avèk yo lakay yo, sou plas piblik, nan mache, e deyò, kote ki pa kouvri. Li te konn pale ak yo menm lè li te bezwen repo, manje, dlo oswa menm lè li te bezwen pase yon ti moman trankil ansanm ak zanmi l ki pi pwòch li yo. Menm lè l t apral mouri, li te kontinye pataje bon nouvèl Wayòm Bondye a ak lòt moun ! — Lik 23:39-43.

19, 20. Ki egzanp Jezi te pran pou l te kapab montre ijans ki genyen nan travay predikasyon an ?

¹⁹ Twazyèmman, Jezi te konsidere ministè a kòm yon bagay ki ijan. Raple w konvèsasyon li te genyen ansanm ak Samaritèn nan nan pi ki andeyò vil Sicha a. Aparamman, apot Jezi yo pa t wè nan sitiyasyon sa a yon bezwen ijan pou yo pataje bon nouvèl la avèk pwochen yo. Jezi te di yo : “ Nou pa di rete kat mwa anvan rekòt la vini ? Gade ! M ap di nou sa : Leve je nou gade jaden yo : yo tou blan pou fè rekòt. ” — Jan 4:35.

²⁰ Jezi te pran egzanp sa a nan sezon yo te ye a. Aparamman, yo te nan mwa Kislèv (zòn novanm/desanm). Rekòt lòj la pa t ap vini anvan kat mwa, apeprè nan epòk Pak, jou ki t ap 14 Nizan an. Kidonk, kiltivatè yo pa t santi okenn ijans anrapò ak rekòt la nan epòk sa a. Yo te gen yon bon kou tan devan yo toujou. Men, e konsènan rekòt moun nan ? Anpil moun te tou pare pou yo koute, pou yo aprann, pou yo vin disip Kris e pou yo gen bèl esperans Jewova te mete a dispozisyon yo a. Se kòmsi Jezi te kapab gade nan jaden senbolik sa yo e li te kapab wè yo blan, li te kapab wè tout grenn ki mi yo k ap balanse dousman nan yon ti van k ap vante, y ap fè konnen yo pare pou rekòt lac. Kounye a se te moman rekòt la, e travay la te ijan ! Konsa, lè moun ki nan yon vil te eseye kenbe Jezi ansanm avèk yo, li te reponn : “ Nan lòt vil yo tou, fòk mwen al anonse bon nouvèl wayòm Bondye a, paske se pou sa yo te voye m. ” — Lik 4:43.

21. Ki jan nou ka imite Jezi ?

²¹ Nou ka imite Jezi nan twa fason nou fèk sot pale la a. Nou ka fè ministè kretyen an vin tounen prensipal okipasyon nou nan lavi a. Menmsi nou kapab gen obligasyon nan fanmi nou, obligasyon pwofàn, nou ka demontre ministè nou pase an premye lè nou patisipe ladan l regilyèman e avèk zèl, menm jan Jezi te konn fè sa (Matye 6:33 ; 1 Timote 5:8). Nou ka bay tout nou menm nan ministè a lè nou montre nou donan nan bay tan nou, enèji nou ak byen nou pou nou soutni l (Lik 13:24). E nou kapab toujou gen nan lespri nou travay nou an ijan (2 Timote 4:2). Nou bezwen sezi chak opòtinite nou genyen pou nou preche !

22. Sou ki sa chapit ki vin apre a pral pale ?

²² Jezi te demontre tou li wè enpòtans travay la, lè li asire l travay la t ap kontinye apre l fin mouri. Li te bay disip li yo lòd pou yo kontinye travay predikasyon an ak travay ansèyman an. Se sou sa chapit ki vin apre a pral pale.