Fason pou nou rezoud pwoblèm nan kesyon biznis

Nan 1 Korentyen 6:1-8, apot Pòl pale de kretyen ki te nan pwosè youn ak lòt. Sa te ba l pwoblèm lefètke kèk kretyen nan vil Korent te “oze al jije [...] nan tribinal devan moun ki enjis”. (Vèsè 1.) Pòl te bay bonjan rezon ki fè kretyen yo pa ta dwe mennen kretyen parèy yo nan tribinal, men okontrè yo ta dwe rezoud pwoblèm yo gen youn ak lòt anndan kongregasyon an. Annou egzamine kèk nan rezon ki te pouse l bay konsèy sa a anba enspirasyon Bondye, e apre sa nou pral wè kèk sitiyasyon kote konsèy sa a ka pa aplikab.

Si nou gen yon pwoblèm ak yon kretyen parèy nou nan kesyon biznis, toudabò, nou ta dwe chèche rezoud pwoblèm nan fason Jewova mande pou nou fè sa, nou pa ta dwe fè sa fason pa nou (Pwovèb 14:12). Jan Jezi te montre sa, li pi bon pou nou regle pwoblèm yo byen vit anvan yo vin grav (Matye 5:23-26). Malerezman, gen kèk kretyen ki konn tèlman gen pwoblèm ak lòt kretyen parèy yo, yo konn menm al nan tribinal pou yo rezoud dezakò yo genyen yo. Pòl te di: “Se deja yon echèk pou nou lè nou nan pwosè youn ak lòt.” Poukisa li di sa? Yon rezon fondamantal ki fè li di sa, se paske jan de pwosè sa yo ka lage vèni ni sou kongregasyon an, ni sou Bondye n ap adore a. Se sa k fè nou dwe byen reflechi sou kesyon sa a Pòl te poze a: “Poukisa nou pa kite yo fè nou enjistis pito?” — Vèsè 7.

Anplis de sa, Pòl te fè kretyen yo sonje Bondye pran bonjan dispozisyon nan kongregasyon an pou pèmèt yo rezoud anpil pwoblèm. Konesans ansyen yo genyen sou verite ki nan Bib la fè yo gen sajès. Se sa k fè Pòl di ansyen yo “kapab fè jijman ant frè ak frè” anrapò ak ‘bagay ki gen nan lavi sa a’. (Vèsè 3-5.) Jezi te fè konnen, lè de kretyen gen pwoblèm youn ak lòt akoz youn ladan yo fè lòt la yon bagay ki grav, se kapab manti li bay sou li oswa li vòlè afè l, yo ta dwe rezoud pwoblèm nan selon yon demach ki gen twa etap ladan l: Premyèman, moun ki konsène yo ta dwe fè tout sa yo kapab pou yo rezoud pwoblèm yo gen antre yo a an prive. Dezyèmman, si premye etap la echwe, moun ki te fè premye demach la ka pran de moun avè l k ap sèvi kòm temwen pou l al pale ak moun nan ankò. Twazyèmman, si dezyèm etap la echwe, moun nan ka mete pwoblèm nan devan kongregasyon an, sa vle di devan ansyen yo. — Matye 18:15-17.

Nòmalman, ansyen yo pa la pou yo sèvi kòm avoka, ni yo pa la pou bay moun konsèy sou fason pou moun jere biznis yo, ni yo pa mande yo pou yo fè sa. Yo pa la pou yo pran desizyon pou frè ki gen pwoblèm antre yo akoz kesyon biznis. Olye de sa, yo dwe fè tout sa yo kapab pou yo ede tout moun ki gen pwoblèm antre yo aplike prensip biblik yo pou yo ka rive dakò sou yon solisyon amikal. Nan ka kote pwoblèm yo konplike, ansyen yo ka kontakte siveyan sikonskripsyon an oubyen biwo filyal Temwen Jewova yo. Sepandan, gen kèk sitiyasyon kote konsèy Pòl te bay la pa aplikab. Ki sitiyasyon konsa?

Nan kèk ka, yon pwosè ka yon senp fòmalite oubyen yon obligasyon legal pou rezoud yon pwoblèm nan lapè. Pa egzanp, yon pwosè se kapab sèl mwayen pou yon moun rive jwenn papye divòs li, pou yo ba l dwa pou pitit li ret nan men l, pou yo fikse pansyon alimantè li dwe resevwa, sa vle di montan lajan moun li te marye avè l la dwe ba li regilyèman, pou l jwenn kòb yon konpayi asirans dwe l, pou yo aksepte mete l nan lis moun yon konpayi ki fè fayit dwe, oubyen pou l pwouve yon testaman valab. Gen lòt sitiyasyon ankò kote yon frè oubyen yon sè ka panse li nesesè pou l al nan tribinal pou l pwoteje tèt li nan yon konfli kote li enplikea.

Si yon kretyen ki fè yon pwosè konsa pa fè l nan entansyon pou l nui lòt kretyen an, pwosè sa a gendwa pa vyole prensip ki gen nan konsèy Pòl te bay anba enspirasyon Bondye ab. Sepandan, sa ki dwe priyorite pou tout kretyen se sangtifikasyon non Jewova, se lapè ak inite nan kongregasyon an. Bagay prensipal ki idantifye disip Kris yo se lanmou yo gen lakay yo, e “lanmou [...] pa chèche pwòp enterè l”. — 1 Korentyen 13:4, 5; Jan 13:34, 35.