Poukisa gen anpil soufrans konsa?

1, 2. Ki sa anpil moun mande?

YON sounami detwi yon vilaj. Yon mesye ouvè kout zam nan yon legliz, li blese anpil moun e li touye anpil moun. Kansè retire lavi yon manman ki kite senk pitit dèyè.

² Lè gen katastwòf oswa malè konsa ki rive, anpil moun mande: “Poukisa?” Anpil moun mande poukisa monn nan chaje lahèn ak soufrans konsa. Èske w pa janm mande tèt ou sa?

3, 4. a) Ki kesyon Abakouk te poze? b) Ki jan Jewova te reponn li?

³ Nan Labib, nou aprann gen yon seri gason ki te gen lafwa solid nan Bondye ki te poze kesyon konsa tou. Pa egzanp, pwofèt Abakouk te mande Jewova: “Poukisa w kite m wè move bagay k ap fèt? E poukisa w tolere moun k ap toupizi lòt moun? Poukisa gen zak kraze brize ak zak vyolans devan je m? E poukisa gen anpil diskisyon ak hinghang?” — Abakouk 1:3.

⁴ Nan Abakouk 2:2, 3, nou jwenn repons Bondye te bay Abakouk pou kesyon l yo e nou jwenn pwomès Bondye te fè pou l korije sitiyasyon an. Jewova renmen moun anpil. Labib di: “Li gen sousi pou nou.” ​(1 Pyè 5:7). An reyalite, Jewova pa vle wè soufrans pi rèd pase nou (Ezayi 55:8, 9). Kidonk, annou egzamine kesyon sa a: Poukisa gen anpil soufrans konsa nan monn nan?

 5. Ki sa anpil anseyan relijye di konsènan soufrans? Ki sa Labib anseye?

⁵ Souvan, gen pastè ak pè ak anseyan relijye ki di se volonte Bondye lè moun ap soufri. Genyen ki konn di tout sa k rive yon moun, san wete malè, Bondye te gentan deside l e nou pap janm ka konprann poukisa. E gen lòt ki konn menm di moun mouri pou yo ka al jwenn Bondye nan syèl, san wete timoun piti. Men, se pa vre. Jewova pa janm lakòz move bagay rive. Labib di: “Li enposib pou vrè Dye a aji ak mechanste, pou Toupisan an fè sa ki mal!” — Jòb 34:10.

 6. Poukisa anpil moun blame Bondye pou tout soufrans ki gen nan monn nan?

⁶ Anpil moun blame Bondye pou tout soufrans ki gen nan monn nan paske yo panse se Bondye k ap dirije monn nan. Men, nan chapit 3 a, nou te aprann vrè chèf monn nan se Satan Ledyab.

7, 8. Poukisa gen anpil soufrans konsa nan monn nan?

⁷ Labib fè nou konnen “lemonnantye anba pouvwa Mechan an”. (1 Jan 5:19.) Satan, ki chèf monn sa a, mechan anpil e li kriyèl. L ap “twonpe lemonnantye”. (Revelasyon 12:9.) Anpil moun imite l. E se youn nan rezon ki fè monn nan chaje avèk manti, lahèn ak vyolans konsa.

⁸ Gen lòt rezon ankò ki fè gen tout soufrans sa yo nan monn nan. Apre Adan ak Èv te fin fè rebelyon, yo te transmèt peche bay pitit yo. E akoz peche, lèzòm fè moun parèy yo soufri. Souvan, youn vle vin pi enpòtan pase lòt. Yo batay, y al nan lagè, e yo fè lòt moun abi (Eklezyas 4:1; 8:9). Pafwa moun soufri akoz ‘move moman ak malè ki rive sou yo sanzatann’. (Eklezyas 9:11.) Lè yo twouve yo yon move kote nan yon move moman, aksidan ak lòt move bagay kapab rive yo.

 9. Poukisa nou mèt sèten Jewova gen bonjan rezon pou l kite soufrans kontinye?

⁹ Jewova pa janm lakòz soufrans. Nou pa dwe blame l pou lagè, krim ak move tretman moun ap fè moun sibi. Se pa Bondye ki lakòz katastwòf tankou tranblemanntè, siklòn ak inondasyon. Men, petèt w ap mande tèt ou: ‘Si se Jewova ki gen plis pisans nan tout linivè, poukisa l pa anpeche bagay terib sa yo rive?’ Nou konnen Bondye gen anpil sousi pou nou, se sèten, li gen bonjan rezon pou l kite soufrans kontinye. — 1 Jan 4:8.

10. Ki fason Satan te akize Jewova?

¹⁰ Nan jaden Edenn nan, Dyab la te twonpe Adan ak Èv. Satan te akize Bondye kòm yon move Dirijan. Li te fè konnen Bondye anpeche Adan ak Èv jwenn sa ki bon. Satan te vle yo kwè li t ap yon pi bon dirijan pase Jewova e yo pa bezwen Bondye. — Jenèz 3:2-5; gade nòt 27.

11. Ki kesyon nou bezwen reponn?

¹¹ Adan ak Èv te dezobeyi Jewova e yo te fè rebelyon kont li. Yo te panse yo te gen dwa pou yo deside pou tèt yo sa ki byen ak sa ki mal. Ki jan Jewova t apral pwouve rebèl yo te gen tò e li konnen sa ki pi bon pou nou?

12, 13. a) Poukisa Jewova pa t detwi rebèl yo tousuit? b) Poukisa Jewova kite se Satan ki chèf monn sa a e poukisa li kite lèzòm dirije tèt yo?

¹² Jewova pa t detwi Adan ak Èv tousuit. Okontrè, li te kite yo fè pitit. Apre sa, Jewova te bay posiblite pou pitit Adan ak Èv yo chwazi kiyès yo vle kòm chèf yo. Objektif Jewova se te pou tè a plen ak moun pafè, e sa ap fèt kèlkeswa sa Dyab la eseye fè. — Jenèz 1:28; Ezayi 55:10, 11.

¹³ Satan te akize Jewova devan plizyè milyon zanj (Jòb 38:7; Dànyèl 7:10). Se sa k fè Jewova te bay Satan tan pou l pwouve si akizasyon l lan se laverite. Mete sou sa, Bondye te bay lèzòm tan pou yo eseye pwòp gouvènman yo anba direksyon Satan pou montre si yo kapab reyisi san èd Bondye.

14. Ki sa tan ki pase yo pwouve?

¹⁴ Depi plizyè milye ane lèzòm ap eseye dirije tèt yo, men, yo pa reyisi. Sa pwouve Satan se yon mantè. Lèzòm vrèman bezwen èd Bondye. Pwofèt Jeremi te gen rezon lè l te di: “O Jewova, mwen byen konnen se pa lòm ki pou chwazi chemen l ap suiv. Se pa lòm ki pou deside ki kote l ap met pye l.” — Jeremi 10:23.

15, 16. a) Poukisa Jewova pèmèt soufrans kontinye pandan tout tan sa a? b) Poukisa Jewova pa rezoud pwoblèm Satan lakòz yo?

¹⁵ Poukisa Jewova pèmèt soufrans kontinye pandan tout tan sa a? Poukisa li pa anpeche bagay mal rive? Sa pran tan pou pwouve gouvènman Satan an echwe. Lèzòm eseye tout kalite gouvènman, anyen pa mache. Menm lè yo fè anpil pwogrè nan domèn lasyans ak nan teknoloji, gen plis enjistis, plis povrete, plis krim, e pa t janm gen lagè konsa. Nou pa ka dirije tèt nou byen san Bondye.

¹⁶ Sepandan, Jewova pa rezoud pwoblèm Satan lakòz yo. Si Bondye te fè sa, sa t ap montre li soutni dominasyon Satan an, e Bondye pa t ap janm fè yon bagay konsa. Epitou, lèzòm t ap kwè yo ka dirije tèt yo byen. Men, sa se manti, e Jewova pa t ap soutni manti sa a tou. Li pa janm bay manti. — Ebre 6:18.

17, 18. Ki sa Jewova pral fè ak tout dega Satan lakòz yo?

¹⁷ Èske Jewova kapab elimine tout dega rebelyon Satan ak lèzòm lakòz la? Wi. Pou Bondye, tout bagay posib. Jewova konnen ki lè tout akizasyon Satan te fè yo pral jwenn yon repons total. Lè sa a, li pral fè tè a tounen yon paradi, jan l te dwe ye a. Tout moun ki nan “tonm” pral resisite (Jan 5:28, 29). Moun pap janm ni malad ni mouri. Jezi pral elimine tout dega Satan lakòz yo. Jewova pral sèvi ak Jezi “pou l kraze travay Dyab la”. (1 Jan 3:8.) Nou gen Jewova rekonesans poutèt li montre pasyans avèk nou pandan tan sa a yon fason pou n ka aprann konnen l e pou n ka deside chwazi l kòm Chèf nou. (Li 2 Pyè 3:9, 10.) Menm lè n ap soufri, li ede nou andire. — Jan 4:23; li 1 Korentyen 10:13.

¹⁸ Jewova pa fòse nou chwazi l kòm Chèf nou. Li bay lèzòm libète pou yo deside. Ann egzamine sa kado ki gen anpil valè sa a vle di pou nou.

19. Ki kado estrawòdinè Jewova ban nou? Poukisa nou dwe gen rekonesans pou kado sa a?

¹⁹ Kado estrawòdinè sa a Jewova ban nou an, anpalan de libète nou genyen pou nou deside, fè nou pa menm ak bèt yo ditou. Yo sitou aji pa ensten, men nou menm nou ka chwazi fason nou vle viv lavi nou e nou ka deside si nou vle fè Jewova plezi (Pwovèb 30:24). Epitou, nou pa tankou yon aparèy ki fè sèlman sa yo te envante l pou l fè a. Nou gen libète pou nou chwazi ki moun nou vle ye, ki moun nou vle kòm zanmi nou e ki sa nou vle fè ak lavi nou. Jewova vle nou jwi lavi a.

20, 21. Ki pi bon chwa ou ka fè depi kounye a?

²⁰ Jewova vle nou renmen l (Matye 22:37, 38). Li tankou yon papa ki kontan tande pitit li di l “Mwen renmen w”, lè se ak tout kè l pitit la di l sa, san se pa fòse yo fòse l. Jewova ban nou libète pou nou chwazi si nou vle sèvi l oswa si nou pa vle sèvi l. Satan ansanm ak Adan ak Èv te chwazi rejte Jewova. Ki jan w ap sèvi ak libète ou genyen pou w deside a?

²¹ Sèvi ak libète ou genyen pou w deside a pou w sèvi Jewova. Gen plizyè milyon moun ki deside fè Bondye plezi e ki deside rejte Satan (Pwovèb 27:11). Kounye a, ki sa w ka fè pou w ka la nan monn nouvo Bondye a lè l ap retire tout soufrans. Chapit ki vin apre a pral reponn kesyon sa a.