Jewova pral fè non l jwenn glwa pou tout letènite.
Kesyon Lektè Yo Poze
Ki jan atik ki gen tit “Se pou non w vin sen” ki parèt nan Toudegad jen 2020 an ede n pi byen konprann kwayans nou genyen anrapò ak non Jewova e ak dwa l genyen pou l dirije antanke Souvren an?
▪ Nan atik nou sot site la a, nou te aprann gen yon sèl kesyon ki enpòtan anpil ki konsène tout moun ak tout zanj yo: se kesyon konsènan non Jewova ki estrawòdinè ki dwe vin sen. Dwa Jewova genyen pou l dirije antanke Souvren an, sa vle di se fason Li dirije a ki pi bon, se yon aspè nan kesyon enpòtan sa a. Epitou, fidelite lèzòm se yon lòt aspè nan kesyon enpòtan sa a.
Bon, poukisa nou di kesyon ki pi enpòtan an gen rapò ak non Jewova e pou non l vin sen? Ann wè twa rezon.
Satan ap sal non Bondye depi rebelyon ki te fèt nan jaden Edenn nan.
Premyèman, Satan te atake non Jewova, oswa repitasyon l, nan jaden Edenn nan. Kesyon Satan te poze Èv pou l te twonpe l la te vle fè konprann Jewova pa yon Dye ki donan e li bay Adan ak Èv yon seri restriksyon ki pa rezonab. Apre sa, Satan fè konnen kareman sa Jewova di yo pa laverite. Anfèt, li vle di Bondye se yon mantè. Konsa, li sal non Jewova. Li vin tounen “Dyab la” ki vle di “medizan”. (Jan 8:44.) Piske Èv te kwè manti Satan te bay yo, li te dezobeyi Bondye, li pa t aksepte Bondye kòm Chèf li (Jen. 3:1-6). Jis kounye a, Satan kontinye ap sal non Bondye, l ap bay manti sou Jewova. Moun ki kwè manti sa yo gen plis tandans dezobeyi Jewova. Donk, pou pèp Bondye a, pi gwo enjistis ki genyen se lefètke yo sal non Jewova, yon non ki sen. Se pi gwo rezon ki lakòz tout soufrans ak tout mechanste ki gen nan monn nan.
Dezyèmman, Jewova detèmine pou l defann non l, pou l retire tout vèni yo lage sou li, e l ap fè sa pou byen tout kreyasyon an. Se sa k pi enpòtan pou Jewova. Se poutèt sa li di: “Se sèten m ap fè moun rekonèt non estrawòdinè mwen genyen an se yon non ki sen.” (Eze. 36:23). E Jezi te montre aklè sa k dwe pi enpòtan pou sèvitè fidèl Jewova yo lè y ap priye. Men sa l te di: “Se pou non w vin sen.” (Mat. 6:9). Se pa ni de ni twa fwa Bib la montre jan sa enpòtan pou n bay non Jewova glwa. Ann pran kèk egzanp: “Onore Jewova pou glwa non l merite.” (1 Kwo. 16:29; Sòm 96:8). “Chante louwanj pou non l ki gen glwa.” (Sòm 66:2). “M ap toujou bay non w glwa.” (Sòm 86:12). Youn nan okazyon Jewova te pale detan l nan syèl la se te nan tanp lan nan Jerizalèm, lè Jezi te di: “Papa, fè non w jwenn glwa.” Men sa Jewova te reponn: “Mwen te fè l jwenn glwa e m ap fè l jwenn glwa ankò.” — Jan 12:28.a
Twazyèmman, objektif Jewova ap toujou gen rapò ak non l, oswa repitasyon l. Fè yon ti reflechi: Apre dènye eprèv ki pral gen nan fen Rèy mil an Kris la, ki sa k ap rive annapre? Èske kesyon pou non Jewova vin sen an, yon kesyon ki enpòtan anpil, pral kontinye lakòz divizyon nan mitan zanj yo e nan mitan lèzòm? Pou n jwenn repons lan, ann retounen sou de aspè ki gen rapò ak kesyon sa a: fidelite lèzòm ak dwa Jewova genyen pou l dirije antanke Souvren. Èske moun ki fidèl yo pral kontinye jwenn eprèv k ap fè l difisil pou yo ret fidèl? Non. Y ap pafè e y ap deja pase dènye eprèv la. Yo pral gen lavi ki pap janm fini an. Èske pral kontinye gen diskisyon, e menm divizyon, pami zanj yo e pami lèzòm sou dwa Jewova genyen pou l dirije antanke Souvren an? Non. Lè sa a, tout kreyati nan syèl la ak tout moun sou tè a pral ini e yo tout ap aksepte Jewova kòm Dirijan yo pou toutan. Bon, e non Jewova menm?
Lè sa a, tout moun ap konn laverite sou Jewova, non l ap vin sen nèt. Sepandan, non Jewova ap toujou pi enpòtan pou tout sèvitè fidèl li yo ni nan syèl la ni sou tè a. Sa k fè sa? Paske y ap wè Jewova kontinye fè yon seri bagay estrawòdinè. Ann fè yon ti reflechi: Avèk imilite, Jezi pral remèt Jewova tout pouvwa, konsa, Bondye pral “tout bagay pou tout moun”. (1 Kor. 15:28.) Apre sa, tout moun sou tè a pral jwi “libète pitit Bondye yo genyen an nan laglwa”. (Wom. 8:21.) Epitou, Jewova pral fin reyalize objektif li te toujou genyen an, sa vle di pou l gen yon fanmi ki gen tèt ansanm ki gen ladan l tout pitit li yo ni nan syèl la ni sou tè a. — Efe. 1:10.
Ki efè sa n sot egzamine la yo pral genyen sou fanmi Jewova nan syèl la e sou tè a? Se sèten n ap toujou gen yon gwo anvi pou n fè louwanj pou bèl non Jewova genyen an. Men sa David, youn nan moun ki te patisipe nan ekri sòm yo, te ekri: “Se pou yo louwe Jewova Dye [...]. Se pou yo louwe non l ki gen glwa pou toutan.” (Sòm 72:18, 19). Pandan tout letènite, n ap kontinye jwenn anpil lòt bon rezon pou n fè sa.
Dayè, non Jewova reprezante tout sa ki gen rapò avè l. Se sa k fè, lè n panse ak non Jewova, nou sitou panse ak lanmou Li genyen (1 Jan 4:8). N ap toujou sonje se paske Jewova gen lanmou ki fè l kreye nou, ki fè l te bay ranson an, e ki fè l montre se fason li dirije a ki pi bon. Men, n ap kontinye wè jis nan ki pwen Jewova renmen nou. Pandan tout letènite, n ap anvi vin pi pwòch avè l antanke Papa nou e n ap anvi chante louwanj pou non l ki estrawòdinè. — Sòm 73:28.