Wat Luke Wen Write
12 Dat time, had tousands of guys dat wen gadda togedda. Had so much dat dey wuz stepping on each oddas feet. Den Jesus turn to his guys an sed: “Watch out fo da yeast of da Pharisees.* Dat mean, watch out so you no come two-face like dem. 2 Cuz no moa notting dat stay cova up dat not goin be seen. An tings dass secret goin come out in da open. 3 So wateva you say in da dark, peopo goin hea um in da light. An wat you whispa behind one closed door, peopo goin yell um from da roof. 4 So my frenz, let me tell you, no sked da guy dat can kill da body but afta dat, he no can do notting else to you. 5 But I goin show you who fo be sked of. Be sked of da One dat can kill you an throw you in Ge·henʹna.* Dass da One you gotta be sked of. 6 Try tink, you can buy five sparrows wit two coins dass worth ony litto bit.* But yoa Faddah no foget any one of dem. 7 An you know wat? He even know how much hair you get on top yoa head. So no sked, you worth moa den plenny sparrows.
8 “I tell you, evrybody who tell dey know me in front peopo, da Son of man* goin say he know him in front God’s angels. 9 But da guy who tell in front peopo dat he donno me, I goin say dat I donno him in front God’s angels too. 10 An evrybody dat say someting bad about da Son of man, he goin be let go fo dat. But whoeva talk stink an go agains God’s powa not goin be let go. 11 Wen dey bring you in front one public hearing,* govament rulas, an guys in charge, no worry about how you goin defend yoaself or wat you goin say. 12 Cuz right den an dea* God goin use his powa fo tell you wat fo say.”
13 Den somebody in da crowd sed to him: “Teacha, tell my braddah fo take da stuff my faddah wen leave, an split um up wit me.” 14 He tell him: “Brah, dass not my job fo judge you or split up yoa guys stuff.” 15 Den he sed to da crowd: “Watch out an be keaful fo no be greedy, cuz even wen somebody get plenny stuff, da tings he get not goin give him life.” 16 Den he tell dem one story. He sed: “One rich guy had one piece land dat wen give moa den wat he expeck. 17 So he start fo tink to himself, “Wat I goin do now cuz I no moa one place fo put all my grain?” 18 Den he sed, “Dis wat I goin do. I goin break down my warehouses an build moa bigga ones, an dass wea I goin put my grain an all my odda stuff. 19 Den I goin tell myself:* “You get plenny good tings dat goin las fo years. Take it easy. Eat, drink, an enjoy yoaself.”” 20 But God tell um, “Wat you tinking? Tonight you goin die. Den who goin get all da stuff you wen stash?” 21 Dass wat goin happen to da guy dat pile up plenny tings fo himself but to God he stay pooa.”
22 Den he sed to his guys: “Dass how come I tell you, no worry all da time about how you goin live, like wat you goin eat or wat you goin wea, 23 cuz yoa life iz moa importan den food an clothes. 24 Try check out da birds. Dey no plant seed or gadda um. Dey no moa one barn or one place fo store um away. Still yet, God make shua dey get food. You no tink you worth way moa den da birds? 25 You tink stressing out goin make you live litto bit moa long?* 26 So den, if you no can even do dat, why you worry about dose odda tings? 27 Try look how da flowas grow. Dey no work an dey no sew clothes. But I tell you dis, not even Solʹo·mon wit all his nice stuff wen look az good az one of dem. 28 Da plants grow today an den tomorrow get thrown in da fiyah, but God still make shua dey look nice. If he do dat fo da plants, fo shua he radda give you clothes, you guys who trus God ony litto bit! 29 So stop worrying about wat you goin eat an wat you goin drink, an stop stressing about um. 30 Peopo all ova da world worry about all dis kine stuff, but yoa Faddah in heaven know dat you need all dese tings. 31 Instead, work hahd fo make God’s Govament da numba one ting in yoa life, an he goin make shua you get all da stuff you need.
32 “No sked, litto group of sheep, cuz yoa Faddah happy fo give you his Govament. 33 Sell yoa stuffs an help da guys dat need um.* Make money bags dat not goin wea out. Dat mean, go get treshas in heaven dat goin las. Dass wea da thief no can get to um an da moth no can eat um. 34 Cuz wea yoa tresha stay, dass wea yoa heart goin be.
35 “Dress fo work an be ready.* Make shua yoa lamps stay burning. 36 You gotta be like da workas dat wait fo dea masta come back from da wedding party, so dat wen he come an knock on da door, dey can open um right away. 37 Wen da masta come, da workas dat goin be happy iz da ones he find watching. I telling you, he goin dress fo work an tell dem fo sit at da table an he goin take kea dem. 38 An if he come real late night time* or supa early in da morning,* an he see dem ready, dey goin be happy! 39 Tink about dis, if one guy know wat time at night da thief wuz goin break in his house, he no would let da thief break in. 40 You too, stay ready cuz at one time you no tink so, da Son of man goin come.”
41 Den Peter sed: “Lord, you telling dis story jus fo us, or fo evrybody?” 42 An da Lord sed: “Who da faithful worka, da one dass akamai,* dat da masta goin put in charge of his odda workas fo keep giving dem da food dey need wen da time stay right? 43 Dat worka goin be happy if his masta come an see him doin his job! 44 I tell you fo shua, he goin put him in charge ova all his stuff. 45 But if da worka start fo turn bad an tink, “My masta taking way too long fo come,” an he start fo beat up da odda workas an eat an drink an get drunk, 46 da masta of dat worka goin come on one day he neva expeck, at one time he neva know, an dat masta goin make him suffa plenny an throw him wit da guys dass not faithful. 47 Da worka who knew wat his masta wanted but neva get ready or do wat he tell, he goin get beat up plenny. 48 But da one dat neva undastan wat his masta wanted an wen do bad tings, he not goin catch az much cracks. Fo shua, evrybody dat get plenny kuleana, dey gotta do um. An if somebody get put in charge fo take kea plenny tings, peopo goin expeck him fo do um right.
49 “I wen come fo start one fiyah on da earth. But if I awready wen light um, wat else I can wish fo? 50 But I get one diffren kine baptizum* fo go thru, an I goin keep stressing til iz pau! 51 You tink I wen come hea on da earth fo make evrybody get along? No ways! I wen come fo split peopo up. 52 Cuz from now on, in one family goin get five guys dat go agains each odda, three agains two an two agains three. 53 Dey goin be split up, faddah agains his son an son agains his faddah, maddah agains her daughtah an daughtah agains her maddah, maddah in law agains her daughtah in law an daughtah in law agains her maddah in law.”
54 Den he tell da crowd too: “Wen you see one cloud coming from da west side, right away you tell, “Goin get one storm,” an it come. 55 An wen you see dat one south wind stay blowing, you tell, “Ho! Goin be hot,” an it happen. 56 You guys so two-face. You know how fo look da earth an sky an figga wat da wedda goin be, but how come you no can figga out wat stay happening right now? 57 How come you no figga out fo yoaself wat iz right? 58 Fo exampo, wen you goin to da town officer wit somebody dat like take you court, befoa you get dea try fo fix da problem so dat he no make you go in front da judge, an da judge goin give you to da guard, an da guard goin throw you in jail. 59 I tell you, you not goin get outa dea til you pay all da money* you owe.”