Wat Luke Wen Write

22 Da Festival Of Da Bread Dat No Moa Yeast,* dass called da Passova,* wuz coming up. 2 An da scribes* an da main pries guys wuz sked of wat da peopo wuz goin do, so dey try fo figga out one good way fo get rid of Jesus. 3 Den Satan wen get control of Judas Is·carʹi·ot’s heart an affeck how he tink. He wuz one of da 12 guys. 4 So he go talk to da main pries guys an da tempo supavizas about how fo set up Jesus fo dem. 5 Dey wuz happy fo hea dis an promise fo give Judas silva money. 6 He wuz good wit dat deal an wen start fo look fo one chance fo set up Jesus. But he neva like do um wit peopo aroun.

7 Da day of Da Festival Of Bread Dat No Moa Yeast wen come. Dass wen dey kill da animal fo da Passova sacrifice. 8 So Jesus sen Peter an John, an he tell dem: “Go get da Passova ready fo us eat.” 9 Dey tell um: “Wea you like us go fo get um ready?” 10 He sed to dem: “Try look! Wen you go inside da town, one guy dass carrying one clay watta jar goin meet you. Wateva house he go inside, go wit him. 11 An tell da landlord, “Da Teacha sed fo ask you: “Wea yoa guest room stay fo me an my guys eat da Passova?”” 12 An dat guy goin show you one big room upstairs dass all set up awready. Get da Passova food ready ova dea.” 13 So dey leave an evryting happen jus like Jesus wen tell dem, an dey make tings ready fo da Passova.

14 Wen da time come, he sit at da table wit da aposals. 15 An he tell dem: “I been waiting fo da Passova come so I can eat um wit you befoa I suffa. 16 Cuz I tell you, I not goin eat um again til evryting da Passova rep come tru in God’s Govament.” 17 Jesus take one cup an give tanks to God. Den he sed: “Drink dis an pass um down to each odda. 18 Cuz I telling you, from now on, I not goin drink wine anymoa til God’s Govament come.”

19 An he take da bread an give tanks to God. He broke um up, give um to dem, an tell: “Dis rep my body dat I goin sacrifice fo you. Keep doin dis fo rememba me.” 20 He do dis afta da Passova, an he do da same ting wit da cup. He tell: “Dis cup rep da new deal dat goin start wen I give my blood az one sacrifice fo you.

21 “But try look! Da guy dat goin stab me in da back stay wit me at da table. 22 Fo shua, evryting da Scripchas wen tell about me, da Son of man,* goin happen. But goin be horraz fo da guy dat stab me in da back!” 23 Wen dey hea dis, dey start fo talk wit each odda about which one of dem would tink fo do dat.

24 An dey wuz beefing wit each odda about who wuz da mos importan. 25 But Jesus sed to dem: “Da kings of da world boss aroun da peopo dey rule ova, an peopo give spesho names* to da big shot guys who control dem. 26 But no be lidat. Da mos importan guy gotta make like he da younga one, an da guy in charge gotta make like he da worka. 27 Who moa importan? Da guy eating at da table or da guy dass serving? Da guy eating at da table yeah? But me, I da guy dass serving you.

28 “But you da guys dat wen stick wit me thru all my hahd times. 29 Cuz of dat, jus like my Faddah wen make one deal wit me fo be da rula of one govament, I make one deal wit you, 30 so dat you can eat an drink wit me at my table in my Govament. You goin sit on thrones an judge da 12 Israel tribes.

31 “Simon,* Simon, try lissen! Satan sed he like shake all you guys up, jus like how one guy do wit da wheat. 32 But I wen pray hahd fo you dat you no lose yoa faith. An wen yoa faith come strong again an you come back to me, go make yoa braddahs strong.” 33 Den Peter tell him: “Lord, I stay ready fo be lock up wit you an fo die wit you.” 34 But Jesus sed: “I tell you Peter, befoa one roosta crow today, three times you goin tell dat you donno me.”

35 An Jesus tell dem: “Da time I wen sen you guys out witout money, or one bag wit food, or slippas, you guys neva need notting ah?” Dey sed: “No, we neva!” 36 Den he sed to dem: “But now, if you get money an one food bag, take um. An if you no moa one sword, go sell yoa coat an buy one. 37 Cuz I telling you dat evryting da Scripchas wen say, gotta happen to me. Like, “He wuz treated like da crooks.” All da tings about me iz coming tru.” 38 Den dey sed: “Lord, try look! Get two swords ova hea.” He sed to dem: “Dass nuff.”

39 Jesus leave an go da Mount of Olives like he always do, an his guys go too. 40 Wen dey get dea, he tell dem: “Keep on praying so dat you no give in to sin.” 41 He go litto bit away* from dem an go on his knees an start fo pray. 42 He tell: “Faddah, if you like, take dis cup* away from me. But make happen wat you like, not wat I like.” 43 Den one angel from heaven wen show up an make him strong. 44 But Jesus wuz so stress out dat he pray even moa hahd. His sweat come like drops of blood dat fall to da groun. 45 Wen he pau pray, he go to his guys an see dem all knock out cuz dey wuz sad afta dey find out wat goin happen to him an dem. 46 He tell dem: “Why you sleeping fo? Get up an keep praying, so you no give in to sin.”

47 Wen he wuz still talking, try look! Plenny peopo come, an da guy named Judas, one of da Twelve, wuz da one bringing dem. He go up to Jesus an kiss um. 48 But Jesus sed to him: “Judas, you goin sell me* out wit one kiss?” 49 Wen da guys aroun him see wat goin happen, dey tell: “Lord, you like us use oua swords fo fight dem o wat?” 50 One of dem even cut off da right ear of one worka fo da main pries. 51 But Jesus tell dem: “Eh dass enuff.” An he touch da ear an heal um. 52 Den Jesus tell da main pries guys, eldas, an supavizas of da tempo dat wen come fo get him: “You come hea fo arrest me wit swords an clubs az if I one crook? 53 Wen I wuz wit you evryday in da tempo, you neva grab me. But dis yoa time an da time fo da guys dass in da dark fo take control.”

54 Den dey arrest him an take him away, an dey bring him to da main pries guy’s house. But Peter follow him from far. 55 Wen some guys light one fiyah in da middo of da courtyard an sit down togedda, Peter wen sit wit dem. 56 But one girl dat work dea see him sitting by da fiyah. She look him real good an sed: “Eh dis guy wuz wit Jesus too ah?” 57 But he say: “No way girl, I donno him.” 58 Afta litto while, somebody else spock him an tell: “You one of dem too.” But Peter sed: “Brah, I not.” 59 About one hour layta, anodda guy keep saying: “Garanz dis guy wuz wit um too, cuz fo shua, he one Gal·i·leʹan!” 60 But Peter sed: “I donno wat you talking about.” An wen he wuz still talking, right den an dea, one roosta crow. 61 Den Jesus turn an look right at Peter, an Peter rememba wat Jesus sed to him: “Befoa one roosta crow today, you goin tell you donno me three times.” 62 Den he go outside an cry real hahd.

63 Da guys dat wuz guarding Jesus wen start fo make fun of him an hit um. 64 Afta dey cova his face, dey tell him: “Show you one prophet an tell us who hit you!” 65 An dey disrespeck God wen dey sed plenny odda bad tings about Jesus.

66 Wen day time come, da group of eldas wen gadda togedda. Dass da scribes an da main pries guys. Dey bring um inside dea High Court* an sed: 67 “Tell us if you da Christ.” But he sed to dem: “You no would believe um even if I told you. 68 If I question you, you not goin tell me notting. 69 But from now on, da Son of man goin sit on da right side of da God dat get powa.” 70 Wen dey hea dis, dey all tell: “So wat, you saying you da Son of God?” He tell dem: “You da one saying um.” 71 Dey sed: “We no need hea notting else from nobody. We wen hea um from his own mout.”