Wat Luke Wen Write
7 Wen he pau tell dese tings to da peopo, he go Ca·perʹna·um. 2 Had one army officer* wit one worka dat he kea plenny about. Da worka wuz real sick an about fo mahke. 3 Wen da army officer hea about Jesus, he sen some eldas of da Jews fo go ask him fo come heal his worka. 4 Dey go to Jesus an beg um: “Please help dis officer. He one good guy, 5 cuz he love oua peopo an wen build* oua synagog.”* 6 So Jesus go wit dem. But wen he almos to da house, da army officer awready sen frenz to him fo tell: “Mista, no bodda come, cuz I not good enuff fo have you come my house. 7 Dass how come I neva go to you. But jus say da word fo make my worka come good. 8 I say dis cuz I get guys in charge of me, an I get soldiers dat I stay in charge of. I tell one soldier “Go!” an he go. An I tell da odda guy “Come!” an he come. An wen I tell my worka “Do dis!” he do um.” 9 Jesus trip out wen he tell dis, an he look at all da guys following him an sed: “Fo shua, I neva find nobody in Israel wit dis much faith.” 10 Wen da army officer’s frenz go back to da house, dey wen see dat da worka wuz all good.
11 Den Jesus go one town called Naʹin, an his guys an plenny odda peopo wuz wit him too. 12 Wen he stay right outside da town, try look! peopo wuz carrying out one dead guy fo bury him. He wuz his maddah’s ony boy.* On top of dat, she wuz one widow. An had one good size crowd from da town wit her. 13 Wen da Lord see her, he pity her plenny an sed to her: “No cry.” 14 Den he go up to da funeral stretcha an touch um, an da guys dat wuz carrying um wen stop. Den Jesus sed: “Eh boy, I tell you, get up!” 15 An he wen sit up an start fo talk, den Jesus give him back to his maddah. 16 Dis wen shock all da peopo, an dey start fo praise God an tell: “One prophet wit plenny powa stay wit us,” an, “God neva foget his peopo.” 17 An dis news about Jesus wen spread all ova Ju·deʹa an da places aroun dea.
18 John’s followas wen tell him about all dese tings. 19 So John sen two of his followas to da Lord fo ask: “You da One we wuz waiting fo, or we waiting fo somebody else?” 20 Wen dey come by him dey tell: “John da Baptiza sen us hea fo ask you, “You da One we wuz waiting fo, or we waiting fo anodda guy?”” 21 Same time, Jesus wen heal plenny peopo wit all kine healt problems, mayjah kine too. He kick out da demons, an make blind peopo see. 22 Den he tell dem: “Go back an tell John all da tings you wen see an hea: Da blind can see, da cripple guys stay walking, da lepers wen come clean, da deaf can hea, da dead stay coming back to life, an da peopo dass pooa an hurting get fo hea da good news. 23 Da guys dat no look fo one reason fo stumbo cuz of me goin be happy.”
24 Wen John’s guys leave, Jesus start fo talk to all da peopo about him. He tell: “Wat you wen go out in da boonies fo see? One guy dass weak, like da tall grass da wind blow all ova? No. 25 So wat you wen see? One guy in fancy clothes? No, da guys dat wea expensive clothes an get all da nice tings dey like live in da king’s house. 26 Fo real den, wat you wen go out dea fo see? One prophet? John iz one prophet. But he way moa importan den all da prophets. 27 Da Scripchas wen tell about John: “Try look! I goin sen my messenja befoa you come. He goin clear da road an make um ready fo you.” 28 I goin tell you dis, outa evrybody who eva wen live, nobody moa importan den John. But somebody who ony litto bit importan in God’s Govament stay moa importan den him.” 29 (Wen all da peopo an tax collectas hea dis, dey tell dat God do evryting right, cuz dey wuz baptize by John. 30 But da Pharisees* an da guys dat wen know da Law real good neva lissen to wat God tell, cuz dey no wuz baptize by John.)
31 Den Jesus tell: “Dis generation now days, who I can compare dem to an who dey ack like? 32 Dey jus like litto kids dat play outside in da market dat tell each odda: “We wen play da flute fo you, but you neva dance. We wen cry real loud, but you neva cry wit us.” 33 Same ting, John da Baptiza wen fast an neva drink wine, but you tell: “Ho! He get one demon.” 34 But I* wen eat an drink an you say: “How’s dis guy! He pig out an suck um up. He cruz wit tax collectas an sinnaz!” 35 You goin know one guy stay akamai wen you look how tings turn out fo him.”
36 Had one Pharisee named Simon dat wen keep asking Jesus fo eat wit him. So he go inside his house an sit at da table. 37 An try look! One wahine dat evrybody in da town know az one sinna wen find out dat Jesus wuz eating at da Pharisee guy’s house. So she go dea wit one bottle* of perfume oil. 38 She go behind him by his feet. She cry an wen let her tears wet his feet, an she wipe um off wit her hair. Den she kiss his feet an pour da perfume oil on um. 39 Da Pharisee dat wen invite Jesus see dis an say to himself: “If he really wuz one prophet, he would know wat kine lady dis iz dass touching him, dat she one sinna.” 40 But Jesus sed to him: “Let me tell you someting Simon.” He sed: “Yeah, Teacha?”
41 “Two guys wen owe somebody money. One guy owe 500 de·narʹi·i,* but da odda guy owe 50. 42 Wen dey neva have notting fo pay him back, he let both of dem go. So wat you tink? Which one goin love him moa?” 43 Simon tell: “I would tink da guy dat owe moa.” He tell um: “Az right.” 44 Den he look at da lady an sed to Simon: “You see dis wahine? I wen come inside yoa house an you neva give me watta fo my feet. But she wet my feet wit her tears an wipe um off wit her hair. 45 You neva kiss me, but she neva stop kissing my feet from da time I wen come. 46 You neva pour oil on my head, but she wen pour perfume oil on my feet. 47 Az why I tell you, even tho she wen sin plenny, I wen let her go cuz she love me plenny. But da guy dat get let go fo litto bit, love ony litto bit.” 48 Den he tell her: “Yoa sins stay let go.” 49 Da guys at da table wit him start fo say to each odda: “Who dis guy dat can fogive sins?” 50 But Jesus sed to da wahine: “Cuz of yoa faith, God wen save you. Go an no worry.”*