Զաքարիա

4 Հրեշտակը, որը խոսում էր ինձ հետ, վերադարձավ ու արթնացրեց ինձ, ինչպես քնած մարդուն են արթնացնում: 2 Նա հարցրեց. «Ի՞նչ ես տեսնում»:

Ես ասացի. «Մի ճրագակալ եմ տեսնում՝ ամբողջովին պատրաստված ոսկուց,+ իսկ դրա վերևում՝ մի թաս: Ճրագակալի վրա յոթ ճրագներ կան,+ այո՛, յոթն են, և այդ ճրագները յոթ խողովակներ ունեն:* 3 Ճրագակալի մոտ երկու ձիթենիներ կան,+ մեկը՝ թասից դեպի աջ, մյուսը՝ դեպի ձախ»:

4 Ինձ հետ խոսող հրեշտակին հարցրի. «Սրանք ի՞նչ են նշանակում, տե՛ր իմ»: 5 Հրեշտակն էլ ասաց. «Չգիտե՞ս՝ ինչ են նշանակում»:

Ես պատասխանեցի. «Ո՛չ, տե՛ր իմ»:

6 Այդ ժամանակ նա ասաց ինձ. «Սա է Եհովայի խոսքը՝ ուղղված Զորաբաբելին. «Ոչ թե զորքով, ոչ թե մարդկային ուժով,+ այլ իմ ոգով կլինի այս ամենը,+– ասում է Զորքերի տեր Եհովան:– 7 Ո՞վ ես դու, մե՛ծ լեռ: Դու հարթ դաշտ*+ կդառնաս Զորաբաբելի+ առաջ: Նա կբերի գլխաքարը* ուրախ բացականչությունների ներքո. «Հիասքա՜նչ է, հիասքա՜նչ»»:

8 Եհովան կրկին իր խոսքը հաղորդեց ինձ. 9 «Զորաբաբելն իր ձեռքերով դրեց այս տան հիմքը+ և իր ձեռքերով էլ կավարտի այն:+ Այդ ժամանակ դուք կիմանաք, որ Զորքերի տեր Եհովան է ինձ ուղարկել ձեզ մոտ: 10 Ինչո՞ւ եք արհամարհում համեստ սկիզբը:+ Կգա ժամանակ, երբ Զորաբաբելի ձեռքին ուղղալար* կտեսնեք* ու կուրախանաք: Դա կտեսնեն նաև այն յոթը և կուրախանան. այն յոթը Եհովայի աչքերն են, որոնք զննում են ամբողջ երկիրը»»:+

11 Ապա ես հարցրի հրեշտակին. «Ի՞նչ են նշանակում ճրագակալի աջ ու ձախ կողմերում գտնվող այս երկու ձիթենիները»:+ 12 Նաև հարցրի. «Ի՞նչ են նշանակում երկու ձիթենիների ճյուղերը,* որոնցից դուրս եկող ոսկեգույն հեղուկը երկու ոսկե խողովակներով լցվում է թասի մեջ»:

13 Նա էլ ասաց ինձ. «Չգիտե՞ս՝ ինչ են նշանակում դրանք»:

Ես պատասխանեցի. «Ո՛չ, տե՛ր իմ»:

14 Նա ասաց. «Դրանք երկու օծյալներն են, որոնք կանգնած են ողջ երկրի Տիրոջ կողքին»:+