Ինչո՞ւ պետք է որքան հնարավոր է շուտ վերայցելենք

 1. Ի՞նչ է հարկավոր աշակերտներ պատրաստելու համար։

¹ Աշակերտներ պատրաստելու համար հարկավոր է վերայցելել այն անհատներին, ովքեր ցանկանում են սովորել Եհովայի Թագավորության մասին (Մատթ. 28։19, 20)։ Իսկ որքա՞ն շուտ պետք է այցելենք նրանց։ Հաճախ դա կախված է այն բանից, թե ինչ գրաֆիկ ունենք մենք և հետաքրքրվող անհատները։

2, 3. Ինչո՞ւ պետք է որքան հնարավոր է շուտ վերայցելենք։

² Ինչո՞ւ է կարևոր շուտ վերայցելել։ Այս համակարգի վերջը մոտ է, և «Թագավորության բարի լուրը» քարոզելու գործը շուտով իր ավարտին կհասնի (Մատթ. 24։14; 1 Պետ. 4։7)։ Հետևաբար քանի դեռ «փրկության օրն» է, և հետաքրքրվող անհատները հնարավորություն ունեն քայլեր անելու, մենք պետք է հետևենք «խոսքը քարոզենք հրատապության զգացումով» հորդորին։ Ուստի պետք է որքան հնարավոր է շուտ վերայցելենք հետաքրքրություն ցույց տված անհատներին (2 Կորնթ. 6։1, 2; 2 Տիմոթ. 4։2)։

³ Սատանան ցանկանում է մարդկանց սրտից հանել Թագավորության սերմերը (Մարկ. 4։14, 15)։ Այդ պատճառով էլ հաճախ ընտանիքի անդամները, աշխատակիցները և ուրիշները սկսում են ծաղրել։ Եթե շուտ վերայցելենք, կկարողանանք հետաքրքրություն զարգացնել։ Այդպիսով թույլ չենք տա, որ ուրիշների ճնշման ներքո անհատը կորցնի իր հետաքրքրությունը։

 4. Առաջին այցելության ժամանակ ինչպե՞ս կարող ես հիմք նախապատրաստել վերայցելության համար։

⁴ Պայմանավորվիր վերայցելության համար։ Նախքան հեռանալը կոնկրետ պայմանավորվիր, թե երբ կարող եք նորից հանդիպել։ Լավ կլինի որևէ հարց առաջ քաշել՝ հաջորդ այցելության համար հիմք նախապատրաստելու նպատակով։ Շատ կարևոր է գրառումներ անել առաջին այցելության, ինչպես նաև ձեր պայմանավորվածության մասին։ Կարելի է նաև հարցնել անհատին, թե հարմար կլինի արդյոք այցելել հաջորդ օրը կամ որոշ ժամանակ անց։ Եթե հանգստյան օրերին ես առաջին անգամ քարոզել անհատին, որը աշխատում է շաբաթվա ընթացքում, ապա հավանաբար նա կհամաձայնվի, որ վերայցելես իրեն հաջորդ շաբաթ։ Ջանք թափիր պայմանավորված օրն անպայման վերայցելել (Մատթ. 5։37)։

 5. Ինչպե՞ս կկատարենք Հիսուսի տված հանձնարարությունը, եթե շուտ վերայցելենք։

⁵ Մենք հիմնավոր պատճառներ ունենք հնարավորինս շուտ վերայցելելու մարդկանց։ Ուստի հարկավոր է պայմանավորվել և շուտ վերայցելել, քանի որ «մնացած ժամանակը կարճացել է» (1 Կորնթ. 7։29)։ Որքան շուտ վերայցելենք հետաքրքրվող անհատներին, այնքան ավելի արդյունավետորեն կկատարենք Հիսուսի հանձնարարությունը։