Վերակացուներ, որ նշանակված են հոտը հովվելու համար

ԻՐ ԵՐԿՐԱՅԻՆ ծառայության ընթացքում Հիսուսը ցույց տվեց, որ իսկապես «բարի հովիվ» է (Հովհ. 10։11)։ Տեսնելով մարդկանց բազմությունը՝ «նա խղճաց նրանց, որովհետև կեղեքված էին և ցիրուցան եղած, ինչպես ոչխարներ, որ հովիվ չունեն» (Մատթ. 9։36)։ Պետրոսն ու մյուս առաքյալները տեսնում էին նրա սիրառատ հոգատարությունը։ Որքա՜ն էր Հիսուսը տարբերվում Իսրայելի կեղծ հովիվներից, որոնք այնքան էին արհամարհում հոտին, որ գառները ցրված էին ու հոգևորապես քաղցած (Եզեկ. 34։7, 8)։ Ուշադրություն դարձնելով Հիսուսի ուսուցանելու լավ օրինակին և այն բանին, թե ինչպես նա հոգ տարավ իր ոչխարներին և նույնիսկ նրանց համար իր կյանքը տվեց՝ առաքյալները սովորեցին օգնել հավատ ունեցող մարդկանց վերադառնալու դեպի Եհովան՝ «հովվի ու [նրանց] հոգիների պահապանի մոտ» (1 Պետ. 2։25)։

² Մի անգամ Պետրոսի հետ խոսելիս Հիսուսը նշեց, թե որքան կարևոր է կերակրել և հովվել ոչխարներին (Հովհ. 21։15–17)։ Անկասկած, այդ խոսքերը մեծ ազդեցություն էին թողել Պետրոսի վրա, ինչպես երևում է հետագայում երեցներին տված նրա հորդորից. «Հովվեք ձեր հոգածությանը հանձնված Աստծու հոտը ոչ թե հարկադրաբար, այլ հոժարակամորեն, ոչ թե անազնիվ շահասիրությունից դրդված, այլ ջանասիրությամբ, ոչ թե իշխելով նրանց վրա, ովքեր Աստծու ժառանգությունն են, այլ հոտին օրինակ լինելով» (1 Պետ. 5։1–3)։ Պետրոսի խոսքերը վերաբերում են նաև այսօրվա երեցներին։ Ընդօրինակելով Հիսուսին՝ նրանք պատրաստակամորեն ու ջանասիրաբար ծառայում են հոտին (Եբր. 13։7)։

³ Մենք երախտապարտ ենք սուրբ ոգով նշանակված վերակացուների ծառայության համար, քանի որ մեծ օգուտներ ենք ստանում նրանց կատարած գործից։ Օրինակ՝ վերակացուները հոգևորապես քաջալերում են ժողովում ծառայող բոլոր անհատներին և հետաքրքրվում նրանցով։ Ամեն շաբաթ նրանք ջանասիրաբար անցկացնում են ժողովի հանդիպումները, որտեղ զորանում է բոլորի հավատը (Հռոմ. 12։8)։ Այն ջանքերը, որ նրանք գործադրում են հոտը վնասակար բաներից և ամբարիշտ մարդկանցից պաշտպանելու նպատակով, նպաստում են մեր հոգևոր բարօրությանը (Ես. 32։2; Տիտոս 1։9–11)։ Ծառայության մեջ նրանց ցույց տված առաջնորդությունը մղում է մեզ լինելու ակտիվ քարոզչական գործում՝ ամեն ամիս կանոնավորաբար քարոզելով բարի լուրը (Եբր. 13։15–17)։ «Մարդկանց տեսքով պարգևների» միջոցով Եհովան հոգ է տանում իր ժողովի մասին (Եփես. 4։8, 11, 12)։

⁴ Ժողովին հոգ տանելու համար վերակացուները պետք է համապատասխանեն Աստծու Խոսքում գրված պահանջներին։ Նրանց կարելի է համարել սուրբ ոգով նշանակված միայն այն դեպքում, եթե համապատասխանում են այդ պահանջներին (Գործ. 20։28)։ Ինչ խոսք, քրիստոնյա վերակացուների համար սահմանված են սուրբգրային բարձր չափանիշներ, քանի որ վերակացու լինելը լուրջ պատասխանատվություն է։ Սակայն այդ չափանիշները այնքան բարձր չեն, որ քրիստոնյա տղամարդիկ, ովքեր իսկապես սիրում են Եհովային և ցանկանում են իրենց տրամադրել ծառայությանը, չկարողանան համապատասխանել դրանց։ Բոլորին պետք է ակնհայտ լինի, որ երեցները իրենց առօրյա կյանքում կիրառում են Աստվածաշնչի խորհուրդները։

⁵ Տիմոթեոսին և Տիտոսին ուղղված իր նամակներում Պողոս առաքյալը նշեց վերակացուների համար սահմանված հիմնական սուրբգրային պահանջները։ 1 Տիմոթեոս 3։1–7-ում կարդում ենք. «Եթե որևէ մեկը ձգտում է վերակացուի պարտականության, լավ գործի է ձգտում։ Ուստի վերակացուն պետք է լինի անպարսավելի, մեկ կնոջ ամուսին, սովորությունների մեջ չափավոր, ողջամիտ, կարգապահ, հյուրասեր, սովորեցնելու համար որակյալ, ո՛չ հարբեցող, ո՛չ հարվածող, այլ լինի խոհեմ, ո՛չ կռվարար, ո՛չ փողասեր, իր ընտանիքը լավ ղեկավարող, ունենա այնպիսի երեխաներ, որոնք հնազանդվում են ամենայն լրջությամբ (քանի որ եթե որևէ մեկը չգիտի, թե ինչպես ղեկավարի իր սեփական ընտանիքը, էլ ինչպե՞ս հոգ կտանի Աստծու ժողովին), ո՛չ էլ պետք է նոր ընդունած լինի հավատը, որ հանկարծ հպարտությամբ չլցվի ու չընկնի այն դատաստանի տակ, որը Բանսարկուի համար է վճռված։ Բացի այդ, նա պետք է լավ անուն ունենա դրսի մարդկանց շրջանում, որպեսզի իր վրա նախատինք չբերի և չընկնի Բանսարկուի թակարդը»։

⁶ Իսկ Տիտոս 1։5–9-ում կարդում ենք. «Քեզ թողեցի Կրետեում այն բանի համար, որ թերությունները շտկես և ամեն քաղաքում երեցներ նշանակես, ինչպես որ պատվիրեցի, եթե մարդը զերծ է մեղադրանքից, մեկ կնոջ ամուսին է, և նրա երեխաները հավատացյալ են, որոնք չեն մեղադրվում սանձարձակ ու անկառավարելի լինելու մեջ։ Որպես Աստծու տնտես՝ վերակացուն պետք է զերծ լինի մեղադրանքից, չլինի ինքնահաճ, բարկացկոտ, հարբեցող, հարվածող, շահամոլ, այլ լինի հյուրասեր, առաքինություն սիրող, ողջամիտ, արդար, նվիրված, ինքն իրեն տիրապետող, սովորեցնելու արվեստում ամուր բռնած լինի հավատարիմ խոսքը, որպեսզի կարողանա թե՛ հորդորել առողջ ուսմունքով և թե՛ հանդիմանել դրան հակառակվողներին»։

⁷ Թեպետ սուրբգրային այս պահանջները առաջին հայացքից կարող են ծանր թվալ, սակայն քրիստոնյա տղամարդիկ չպետք է խուսափեն առանձնաշնորհումներ ստանձնելուց։ Քրիստոնեական հատկություններ դրսևորելու հարցում իրենց լավ օրինակով վերակացուները հորդորում են ժողովում ծառայող մյուս անհատներին նույնն անել։ Պողոս առաքյալը նշեց, որ «մարդկանց տեսքով պարգևները» նշանակված են «սրբերին ուղղելու համար, ծառայության գործի համար, Քրիստոսի մարմնի շինության համար, մինչև որ բոլորս հավատի և Աստծու Որդու մասին ճշգրիտ գիտելիքների մեջ հասնենք միասնության, դառնանք չափահաս մարդու պես՝ հասնելով Քրիստոսի ողջ հասակին» (Եփես. 4։8, 12, 13)։

⁸ Վերակացուները չպետք է լինեն չափազանց երիտասարդ կամ նորահավատ։ Նրանք պետք է ունենան քրիստոնեական կյանքի փորձ, աստվածաշնչյան խոր գիտելիքներ և հասկացողություն, ինչպես նաև անկեղծ սեր ժողովի հանդեպ։ Վերակացուները պետք է քաջություն ունենան մեղք գործած անհատի հետ անկաշկանդ խոսելու և նրան ուղղելու համար։ Այդպիսով նրանք կպաշտպանեն հոտը նրանցից, ովքեր կփորձեն եսասիրաբար շահագործել այն (Ես. 32։2)։ Ժողովում բոլորին պետք է ակնհայտ լինի, որ նրանք հոգևորապես հասուն են և անկեղծորեն հոգ են տանում Աստծու հոտի մասին։

⁹ Նրանք, ովքեր համապատասխանում են վերակացու լինելու պահանջներին, իրենց կյանքում պետք է իմաստություն դրսևորեն։ Եթե ամուսնացած են, պետք է հետևեն ամուսնությանը վերաբերող քրիստոնեական չափանիշներին, այսինքն՝ լինեն մեկ կնոջ ամուսին և ընտանիքը լավ ղեկավարող։ Եթե վերակացուն ունի հավատացյալ երեխաներ, որոնք հնազանդվում են ամենայն լրջությամբ և չեն մեղադրվում սանձարձակ կամ անհնազանդ լինելու մեջ, ապա ժողովում ծառայող մյուս անհատները վստահությամբ կդիմեն նրան՝ ընտանիքին և քրիստոնեական ապրելակերպին առնչվող բազում հարցերի վերաբերյալ խորհուրդ ստանալու համար։ Այս տղամարդիկ պետք է նաև լինեն անպարսավելի, մեղադրանքից զերծ և նույնիսկ դրսի մարդկանց շրջանում լավ անուն ունենան։ Ոչ ոք հիմքեր չպետք է ունենա մեղադրելու նրանց անպատշաճ վարք դրսևորելու մեջ, որն արատավորում է ժողովի համբավը։ Նրանք չպետք է լինեն այնպիսի անհատներ, որոնք վերջերս հանդիմանություն են ստացել լուրջ մեղքի համար։ Մյուս քարոզիչները պետք է մղվեն հետևելու նրանց լավ օրինակին և վստահելու իրենց հոգևոր կյանքը այդպիսի հովիվներին (1 Կորնթ. 11։1; 16։15, 16)։

¹⁰ Այս տղամարդիկ ծառայում են քրիստոնեական ժողովում այնպես, ինչպես Իսրայելի ծերերն էին ծառայում, որոնք «իմաստուն [էին], խոհեմ և փորձառու» (2 Օրենք 1։13)։ Սա չի նշանակում, որ նրանք ընդհանրապես մեղք չեն գործում, սակայն ժողովում և իրենց բնակավայրում նրանք հայտնի են որպես արդար և աստվածավախ մարդիկ, ովքեր առաջնորդվում են աստվածաշնչյան սկզբունքներով։ Լինելով անպարսավելի՝ նրանք խոսելու ազատություն ունեն ժողովում (Հռոմ. 3։23)։

¹¹ Նրանք, ովքեր համապատասխանում են վերակացու ծառայելու պահանջներին, պետք է չափավոր լինեն սովորությունների մեջ և ողջամիտ ուրիշների հանդեպ։ Նրանք չեն ընկնում ծայրահեղությունների մեջ, այլ իրենց ապրելակերպով ցույց են տալիս, որ հավասարակշռված են և ինքնատիրապետում ունեն։ Նրանք գիտեն ուտելու, խմելու, հանգստանալու, զվարճանալու և սիրած գործերով զբաղվելու չափը։ Նաև չափավոր են օգտագործում ալկոհոլային խմիչքներ, որպեսզի մեղադրելի չլինեն հարբեցողության կամ հարբեցող լինելու մեջ։ Նա, ում զգացողությունը բթանում է ալկոհոլ խմելու պատճառով, հեշտությամբ կարող է կորցնել ինքնատիրապետումը։ Այդպիսի անհատը չի կարող հոգ տանել ժողովի հոգևոր բարօրության մասին։

¹² Անհրաժեշտ է, որ ժողովի գործերը վերահսկող անհատը կարգապահ լինի։ Նա պետք է ունենա լավ սովորություններ, օրինակ՝ հետևի իր արտաքինին, տանը, կատարի իր անձնական գործերը։ Նման անձնավորությունը անհարկի չի հետաձգում իր գործերը։ Ընդհակառակը՝ նա հասկանում է, թե ինչ պետք է անի, և համապատասխան ծրագրեր է կազմում։ Նա հավատարիմ է մնում աստվածաշնչյան սկզբունքներին։

¹³ Երեցը պետք է խոհեմ լինի։ Նա պետք է կարողանա խաղաղությամբ համագործակցել երեցների խորհրդի մյուս անդամների հետ։ Նա պետք է իր մասին ճիշտ տեսակետ ունենա և չլինի չափից շատ պահանջող։ Որպես խոհեմ անձնավորություն՝ երեցը չպետք է ինքնավստահ լինի՝ միշտ համարելով, թե իր տեսակետները ավելի ճիշտ են, քան իր հետ ծառայող մյուս երեցների տեսակետները։ Հնարավոր է՝ այդ երեցները ունենան այնպիսի հատկություններ կամ կարողություններ, որոնք ինքը չունի։ Եթե երեցը իր եզրակացությունները ամբողջովին հիմնում է Սուրբ Գրքի վրա և ձգտում է ընդօրինակել Հիսուս Քրիստոսին, ուրեմն նա խոհեմ է (Փիլիպ. 2։2–8)։ Երեցը կռվարար կամ հարվածող չէ, այլ հարգանք է դրսևորում ուրիշների հանդեպ՝ նրանց իրենից ավելի բարձր համարելով։ Նա ինքնահաճ չէ՝ միշտ պնդելով, որ իր տեսակետը կամ առաջարկը լավագույնն է։ Նաև բարկացկոտ չէ, այլ ուրիշների հետ գործ ունենալիս խաղաղարար է։

¹⁴ Նա, ով համապատասխանում է երեց ծառայելու պահանջներին, պետք է ողջամիտ լինի։ Դա նշանակում է, որ նա հավասարակշռված է և հակված չէ արագ դատողություններ անելու։ Երեցը լավ է հասկանում աստվածաշնչյան սկզբունքները և դրանց կիրառությունը։ Ողջամիտ անհատը ընդունում է իրեն տրված առաջնորդությունն ու խորհուրդները։ Նա կեղծավոր չէ։

¹⁵ Պողոսը հիշեցրեց Տիտոսին, որ վերակացուն պետք է լինի նաև առաքինություն սիրող, արդար և նվիրված։ Այս հատկությունները կարտացոլվեն ուրիշների հետ ունեցած իր փոխհարաբերություններում և ճիշտն ու բարին անելու հարցում իր հաստատակամ լինելու մեջ։ Նա միշտ նվիրված կլինի Եհովային և որոշում կայացնելիս կհետևի նրա արդար սկզբունքներին։ Վերակացուն նաև գաղտնապահ է։ Բացի այդ, նա հյուրասեր է՝ պատրաստակամորեն իրեն ու իր միջոցները տրամադրելով ուրիշներին (Գործ. 20։33–35)։

¹⁶ Իր հանձնարարությունը արդյունավետորեն կատարելու համար վերակացուն պետք է սովորեցնելու համար որակյալ լինի։ Տիտոսին գրած Պողոսի խոսքերի համաձայն՝ վերակացուն պետք է «սովորեցնելու արվեստում ամուր բռնած լինի հավատարիմ խոսքը, որպեսզի կարողանա թե՛ հորդորել առողջ ուսմունքով և թե՛ հանդիմանել դրան հակառակվողներին» (Տիտոս 1։9)։ Նա կարողանում է տրամաբանել մարդկանց հետ, բերել փաստարկներ, հաղթահարել առարկությունները և սուրբգրային համարները կիրառել այնպես, որ դա համոզիչ լինի ուրիշների համար և ամրացնի նրանց հավատը։ Վերակացուն սովորեցնելու իր ունակությունը գործի է դնում թե՛ բարենպաստ ժամանակ և թե՛ դժվարին ժամանակ (2 Տիմոթ. 4։2)։ Նա պետք է այնքան համբերատար լինի, որ մեղմությամբ հանդիմանի սխալ գործողին կամ հավատի մեջ հաստատի կասկածներ ունեցող անհատին և մղի նրան բարի գործերի։ Ունակ լինելով սովորեցնելու կա՛մ հանրության առջև, կա՛մ անհատապես՝ վերակացուն փաստում է, որ համապատասխանում է այս կարևոր պահանջին։

¹⁷ Անչափ կարևոր է, որ երեցները եռանդորեն մասնակցեն քարոզչական ծառայությանը։ Պետք է ակնհայտ լինի, որ նրանք նաև այս կերպ են ձգտում ընդօրինակել Հիսուսին, որը միշտ առաջնահերթ էր համարում բարի լուրը քարոզելը։ Հիսուսը հետաքրքրված էր իր աշակերտներով և օգնում էր նրանց լինելու արդյունավետ քարոզիչներ (Մարկ. 1։38; Ղուկ. 8։1)։ Երբ երեցը, չնայած իր զբաղված գրաֆիկին, ժամանակ է տրամադրում ծառայությանը, դա ոգևորում է ողջ ժողովին և բորբոքում քարոզիչների եռանդը։ Իսկ երբ երեցը ծառայում է իր ընտանիքի անդամների, ինչպես նաև ժողովի հետ, բոլորը «փոխադարձ քաջալերություն» են ստանում (Հռոմ. 1։11, 12)։

¹⁸ Գուցե թվա, թե վերակացու լինելու համար չափազանց շատ բան է պահանջվում։ Իրականում, ոչ մի երեց չի կարող կատարելապես համապատասխանել աստվածաշնչյան պահանջներին, սակայն նշանակված երեցներից ոչ մեկի մեջ այս հատկություններից որևէ մեկը չպետք է բացակայի այն աստիճան, որ դա համարվի լուրջ թերություն։ Որոշ երեցներ թերևս ունեն ակնառու հատկություններ, մինչդեռ երեցների խորհրդի մյուս անդամները, հնարավոր է, աչքի ընկնեն այլ ոլորտներում։ Արդյունքում երեցների խորհուրդը՝ որպես ամբողջություն, կունենա այն բոլոր լավ հատկությունները, որոնք անհրաժեշտ են Աստծու ժողովին առաջնորդելու համար։

¹⁹ Երբ երեցների խորհուրդը որևէ մեկին երաշխավորում է ծառայելու որպես երեց, ապա խորհրդի անդամները հաշվի են առնում Պողոս առաքյալի խոսքերը. «Ասում եմ ձեր մեջ գտնվող ամեն մեկին, որ չմտածի իր մասին ավելին, քան հարկ է մտածել, այլ այնպես մտածի, որ ողջամտություն ունենա հավատի այն չափով, ինչ չափով որ Աստված բաժանեց յուրաքանչյուրին» (Հռոմ. 12։3)։ Յուրաքանչյուր երեց իրեն պետք է ցածր համարի մյուսներից։ Անհատի որակները քննարկելիս՝ որպես ապագա երեցի, չպետք է «չափից դուրս արդար» լինել (Ժող. 7։16)։ Մտքում պահելով երեցների վերաբերյալ սուրբգրային պահանջները՝ երեցների խորհուրդը կորոշի, թե արդյոք այդ եղբայրը ողջամտության սահմաններում համապատասխանում է այդ պահանջներին։ Իրենց երաշխավորագրերը կազմելիս երեցները չեն լինի կողմնապահ և կեղծավոր, ինչպես նաև հաշվի կառնեն, որ բոլոր մարդիկ անկատար են։ Այդպես վարվելով՝ նրանք հարգանք ցույց կտան Եհովայի արդար պահանջների հանդեպ և կնպաստեն ժողովի բարօրությանը։ Երաշխավորագրերը քննարկելիս նրանք սուրբ ոգու առաջնորդությունը կխնդրեն Աստծուց և ուշադրություն կդարձնեն, թե արդյոք եղբայրը կատարում է աստվածաշնչյան այդ պահանջները։ Սա նրանց ստանձնած լուրջ պատասխանատվություններից մեկն է։ Ուստի նրանք պետք է վարվեն Պողոսի հորդորի համաձայն. «Երբեք մի՛ շտապիր ձեռքերդ դնել որևէ մեկի վրա» (1 Տիմոթ. 5։21, 22)։

²⁰ Հոգևորապես հասուն այս տղամարդիկ ցույց են տալիս, որ իրենց կյանքում առաջնորդվում են սուրբ ոգով և դրսևորում են ոգու պտուղը։ Պողոսը սուրբ ոգու պտղի ինը երեսակ է ընդգծում. «Սեր, ուրախություն, խաղաղություն, համբերատարություն, բարություն, առաքինություն, հավատ, մեղմություն, ինքնատիրապետում» (Գաղ. 5։22, 23)։ Նրանք թարմության աղբյուր են եղբայրների և քույրերի համար, ու սուրբ ծառայություն մատուցելու գործում նպաստում են նրանց միասնությանը։ Երեցների վարքը և գործերը ցույց են տալիս, որ նրանք նշանակված են սուրբ ոգով (Գործ. 20։28)։

²¹ Ժողովի միասնությանը նպաստելու համար կարևոր է, որ երեցները միմյանց հետ համագործակցեն։ Չնայած նրանք տարբեր բնավորություններ ունեն, սակայն կարող են պահպանել իրենց միասնությունը՝ հարգանքով լսելով մեկը մյուսին։ Հնարավոր է՝ ոչ բոլոր հարցերում նրանք համաձայնության գան, սակայն քանի դեռ աստվածաշնչյան ոչ մի սկզբունք չի ոտնահարվում, յուրաքանչյուրը պետք է պատրաստ լինի զիջելու և թիկունք կանգնելու ամբողջ խորհրդի ընդունած վերջնական որոշմանը։ Զիջող լինելը ցույց է տալիս, որ անհատը առաջնորդվում է «վերին իմաստությամբ», որը «խաղաղարար է, խոհեմ» (Հակ. 3։17, 18)։ Ոչ մի երեց չպետք է մտածի, թե ինքը ավելի լավն է, քան խորհրդի մյուս անդամները, և ոչ մեկը չպետք է փորձի իշխել մյուսների վրա։ Երբ երեցների խորհրդի անդամները համագործակցում են միմյանց հետ ժողովի բարօրության համար, նրանք իրականում համագործակցում են Եհովայի հետ (1 Կորնթ., գլ. 12; Կող. 2։19)։

²² Հասուն քրիստոնյա տղամարդիկ պետք է ցանկանան ծառայել որպես վերակացուներ (1 Տիմոթ. 3։1)։ Սակայն վերակացու լինելու համար պահանջվում է լինել ջանասեր և անձնուրաց։ Դա նշանակում է սեփական անձը տրամադրել եղբայրներին ծառայելուն՝ հոգ տանելով նրանց հոգևոր շահերի մասին։ Այդ առանձնաշնորհմանը ձգտել նշանակում է նաև ջանք թափել համապատասխանելու սուրբգրային պահանջներին։

²³ Հնարավոր է՝ այն եղբայրը, որը որոշ ժամանակ հավատարմորեն ծառայել է որպես երեց, հիվանդանա կամ տարիքի պատճառով ի վիճակի չլինի կատարելու երեցի պարտականությունները։ Նույնիսկ այդ դեպքում նրան պետք է հարգել որպես երեցի, քանի դեռ նա ունի այդ նշանակումը։ Կարիք չկա, որ նա հրաժարվի այդ առանձնաշնորհումից իր սահմանափակ կարողությունների պատճառով։ Նա արժանի է կրկնակի պատվի, որ տրվում է բոլոր ջանասեր երեցներին, ովքեր իրենց կարողությունների սահմաններում հովվում են հոտը։

²⁴ Սակայն եթե եղբայրը, ելնելով իր հանգամանքներից, կարծում է, որ իր համար լավագույնը կլինի հրաժարվել այդ նշանակումից, ապա կարող է այդպես վարվել (1 Պետ. 5։2)։ Այնուամենայնիվ, նրան պետք է հարգանքով վերաբերվել։ Այդ եղբայրը կարող է շատ բան անել ժողովի համար։

²⁵ Ժողովում երեցները զանազան պարտականություններ են կատարում։ Դրանցից են՝ երեցների խորհրդի կոորդինատոր, քարտուղար, ծառայողական վերակացու, «Դիտարանի» ուսումնասիրությունն անցկացնող ու «Մեր կյանքը և ծառայությունը» հանդիպման վերակացու։ Շատ երեցներ ծառայում են որպես խմբի վերակացուներ։ Այսպիսի պատասխանատվություններ երեցները կրում են անսահմանափակ ժամանակով։ Ինչ խոսք, եթե եղբայրը տեղափոխվում է մեկ ուրիշ ժողով կամ առողջական խնդիրների պատճառով չի կարողանում կատարել իր պարտականությունները կամ այլևս չի համապատասխանում երեց լինելու սուրբգրային պահանջներին, ապա նրա պարտականությունը կատարելու համար նշանակվում է մեկ ուրիշ երեց։ Այն ժողովներում, որտեղ երեցները քիչ են, գուցե անհրաժեշտ լինի, որ երեցը կատարի մեկից ավելի պարտականություններ, մինչև ուրիշ եղբայրներ համապատասխանեն որպես երեց ծառայելու պահանջներին։

²⁶ Երեցների խորհրդի կոորդինատորը նախագահում է երեցների խորհրդի հանդիպումները։ Նա խոնարհաբար համագործակցում է երեցների հետ և հոգ տանում Աստծու հոտի մասին (Հռոմ. 12։10; 1 Պետ. 5։2, 3)։ Նա պետք է լավ կազմակերպիչ լինի և կարողանա «ջանասիրությամբ առաջնորդել» հանդիպումները (Հռոմ. 12։8)։

²⁷ Քարտուղարը զբաղվում է ժողովի հաշվետվություններով և երեցներին տեղյակ է պահում կարևոր նորությունների մասին։ Եթե անհրաժեշտ է, նրան օգնելու համար կարող է նշանակվել մեկ ուրիշ երեց կամ հմուտ ծառայող օգնական։

²⁸ Քարոզչության և ծառայության հետ կապված այլ հարցերը վերահսկում է ծառայողական վերակացուն։ Նա կանոնավորաբար այցելում է քարոզչական բոլոր խմբերին. ծրագրում է ամեն ամիս այցելել մի խմբի։ Փոքր ժողովներում, որտեղ կան ընդամենը մի քանի քարոզչական խմբեր, նա կարող է տարին երկու անգամ այցելել դրանցից յուրաքանչյուրը։ Իր այցելության ընթացքում անցկացնում է քարոզչական ծառայության հանդիպումները, այդ խմբի հետ մասնակցում է ծառայությանը, օգնում է քարոզիչներին կատարելու իրենց վերայցելությունները և անցկացնելու Աստվածաշնչի ուսումնասիրություններ։

²⁹ Ժողովում մեծ առանձնաշնորհում է ծառայել որպես խմբի վերակացու։ Խմբի վերակացուի պարտականությունն է 1) հետաքրքրվել խմբի յուրաքանչյուր անհատի հոգևոր բարօրությամբ, 2) օգնել յուրաքանչյուր քարոզչի կանոնավորաբար ու եռանդորեն ծառայելու և ուրախություն ստանալու և 3) աջակցել ու մարզել խմբում նշանակված ծառայող օգնականներին, որպեսզի նրանք ձգտեն ավելի շատ պատասխանատվություններ ունենալ ժողովում։ Երեցների խորհուրդն է որոշում, թե որ եղբայրները լավագույնս կարող են կատարել վերոնշյալ բոլոր պարտականությունները։

³⁰ Քանի որ սա լուրջ պատասխանատվություն է, հնարավորության դեպքում այն պետք է ստանձնեն երեցները։ Կամ կարող է նշանակվել հմուտ ծառայող օգնական, մինչև որևէ երեց ստանձնի այդ պատասխանատվությունը։ Այս նշանակումն ունեցող ծառայող օգնականը կոչվում է խմբի ծառայող, քանի որ ժողովում նա վերակացուի գործ չի կատարում։ Իր պարտականությունը նա կատարում է երեցների առաջնորդության ներքո։

³¹ Խմբի վերակացուի կարևոր պարտականություններից է քարոզչական ծառայության մեջ առաջնորդություն ցույց տալը։ Եթե նա ծառայությանը մասնակցում է կանոնավորաբար, նախանձախնդրորեն և խանդավառությամբ, ապա մեծ քաջալերություն կլինի քարոզիչների համար։ Քանի որ վերջիններս գնահատում են այն քաջալերանքն ու օգնությունը, որ ստանում են շփվելով միմյանց հետ, հարկավոր է կազմել խմբակային վկայության այնպիսի գրաֆիկ, որը հարմար է քարոզիչների մեծամասնությանը (Ղուկ. 10։1–16)։ Վերակացուն միշտ պետք է քարոզչական ծառայության համար տարածք ունենա։ Հիմնականում նա է անցկացնում քարոզչական ծառայության հանդիպումը և կազմակերպում քարոզիչների ծառայությունը։ Եթե նա չի կարող անցկացնել հանդիպումը, ապա պետք է խնդրի մեկ ուրիշ երեցի կամ ծառայող օգնականի անցկացնել այն։ Եթե նրանցից ոչ մեկը չի կարող դա անել, ապա այս պատասխանատվությունը կարող է կատարել որևէ փորձառու քարոզիչ, որպեսզի մյուսները անհրաժեշտ առաջնորդություն ստանան։

³² Խմբի վերակացուն պետք է նախապես պատրաստվի ծառայողական վերակացուի այցելությանը, տեղյակ պահի խմբին, թե երբ է տեղի ունենալու նրա այցելությունը, և թե ինչ օգուտներ քարոզիչները կարող են քաղել այդ այցելությունից։ Եթե խմբում ծառայող բոլոր անհատները իմանան այդ մասին, ապա կկարողանան սրտանց աջակցել։

³³ Քարոզչական խմբերը նպատակային կերպով փոքր են լինում։ Սա հնարավորություն է տալիս խմբի վերակացուին լավ ծանոթանալու խմբի բոլոր քարոզիչների հետ։ Որպես սիրառատ հովիվ՝ նա անկեղծ հետաքրքրություն է ցույց տալիս յուրաքանչյուրի հանդեպ։ Ձգտում է օգնել յուրաքանչյուր քարոզչի և քաջալերում է մասնակցել ծառայությանը ու հաճախել ժողովի հանդիպումներին։ Նա նաև ջանում է անել հնարավոր ամեն բան, որ օգնի յուրաքանչյուր անհատի մնալու հոգևորապես ամուր։ Այն քարոզիչները, ովքեր ունեն առողջական խնդիրներ կամ ընկճված են, կքաջալերվեն և կզորանան, երբ խմբի վերակացուն այցելի իրենց։ Քաջալերական խոսքը կամ խորհուրդը կարող է մղել ոմանց ձգտելու լրացուցիչ առանձնաշնորհումների և ավելի շատ բան անելու եղբայրների ու քույրերի համար։ Թեև ժողովի խմբի վերակացուն ջանքեր է գործադրում գլխավորապես իր խմբի քարոզիչներին օգնելու համար, բայց որպես երեց և հովիվ՝ նա ուշադիր է ժողովում ծառայող բոլոր անհատների հանդեպ և պատրաստ է աջակցելու օգնության կարիք ունեցող յուրաքանչյուր քարոզչի (Գործ. 20։17, 28)։

³⁴ Խմբի վերակացուի պատասխանատվություններից մեկն էլ այն է, որ նա իր խմբի բոլոր քարոզիչներից հավաքի ծառայության հաշվետվությունները և դրանք փոխանցի քարտուղարին։ Յուրաքանչյուր քարոզիչ կարող է աջակցել խմբի վերակացուին՝ ժամանակին հանձնելով ծառայության հաշվետվությունը։ Դա կարելի է անել՝ հաշվետվությունը տալով անմիջապես խմբի վերակացուին ամեն ամսվա վերջում կամ այն գցելով Թագավորության սրահում ծառայության հաշվետվությունների համար նախատեսված արկղը։

³⁵ Կան որոշ պարտականություններ, որոնց մասին հոգ է տանում ժողովի ծառայողական կոմիտեն, որը կազմված է երեցների խորհրդի կոորդինատորից, քարտուղարից և ծառայողական վերակացուից։ Օրինակ՝ ծառայողական կոմիտեն է թույլ տալիս Թագավորության սրահը օգտագործել ամուսնական և թաղման արարողությունների համար։ Ծառայողական կոմիտեն քարոզիչներին նշանակում է տարբեր քարոզչական ծառայության խմբեր։ Այն նաև ստորագրում է ռահվիրայության, ենթառահվիրայության, ինչպես նաև ծառայության այլ տեսակների հետ կապված դիմումներ։ Ծառայողական կոմիտեում ծառայող երեցները իրենց պարտականությունները կատարում են երեցների խորհրդի առաջնորդության ներքո։

³⁶ Այս եղբայրների, ինչպես նաև «Դիտարանի» ուսումնասիրությունն անցկացնողի, «Մեր կյանքը և ծառայությունը» հանդիպման վերակացուի, նաև երեցների խորհրդի մյուս անդամների պարտականությունների մասին ցուցումներ տրվում են մասնաճյուղի կողմից։

³⁷ Յուրաքանչյուր ժողովի երեցների խորհուրդ ժամանակ առ ժամանակ հավաքվում և քննարկում է ժողովի հոգևոր բարօրության հետ կապված տարբեր հարցեր։ Բացի շրջանային վերակացուի այցելության ժամանակ տեղի ունեցող երեցների հանդիպումից՝ նրա յուրաքանչյուր այցելությունից մոտ երեք ամիս անց նույնպես տեղի է ունենում երեցների հանդիպում։ Սակայն երեցները կարող են հանդիպել ցանկացած ժամանակ, երբ հանգամանքները պահանջում են։

³⁸ Թեև վերակացուները անկատար են, սակայն քարոզիչները պետք է հնազանդվեն նրանց, քանի որ դա Եհովայի հաստատած կառույցն է։ Նրանք հաշվետու են Եհովային։ Երեցները ներկայացնում են Եհովային և նրա աստվածապետական իշխանությունը։ Եբրայեցիներ 13։17-ում գրված է. «Հնազանդվեք ու հպատակվեք նրանց, ովքեր առաջնորդություն են վերցնում ձեր մեջ, որովհետև նրանք անդադար հոգ են տանում ձեր հոգիների մասին և դրա համար հաշիվ պիտի տան։ Այդպես վարվեք, որպեսզի նրանք ուրախությամբ անեն դա և ոչ թե հոգոց հանելով, քանի որ դա վնասակար կլինի ձեզ համար»։ Ճիշտ ինչպես Եհովան օգտագործում է իր սուրբ ոգին երեցներ նշանակելու համար, այնպես էլ այդ նույն ոգու միջոցով կզրկի այդ առանձնաշնորհումից այն երեցներին, ովքեր չեն դրսևորում ոգու պտուղը և իրենց ապրելակերպով ցույց են տալիս, որ չեն համապատասխանում սուրբգրային պահանջներին։

³⁹ Արդյո՞ք բարձր ենք գնահատում ժողովի վերակացուների ծանր աշխատանքն ու լավ օրինակը։ Թեսաղոնիկեի ժողովին ուղղած իր նամակում Պողոսը եղբայրներին հորդորեց. «Խնդրում ենք ձեզ, եղբայրնե՛ր, հարգեք նրանց, ովքեր տքնաջան աշխատում են ձեր մեջ, առաջնորդում են ձեզ Տիրոջ գործում ու հորդորում են ձեզ։ Նրանց հանդեպ սիրով լի մեծագույն գնահատանք ցույց տվեք իրենց կատարած աշխատանքի համար» (1 Թեսաղ. 5։12, 13)։ Ժողովի երեցների ծանր աշխատանքի շնորհիվ մենք հեշտությամբ և ուրախությամբ ենք ծառայում Աստծուն։ Իսկ Տիմոթեոսին ուղղած իր առաջին նամակում Պողոսը հիշատակում է, թե ժողովը ինչ վերաբերմունք պետք է ունենա երեցների նկատմամբ՝ ասելով. «Այն երեցները, որ լավ են ղեկավարում, թող կրկնակի պատվի արժանանան, հատկապես նրանք, ովքեր տքնաջան աշխատում են խոսելու և ուսուցանելու համար» (1 Տիմոթ. 5։17)։

⁴⁰ Ժամանակ առ ժամանակ որոշ երեցներ նշանակվում են ծառայելու Հիվանդներին այցելող խմբերում։ Մյուսները ծառայում են Հիվանդանոցների հետ կապի կոմիտեներում և այցելում են հիվանդանոցներ ու զրուցում բժիշկների հետ, որպեսզի խրախուսեն նրանց բուժել Եհովայի վկաներին առանց արյան գործածության։ Երեցներից ոմանք էլ կարողանում են Թագավորության շահերն առաջ տանել՝ աջակցելով Թագավորության սրահների և համաժողովների սրահների շինարարությանը և դրանք սարքին վիճակում պահելու գործին կամ ծառայելով տարածաշրջանային համաժողովի կոմիտեներում։ Կազմակերպության մեջ բոլորը գնահատում են այս եղբայրների ծանր աշխատանքը և նրանց պատրաստակամությունը։ Իսկապես, մենք «այսպիսի մարդկանց թանկ ենք համարում» (Փիլիպ. 2։29)։

⁴¹ Կառավարիչ մարմինը փորձառու երեցներից ոմանց նշանակում է ծառայելու որպես շրջանային վերակացուներ։ Մասնաճյուղը նրանց հանձնարարում է, որ կանոնավորաբար այցելեն իրենց շրջանի մեջ մտնող ժողովները, սովորաբար տարին երկու անգամ։ Նրանք նաև ժամանակ առ ժամանակ այցելում են հեռավոր տարածքներում ծառայող ռահվիրաներին։ Շրջանային վերակացուները ծրագրում են իրենց այցելությունը և այդ մասին նախապես տեղյակ պահում ժողովին, որպեսզի քարոզիչները կարողանան առավելագույն օգուտները ստանալ։

⁴² Երեցների խորհրդի կոորդինատորը ամեն բան կազմակերպում է այնպես, որ շրջանային վերակացուի այցելությունը հոգևորապես թարմացնի բոլորին (Հռոմ. 1։11, 12)։ Շրջանային վերակացուի և նրա կնոջ այցելության (եթե ամուսնացած է), ինչպես նաև նրանց կարիքների մասին տեղեկություն ստանալուց հետո կոորդինատորը եղբայրների օգնությամբ զբաղվում է կացարանի և այլ անհրաժեշտ բաների հարցերով։ Նա հոգ է տանում, որ բոլորը, ինչպես նաև շրջանային վերակացուն տեղյակ լինեն այդ ծրագրերին։

⁴³ Շրջանային վերակացուն կապ է հաստատում կոորդինատորի հետ՝ ժողովի հանդիպումները, ինչպես նաև քարոզչական ծառայության հանդիպումները ծրագրելու համար։ Դրանք կազմակերպվում են շրջանային վերակացուի առաջարկների ու մասնաճյուղի տված առաջնորդության համաձայն։ Բոլորն էլ պետք է նախապես տեղյակ լինեն ժողովի, ռահվիրաների, երեցների ու ծառայող օգնականների, ինչպես նաև քարոզչական ծառայության հանդիպումների վայրի և ժամի մասին։

⁴⁴ Քանի որ երեքշաբթի օրը՝ կեսօրից հետո, շրջանային վերակացուն ստուգում է «Ժողովի քարոզչի հաշվետվությունները», հանդիպումների հաճախելիության հաշվետվությունը, տարածքների մասին գրառումները և ֆինանսական հաշիվները, դրանք նախօրոք պետք է պատրաստ լինեն և հարկ եղած ձևով դասավորված։ Սա որոշ չափով օգնում է նրան պատկերացում կազմելու ժողովի կարիքների, ինչպես նաև այն մասին, թե ինչպես կարելի է օգնել նրանց, ովքեր պատասխանատվություն ունեն զբաղվելու այդ հաշվետվություններով։ Երեցների խորհրդի կոորդինատորը պետք է միջոցներ ձեռնարկի, որպեսզի շրջանային վերակացուն նախապես ստանա այդ հաշվետվությունները։

⁴⁵ Իր այցելության ընթացքում շրջանային վերակացուն ժամանակ է տրամադրում զրուցելու քարոզիչների հետ հանդիպումներից առաջ և հետո, քարոզչական ծառայության ժամանակ, ճաշելու ընթացքում և այլ հարմար պահերի։ Բացի այդ, նա հանդիպում է երեցների և ծառայող օգնականների հետ, տալիս է սուրբգրային համապատասխան խորհուրդներ, առաջարկներ, քաջալերում է նրանց, որ շարունակեն կատարել իրենց պարտականությունները և ծառայեն իրենց հոգածության տակ գտնվող հոտին (Առակ. 27։23; Գործ. 20։26–32; 1 Տիմոթ. 4։11–16)։ Նա նաև հանդիպում է ունենում ռահվիրաների հետ, որպեսզի քաջալերի նրանց և օգնի ցանկացած խնդրի առնչությամբ, որին նրանք բախվում են ծառայության մեջ։

⁴⁶ Եթե կան այլ հարցեր, որոնց նույնպես պետք է ուշադրություն դարձնել, ապա շրջանային վերակացուն որքան հնարավոր է կաջակցի երեցներին իր այցելության ընթացքում։ Իսկ եթե տվյալ հարցը չլուծվի այդ ընթացքում, նա կարող է օգնել երեցներին կամ գործի մեջ ներգրավված անհատներին փնտրտուքներ անելու և կողմնորոշվելու, թե սուրբգրային որ սկզբունքն է կիրառելի իրենց պարագայում։ Եթե հարկ կա, որ մասնաճյուղը միջամտի, նա երեցների հետ այդ մասին մանրամասն հաշվետվություն կուղարկի մասնաճյուղ։

⁴⁷ Ժողովներ այցելելիս շրջանային վերակացուն հաճախում է ժողովի բոլոր հանդիպումներին։ Դրանց անցկացման կարգը ժամանակ առ ժամանակ կարող է փոփոխվել՝ մասնաճյուղի նամակներում տրված առաջնորդության համաձայն։ Նա կներկայացնի ելույթներ՝ ժողովին ուսուցանելու, քաջալերելու, հորդորելու և ամրապնդելու համար։ Նա կձգտի սեր ու գնահատանք առաջացնել Եհովայի, Հիսուս Քրիստոսի և կազմակերպության նկատմամբ։

⁴⁸ Շրջանային վերակացուի այցելության գլխավոր նպատակներից մեկն է քաջալերել քարոզիչներին եռանդորեն մասնակցել ծառայությանը՝ տալով գործնական առաջարկներ։ Քարոզիչներից շատերը թերևս կարողանան հարմարեցնել իրենց գրաֆիկը, որպեսզի լիարժեքորեն մասնակցեն այդ շաբաթվա քարոզչական ծառայությանը, օրինակ՝ ոմանք գուցե այդ ամիս ենթառահվիրա ծառայեն։ Նրանք, ովքեր ցանկանում են համագործակցել շրջանային վերակացուի կամ նրա կնոջ հետ, կարող են պայմանավորվել։ Մեծ օգուտներ կարելի է քաղել՝ շրջանային վերակացուի կամ նրա կնոջ հետ անցկացնելով Աստվածաշնչի ուսումնասիրություններ և կատարելով վերայցելություններ։ Այդ շաբաթվա ծառայությանը աջակցելու նպատակով քո գործադրած ջանքերը մեծապես կգնահատվեն (Առակ. 27։17)։

⁴⁹ Ամեն տարի երկու շրջանային համաժողով է կազմակերպվում յուրաքանչյուր շրջանի համար։ Այդ համաժողովների կազմակերպման և անցկացման հարցում պատասխանատու է շրջանային վերակացուն։ Նա նշանակում է համաժողովի վերակացու և համաժողովի վերակացուի օգնական։ Համաժողովը կազմակերպելու հարցերում նրանք պետք է սերտորեն համագործակցեն շրջանային վերակացուի հետ։ Սա հնարավորություն կտա, որ շրջանային վերակացուն իր ուշադրությունը կենտրոնացնի ծրագրի վրա։ Շրջանային վերակացուն նաև նշանակում է այլ փորձառու տղամարդկանց, որպեսզի նրանք ծառայեն համաժողովի տարբեր բաժիններում։ Յուրաքանչյուր համաժողովից հետո նա նաև հոգ է տանում, որ ստուգվեն շրջանի ֆինանսական հաշիվները։ Ամեն տարի կազմակերպվող շրջանային համաժողովներից մեկը այցելում է մասնաճյուղի ներկայացուցիչը, որը մասնաճյուղի կողմից նշանակված հռետոր է։ Լինում են դեպքեր, երբ քարոզիչները իրարից հեռու են ապրում կամ համաժողովների անցկացման շենքերը փոքր են, ուստի համաժողովներ անցկացնելու համար որոշ շրջաններ բաժանվում են մի քանի մասի և իրենց համաժողովները անցկացնում են յուրաքանչյուր մասի համար առանձին։

⁵⁰ Յուրաքանչյուր ամսվա վերջում շրջանային վերակացուն քարոզչական ծառայության իր հաշվետվությունը ուղարկում է անմիջապես մասնաճյուղ։ Եթե որոշ համեստ ծախսեր են արվում՝ կապված ճանապարհի, սննդի, կացարանի և այլ անհրաժեշտ բաների հետ, ու ժողովը, որտեղ այդ շաբաթ նա ծառայում է, չի կարողանում ծածկել ծախսերը, ապա նա այդ ծախսերի մասին տեղեկություն է ուղարկում մասնաճյուղ։ Շրջագայող ներկայացուցիչները վստահ են, որ, ինչպես խոստացավ Հիսուսը, իրենց կարիքների մասին հոգ կտարվի, եթե շարունակ փնտրեն Եհովայի Թագավորության շահերը (Ղուկ. 12։31)։ Ժողովները, որոնց ծառայում են այս նվիրված երեցները, պետք է առանձնաշնորհում համարեն նրանց հյուրասիրություն ցույց տալը (3 Հովհ. 5–8)։

⁵¹ Աշխարհով մեկ սփռված Եհովայի վկաների յուրաքանչյուր մասնաճյուղում երեք կամ ավելի հոգևորապես հասուն եղբայրներ ծառայում են մասնաճյուղի կոմիտեում՝ վերահսկելու տվյալ մասնաճյուղի հսկողության ներքո գտնվող երկրի կամ երկրների քարոզչական գործունեությունը։ Կոմիտեի անդամներից մեկը ծառայում է որպես մասնաճյուղի կոմիտեի կոորդինատոր։

⁵² Մասնաճյուղի կոմիտեում ծառայող եղբայրները զբաղվում են իրենց տարածքի բոլոր ժողովներին վերաբերող հարցերով։ Կոմիտեն վերահսկում է Թագավորության բարի լուրի քարոզչությունը մասնաճյուղի հսկողության ներքո գտնվող բոլոր տարածքներում և ժողովներ ու շրջաններ է կազմավորում մարդկանց հոգևոր կարիքները գոհացնելու համար։ Մասնաճյուղի կոմիտեն ուշադրություն է դարձնում նաև միսիոներների, հատուկ ռահվիրաների, ռահվիրաների և ենթառահվիրաների գործունեությանը։ Այս եղբայրները համաժողովների համար համապատասխան միջոցներ են ձեռնարկում և նշանակումներ անում, որպեսզի «ամեն ինչ պարկեշտությամբ և կարգուկանոնով լինի» (1 Կորնթ. 14։40)։

⁵³ Մասնաճյուղի վերահսկողության տակ գտնվող որոշ երկրներում նշանակվում է երկրի կոմիտե։ Նրա գործունեությունը հնարավորություն է տալիս ավելի լավ վերահսկելու քարոզչական գործը։ Կոմիտեն հոգ է տանում Բեթելի բնակելի շենքերի և գրասենյակների մասին, զբաղվում է նամակագրությամբ ու հաշվետվություններով և մեծ ուշադրություն է դարձնում դաշտում ծավալվող գործունեությանը։ Երկրի կոմիտեն Թագավորության շահերն առաջ տանելու հարցում համագործակցում է մասնաճյուղի կոմիտեի հետ։

⁵⁴ Մասնաճյուղերի և երկրի կոմիտեների անդամների բոլոր նշանակումները կատարում է Կառավարիչ մարմինը։

⁵⁵ Ժամանակ առ ժամանակ Կառավարիչ մարմնի նախաձեռնությամբ հոգևորապես հասուն որոշ եղբայրներ այցելում են աշխարհով մեկ սփռված մասնաճյուղերը։ Այս նշանակումն ունեցող եղբայրները հայտնի են որպես գլխավոր վարչության ներկայացուցիչներ։ Նրանց այցելության գլխավոր նպատակն է քաջալերել Բեթելի ընտանիքին և օգնել մասնաճյուղերի կոմիտեներին լուծելու այն խնդիրներն ու հարցերը, որոնք առաջանում են քարոզելու և աշակերտներ պատրաստելու գործում։ Գլխավոր վարչության ներկայացուցիչը նաև հանդիպում է ունենում որոշ շրջանային վերակացուների և պարբերաբար՝ միսիոներների հետ։ Նա նրանց հետ զրուցում է նրանց խնդիրների և կարիքների մասին, տալիս է անհրաժեշտ քաջալերանք, որպեսզի նրանք շարունակեն կատարել ամենակարևոր բանը՝ Թագավորության քարոզչության և աշակերտներ պատրաստելու գործը։

⁵⁶ Գլխավոր վարչության ներկայացուցչին հատկապես հետաքրքրում է, թե ինչ արդյունքներ կան մասնաճյուղի վերահսկողության տակ գտնվող տարածքում՝ կապված Թագավորության քարոզչության և ժողովի գործունեության հետ։ Եթե նա ժամանակ ունի, այցելում է նաև թարգմանչական գրասենյակներ։ Երբ նա մասնաճյուղ է այցելում, հնարավորության դեպքում մասնակցում է նաև քարոզչական ծառայությանը։

⁵⁷ Անշուշտ, մենք մեծ օգուտներ ենք քաղում հասուն քրիստոնյա տղամարդկանց ծանր աշխատանքից և սիրառատ հոգատարությունից։ Շարունակելով հպատակվել նշանակված երեցներին, որոնց հանձնարարված է հովվել հոտը՝ մենք միավորվում ենք ժողովի Գլխի՝ Հիսուս Քրիստոսի հետ (1 Կորնթ. 16։15–18; Եփես. 1։22, 23)։ Արդյունքում Աստծու ոգին գործում է բոլոր ժողովներում, և նրա Խոսքը առաջնորդում է ամբողջ երկրով ծավալվող քարոզչական գործունեությունը (Սաղ. 119։105)։