Մոտեցիր Աստծուն աղոթքի միջոցով

Երբևէ մտածե՞լ ես, որ կյանքում առաջնորդության կարիք ունես։ Կա՞ն հարցեր, որոնց պատասխաններն ուզում ես իմանալ։ Մխիթարության կամ քաջալերանքի կարիք ունե՞ս։ Կցանկանայի՞ր ավելի մոտ լինել Եհովային։ Աղոթքը կարող է օգնել բավարարելու այս բոլոր կարիքները։ Իսկ ո՞րն է աղոթելու ճիշտ ձևը։ Աստված բոլո՞ր աղոթքներն է լսում։ Ինչպե՞ս կարող ես վստահ լինել, որ նա քո աղոթքներն էլ կլսի։ Եկ տեսնենք։

1. Ո՞ւմ պետք է աղոթենք և ինչի՞ մասին

Հիսուսը սովորեցրեց, որ միայն մեր երկնային Հորը պետք է աղոթենք։ Հիսուսը ինքն էլ էր Եհովային աղոթում։ Նա ասել է. «Ուստի այսպես աղոթեք. «Հա՛յր մեր, որ երկնքում ես»» (Մատթեոս 6։9)։ Աղոթելով մենք ամրացնում ենք մեր ընկերությունը Եհովայի հետ։

Մենք կարող ենք աղոթել ցանկացած բանի մասին։ Սակայն որպեսզի Աստված պատասխանի մեր աղոթքին, այն պետք է իր կամքի համաձայն լինի։ «Ինչ էլ որ մենք խնդրում ենք նրա կամքի համաձայն, լսում է մեզ» (1 Հովհաննես 5։14)։ Հիսուսը օրինակով ցույց տվեց, թե որ հարցերի մասին տեղին կլինի աղոթել (կարդա Մատթեոս 6։9–13)։ Անձնական մտահոգությունների մասին աղոթելուց բացի՝ մենք պետք է շնորհակալություն հայտնենք Աստծուն մեզ տված բոլոր բարիքների համար և չմոռանանք խնդրել, որ ուրիշներին էլ օգնի։

2. Ինչպե՞ս պետք է աղոթենք

Աստվածաշունչը հորդորում է մեզ, որ «[Աստծու] առաջ դատարկենք [մեր] սիրտը» (Սաղմոս 62։8)։ Հետևաբար մեր աղոթքները պետք է լինեն անկեղծ և սրտաբուխ։ Մենք կարող ենք աղոթել Աստծուն ցանկացած հարգալից դիրքով, թե՛ բարձրաձայն, թե՛ մեր մտքում։ Նաև կարող ենք աղոթել ցանկացած ժամի և ցանկացած վայրում։

3. Ինչպե՞ս է Աստված պատասխանում մեր աղոթքներին

Նա դա անում է տարբեր կերպերով։ Եհովան տվել է իր Խոսքը՝ Աստվածաշունչը, որտեղ մենք կարող ենք գտնել մեր շատ հարցերի պատասխանները։ Աստծու Խոսքն ընթերցելը կարող է «իմաստուն դարձնել անփորձին» (Սաղմոս 19։7; կարդա Հակոբոս 1։5)։ Դժվարությունների ժամանակ նա կարող է մեզ մտքի խաղաղություն տալ և մղել իր ծառաներին օգնության հասնելու մեզ։

ԱՄՓՈՓՈՒՄ

Անկեղծ աղոթքները մտերմացնում են մեզ Աստծու հետ, տալիս են մտքի խաղաղություն և ուժ, որպեսզի կարողանանք հաճեցնել Եհովային։

Վերհիշենք

• Ո՞ւմ պետք է աղոթենք։

• Ինչպե՞ս պետք է աղոթենք։

• Ի՞նչ օգուտներ կարող է տալ աղոթքը։

ԲԱՑԱՀԱՅՏԻՐ ԱՎԵԼԻՆ

Գտիր աղոթքի մասին հաճախ տրվող հարցերի պատասխանները։

«Յոթ բան, որ արժե իմանալ աղոթքի մասին» («Դիտարան», 2010 թ. հոկտեմբերի 1)

Իմացիր, թե աղոթելու ինչ կարևոր պատճառներ կան, և թե ինչպես կարող ես բարելավել քո աղոթքների որակը։

«Ինչո՞ւ պետք է աղոթեմ» (վեբ հոդված)

Տես, թե ինչ է ասվում Աստվածաշնչում այն մասին, թե ում պետք է աղոթենք։

«Պե՞տք է աղոթեմ սրբերին» (վեբ հոդված)

Երաժշտական տեսանյութը դիտելիս ուշադրություն դարձրու՝ արդյոք կարևոր է, թե երբ և որտեղ ենք աղոթում։

«Աղոթիր ամեն ժամանակ» (1։22)