Poskole omuatje woye mape ya e rihongo ohunga nourenga warwe mbu munika moviutwa ovingi. Otjotjihorera, omiti omingi vi hapa momuano umwe. Otjiunda tji haṋika mozondavi. Tjazumba ozondavi aze haṋika motutavi ku ku kahapa oviyao. Omuano wokuhapa mbwi, u isanewa kutja fractal, nu wina u munika moviutwa vyarwe. Ouṋe ngwa tjita kutja oviṋa vi hape momuano mbwo? Indu omuatje woye tji me ripurire ko oukoto koviṋa ovihimise Jehova mbya mema, ihi matji mu vatere kutja ma kare nongamburiro yomasa kutja Mukuru ongwa mema oviṋa avihe. Otja omuatje woye tji me kuru, ove mo hepa okumuvatera okuzuva nawa kutja ongwaye tje ri ounanḓengu okukara nonḓuviro komatwako wa Mukuru. Ove mape ya o mu pura epuriro ndi, “Ndoovazu Mukuru we tu mema, hapo mo munu kutja eye ma tjiwa nawa omuano mu matu sokuritjinda kokutja tu rire ovaṋingandu?” Okuzambo ove mo yenene okumukahururira kutja Mukuru we tu pa Ombeibela okuturaisira omuano mu matu yenene okurira ovaṋingandu. w24.12 16 ¶8

Jehova wa hinga omuapostele Paulus okutjanga orutuu kombongo ndu maru kahurura kutja omundu ngu hi nokuvanga okuritanaura nga isamewe mombongo. (1 Kor. 5:13) Hapo imba mba ri mombongo aave sokumutjinda vi? Paulus we ve raera kutja ave “ha wana” nomundu ngo. Hapo iho matji hee tjike? Paulus wa kahurura kutja ihi matji kamburire mo “nangarire . . . okurya ovikurya puna omundu ngu ri nai.” (1 Kor. 5:11) Okurya ovikurya ku nomundu ku tjita kutja mu kare noruveze okuhungira, nu ku tjita kutja mu ute okukara pamwe tjinene. Paulus aa hee kutja ombongo kai sokutjita oupanga ku nomundu ngo. Otjiṋa hi matji yenene okutjevera ombongo komeritjindiro we omavi. (1 Kor. 5:​5-7) Nu wina, okuhinokukara pu nomundu ngo maku mu vatere kutja ma ute okumuna kutja wa hihamisa Jehova tjinene, nokumuhinga kutja me ritanaure. w24.08 15 ¶4-5

Ovaisrael aave zemburuka Eyuva enene rOhanganisiro ombura aihe. Meyuva ndo, omupristeri omunene aa tjiti ozombunguhiro zovinamuinyo okupunguhira ouvi wovandu. Otjingaperi kutja ombunguhiro yovinamuinyo aiyerike kaai yenene okuisa po ouvi wOvaisrael, mena rokutja ovinamuinyo vi nonḓengu yokehi povandu. Posi yokutja, indu Omuisrael ngwe ritanaura tja yandja ombunguhiro Jehova ndjaa undjire ko, Jehova aa yenene okumuisira omauvi we. (Hebr. 10:​1-4) Ozombunguhiro nḓaaze tjitwa mEyuva enene rOhanganisiro na povikando vyarwe, za vatera Ovaisrael okumuna kutja ovanauvi. Posi ya, Jehova wa tjita tjike kutja omauvi wovandu ye isirwe? Eye wa tjita kutja Omuna we omusuverwa ma ‘punguhwe rumwe kutja ma ise po omauvi wovengi.’ (Hebr. 9:28) Jesus wa yandja “omuinyo we u rire onguturiro yovengi.”—Mat. 20:28. w25.02 4 ¶9-10