Indu omaṱunḓu tji maye yorokere oviṋa Jehova mbya uta, mave yenene okukutura ouruvi nokukara nenyando pamwe. Jehova wa mema otuveze otuwa kombanda yehi kutja tu yenene okutjita oviṋa mbi twa suvera. Omaṱunḓu omengi ya suvera okukaryanga pamwe kotuveze ku ku ṱizirwa ovipuka na mozondundu poo komuronga. Mouye oupe ovanene novanatje mave kayorokera ovimemwa vya Jehova momuano wapeke. Okutja moruveze ndwo katu nokutira ovipuka poo ovyo kavi nokututira, tjimuna ndino. (Jes. 11:​6-9) Eṱe matu yenene okukara noruveze oruingi okuyorokera oviutwa vya Jehova. (Eps. 22:26) Posi ya, ovanene kave sokuundja nga oruveze ndwo tji rwe ya okuvatera ovanatje vawo okukara nondjoroka moviutwa vya Jehova. Otja tji mo ungurisa ovimemwa okuhonga ovanatje voye ohunga na Jehova, owo mave yenene okukara noumune tjimuna wOmbara David mbwi: “Kape noviungura, mbi sasanekwa na imbi ovyoye.”—Eps. 86:8. w23.03 25 ¶16-17

Hapo omurumendu ombondo Omuetiopi tjiri wa ri aa rongere okupapitisiwa? Ripurira ku imbi: Omurumendu Omuetiopi wa ya ‘koJerusalem okukerikotamena ku Ndjambi.’ (Oviung. 8:27) Ku nao, eye wa yakurire ongamburiro yOvajuda nu we rihonga ohunga na Jehova okuza kOmatjangwa Omayapuke wOtjiheberi. Nandarire nao, eye wa ri nonḓero yokurihonga ovingi. Indu Filipus tja hakaena ku nomurumendu ngo mondjira, eye tjandje ma lese membo romuprofete Jesaja. (Oviung. 8:28) Eye aa vanga okukayenda komurungu okurihonga.Eye wa toora ouyenda oure okuza ku Etiopie kutja ma yenene okurikotamena ku Jehova kondjuwo ondjapuke moJerusalem. Omurumendu Omuetiopi we rihonga ouatjiri ounanḓengu okuza ku Filipus. Nu ouatjiri umwe mbwi, wa ri wokutja Jesus ongwaa ri Messias. (Oviung. 8:​34, 35) Orusuvero rwe ku Jehova na kOmuna we, rwe kurira ko. Nu iho tje mu hinga okutjita ondando onanḓengu kutja ma papitisiwe otjomukongorere wa Jesus Kristus. Filipus wa muna kutja omurumendu ngwi wa rongere okupapitisiwa, ku nao eye we mu papitisa. w23.03 8-9 ¶3-6

Eṱe kamaatu yenene okutjata ku Jehova indu tji tu hi nokuhungira ouatjiri. (Omiano 6:​16, 17) Nandarire kutja ovandu ovengi ndino ve muna kutja ovizeze oviṋa uriri, eṱe tu nakaura vyo, mena rokutja Jehova u tja oviṋa ovivi. (Eps. 15:​1, 2) Otjiperi kutja kamaatu hungire ovizeze oparukaze. Posi yokutja wina matu sokunakaura okuhoreka ondjivisiro tjiva, ndji mai tjiti kutja omundu warwe a ha tjiwa ouatjiri, poo ma kare noumune woposyo ohunga notjiṋa tjorive. Eṱe matu sokunakaura okuyamba poo okuhungira oviṋa mbi mavi hihamisa varwe. (Omiano 25:23; 2 Tes. 3:11) Indu tji wa munu kutja ehungi ndi mamu hungire ra tanaukire motuyambo otuvi, tanaura ehungi mokuhungira omambo omatunge. Mena rokutja tu hupa mouye ovandu mu ve ungurisa eraka ehazendu, eṱe matu sokukondja nomasa kutja omuano mu matu hungire u tjate ku Jehova. Eye me tu sere ondaya, indu tji matu kondjo okuhungira momuano mbu mau eta ondangero ku ye motjiungura tjokuzuvarisa, pozombongarero zombongo, na momahungi wetu weyuva arihe. Indu Jehova tja yandeke ouye ourunde mbwi, ma rire oupupu okuhivirika Jehova momambo wetu.—Judas 15. w22.04 9 ¶18-20