Luke

24 Tumu pagi Hari Minggu,* sida ke indu mansang ngagai kubur mai rempah ke bebau rengut ti udah disediaka sida. 2 Tang sida meda batu ke dikena nutup kubur nya udah dibaring ke tisi. 3 Lebuh sida tama, sida nadai tetemuka bangkai Tuan Jesus. 4 Lebuh sida benung tusut runding pasal utai nya, dua iku lelaki ke ngena gari ti beperenching tekala nya bediri ba sepiak sida. 5 Bala indu nya takut lalu ngendukka pala. Nya alai, dua iku lelaki nya madah ngagai sida: “Nama kebuah kita ngiga orang ke idup ba endur orang mati? 6 Iya nadai ba ditu. Tang iya udah diidupka baru ari mati. Kingatka baru utai ke udah disebut iya ngagai kita lebuh iya agi ba Galili. 7 Iya madahka Anak Mensia patut diserahka ngagai orang ke bedosa, diukum bunuh ba tiang, lalu ba hari ketiga, iya deka diidupka baru.” 8 Udah nya, baru sida teingatka utai ke disebut Jesus. 9 Nya alai, sida mupuk ari kubur lalu madahka utai nya ngagai 11 iku rasul sereta semua murid ke bukai. 10 Bala sida ke nusui utai nya ngagai bala rasul nyengkaum Maria Magdalin, Joana, Maria indai James, enggau bala indu ke bukai ke enggau sida. 11 Taja pia, bala rasul enggau bala murid ke bukai enggai pechayaka sida, laban ngumbai jaku sida ke indu nya cherita ngapa.

12 Tang Peter angkat lalu belanda ngagai kubur. Iya nyenguk ke dalam kubur lalu semina meda kain linin ke dikena malut bangkai aja ba dia. Nya alai, iya mupuk ari endur nya, tang iya agi berundingka nama utai ke udah nyadi.

13 Sehari nya mega, dua iku murid Jesus mansang ngagai siti genturung pendiau ti dikumbai Emaus. Endur nya kira 11 kilometer* ari Jerusalem. 14 Seduai iya berandau pasal semua utai ke udah nyadi.

15 Lebuh dua iku murid nya benung berandauka pekara nya, Jesus datai semak lalu bejalai enggau seduai iya. 16 Seduai iya meda Jesus tang enda ngelala iya. 17 Iya bejaku ngagai dua iku murid nya: “Nama utai ke dikerandauka seduai?” Seduai iya ngetu bejalai lalu mua seduai iya berupai tusah ati. 18 Siku ari murid nya ke benama Kliopas madahka ngagai Jesus: “Nama kebuah nuan enda nemu utai ke nyadi ba Jerusalem baru-baru tu, taja pan nuan diau ba dia? Kati nuan tu temuai?”* 19 Iya nanya seduai iya: “Nama utai nya?” Seduai iya nyaut: “Utai ke nyadi ngagai Jesus, orang Nasaret nya. Ba Petara enggau ba semua orang, iya siku nabi ke bekuasa, sekalika ba jaku tauka ba ulah. 20 Tang bala tuai imam enggau bala ketuai kami nyerahka iya ngambika iya diukum bunuh, lalu sida mantang iya ba tiang. 21 Iya meh ke dikearapka kami ngelepaska Israel. Lalu seharitu hari ketiga pengudah utai nya nyadi. 22 Nambahka nya, kami mega tekenyit pengudah ninga jaku sida ke indu ari bala kami. Lebuh sida ngagai kubur tumu pagi tadi, 23 sida nadai tetemuka bangkai Jesus. Udah nya, sida pulai lalu madahka diri tepedaka melikat ke madahka Jesus udah idup. 24 Pia mega, sekeda ari bala kami pan bisi ngagai kubur, lalu nemu utai ba dia amat baka ke disebut sida ke indu nya. Tang sida nadai meda Jesus.”

25 Nya alai Jesus madah ngagai seduai iya: “Nama kebuah runding seduai lubah nangkap lalu lubah arapka semua utai ke dipadah bala nabi? 26 Endaka Kristus endang patut napi pemerinsa nya ngambika iya dimuliaka?” 27 Udah nya, Jesus nerangka ngagai seduai iya semua utai ke bekaul enggau iya empu dalam Bup Kudus, belabuh ari bup ke ditulis Moses enggau semua Ajar Sida Nabi.

28 Lebuh sida nyauka datai ba genturung pendiau ke dituju sida, Jesus baka ke deka neruska pejalai iya. 29 Tang seduai iya ngumbuk Jesus ngambika enda mupuk. Ku seduai iya madah: “Bemalam enggau kami duai laban hari nyau lemai.” Nya alai, iya tama ke dalam rumah lalu bemalam enggau seduai iya. 30 Lebuh iya makai enggau seduai iya, iya ngambi roti, besampi meri terima kasih, mechahka roti nya, lalu nyuaka iya ngagai seduai iya. 31 Tekala nya baru seduai iya sedar lalu ngelala Jesus. Tang Jesus lesap lalu nadai dipeda seduai iya agi. 32 Seduai iya bejaku enggau pangan diri: “Lebuh kitai ba rantau jalai tadi, endaka ati tua balat diperansang* lebuh iya bejaku sereta nerangka ayat Bup Kudus enggau silik ngagai tua?” 33 Tekala nya mega, seduai iya angkat lalu pulai ngagai Jerusalem. Ba din, seduai iya betemu enggau 11 iku rasul sereta bala murid ke bukai ke benung begelumu. 34 Sida ke begelumu nya madahka Tuan Jesus amat udah diidupka baru, lalu iya ngayanka diri ngagai Simon. 35 Udah nya, seduai iya nusui utai ke udah nyadi lebuh ba rantau jalai sereta baka ni seduai iya ngelala Jesus lebuh iya mechahka roti.

36 Lebuh sida iya benung bejaku pasal utai nya, Jesus ayan ba tengah-tengah sida lalu bejaku: “Arapka semua kita gerai magang.” 37 Tang sida tekenyit sereta balat takut laban ngumbai diri meda ayas orang. 38 Nya alai iya bejaku ngagai sida: “Nama kebuah kita takut? Nama kebuah ati kita kakang? 39 Peda jari enggau kaki aku. Aku meh tu. Tegu aku lalu peda, laban enti aku semina ayas, aku nadai isi tauka tulang baka aku.” 40 Lebuh Jesus bejaku, iya mandangka jari enggau kaki iya ngagai sida. 41 Tang sida agi enda arap, laban sida kelalu gaga sereta alit ati. Jesus lalu nanya sida: “Kati kita bisi utai diempa ditu?” 42 Sida lalu nyuaka ngagai iya sekerat ikan ti udah dipanggang. 43 Iya ngambi ikan nya lalu makai iya ba mua sida.

44 Udah nya iya bejaku ngagai sida: “Lebuh aku agi enggau kita, aku kala madahka semua utai ke ditulis pasal aku dalam Adat Moses, Ajar Sida Nabi, enggau Masmur patut dikeamatka.” 45 Udah nya, Jesus muka runding sida ngambika sida ulih meretika ayat Bup Kudus enggau pengabis iya. 46 Iya madah ngagai sida, “Endang udah ditulis: Kristus deka merinsa lalu diidupka baru ari mati ba hari ti ketiga. 47 Dalam nama iya, berita pasal orang patut nesal ati ngambika dosa sida diampun deka ditusui, berengkah ari Jerusalem ngagai semua bansa. 48 Kita patut nyadi saksi ke semua utai tu. 49 Aku deka meri kita utai ke udah disemayaka Apai aku. Tang kita patut nganti ba nengeri tu nyentuk ngagai maya kita nerima kuasa ari serega.”

50 Udah nya, Jesus mai sida ngagai Betani. Ba dia, iya ngangkatka jari iya lalu merekatka sida. 51 Lebuh iya benung merekatka sida, iya dibai niki ke serega lalu ninggalka sida. 52 Sida lalu besugang ngagai iya. Udah nya, sida pulai baru ngagai Jerusalem enggau ati ti balat gaga. 53 Ninting hari, sida muji Petara ba Rumah Sembiang.