Hari Lima, 4 September
Jehovah begedika orang ke ngereja penyai, tang Iya ngaga orang ke lurus nyadika pangan Iya.—J-lam. 3:32.
Kati nya penting nyadi orang ke nyebut utai ti amat sereta tau dikearapka? Peratika utai ke nyadi lebuh Philip mai kaban iya, Natanel, betemu enggau Jesus. Taja pan Jesus bedau kala betemu enggau Natanel, tang iya madah: “Peda, iya tu orang Israel ti bendar. Iya nadai nemu ngelakar.” (Jhn. 1:47) Jesus ulih beratika Natanel nya orang ti amat jujur. Baka kitai, Natanel mega enda sempurna. Taja pia iya enda kala pepura, tang iya jujur dalam semua utai. Jesus rinduka sifat nya, lalu muji Natanel. Mayuh ari utai ke disebut kena ngelantangka ati Jehovah ba Masmur 15 bisi kaul enggau chara kitai ngelayan orang bukai. Masmur 15:3 madahka temuai ba langkau kain Jehovah “enda betenahka orang. Sida nadai ngereja penyalah ngagai pangan diri lalu sida enda mega nusui berita ngapa pasal pangan diri.” Enti kitai betenahka orang bukai, nya ulih ngemediska sida.—Jas. 1:26. w24.06 10 ¶7, 9; 11 ¶10
Hari Enam, 5 September
Tuan, indah bala melikat ti jai pan ngasika kami lebuh kami ngena nama nuan.—Luk. 10:17.
Enti nuan besedia enggau manah ke pengawa nginjil, nuan deka kurang agi berasai irau lebuh bejaku enggau orang bukai. Jesus nulung bala murid iya besedia sebedau iya nganjung sida ngereja pengawa nginjil. (Luk. 10:1-11) Ketegal sida nitihka utai ti diajar Jesus, sida ulih ngereja mayuh agi utai ti manah lalu tu nulung sida berasai gaga ati. Baka ni kitai ulih nyediaka diri ke pengawa nginjil? Kitai ulih berundingka utai ke deka dipadah kitai, lalu ngenataika nya nitihka chara kitai biasa bejaku. Kitai mega ulih berundingka sekeda reaksi orang sereta utai ti deka dikereja kitai lebuh napi reaksi ke baka nya. Udah nya, lebuh bejaku enggau orang bukai, uji meh relax, tuchum, sereta bejaku enggau manah. w24.04 16 ¶6-7
Hari Minggu, 6 September
Petara kami, Jehovah, Nuan endang layak nerima mulia, basa, enggau kuasa laban Nuan udah ngaga semua utai. Ketegal peneka Nuan, semua utai digaga lalu ketegal nya mega semua utai tau bisi.—Pem. 4:11.
Kebuah ti pemadu penting kitai nginjil pasal Berita Manah, iya nya kitai rinduka Petara Jehovah enggau nama Iya ti kudus. Pengawa nginjil nya siti chara kitai muji Petara ti dikerinduka kitai. Kitai enggau pengabis ati setuju, Petara Jehovah endang layak nerima mulia, basa, enggau kuasa. Kitai meri Jehovah mulia enggau basa lebuh kitai bekunsi enggau orang bukai bukti ke nunjukka Iya “udah ngaga semua utai.” Lalu kitai ulih idup laban Iya udah meri kitai nyawa. Kitai meri Jehovah kuasa kitai lebuh kitai ngena awak, pengering, sereta utai ti dikemisi kitai ngereja pengawa nginjil enggau naka ulih. (Mat. 6:33; Luk. 13:24; Kol. 3:23) Pandakka jaku, kitai rindu bejaku pasal Petara ti dikerinduka kitai! Kitai mega diperansang madahka ngagai orang bukai pasal nama Iya sereta Iya Petara ke baka ni. w24.05 17 ¶11