Pemansut

11 Jehovah lalu bejaku ngagai Moses: “Aku deka ngenataika siti da agi penulah ngagai Firaun enggau Ejip. Udah nya, iya deka ngasuh kita mupuk. Indah, iya deka muru kita ari tu. 2 Padah ngagai semua orang Israel ke lelaki enggau ke indu, sida mesti minta utai ke digaga ari pirak enggau emas ari jiran sida.” 3 Jehovah deka ngasuh orang Ejip ngayanka pemanah ati ngagai sida. Moses mega nyadi orang ke dipebasa bala pegawai Firaun enggau bala rayat ba menua Ejip.

4 Ku Moses nampung baru: “Tu meh utai ke dipadahka Jehovah: ‘Ba urung tengah malam, Aku deka mansang ngagai menua Ejip. 5 Tiap iku anak tuai ba menua Ejip deka mati magang, berengkah ari anak tuai Firaun ke duduk ba kerusi diraja, nyentuk ngagai anak tuai ulun indu ke ngisar bijirin. Tiap iku anak tuai jelu tupi mega deka mati magang. 6 Orang deka rauh-rauh nyabak ba serata menua Ejip. Utai ke baka nya nadai kala nyadi, lalu nadai agi nyadi ila. 7 Tang ba orang Israel, indah ukui deh enda nyalak sida tauka nyalak jelu tupi sida. Nya baru kita nemu, Jehovah udah ngasuh orang Israel bebida ari orang Ejip.’ 8 Semua pegawai nuan deka datai lalu besugang ba depan aku, lalu madahka, ‘Alai kita mupuk, nuan enggau semua bansa nuan.’ Pengudah nya, aku deka pansut ari tu.” Enggau ati ti balat ringat, Moses mupuk ari Firaun.

9 Udah nya, Jehovah bejaku ngagai Moses: “Firaun tentu enggai mendingka nuan. Tu nyadi ngambika Aku ulih mandangka mayuh agi utai ti luar biasa ba menua Ejip.” 10 Firaun udah meda Moses enggau Aron ngereja semua utai ti luar biasa nya. Tang, Jehovah nejuka ati Firaun degil, lalu Firaun enggai ngemendarka orang Israel mupuk ari menua iya.