Pemansut

27 “Gaga siti alta ngena kayu akasia. Bentuk alta nya mesti segi empat. Pemanjai iya kira-kira dua meter, buka iya kira-kira dua meter, lalu peninggi iya kira-kira semeter.* 2 Gaga tanduk ba keempat-empat iti sukut alta nya. Tanduk nya digaga ari kayu ti dikena ngaga alta nya empu. Alta nya mesti dilapis ngena temaga. 3 Gaga beledi kena ngumpul amau,* lalu gaga mega sekup, bisin, gerepu, enggau pekekas endur engkah bara api. Semua pekekas nya mesti digaga ngena temaga. 4 Sambung beberapa iti batang temaga kena ngaga gelegar.* Gaga mega empat iti gelang temaga ba empat iti sukut gelegar temaga nya. 5 Engkahka gelegar temaga nya ba baruh bingkai alta, iya nya ba tengah alta nya. 6 Gaga kayu ke alta nya ngena kayu akasia, lalu lapis kayu nya ngena temaga. 7 Lebuh deka ngesan alta nya, rasukka kayu nya ba gelang ke bisi ba kedua-dua piak alta nya. 8 Gaga alta ngena papan. Bentuk alta nya mesti baka siti kutak kusung, nitihka pelan ke ditunjukka Aku ngagai nuan ba gunung tu.

9 “Tentuka bisi laman ngelingi Langkau Sembiang. Ba begian selatan laman nya, gaga tirai ari ubung linin ti alus. Pemanjai tirai nya mesti 44.5 meter.* 10 Gaga 20 iti tiang enggau 20 iti pelasar ari temaga. Gaga mega pengait enggau penyambung* ari pirak ke tiang nya. 11 Pemanjai tirai ba begian utara mesti 44.5 meter. Gaga 20 iti tiang enggau 20 iti pelasar ari temaga. Gaga mega pengait enggau penyambung* ari pirak ke tiang nya. 12 Pemanjai tirai ba begian barat laman nya mesti kira-kira 22 meter.* Gaga mega 10 iti tiang enggau 10 iti pelasar. 13 Ba begian timur laman, tunga ngagai endur mata panas tumbuh, pemanjai tirai nya mesti kira-kira 22 meter. 14 Gaga tirai ba begian kiba pintu penama laman nya, lalu pemanjai iya mesti kira-kira tujuh meter.* Gaga mega tiga iti tiang enggau tiga iti pelasar. 15 Pia mega, gaga tirai ba begian kanan pintu penama laman nya, lalu pemanjai iya mesti kira-kira tujuh meter. Gaga mega tiga iti tiang enggau tiga iti pelasar.

16 “Gaga tirai ke pintu penama laman Langkau Sembiang. Pemanjai tirai nya mesti 8.9 meter,* lalu mesti ditenun ngena ubung biru, ubung ungu ke digaga ari bulu bedus, ubung mirah, enggau ubung linin ti alus. Gaga mega empat iti tiang enggau empat iti pelasar. 17 Semua tiang ke ngelingi laman nya mesti bisi penyambung enggau pengait ke digaga ari pirak. Tang pelasar tiang nya mesti digaga ari temaga. 18 Pemanjai laman nya mesti 44.5 meter, lalu buka iya kira-kira 22 meter.* Peninggi tirai ke digaga ari ubung linin ti alus, iya nya tirai ke ngelingi laman nya, mesti kira-kira dua meter,* lalu pelasar iya mesti digaga ari temaga. 19 Semua pekekas ke dikena bejalaika pengawa ba Langkau Sembiang, nyengkaum semua paku langkau enggau paku ba laman langkau, mesti digaga ari temaga.

20 “Asuh orang Israel mai minyak kana ti tulin ke lampu kelita, ngambika api kelita nya terus mau. 21 Lampu kelita ke ba langkau gempuru, iya nya ke ba luar tirai ke semak enggau peti lampang batu Adat, mesti seruran idup ba depan Aku, Jehovah. Aron enggau bala anak lelaki iya mesti nentuka api lampu kelita nya seruran idup ari lemai sampai pagi. Adat ti tetap tu mesti dititihka orang Israel enggau bala peturun sida.