Adat Lewi

2 “‘Enti siku ari bala kita deka nyerahka pemeri bijirin ngagai Aku, Jehovah, pemeri nya mesti ari tepung ti alus. Iya patut nuangka minyak enggau naburka menyan putih ba tepung nya. 2 Iya patut mai pemeri nya ngagai bala anak lelaki Aron ke nyadi imam. Udah nya, imam deka ngambi segenggam tepung ti alus, ke udah dituang minyak sereta ditaburka enggau menyan putih. Imam deka nunu pemeri nya ba atas alta nyentukka asap niki ke atas. Iya ngereja nya kena nandaka* semua pemeri nya udah diserahka ngagai Aku. Bau ari pemeri nya deka ngelantangka ati Aku, Jehovah. 3 Laluh ari pemeri bijirin nya deka diempu Aron enggau bala anak lelaki iya. Laluh nya utai ti pemadu kudus. Iya diambi ari pemeri ke ditunu ke Aku, Jehovah.

4 “‘Enti iya deka nyerahka pemeri bijirin ke udah dipanggang dalam oven, pemeri nya patut digaga ari tepung ti alus, lalu enda tau dichampur enggau ragi. Iya ulih nyerahka roti ti segala ke baka gelang ti dichampur enggau minyak tauka roti nipis ti disapu enggau minyak.

5 “‘Enti iya nyerahka pemeri bijirin ke dipanggang ba kali ti rata, pemeri nya patut digaga ari tepung ti alus, lalu dichampur enggau minyak. Tang iya enda tau dichampur enggau ragi. 6 Pemeri nya patut dipechah-pechah. Udah nya, tuangka minyak ba atas pemeri nya. Nya meh pemeri bijirin.

7 “‘Enti iya nyerahka pemeri bijirin ke dipanduk ngena periuk, pemeri nya patut digaga ari tepung ti alus, lalu dichampur enggau minyak. 8 Iya patut mai pemeri bijirin nya ngagai imam, lalu imam deka mai pemeri nya semak enggau alta, lalu nyerahka pemeri nya ngagai Aku, Jehovah. 9 Udah nya, imam deka ngambi sekeda ari pemeri bijirin nya lalu nunu nya ba atas alta nyentukka asap niki ke atas. Iya ngereja nya kena nandaka* semua pemeri nya udah diserahka ngagai Aku. Bau ari pemeri nya deka ngelantangka ati Aku, Jehovah. 10 Laluh ari pemeri bijirin nya deka diempu Aron enggau bala anak lelaki iya. Laluh nya utai ti pemadu kudus. Iya diambi ari pemeri ke ditunu ke Aku, Jehovah.

11 “‘Pemeri bijirin ke diserahka ngagai Aku, Jehovah, enda tau dichampur enggau ragi. Kita enda tau nunu utai ke bisi ragi tauka madu nyadika pemeri ngagai Aku, Jehovah.

12 “‘Tang pemeri bijirin ke bisi ragi tauka madu deka diserahka ngagai Aku, Jehovah, nyadika pemeri asil utai tanam ti keterubah. Tang utai nya enda tau ditunu ba alta kena ngasilka bau ti ngelantangka ati Aku.

13 “‘Tiap iti pemeri bijirin ke diserahka kita mesti dichampur enggau garam. Anang enda ingat nyimpan garam dalam pemeri bijirin kita, laban garam ngingatka kita pasal sempekat Aku. Kita mesti nyimpan garam dalam semua pemeri bijirin ke diserahka kita.

14 “‘Enti siku ari bala kita deka nyerahka asil utai tanam ti keterubah nyadika pemeri bijirin ngagai Aku, Jehovah, iya patut nyerahka bijirin ti baru, ke udah dipanggang tauka dikisar. 15 Iya patut nuangka minyak lalu naburka menyan putih ba pemeri nya. Nya meh pemeri bijirin. 16 Imam deka ngambi sekeda ari bijirin ke udah dikisar nya, ke udah dituang minyak, sereta ditaburka enggau menyan putih. Imam deka nunu pemeri nya ba atas alta nyentukka asap niki ke atas. Iya ngereja nya kena nandaka* semua pemeri nya udah diserahka ngagai Aku, Jehovah.