Matthew

22 Sekali agi, Jesus bejaku enggau sida ngena sempama. Ku iya: 2 “Perintah serega tau dibandingka enggau siku raja ke nyediaka pengerami tikah ke anak lelaki iya. 3 Iya ngasuh bala ulun iya mai orang ke udah dikangau datai ngagai pengerami tikah nya. Tang sida enggai datai. 4 Sekali agi, iya nganjung bala ulun iya ti bukai. Ku iya, ‘Padahka ngagai orang ke udah dikangau datai ngagai pengerami tikah: “Dinga kita! Aku udah nyediaka pengerami makai besai. Jelu sapi aku enggau anak sapi aku ti gemu udah disayat, lalu semua utai udah sedia magang. Datai meh kita ngagai pengerami tikah.”’ 5 Tang sida enda ibuhka tesau nya lalu mupuk ngagai endur bukai, siku ke ladang, siku ngereja pengawa dagang iya; 6 lalu ke bukai nangkap bala ulun raja nya, malu lalu munuh sida.

7 “Raja nya lalu ringat. Iya ngasuh bala soldadu iya munuh bala pemunuh nya, lalu nunu nengeri sida. 8 Udah nya, iya bejaku ngagai bala ulun iya: ‘Pengerami tikah udah sedia, tang orang ke dikangau datai ngagai pengerami tikah enda layak datai. 9 Nya alai, mupuk kita ngagai jalai besai, lalu bai sapa-sapa ke ditemu kita datai ngagai pengerami tikah tu.’ 10 Bala ulun iya lalu mupuk ngagai semua jalai. Sida ngempuruka semua orang ke ditemu sida, orang ke manah enggau orang ke jai. Nya alai, balai tikah nya nyau penuh laban bala temuai.

11 “Tang lebuh raja tama, deka meda bala temuai, iya tepedaka siku lelaki ke enda ngena gari ti patut ngagai pengerami nya. 12 Iya lalu bejaku ngagai orang nya: ‘Unggal, baka ni ku nuan ulih tama kitu, taja pan enda ngena gari ti patut?’ Orang nya enda nyaut. 13 Udah nya, raja lalu bejaku ngagai bala ulun iya: ‘Tanchang kaki jari iya lalu buai iya ke luar ngagai endur ti petang. Dia meh alai iya deka nyabak sereta begerit ngeli.’

14 “Laban mayuh ke dikangau, tang mimit aja ke dipilih.”

15 Udah nya, bala orang Parisi mupuk lalu baum deka manjuk Jesus ngena jaku iya empu. 16 Nya alai, sida ngasuh bala murid sida enggau bala nembiak Herod mansang ngagai Jesus. Ku sida: “Pengajar, kami nemu nuan endang madahka utai ti bendar, lalu ngajar utai ti bendar pasal jalai Petara, lalu nuan enda bechiping, sereta enda ngakim orang beduduk ba utai ti dipeda. 17 Padahka ngagai kami, nama runding nuan? Kati tau kitai mayar chukai pala ngagai raja Rome?”* 18 Tang Jesus nemu sida jai ati. Nya alai, iya bejaku: “Kita tu orang ke pura-pura ngapa! Nama kebuah kita nguji aku? 19 Pandangka ngagai aku duit seling kena mayar chukai.” Sida lalu mai sesingkap duit seling denari* ngagai iya. 20 Iya nanya sida: “Gambar sapa enggau gelar sapa tu?” 21 Sida lalu nyaut, “Raja Rome.” Iya lalu bejaku ngagai sida: “Enti pia, utai ke enggi raja Rome, beri ngagai raja Rome, tang utai ke enggi Petara, beri ngagai Petara.” 22 Lebuh sida ninga nya, sida balat alit ati. Sida ninggalka iya, lalu mupuk ari endur nya.

23 Sehari nya mega, sekeda orang Saduki datai ngagai iya. Sida enda arap pasal orang ti udah mati ulih angkat idup baru. Nya alai, sida nanya Jesus: 24 “Pengajar, Moses madahka: ‘Enti siku lelaki mati sebedau iya bisi anak, menyadi lelaki iya patut jadi enggau balu nya, ngambika lelaki ke udah mati nya bisi peturun.’ 25 Nyadi sekali, ba bala kami bisi tujuh iku orang diri menyadi. Iya ke tuai bebini, lalu mati sebedau iya bisi anak. Udah nya, menyadi iya jadi enggau balu iya nya. 26 Utai ti sama mega nyadi ba menyadi iya ti kedua, ti ketiga, nyentuk ngagai menyadi iya ti ketujuh. 27 Pengujung iya, indu nya mega mati. 28 Lebuh orang ke mati diangkatka idup baru ila, sapa ari sida tujuh iku nya ke bempu bini nya? Laban semua sida kala jadi enggau iya.”

29 Tang ku Jesus nyaut sida: “Salah penemu kita nya. Laban kita enda nemu Bup Kudus, tauka kuasa Petara. 30 Laban lebuh orang ke mati diidupka baru ila, sida nadai jadi melaki-bini tauka nikah, tang nyadi baka melikat ti ba serega. 31 Nyadi, pasal orang mati ke diidupka baru, kati kita nadai kala macha utai ti udah dipadah Petara ngagai kita: 32 ‘Aku tu Petara Abraham, Isak, enggau Jakop’? Iya ukai Petara ke orang ti mati, tang Petara ke orang ti idup.” 33 Lebuh orang mayuh ninga nya, sida balat alit ati ke ajar iya.

34 Pengudah orang Parisi ninga orang Saduki enda tesautka Jesus agi, orang Parisi begempuru lalu mansang ngagai Jesus. 35 Siku ari sida ke landik pasal Adat deka nguji iya. Ku iya nanya: 36 “Pengajar, ni bagi pesan ti pemadu besai dalam Adat?” 37 Ku Jesus nyaut: “‘Nuan patut rinduka Jehovah, Petara nuan, enggau pengabis ati nuan, enggau pengabis pengidup* nuan, sereta enggau pengabis runding nuan.’ 38 Tu meh pesan ti keterubah sereta ti pemadu besai. 39 Lalu pesan ti kedua bisi kaul enggau pesan nya tadi: ‘Nuan patut rinduka orang bukai baka nuan ke rinduka diri empu.’ 40 Semua Adat enggau Ajar Sida Nabi* beduduk ba dua iti pesan tu.”

41 Lebuh orang Parisi agi begempuru, Jesus nanya sida: 42 “Nama penemu kita pasal Kristus? Iya anak sapa?” Sida lalu nyaut: “Iya anak David.” 43 Iya nanya sida: “Enti pia, baka ni ku David, ari iring kuasa kudus, ngumbai Kristus nya Tuan, laban David empu ke nyebut, 44 ‘Ku Jehovah bejaku enggau Tuan aku: “Duduk ba sepiak kanan Aku, datai ke Aku udah ngengkahka bala munsuh nuan ba baruh kaki nuan”’? 45 Enti David ngumbai iya Tuan, baka ni ku iya tau nyadi anak David?” 46 Nadai siku orang ulih tesautka iya. Kenyau ari nya, nadai agi orang berani betanyaka utai ngagai iya.