Ulang Adat

31 Udah nya, Moses bejaku baru ngagai semua orang Israel. 2 Ku iya madah ngagai sida: “Diatu aku udah beumur 120 taun. Aku enda ulih agi ngiring kita laban Jehovah udah madah ngagai aku: ‘Nuan enda tau meraka Sungai Jordan.’ 3 Baka ke udah dipadah Jehovah, Josua ke deka ngiring kita meraka sungai nya. Jehovah, Petara kita, deka meraka dulu ari kita lalu Iya Empu deka ngemunaska bansa bukai ba depan kita, lalu kita deka ngempu menua sida. 4 Jehovah deka ngemunaska sida baka Iya ngemunaska Sihon enggau Og, iya nya raja orang Amor, sereta menua ke dipegai seduai iya. 5 Jehovah deka nulung kita ngalahka sida, lalu utai ke dikereja kita ba sida mesti nitihka semua pesan ti udah diberi aku ngagai kita. 6 Kita mesti berani sereta kuat. Anang takutka sida laban Petara kita, Jehovah, deka ngiring kita. Iya enda sekali-kali deka ninggalka kita tauka ngelengkaka kita.”

7 Udah nya, Moses ngangauka Josua lalu bejaku enggau iya ba depan semua orang Israel: “Nuan mesti berani sereta kuat, laban nuan ke deka mai bansa tu tama ngagai menua ti udah disemayaka Jehovah ngagai aki ini sida, lalu nuan deka meri menua nya ngagai sida nyadika pesaka. 8 Jehovah deka ngiring nuan, lalu Iya deka seruran enggau nuan. Nya alai, anang takut tauka rawan. Iya enda sekali-kali deka ninggalka nuan tauka ngelengkaka nuan.”

9 Udah nya, Moses nuliska Adat nya lalu meri Adat nya ngagai bala imam Lewi ke ngesan peti lampang batu Adat Jehovah sereta ngagai semua bala tuai orang Israel. 10 Ku Moses meri pesan ngagai sida: “Ba ujung tiap taun ti ketujuh, ba maya ti ditetapka dalam Taun Sabat, iya nya maya Pengerami Belangkau, 11 lebuh semua orang Israel datai ngagai Petara kita, Jehovah, ba endur ke udah dipilih Iya, nuan mesti macha Adat nya ngagai semua orang Israel. 12 Gempuruka semua orang, enda ngira lelaki, indu, bala anak mit, enggau orang asing ke diau ba kuta kita ngambika sida ulih ninga sereta belajar pasal Petara kita, Jehovah. Enggau nya, sida deka nangika Iya lalu ngasika semua pesan ke ditulis dalam Adat tu. 13 Enggau nya, bala anak kita ke bedau nemu pasal Adat tu deka ninga sereta belajar nangika Jehovah, Petara kita, seagi-agi kita idup ba menua ke deka diempu kita ba seberai Sungai Jordan.”

14 Udah nya, Jehovah bejaku ngagai Moses: “Enda lama agi nuan deka mati. Kangauka Josua lalu mansang ngagai langkau gempuru ngambika Aku ulih ngelantik iya nyadi ketuai.” Nya alai, Moses enggau Josua lalu mansang ngagai langkau gempuru. 15 Jehovah lalu ngayanka Diri dalam tiang remang,* lalu tiang remang nya ba depan pintu penama langkau gempuru.

16 Jehovah bejaku ngagai Moses: “Enda lama da agi nuan deka mati. Pengudah nya, bansa tu deka nyadi enda setia ngagai Aku lalu nyembah petara-petara bukai* ke bisi ba serata menua ke deka alai sida diau. Sida deka ninggalka Aku lalu ngelanggar sempekat ke udah digaga Aku enggau sida. 17 Maya nya, Aku deka balat ringat ngagai sida. Aku deka ninggalka sida lalu ngelalaika mua Aku ari sida sampai sida dipunaska. Pengudah sida napi mayuh bencana sereta penusah, sida deka nyebut: ‘Kitai ditinggang bencana tu, laban Petara nadai agi enggau kitai.’ 18 Tang, Aku deka majak ngelalaika mua Aku ari sida ketegal sida udah ngereja semua penyai, laban sida udah nyembah petara bukai.

19 “Diatu, tuliska lagu tu lalu ajar lagu tu ngagai orang Israel. Sida mesti belajar pasal lagu tu, ngambika lagu tu ulih ngingatka sida pasal utai ke deka nyadi lebuh sida enda ngasika Petara. 20 Lebuh Aku mai sida ngagai menua ke udah disemayaka Aku ngagai aki ini sida, iya nya menua ke kaya enggau ai tusu sereta madu, sida deka idup lantang sereta makai sampai puas. Tang udah nya, sida deka nyembah petara bukai. Sida enda bebasaka Aku lalu deka ngelanggar sempekat Aku. 21 Lebuh sida ditinggang mayuh bencana sereta penusah, lagu tu deka ngingatka sida pasal utai ke deka nyadi lebuh sida enda ngasika Aku. Bala peturun sida mega deka ingatka lagu tu. Aku udah nemu pengingin ati sida, taja pan Aku bedau mai sida ngagai menua ke udah disemayaka Aku ngagai sida.”

22 Nya alai, Moses nuliska lagu nya lalu ngajar lagu nya ngagai orang Israel.

23 Petara ngelantik Josua anak Nun, lalu bejaku ngagai iya: “Nuan mesti berani sereta kuat, laban nuan ke deka mai bansa tu tama ngagai menua ke udah disemayaka Aku ngagai sida, lalu Aku deka seruran enggau nuan.”

24 Sepengudah Moses tembu nuliska semua Adat nya dalam siti bup, 25 Moses meri pesan ngagai orang Lewi ke ngesan peti lampang batu Adat Jehovah. Ku iya: 26 “Ambi bup Adat tu lalu engkahka iya ba sepiak peti lampang batu Adat Jehovah, Petara kita. Bup tu deka nyadi saksi kena ngelaban kita. 27 Aku nemu kita udu ngelaban sereta degil. Enti kita ngelaban Jehovah lebuh aku agi idup, kita tentu ka agi ngelaban Iya pengudah aku mati. 28 Gempuruka semua tuai raban bansa kita enggau bala pegawai kita ba depan aku, ngambika aku ulih bejaku ngagai sida. Langit enggau dunya deka nyadi saksi kena ngelaban sida. 29 Aku nemu, pengudah aku mati, sida tentu deka ngereja utai ti jai lalu limpang ari jalai ti udah diajar aku. Dudi hari, sida deka ditinggang penusah ketegal sida ngereja utai ti jai ba mata Jehovah, lalu ngemediska ati Iya ngena pengawa sida.”

30 Udah nya, Moses nyebut semua leka lagu tu ba depan semua orang Israel: