Surat Kereja Rasul

5 Siku lelaki ke benama Ananias, enggau bini iya Safira, nyual tanah seduai iya. 2 Tang Ananias belalai nyimpan sebagi ari duit nya, lalu teda duit nya diberi iya ngagai bala rasul. Pekara tu mega ditemu bini iya. 3 Peter lalu bejaku: “Ananias, nama kebuah nuan nejuka Sitan ngasut* nuan nyentukka nuan berani bula ngagai kuasa kudus Petara, lalu belalai nyimpan sebagi ari duit tanah ke dijual nuan? 4 Endaka tanah nya enggi nuan sebedau iya dijual? Pengudah nuan nyual tanah nya, endaka nuan ulih ngena duit nya sepeneka ati nuan? Nya alai, nama kebuah nuan berundingka pengawa ke baka tu dalam ati nuan? Nuan ukai ngemulaka mensia, tang ngemulaka Petara.” 5 Sepengudah Ananias ninga jaku nya, iya rebah lalu mati. Semua orang ke ninga pasal nya nyadi balat takut. 6 Beberapa iku orang ke biak ba dia lalu angkat, malut iya ngena kain, mai iya pansut, lalu nguburka iya.

7 Kira-kira tiga jam udah nya, bini Ananias datai. Tang iya enda nemu utai ke udah nyadi. 8 Peter bejaku ngagai iya: “Padahka ngagai aku, kati tu semua duit tanah ke dijual seduai?” Ku iya nyaut: “Au, nya meh semua duit tanah nya.” 9 Nya alai, Peter bejaku ngagai iya: “Nama kebuah seduai besetuju deka nguji kuasa kudus Jehovah? Peda nuan! Orang ke nguburka laki nuan udah bediri ba pintu, lalu sida mega deka mai nuan pansut.” 10 Tekala nya mega bini Ananias rebah lalu mati ba kaki Peter. Lebuh beberapa iku orang ke biak nya tama, sida meda iya udah mati. Sida pan mai iya pansut, lalu nguburka iya ba sepiak laki iya. 11 Ketegal nya, semua raban gempuru* enggau semua orang ke ninga pasal nya berasai balat takut.

12 Nambahka nya, bala rasul terus ngaga mayuh kereja ajih enggau tanda ba bala orang mayuh. Bala murid Jesus begelumu ba Serambi* Solomon. 13 Taja pan orang bukai enda berani begulai enggau sida, sida dipuji orang mayuh. 14 Tang penyampau sida majak nambah, laban mayuh sida ke lelaki enggau ke indu arapka Tuan Jesus. 15 Indah bisi orang mai orang ke sakit ngagai jalai besai lalu ngalika sida ba peninduk mit enggau tikai, ngambika lebuh Peter mansa, abis nadai, ayuk Peter ulih tekenaka sekeda orang ke sakit nya. 16 Pia mega, mayuh orang ari nengeri bukai ke semak Jerusalem majak datai kia. Sida mai orang ke sakit enggau orang ke dirasuk melikat ti jai, lalu semua sida digeraika magang.

17 Tang imam besai enggau semua orang ke nitihka iya, ke ari raban pengarap Saduki, lalu bediri. Semua sida balat chemburu. 18 Sida pan nangkap lalu ngurung bala rasul ba rumah jil nengeri nya. 19 Tang malam nya, melikat Jehovah muka pintu rumah jil, lalu mai bala rasul pansut. Ku melikat nya bejaku enggau sida: 20 “Alai kita bediri ba Rumah Sembiang, lalu majak madah ngagai orang mayuh pasal pengidup ti deka datai.” 21 Pengudah ninga jaku melikat nya, sida tama ngagai Rumah Sembiang lebuh hari nyau tawas lalu belabuh ngajar.

Lebuh imam besai enggau bala orang ke nitihka iya datai, sida ngempuruka Raban Kunsil Orang Judah enggau semua bala tuai bansa orang Israel. Udah nya, sida ngasuh bala jejaga ngagai rumah jil lalu mai bala rasul ngagai sida. 22 Tang lebuh bala jejaga nya datai ba rumah jil, sida nadai meda bala rasul. Nya alai, sida pulai baru lalu madahka pekara nya. 23 Ku sida bejaku: “Kami meda pintu jil dikunchi enggau manah, lalu bala jejaga bediri ba mua pintu. Tang lebuh pintu nya dibuka, kami nadai meda siku pan orang ba dalam.” 24 Lebuh ketuai jejaga Rumah Sembiang enggau bala tuai imam ninga nya, sida berasai iran lalu enda nemu nama utai deka nyadi udah nya. 25 Tang bisi orang datai lalu madah ngagai sida: “Orang ke udah dijil kita benung bediri ba Rumah Sembiang sereta ngajar orang mayuh.” 26 Nya alai, ketuai jejaga Rumah Sembiang mupuk enggau bala jejaga iya lalu nangkap bala rasul. Tang sida enda ngereja nya enggau kasar, laban takut enggaika dituku orang mayuh ngena batu.

27 Udah nya, sida mai bala rasul ngagai mua Raban Kunsil Orang Judah. Imam besai lalu bejaku ngagai bala rasul: 28 “Kami udah bebendar nagang kita ngajar orang dalam nama orang nya. Tang kita udah ngerembaika utai ke diajar kita ngagai serata Jerusalem, lalu kita bebendar deka nyalahka kami atas pemati orang nya.” 29 Peter enggau bala rasul ke bukai lalu nyaut: “Kami patut ngasika Petara, ke nyadi pemerintah kami, ukai mensia. 30 Kita udah mantang Jesus ba tiang* lalu munuh iya, tang Petara aki ini kitai udah ngidupka iya baru. 31 Petara udah ngeninggika Jesus ngagai sepiak kanan Iya, nyadi Ketuai enggau Penyelamat, ngambika orang Israel nesal ati lalu dosa sida diampun. 32 Kami meh saksi ke semua pekara tu, pia mega enggau kuasa kudus, ke diberi Petara ngagai sida ke ngasika Iya, ke nyadi pemerintah sida.”

33 Lebuh sida ninga nya, sida balat pedis ati nyentukka sida deka munuh bala rasul. 34 Tang, ba Raban Kunsil Orang Judah nya bisi siku orang Parisi ke benama Gamaliel. Iya siku pengajar Adat ti amat dipebasa semua orang. Iya bediri lalu ngasuh orang mai bala rasul nya pansut enda lama. 35 Udah nya, iya bejaku ngagai semua orang ke ba dia: “Orang Israel, kita patut bejimat enggau utai ke deka digaga kita ngagai sida. 36 Ambika chunto, suba bisi siku lelaki ke benama Teudas. Iya ngumbai diri orang ke bepangkat. Bisi kira-kira 400 iku orang ke nitihka iya. Tang pengudah iya dibunuh, semua sida pambar lalu lenyau. 37 Pengudah nya, Judas ari Galili datai maya pengawa ngerejista diri dipejalaika, lalu bisi mega orang nitihka iya. Tang iya mega mati, lalu semua orang ke nitihka iya pambar. 38 Nya alai, pasal utai ke nyadi diatu, aku madah ngagai semua kita: Tejuka semua orang nya. Anang masuk champur dalam hal sida. Enti pelan enggau pengawa sida nya datai ari mensia, tentu semua nya enda ulih mujur. 39 Tang enti semua nya datai ari Petara, tentu kita enda ulih ngalahka sida. Anang-anang nyau kita empu ke ngelaban Petara.” 40 Sida nitihka jaku lalau nya lalu ngangauka bala rasul. Bala rasul disipat* lalu diasuh badu bejaku dalam nama Jesus. Udah nya, bala rasul dilepaska.

41 Bala rasul pan mupuk ari Raban Kunsil Orang Judah. Sida gaga ati laban Petara ngumbai sida layak dikelese ketegal nama Jesus. 42 Ninting hari, sekalika ba Rumah Sembiang tauka ari rumah ke rumah, sida enda ngetu ngajar sereta nusui Berita Manah pasal Jesus, iya nya Kristus.