Mark

8 Maya nya, sekali agi orang mayuh begempuru, lalu sida nadai agi utai diempa. Nya alai, Jesus ngangauka bala murid iya, lalu bejaku ngagai sida: 2 “Kasih aku meda sida. Sida udah tiga hari enggau aku, lalu nadai utai diempa. 3 Enti aku ngasuh sida pulai enggau perut lapar, sida engka luput ba rantau jalai, lalu sekeda ari sida datai ari endur ti jauh.” 4 Tang ku bala murid iya: “Endur tu jauh, dini alai kami ulih ngiga roti ti chukup ke orang mayuh tu?” 5 Jesus lalu nanya sida: “Kita bisi berapa iti tuku roti?” Ku sida nyaut: “Tujuh iti.” 6 Jesus pan ngasuh orang mayuh duduk ba tanah. Udah nya, iya ngambi tujuh iti tuku roti, besampi meri terima kasih, mechahka roti nya, lalu meri iya ngagai bala murid iya. Sida lalu nyadung pemakai nya ngagai bala mayuh. 7 Sida mega bisi beberapa iku ikan ti mit. Pengudah iya besampi meri terima kasih, iya lalu ngasuh bala murid iya nyadung ikan nya. 8 Semua sida bela makai magang, lalu kenyang. Udah nya, bala murid iya ngumpul tujuh bakul besai ti penuh laban teda pemakai nya. 9 Ba dia, bisi kira 4,000 iku orang lelaki. Udah nya, iya ngasuh orang mayuh pulai.

10 Sepengudah nya, Jesus enggau bala murid iya nepan perau ngagai nengeri Dalmanuta. 11 Ba dia, orang Parisi datai lalu belabuh belaban jaku enggau iya. Kena sida nguji iya, sida minta iya ngayanka tanda ari serega. 12 Nya alai, Jesus berasai balat tusah ati, lalu bejaku: “Nama kebuah rebak tu minta tanda? Enggau bendar aku madah: Nadai tanda deka diberi ngagai rebak tu!” 13 Udah nya, iya ninggalka sida, lalu nepan perau baru ngelayang ke seberai danau.

14 Tang sida enda ingat mai roti. Sida semina bisi setuku roti aja dibai sida dalam perau nya. 15 Maya nya, Jesus beterus-terang nangkan sida. Ku iya: “Bejimat sereta bejaga ari ragi orang Parisi enggau ragi Herod.” 16 Nya alai, sida berengkah bekelikuh enggau pangan diri laban enda mai roti. 17 Lebuh meda sida bekelikuh, Jesus bejaku: “Nama kebuah kita bekelikuh pasal nadai mai roti? Kati kita lalu bedau nemu tauka mereti? Kati ati kita agi tusah deka mereti? 18 ‘Kita bisi mata, tang nama kebuah kita enda ulih meda? Kita bisi pending, tang nama kebuah kita enda ulih ninga?’ Kati kita enda ingat? 19 Lebuh aku mechahka lima iti tuku roti ke 5,000 iku lelaki, berapa bakul teda digumpul kita?” “Dua belas,” ku sida nyaut. 20 “Lalu lebuh aku mechahka tujuh iti tuku roti ke 4,000 iku lelaki, berapa bakul besai teda digumpul kita?” “Tujuh,” ku sida nyaut. 21 Nya alai, ku iya bejaku ngagai sida: “Kati kita agi bedau mereti?”

22 Sida lalu datai ba Betsaida. Orang mayuh mai siku lelaki ke buta ngagai iya, lalu minta iya negu lelaki nya. 23 Iya megai jari lelaki ke buta nya, lalu mai iya pansut ari genturung pendiau nya. Pengudah ngeludah mata lelaki nya, iya ngengkahka jari iya ba lelaki nya, lalu nanya: “Kati nuan bisi meda utai?” 24 Lelaki nya malik ke mua, lalu bejaku: “Aku bisi meda orang, tang sida baka pun kayu ke bejalai kin kia.” 25 Jesus ngengkahka jari iya baru ba mata lelaki nya. Mata iya gerai lalu iya nyau ulih meda semua utai enggau lansik. 26 Udah nya, Jesus ngasuh iya pulai, lalu madah ngagai iya: “Anang tama ngagai genturung pendiau nya.”

27 Udah nya, Jesus enggau bala murid iya mupuk ngagai mayuh genturung pendiau ba Kaisaria Pilipi. Ba rantau jalai, iya nanya bala murid iya: “Ba penemu orang, sapa aku tu?” 28 Ku sida nyaut: “John Pemaptisa. Sekeda ngumbai nuan Elijah, lalu sekeda ke bukai ngumbai nuan siku ari nabi ti bukai.” 29 Iya lalu nanya sida baru: “Ba kita, sapa aku tu deh?” Ku Peter nyaut: “Nuan tu Kristus.” 30 Jesus pan bebendar enda ngasuh sida madahka orang bukai pasal iya. 31 Iya mega berengkah ngajar sida, pasal Anak Mensia ke patut napi mayuh pemerinsa. Bala tuai bansa orang Judah, bala tuai imam, enggau bala penulis Adat enggai nerima iya. Iya deka dibunuh, tang tiga hari udah nya, iya deka diidupka baru. 32 Jesus beterus-terang madahka semua utai nya ngagai sida. Tang, Peter mai iya ke tisi, lalu belabuh ngerara iya. 33 Tang Jesus nguing lalu merening ngagai bala murid iya, lalu ngerara Peter. Ku iya: “Rari ari aku, Sitan! Laban nuan nitihka runding mensia, ukai runding Petara.”

34 Iya ngangauka orang mayuh sereta bala murid iya, lalu bejaku: “Barang sapa deka nitihka aku, awakka iya nulak pengingin diri empu,* ngesan tiang perinsa* iya, lalu enda ngetu nitihka aku. 35 Laban barang sapa ke deka ngidupka nyawa diri, deka ngelenyauka nyawa iya, tang barang sapa ke ngelenyauka nyawa diri ketegal aku, sereta ketegal Berita Manah, deka nyelamatka nyawa iya. 36 Kebendar iya, nama penguntung orang enti iya bempu semua dunya, tang ngelenyauka nyawa diri? 37 Tauka nama utai ti ulih diberi orang kena iya nyelamatka nyawa diri? 38 Rebak tu bedosa sereta enda taluk ngagai Petara.* Ba rebak tu, barang sapa ke malu nyadi murid aku sereta malu arapka jaku aku, Anak Mensia mega malu deka nerima orang nya, lebuh iya datai dalam mulia Apai iya enggau bala melikat ti kudus.”