Penyampau

34 Ku Jehovah bejaku baru ngagai Moses: 2 “Padahka pesan tu ngagai orang Israel: ‘Lebuh kita datai ba menua Kanaan, iya nya menua ke deka nyadi pesaka kita, tu meh sempadan menua nya.

3 “‘Sempadan selatan kita deka berengkah ari menua puang Zin, lalu nengah sempadan Edom. Ba begian timur, sempadan selatan kita berengkah ari ujung Tasik Mati. 4 Ari dia, sempadan nya nuju ngagai selatan lereng Gunung Akrabim sampai ngagai Zin, lalu terus ngagai selatan Kades-barnea. Udah nya, sempadan nya nuju ngagai Hasar-adar lalu terus ngagai Asmon. 5 Ari Asmon, sempadan nya nuju ngagai Wadi* Ejip lalu ngetu ba Tasik.*

6 “‘Tebing Tasik Tengah* deka nyadi sempadan barat kita.

7 “‘Sempadan utara kita deka berengkah ari Tasik Tengah nuju ngagai Gunung Hor. 8 Ari Gunung Hor, sempadan nya nuju ngagai Lebo-hamat* sampai ngagai Zedat. 9 Udah nya, sempadan nya nuju ngagai Sipron lalu ngetu ba Hasar-enan. Nya meh sempadan utara kita.

10 “‘Ba timur, sempadan nya berengkah ari Hasar-enan sampai ngagai Sepam. 11 Ari Sepam, sempadan nya nuju ngagai Riblah, ba begian timur Ain. Udah nya, sempadan nya nurun ngagai lereng ba begian timur Danau Chineret.* 12 Ari dia, sempadan nya nuju ngagai Sungai Jordan lalu ngetu ba Tasik Mati. Nya meh menua kita sereta sempadan ke ngelingi iya.’”

13 Udah nya, Moses madah ngagai orang Israel: “Nya meh tanah pesaka kita ke deka dibagi ngena chara bechabut undi. Nya meh tanah pesaka ke deka diberi Jehovah ngagai setengah ari raban bansa Manasi enggau semilan iti raban bansa ke bukai, 14 laban raban bansa Reuben, raban bansa Gat, enggau raban bansa Manasi ke setengah da agi udah nerima tanah pesaka sida nitihka suku sida. 15 Sida udah nerima tanah pesaka ba sepiak timur Sungai Jordan semak enggau Jeriko, ke nunga ngagai endur mata panas tumbuh.”

16 Ku Jehovah bejaku baru ngagai Moses: 17 “Imam Eleasar enggau Josua anak Nun deka magi menua nya ke kita. 18 Bai siku tuai ari tiap iti raban bansa kena nulung magi menua nya. 19 Tu meh nama sida: Ari raban bansa Judah, Kalep anak Jepuneh; 20 ari raban bansa Simion, Semuel anak Amihut; 21 ari raban bansa Benjamin, Elidat anak Chislon; 22 ari raban bansa Dan, Buki anak Jogli; 23 ari peturun Josep, iya nya ari raban bansa Manasi, Haniel anak Epod; 24 ari raban bansa Efraim, Kemuel anak Siptan; 25 ari raban bansa Sebulun, Elisapan anak Parnak; 26 ari raban bansa Isakar, Paltiel anak Asan; 27 ari raban bansa Aser, Ahihut anak Selomi; 28 ari raban bansa Naptali, Pedahel anak Amihut.” 29 Nya meh nama sida ke diasuh Jehovah magi menua Kanaan ke orang Israel.