Galatia

5 Ngambika kitai bulih pengelepas ke baka nya, Kristus ngelepaska kitai. Nya alai, bediri tegap meh, lalu anang nejuka diri nunduk baru ngagai tangkun ulun.

2 Aku, Paul, madah ngagai kita, enti kita disunat,* utai ke digaga Kristus nadai mai penguntung ke kita. 3 Sekali agi aku ngingatka tiap iku orang ke deka disunat, sida patut nitihka semua utai ke bisi ba Adat. 4 Kita ke nguji deka dikumbai lurus nengah adat udah diseraraka ari Kristus, lalu udah ngelengkaka pemanah ati iya ti besai. 5 Ba kitai, kitai nganti diri deka dikumbai lurus nengah kuasa kudus enggau pengarap ke diayanka kitai. 6 Ba sida ke beserakup enggau Jesus Kristus, sekalika besunat* tauka enda, nya enda penting. Utai ke penting nya, sida ngayanka diri arap nengah pengerindu.

7 Suba, kita belanda enggau manah. Sapa ke mempang kita ari terus ngasika ajar ti bendar? 8 Iya ke ngasuh kita ngereja nya ukai Petara ke ngangauka kita. 9 Mimit aja ragi ulih ngasuh tekang tepung kembai. 10 Aku pechaya, kita ke beserakup enggau Tuan deka setuju. Tang orang ke ngenusahka kita, enda ngira sapa iya, iya deka nerima ukum ti patut. 11 Bala menyadi, ba aku, enti sema aku agi ngerembaika ajar pasal sunat,* nama kebuah aku agi diperinsa? Enti aku ngereja nya, tentu nadai orang ke labuh ketegal utai ke diajar aku pasal Jesus ke mati ba tiang perinsa.* 12 Aku ngarapka orang ke deka ngasuh runding kita charut muai perengka tubuh* sida empu.

13 Bala menyadi, kita udah dikangau ngambika bulih pengelepas. Taja pia, anang ngena pengelepas nya nyadika peluang alai kita bebendar ngereja pengingin ti bedosa. Tang intu meh pangan diri ngena pengerindu. 14 Laban semua utai ba Adat udah dikeamatka dalam siti pesan tu, iya nya: “Rinduka orang bukai baka kita ke rinduka diri empu.” 15 Tang enti kita majak ngasuh pangan diri pedis sereta merinsa, bejimat meh, enggaika kita ngemunaska pangan diri.

16 Taja pia, aku deka madahka: Terus meh nitihka iring kuasa kudus. Enggau nya, kita tentu enggai nitihka pengingin ti bedosa. 17 Pengingin ti bedosa belaban enggau kuasa kudus, lalu kuasa kudus belaban enggau pengingin ti bedosa. Ketegal kedua-dua nya belaban enggau pangan diri, kita enda ulih ngereja utai ti dikinginka kita. 18 Nambahka nya, enti kita diiring kuasa kudus, kita enda di baruh adat.

19 Pengawa ke datai ari pengingin ti bedosa ulih dipeda enggau terang, iya nya ulah seks ti kamah,* pengawa ti kamah, enda malu ngereja utai ti jai,* 20 nyembah engkeramba, pengawa ti bekaul enggau melikat ti jai,* bemunsuh, udu belaya, chemburu, balat ringat, udu bekelikuh, bepechah-belah, bepechah nyadi beberapa raban ketegal nitihka ajar mensia, 21 kepapas, mabuk, berami nyentukka enda tetagangka ulah diri, sereta utai ke baka nya. Aku nangkan kita pasal utai nya diatu, baka aku ke udah nangkan kita suba. Orang ke majak ngereja utai ke baka nya enda ulih bempu Perintah Petara.

22 Tang orang ke diiring kuasa kudus ngembuan* pengerindu, pengaga ati, enggau pengelantang.* Sida mega ngayanka diri sabar, manah ati, badas, arap, 23 nelap, sereta nemu nagang diri. Nadai adat ke ulih ngelaban semua utai ke baka nya. 24 Kelimpah ari nya, orang ke enggi Jesus Kristus udah mantang semua pengingin bedosa ke balat ba tiang.

25 Enti kitai udah idup nitihka iring kuasa kudus, aram meh kitai terus idup sejalai enggau iring kuasa kudus. 26 Anang meh kitai nyadi sumbung, bepekit enggau pangan diri, tauka kepapaska pangan diri.