Pemansut

26 “Gaga 10 iti kain ke Langkau Sembiang. Kain nya mesti digaga ari ubung linin ti alus, ubung biru, ubung ungu ke digaga ari bulu bedus, enggau ubung mirah. Sulam gambar cherub ba kain nya. 2 Pemesai tiap iti kain mesti sama. Pemanjai iya 12.5 meter, lalu buka iya 1.8 meter.* 3 Sambung lima iti kain nya nyadi siti kain ti besai. Gaga utai ti sama ngena lima iti kain da agi. 4 Gaga gelung ba tisi siti ari kain ti besai nya ngena ubung biru, lalu gaga mega utai ti sama ba kain ke siti da agi, ngambika dua iti kain nya ulih disambung. 5 Gaga 50 iti gelung ba tisi siti ari kain nya, lalu gaga 50 iti gelung ba tisi kain ke siti da agi, ngambika lebuh kedua-dua iti kain nya disambung, gelung nya bisi pasangan iya empu. 6 Gaga 50 iti pengait emas kena nyambung kedua-dua iti kain nya, lalu iya deka nyadi siti kain ti besai ke Langkau Sembiang.

7 “Gaga 11 iti kain ari bulu kambin kena nutup Langkau Sembiang. 8 Pemesai 11 iti kain nya mesti sama. Pemanjai iya 13.4 meter, lalu buka iya 1.8 meter.* 9 Sambung lima iti kain nya nyadi siti kain ti besai. Gaga mega utai ti sama ngagai enam iti kain da agi. Ba begian depan Langkau Sembiang deka bisi kain ti lebih. Lipat kain ti lebih nya. 10 Gaga 50 iti gelung ba tisi siti ari kain nya, lalu gaga 50 iti gelung ba tisi kain ke siti da agi, ngambika dua iti kain ti besai nya ulih disambung. 11 Gaga 50 iti pengait temaga, lalu pasukka pengait nya ke dalam gelung kena nyambung kedua-dua iti kain nya, lalu iya deka nyadi siti kain ti besai ke Langkau Sembiang. 12 Ba belakang Langkau Sembiang deka bisi kain ti lebih. Tejuka kain nya kating-kating. 13 Ba kedua-dua piak Langkau Sembiang, kain nya mega ditejuka kating-kating kena nutup tisi Langkau Sembiang, lalu pemanjai iya patut 44.5 sentimeter* panjai agi ari kain ti keterubah.

14 “Gaga siti tudung ke Langkau Sembiang ngena kulit bedus ti lelaki ke udah digaga nyadi warna mirah. Gaga mega siti da agi tudung ngena kulit anjing laut ke patut diengkahka ba atas tudung ke digaga ari kulit bedus nya.

15 “Gaga langkar ngena kayu akasia, lalu dirika langkar nya kena ngaga dinding Langkau Sembiang. 16 Peninggi tiap iti langkar nya mesti 445 sentimeter, lalu buka iya kira-kira 67 sentimeter.* 17 Tiap iti langkar nya patut bisi dua iti kaki,* lalu kaki nya patut digaga berimbai enggau pangan diri. Semua langkar Langkau Sembiang patut digaga baka nya magang. 18 Gaga 20 iti langkar ba begian selatan Langkau Sembiang.

19 “Gaga 40 iti pelasar pirak, lalu engkahka pelasar nya ba baruh 20 iti langkar nya. Tiap iti langkar patut bisi dua iti pelasar, endur ngengkahka kaki langkar nya. 20 Gaga 20 iti langkar ba begian utara Langkau Sembiang. 21 Gaga 40 iti pelasar pirak, lalu engkahka 2 iti pelasar nya ba baruh tiap iti langkar nya. 22 Gaga enam iti langkar ba begian barat, iya nya begian belakang Langkau Sembiang. 23 Gaga dua iti langkar kena ngetanka kedua-dua sukut begian belakang Langkau Sembiang. 24 Langkar nya patut bisi dua batang kayu, lalu begian atas dua iti kayu nya patut disambungka ba gelang ti keterubah. Gaga utai ti sama ba sukut ke siti da agi. Dua iti langkar tu deka ngetanka kedua-dua sukut begian belakang Langkau Sembiang. 25 Semua sekali bisi lapan iti langkar sereta 16 iti pelasar pirak. Engkahka dua iti pelasar nya ba baruh tiap iti langkar nya.

26 “Gaga palang ngena kayu akasia, kena nyambung langkar Langkau Sembiang. Lima iti palang ke langkar ba begian selatan, 27 lima iti palang ke langkar ba begian utara, lalu lima iti palang ke langkar ba begian barat, iya nya begian belakang Langkau Sembiang. 28 Palang ke ba tengah langkar nya patut dipasang ari ujung siti ngagai ujung siti.

29 “Semua langkar enggau palang nya mesti dilapis enggau emas. Gaga gelang emas endur ngerasukka palang nya. 30 Gaga Langkau Sembiang nitihka pelan ke udah ditunjukka Aku ngagai nuan ba gunung tu.

31 “Gaga kain tirai ngena ubung biru, ubung ungu ke digaga ari bulu bedus, ubung mirah, enggau ubung linin ti alus. Sulam gambar cherub ba kain tirai nya. 32 Gantung kain tirai nya ba empat iti tiang ke digaga ngena kayu akasia, ke dilapis ngena emas. Pengait tirai nya mesti digaga ari emas. Tiang-tiang nya mesti diengkahka ba atas empat iti pelasar pirak. 33 Gantung tirai nya ba pengait, lalu bai peti lampang batu Adat ngagai belakang tirai nya. Tirai nya deka nyeraraka Endur ti Kudus ari Endur ti Pemadu Kudus. 34 Engkahka penutup ba atas peti lampang batu Adat, lalu simpan peti nya ba Endur ti Pemadu Kudus.

35 “Engkahka mija ba Endur ti Kudus,* iya nya ba begian utara Langkau Sembiang. Udah nya, engkahka penuduk lampu ba begian selatan Langkau Sembiang, iya nya ba depan mija nya. 36 Tenun kain tirai ke pintu penama langkau nya ngena ubung biru, ubung ungu ke digaga ari bulu bedus, ubung mirah, enggau ubung linin ti alus. 37 Gaga lima iti tiang ngena kayu akasia, endur ngantung kain tirai nya. Tiang nya mesti dilapis ngena emas. Gaga mega pengait emas enggau lima iti pelasar temaga ke tiang nya.