Hebrew

9 Sempekat ke sebedau nya bisi adat kena bejalaika pengawa ti tuchi sereta ke endur ti kudus ba dunya. 2 Ba bilik keterubah, dalam Langkau Kain nya bisi penuduk lampu, mija, enggau roti ti udah diberi ngagai Petara. Bilik nya dikumbai Endur ti Kudus. 3 Tang ba belakang tirai ti kedua, dalam Langkau Kain nya, bisi bilik ke dikumbai Endur ti Pemadu Kudus. 4 Ba dia, bisi pekekas emas endur nunu menyan sereta peti lampang batu Adat ke dilapis ngena emas. Ba peti nya bisi kebuk emas, lalu ba kebuk nya bisi manna. Ba peti nya mega, bisi tungkat Aron ke mansutka daun sereta dua iti lampang batu Adat. 5 Ba atas peti nya bisi dua iku cherub ti bemulia ke ngelindung penutup peti* nya ngena sayap. Tang diatu, ukai maya alai berandauka utai nya enggau silik.

6 Pengudah semua utai digaga baka nya, bala imam tama ngagai bilik ti keterubah ba dalam Langkau Kain nya kena bejalaika pengawa ti tuchi enggau tetap. 7 Tang semina imam besai aja ulih tama ngagai bilik ti kedua, setaun sekali. Maya nya, iya mesti mai darah ke deka dipechik iya ketegal dosa iya empu sereta ketegal dosa ke enda sengaja dikereja bansa sida. 8 Kuasa kudus enggau terang nunjukka, seagi-agi Langkau Kain* ti keterubah agi bisi, jalai ngagai endur ti kudus* bedau dipandangka. 9 Langkau Kain ti keterubah nya ngambarka utai ke diatu. Lalu nitihka atur nya, pemeri jelu* enggau pemeri ke bukai diserahka ngagai Petara. Taja pia, semua nya enda ulih ngasuh ati* orang ke ngereja pengawa ti tuchi nyadi sempurna. 10 Semua nya semina bisi kaul enggau pemakai, utai ke diirup, sereta bemacham adat kena ngasuh mensia enggau utai bukai nyadi beresi.* Semua adat nya bekaul enggau tubuh lalu patut dipejalaika nyentuk ngagai maya ke udah ditetapka kena ngemetulka semua utai.

11 Tang, Kristus datai nyadi imam besai ke mai utai ti manah ke udah diterima kitai. Iya tama ngagai langkau kain ke jauh lebih penting agi sereta ke lebih sempurna. Langkau kain nya ukai utai ke digaga ngena jari mensia tauka utai ke digaga ba dunya. 12 Lebuh tama ngagai endur ti kudus, iya enda mai darah kambin tauka darah sapi lelaki ke agi biak. Tang, iya mai darah diri empu. Iya ngereja nya sekali aja ke belama iya, kena iya ngelepaska* kitai belama iya. 13 Enti darah kambin, darah sapi lelaki, enggau abu ari sapi indu ke biak ke dipechikka ba orang ke kamah ulih ngasuh orang nya nyadi tuchi, 14 endaka darah Kristus lebih agi ulih ngereja nya? Nengah kuasa kudus ti meruan belama iya, Kristus, ke nadai penimpang, udah nyerahka diri ngagai Petara. Darah iya tentu ulih ngasuh ati* kitai tuchi, lalu kitai badu ngereja pengawa ti nadai guna ngambika kitai ulih bejalaika pengawa ti tuchi ke Petara ti idup.

15 Nya meh kebuah Kristus nyadi orang tengah ke sempekat ti baru, ngambika sida ke udah dikangau ulih nerima pesaka ti meruan ke udah disemayaka. Nya ulih nyadi laban iya udah mati kena nebus sereta ngelepaska sida ari penyalah ke digaga sida lebuh sida dibaruh sempekat ke sebedau nya. 16 Enti bisi sempekat, orang* ke ngaga sempekat nya mesti mati, 17 laban enti orang nya agi idup, sempekat nya enda sah. Sempekat nya semina deka nyadi sah enti bisi nyawa* dibunuh. 18 Nya alai, sempekat ke sebedau nya enda ulih dipejalaika enti nadai darah. 19 Pengudah Moses madahka semua pesan ba Adat ngagai semua orang Israel, iya ngambi darah sapi lelaki ke agi biak enggau darah kambin lalu nyampurka darah nya enggau ai. Udah nya, iya nanchangka bulu bedus ke bewarna mirah gelap ba tangkai hisop* lalu mechikka darah nya ngagai bup sempekat* sereta ngagai semua orang. 20 Ku Moses madahka: “Tu meh darah ti nanggam sempekat Petara. Petara udah ngasuh kita nitihka sempekat tu.” 21 Iya mega mechikka darah nya ngagai Langkau Kain sereta ngagai semua pekekas ke dikena ba pengawa ti tuchi. 22 Nitihka Adat, nyauka semua utai digaga nyadi tuchi ngena darah. Enti darah enda dituangka, dosa enda ulih diampunka.

23 Utai ke ngambarka utai ba serega mesti digaga nyadi tuchi ngena chara nya, tang utai ke ba serega begunaka pemeri ti jauh manah agi ari pemeri jelu. 24 Kristus enda tama ngagai endur ti kudus ke digaga ngena jari mensia, ke semina ngambarka utai ti amat, tang iya tama ngagai serega nya empu, lalu diatu, iya ngayanka diri ba mua Petara ngarika kitai. 25 Ninting taun, imam besai tama ngagai Endur ti Kudus, mai darah jelu ukai darah diri empu, tang Kristus enda ibuh ngereja nya. Iya enda ibuh nyerahka diri nyadika pemeri bekali-kali. 26 Enti enda, iya patut merinsa bekali-kali kenyau ari penumbuh dunya.* Tang diatu, ba pengujung dunya,* iya udah mandangka diri sekali aja ke belama iya. Lalu iya udah nyerahka nyawa diri kena muai dosa. 27 Semua orang mesti mati sekali aja ke belama iya, lalu udah nya diakim. 28 Pia mega, Kristus diserahka sekali aja ke belama iya kena muai dosa mayuh orang. Lebuh iya mandangka diri kedua kali, iya ukai deka muai dosa, tang iya deka mandangka diri ngagai sida ke bebendar ngiga iya ngambika sida diselamatka.