Surat Kereja Rasul

27 Pengudah sida mutuska kami patut belayar ngagai Italia, sida nyerahka Paul enggau sekeda orang jil ke bukai ngagai Julius, siku pegawai soldadu ari raban soldadu Augustus. 2 Pengudah nepan kapal ke deka belayar ari Adramitium ngagai mayuh bengkah penyangkai kapal ba sepemanjai tebing tasik Asia, kami pan bekejang. Aristarkus, orang Masedonia ke datai ari Tesalonika, mega nitihka kami. 3 Hari siti, kami datai ba Sidon. Julius amat manah enggau Paul, lalu ngemendarka Paul betemu enggau bala kaban iya ngambika sida ulih ngintu iya.

4 Ari endur nya, kami belayar semak enggau Pulau Saiprus, ngambika pulau nya ngelindung kami ari ribut ke bepuput nunga ngagai kami. 5 Udah nya, kami belayar ba tasik sepemanjai Kilikia enggau Pampilia lalu datai ba Mira, ba menua Lisia. 6 Ba dia, pegawai soldadu bisi tetemuka siti kapal ari Aleksandria ke deka belayar ngagai Italia. Nya alai, iya ngasuh kami nepan kapal nya. 7 Pengelama beberapa hari, kapal kami lubah belayar. Taja pan pejalai kami enda senang, tang pengujung iya, kami datai ba Knidus. Ketegal ribut bepuput nunga ngagai kami, nya alai kami patut belayar semak enggau Pulau Krit ba Salmoni, ngambika pulau nya ngelindung kami ari ribut nya. 8 Kami belayar ba sepemanjai tebing tasik, lalu datai ba siti endur ke dikumbai Penyangkai ti Manah, ke semak enggau nengeri Lasea. Pejalai kami kia mega enda senang.

9 Nyau kelama, pengawa bepasa ke Hari Pengampun Dosa udah ngelebus. Lalu maya nya enda selamat enti deka neruska pejalai ngena kapal. Nya alai, Paul madahka 10 ngagai sida: “Bala kaban, ba runding aku, pejalai tu ukai aja deka mai penusah, tang mega pengerugi ti besai. Kapal kitai engka karam. Barang kitai engka lenyau, lalu kitai mega engka lenyau nyawa.” 11 Taja pia, pegawai soldadu nya enda mendingka jaku Paul. Tang iya mendingka jaku kapten kapal enggau orang ke bempu kapal nya. 12 Ketegal penyangkai kapal nya enda manah alai ngetu lebuh musin chelap, mayuh ari sida deka belayar ari endur nya ngarapka diri ulih datai ba Finiks, lalu ngetu ba dia lebuh musin chelap. Finiks nya penyangkai kapal ba Pulau Krit ke nunga ngagai timur laut enggau tenggara.

13 Lebuh ribut ti enda balat bepuput ari selatan, sida ngumbai diri ulih datai ba Finiks. Nya alai, sida narit sauh lalu belabuh belayar semak tebing tasik Pulau Krit. 14 Tang enda lama udah nya, ribut ti balat ke dikumbai Euroakuilo* lalu bepuput. 15 Kapal kami dipangkaka ribut ti balat nya, lalu kami enda ulih neruska pejalai kami ngelaban ribut nya. Nya alai, kami nejuka kapal kami anyut belayar dibai ribut. 16 Udah nya, kami belayar semak enggau siti pulau ti mit ke dikumbai Kauda, ngambika kami enda dipuputka ribut nya. Taja pia, kami patut bebendar nyelamatka perau mit* ke ditarit kapal kami. 17 Pengudah perau mit nya dibai niki ngagai kapal, sida belabuh ngerapitka papan ba begian baruh kapal nya ngena tali ngambika kapal nya ulih tan. Ketegal sida takut enggaika kapal kami tepanggai ba tebing pasir Sirtis,* sida muka tali kena nurunka layar lalu nejuka kapal kami anyut belayar dibai ribut. 18 Tang kapal kami balat begilik ketegal dipangkaka kabut. Nya alai hari siti, sida belabuh muai barang ngambika kapal kami lempung. 19 Ba hari ketiga, sida muai sekeda perengka kapal.

20 Pengelama beberapa hari kami enda ulih meda mata panas tauka bintang, lalu kami majak dipangkaka kabut ti balat. Nya alai, kami ngumbai diri enda ulih selamat. 21 Pengudah semua orang lama enda makai, Paul lalu bediri ba tengah-tengah sida. Ku iya bejaku: “Bala kaban, enti kita mendingka jaku aku lalu enda belayar ari Krit, kita tentu enda rugi sereta enda napi penusah tu. 22 Taja pia, anang irau. Laban nadai siku pan ari kita ke deka lenyau nyawa. Semina kapal tu aja ke deka karam. 23 Malam tadi, Petara ke disembah sereta dipetuaika aku nganjung melikat Iya, lalu melikat nya bediri ba sepiak aku. 24 Ku melikat nya: ‘Anang takut, Paul. Nuan patut bediri ba mua raja Rome.* Peda nuan! Ketegal pemanah ati Petara, semua orang ke belayar enggau nuan deka diselamatka.’ 25 Nya alai, anang irau bala kaban. Laban aku pechaya Petara deka ngereja utai baka ke dipadah melikat nya ngagai aku. 26 Taja pia, kapal kitai deka karam semak enggau siti pulau.”

27 Ba malam ke-14, kapal kami balat begilik ketegal dipangkaka kabut ba Tasik Adria. Maya tengah malam, bala kelasi ngumbai kapal kami nyauka datai ba tebing. 28 Nya alai, sida nyukat penalam ai lalu nemu penalam ai nya kira-kira 36 meter.* Pengudah kami neruska pejalai enda lama, sida nyukat baru penalam ai lalu nemu penalam ai nya kira-kira 27 meter.* 29 Ketegal sida takut enggaika kapal kami telantakka batu, nya alai sida ngulurka empat iti sauh ari kemudi kapal, lalu ngarapka hari jampat siang. 30 Tang bala kelasi nguji deka ngerarika diri ari kapal. Sida nurunka perau mit ke tasik lalu ngaga diri deka nurunka sauh ke ba luan kapal. Lebuh sida benung nurunka perau mit nya, 31 Paul lalu bejaku ngagai pegawai soldadu enggau bala soldadu: “Kita enda ulih diselamatka enti bala kelasi nadai ba kapal.” 32 Udah nya, bala soldadu pan netak tali perau mit nya, lalu nejuka perau nya labuh ke tasik.

33 Maya hari nyauka siang, Paul ngasuh semua orang makai. Ku iya bejaku: “Diatu udah 14 hari kita nganti. Kita balat irau lalu nadai makai nama-nama utai nyentuk ke diatu. 34 Nyadi, empa meh mimit utai ngambika kita ulih ngidupka diri, laban selambar pan nadai meh buk ba pala tiap iku kita ke deka lenyau.” 35 Pengudah bejaku munyi nya, Paul ngambi roti lalu besampi meri terima kasih ngagai Petara ba mua semua sida. Udah nya, iya mechahka roti lalu makai. 36 Nyadi, semua sida pan badu agi irau lalu makai. 37 Semua kami ke ba kapal nya bisi 276 iku orang. 38 Pengudah sida kenyang, sida muai gandum ke tasik ngambika kapal nya lempung agi.

39 Lebuh hari nyau siang, sida tepedaka siti teluk ba tebing tasik. Tang sida enda nemu menua nya. Nya alai, sida bebendar deka nyangkaika kapal ba tebing tasik nya. 40 Sida pan netak tali sauh ngambika sauh nya labuh ke tasik. Sida mega muka tali ngambika uling* kapal merurut ke tasik. Udah nya, sida muka layar ti mit ba luan kapal ngambika ribut muputka kapal nya ke tebing. 41 Tang kapal nya telantakka tebing pasir ke ba dalam tasik. Nya alai, luan kapal nya tepanggai lalu enda ulih mindah, lalu kemudi kapal pechah dipangkaka gelumbang. 42 Maya nya, bala soldadu deka munuh semua orang jil ngambika sida enda ulih nyemerai lalu ngerarika diri. 43 Tang pegawai soldadu nagang sida ngereja nya, laban iya deka nyelamatka Paul. Iya ngasuh sida ke nemu nyemerai terejun ke tasik, lalu nyemerai dulu ke tebing. 44 Udah nya, sida ke bukai nitih ari belakang. Sekeda nya bepegai ba papan, lalu sekeda ke bukai bepegai ba repik kapal ke udah pechah. Pengujung iya, semua orang selamat datai ba tebing.