Pemungkal

14 Maya nya, Raja Amrapel ari Shinar, Raja Ariok ari Elasar, Raja Kedorlaomer ari Elam, enggau Raja Tidal ari Goim 2 beperang ngelaban Raja Bera ari Sodom, Raja Birsa ari Gomorah, Raja Sinap ari Admah, Raja Semeber ari Seboim, enggau raja ari Bila, ke mega dikumbai Soar. 3 Lima iku raja nya beserakup lalu ngempuruka soldadu sida ba Lebak Sidim, iya nya Tasik Mati.

4 Sida diperintah Raja Kedorlaomer pengelama 12 taun. Tang ba taun ke-13, sida ngelaban raja nya. 5 Ba taun ke-14, Raja Kedorlaomer enggau bala raja ke nyukung iya mansang beperang lalu ngalahka orang Repaim ba Asterot-karnaim, orang Susim ba Ham, orang Emim ba Sabeh-kiriataim, 6 enggau orang Hori ke diau ba kawasan gunung Seir nyentuk ngagai El-paran, ba sempadan menua puang. 7 Udah nya, sida nikal baru lalu datai ba En-mispat, iya nya Kades, lalu ngalahka semua menua orang Amalek. Sida mega ngalahka orang Amor ke diau ba Hasason-tamar.

8 Maya nya, raja ari Sodom, Gomorah, Admah, Seboim, enggau Bila, iya nya Soar, besedia deka beperang ba Lebak Sidim 9 ngelaban Raja Kedorlaomer ari Elam, Raja Tidal ari Goim, Raja Amrapel ari Shinar, enggau Raja Ariok ari Elasar. Empat iku raja tu ngelaban lima iku raja nya. 10 Lebak Sidim bisi mayuh lubang tar. Lebuh raja ari Sodom enggau raja ari Gomorah nguji ngerarika diri, seduai iya labuh ngagai lubang tar. Tang sida ke bukai ulih ngerarika diri ngagai kawasan gunung. 11 Empat iku raja ke menang nya ngerampas semua utai ari Sodom enggau Gomorah, nyengkaum pemakai. Udah nya, sida pan mupuk. 12 Sida mega nabanka Lot, anak menyadi Abram ke diau ba Sodom. Sida ngerampas semua utai iya lalu neruska pejalai sida.

13 Tang siku lelaki mujur ngerarika diri, lalu madahka ngagai Abram* utai ke nyadi. Maya nya, Abram diau* semak pun kayu ti besai ke diempu Mamre, orang Amor. Mamre nya menyadi Eskol enggau Aner. Sida tiga udah besemaya enggau Abram deka nulung pangan diri. 14 Lebuh Abram ninga anak menyadi iya udah ditabanka munsuh, iya lalu ngempuruka 318 iku bala ulun iya ke udah dilatih beperang. Sida tu udah enggau Abram kenyau ari ada. Sida lalu begagaika munsuh nyentuk ngagai Dan. 15 Maya malam hari, Abram magi bala ulun iya lalu sida nyerang sereta ngalahka bala munsuh sida. Sida begagaika bala munsuh nyentuk ngagai Hobah, iya nya utara Damaskus. 16 Abram ngambi pulai baru semua utai ke udah ditabanka munsuh. Iya mega mai pulai Lot, anak menyadi iya, utai ke diempu Lot, bala sida ke indu, enggau orang bukai ke mega ditabanka munsuh.

17 Pengudah Abram ngalahka Raja Kedorlaomer enggau sida ke nyukung raja nya, iya pan pulai. Udah nya, raja ari Sodom betemu enggau Abram ba Lebak Sabeh, ke mega dikumbai Lebak Raja. 18 Melkisedek, iya nya raja Salem, mega bisi datai. Iya siku imam Petara ti Pemadu Tinggi. Iya datai mai roti enggau wain.

19 Udah nya iya merekatka Abram lalu bejaku:

Abram lalu meri Melkisedek 10 peratus ari utai ke udah dirampas iya ari munsuh.

21 Udah nya, raja ari Sodom bejaku enggau Abram: “Simpan nuan aja meh utai ke udah dirampas nuan. Tang beri pulai ngagai aku bala orang aku ke udah kena taban.” 22 Tang ku Abram nyaut raja ari Sodom: “Aku besumpah* ba mua Jehovah, Petara ti Pemadu Tinggi, ke ngaga langit enggau dunya. 23 Aku enggai sekali-kali ngambi nama-nama utai ke enggi nuan. Selambar ubung tauka tali selipar nuan pan enggai meh aku ngambi, awakka nuan enda nyebut, ‘Aku tu ke ngasuh Abram kaya.’ 24 Utai ke diambi aku ari nuan nya semina utai ke udah diempa bala orang ke enggau aku beperang. Awakka Aner, Eskol, enggau Mamre ngambi ungkup sida, laban sida udah enggau aku. Tang aku enggai ngambi nama-nama utai.”