John

19 Udah nya, Pilate ngasuh orang mai Jesus ngambika disipat. 2 Bala soldadu ngaga makota ari duri lalu ngengkahka nya ba pala Jesus. Sida ngerasukka baju jubah ke bechura* ungu ba iya. 3 Sida suah datai ngagai iya lalu madahka: “Tabi ke nuan, Raja orang Judah!” Sida mega suah nampar mua iya. 4 Pilate pansut baru lalu madah ngagai orang mayuh: “Peda kita! Aku mai iya pansut ngambika kita nemu aku nadai tetemuka penyalah iya.” 5 Udah nya, Jesus pan pansut. Iya ngena makota ke digaga ari duri enggau baju jubah ke bechura* ungu. Pilate lalu madah ngagai sida: “Peda kita orang tu!” 6 Tang lebuh bala tuai imam enggau bala jejaga meda iya, sida iya manjung: “Pantang* iya ba tiang! Pantang iya ba tiang!” Pilate madah ngagai sida: “Kita empu meh mai iya lalu mantang iya ba tiang, laban aku nadai tetemuka penyalah iya.” 7 Orang Judah ba dia madahka: “Kami bisi adat, lalu nitihka adat kami, iya patut mati laban iya madahka diri anak Petara.”

8 Lebuh Pilate ninga jaku sida, iya nyadi balat agi takut. 9 Nya alai, iya tama baru ngagai rumah gabenor lalu nanya Jesus: “Ari ni penatai nuan?” Tang Jesus enda nyaut. 10 Pilate lalu bejaku enggau iya: “Kati nuan enggai bejaku enggau aku? Endaka nuan nemu aku bisi kuasa ngelepaska nuan tauka ngasuh nuan diukum bunuh?”* 11 Ku Jesus nyaut: “Nuan endang sigi nadai kuasa atas aku, enti Petara enda meri kuasa nya ngagai nuan. Nya meh kebuah orang ke nyerahka aku ngagai nuan deka lebih agi bedosa.”

12 Ketegal nya, Pilate majak ngiga chara kena ngelepaska Jesus. Tang orang Judah manjung: “Enti nuan ngelepaska orang tu, nuan ukai kaban raja Rome.* Barang sapa ke madahka diri raja, ngelaban raja Rome.” 13 Pengudah ninga jaku sida iya, Pilate mai Jesus pansut, lalu Pilate duduk ba kerusi hakim ba endur ke dikumbai Geladak Batu. Dalam jaku Hebrew, nama endur nya dikumbai Gabata. 14 Maya nya, kira-kira jam 12 tengah hari,* lalu maya nya hari ke dikena nyediaka Hari Sabat. Pilate madahka orang Judah: “Peda! Raja kita!” 15 Tang sida inggar agi manjung: “Bunuh iya! Bunuh iya! Pantang iya ba tiang!” Pilate madah ngagai sida: “Patut aku ngukum bunuh raja kita?” Bala tuai imam nyaut: “Kami nadai raja bukai kelimpah ari raja Rome.” 16 Pilate lalu nyerahka Jesus ngagai sida, ngambika Jesus diukum bunuh ba tiang.

Sida pan mai Jesus. 17 Jesus ngesan tiang perinsa* iya empu lebuh iya ngagai endur ke dikumbai Endur Kerubung Pala,* tauka Golgota dalam jaku Hebrew. 18 Ba dia, sida mantang iya ba tiang sama enggau dua iku da agi orang. Siku ba sepiak kanan iya, lalu siku da agi ba sepiak kiba iya. 19 Pilate mega bisi nulis gelar tu ba siti papan: “Jesus orang Nasaret, Raja orang Judah,” lalu ngengkahka papan nya ba tiang perinsa* Jesus. 20 Mayuh orang Judah macha gelar nya, laban endur Jesus dipantang ba tiang semak Jerusalem. Gelar nya ditulis dalam jaku Hebrew, Latin, enggau Gerika. 21 Bala tuai imam orang Judah madah ngagai Pilate: “Anang nulis, ‘Raja orang Judah,’ tang tulis, orang tu madahka, ‘Aku tu Raja orang Judah.’” 22 Ku Pilate nyaut: “Nama-nama utai ke udah ditulis aku, enda tau diubah.”

23 Pengudah bala soldadu mantang Jesus ba tiang, sida ngambi gari luar iya lalu magi gari iya nyadi empat bagi. Sebagi ke siku soldadu. Sida mega ngambi gari dalam iya. Tang gari nya enda dijait. Iya ditenun ari atas nyentuk ke baruh. 24 Nya alai, sida madah ngagai pangan diri: “Anang nyarikka gari tu. Aram kitai bechabut undi kena nentuka sapa ke patut ngempu gari tu.” Utai ke nyadi tu ngamatka utai ke ditulis ba Bup Kudus: “Sida bebagika gari aku entara sida lalu bechabut undi ke gari aku.” Nya meh utai ke digaga bala soldadu nya.

25 Indai Jesus, menyadi indu iya, iya nya Maria bini Klopas, enggau Maria Magdalin, bediri semak tiang perinsa* Jesus. 26 Lebuh Jesus meda indai iya enggau murid ke dikesayauka iya bediri ba dia, iya madah ngagai indai iya: “Indai,* berengkah ari diatu, iya meh anak nuan.” 27 Udah nya, Jesus bejaku ngagai murid nya: “Berengkah ari diatu, iya meh indai nuan.” Kenyau ari nya, murid nya mai indai Jesus diau ba rumah iya.

28 Pengudah nya, Jesus nemu iya udah ngereja semua utai ke dipinta Apai iya. Iya lalu nyebut: “Aku aus.” Iya nyebut tu kena ngamatka utai ke disebut ba Bup Kudus. 29 Ba dia, bisi jag* ke penuh enggau wain ti masam. Nya alai, sida ngengkahka kapuk* ke penuh enggau wain ti masam ba tangkai hisop,* lalu nuatka kapuk nya ngagai mulut Jesus. 30 Pengudah nyepi wain ti masam nya, ku Jesus madahka: “Udah tembu!” Iya pan ngendukka pala iya, lalu ngapuska seput iya.

31 Ketegal hari nya hari ke dikena nyediaka Hari Sabat, orang Judah enggai nejuka bangkai orang mati mengkang ba tiang perinsa* maya Hari Sabat (laban Hari Sabat nya Hari Sabat ti besai.) Nya alai, orang Judah minta ngagai Pilate ngambika kaki orang ke dipantang ba tiang nya dipatahka lalu bangkai sida diturunka. 32 Bala soldadu pan datai lalu matahka kaki dua iku orang ke ba tiang perinsa* sepiak Jesus. 33 Tang lebuh sida datai ba Jesus, sida meda iya udah mati. Nya alai, sida enda matahka kaki iya. 34 Taja pia, siku soldadu ngerejang rusuk Jesus ngena sangkuh. Tekala nya, darah enggau ai lalu pansut. 35 Orang ke meda utai ke nyadi nya udah meri saksi pasal utai nya, lalu saksi ke diberi iya endang amat. Orang nya nemu utai ke disebut iya nya amat, lalu iya nyebut nya ngambika kita mega arap. 36 Utai nya nyadi kena ngamatka utai ke ditulis ba Bup Kudus: “Nadai siti pan tulang iya deka dipatahka.”* 37 Bisi mega ayat bukai ke madahka: “Sida deka merening ngagai iya ti udah direjang sida.”

38 Pengudah semua utai nya nyadi, Josep ke ari Arimatea, minta pemendar ari Pilate ngambika iya ulih ngambi bangkai Jesus. Pilate ngemendarka iya, lalu Josep mupuk ngambi bangkai Jesus. Josep nya murid Jesus, tang iya enda madah ngagai orang bukai pasal nya laban iya takutka orang Judah. 39 Nikodimus, ke kala datai ngagai Jesus maya malam hari, mega bisi datai kia. Iya mai mur ke udah dichampurka* enggau garu. Utai nya ngemerat kira-kira 30 kilogram.* 40 Sida ngambi bangkai Jesus lalu malut iya ngena kain linin enggau rempah nya, nitihka adat orang Judah lebuh sida nguburka orang ke udah mati. 41 Ba endur Jesus diukum bunuh,* bisi siti taman. Ba taman nya, bisi siti kubur ti baru, ke bedau dikena. 42 Ketegal hari nya hari ke dikena nyediaka Hari Sabat orang Judah lalu kubur nya semak, nya alai sida ngengkahka bangkai Jesus ba dia.