John

5 Udah nya, bisi pengerami orang Judah. Nya alai, Jesus mupuk ngagai Jerusalem. 2 Ba Jerusalem, semak enggau Pintu Bedus, bisi siti kulam ti dikumbai Betsata dalam jaku Hebrew. Kulam nya dikelingi lima iti serambi.* 3 Mayuh orang ke sakit, ke buta, ke pinchat, sereta ke mati jari tauka mati kaki gali ba serambi nya. 4* —— 5 Ba dia, bisi siku lelaki ke udah sakit pengelama 38 taun. 6 Lebuh Jesus meda lelaki nya gali ba dia, Jesus nemu iya udah lama sakit. Nya alai, Jesus nanya iya: “Nuan ka gerai?” 7 Ku lelaki ke sakit nya nyaut: “Tuan, nadai orang nanggung aku ngagai kulam nya, lebuh ai kulam nya beumbak. Tiap kali aku ka kin, orang bukai udah dulu agi ari aku.” 8 Jesus bejaku ngagai iya: “Angkat! Bai tikai* nuan lalu bejalai.” 9 Tekala nya, lelaki nya gerai. Iya mai tikai iya lalu bejalai.

Maya nya, Hari Sabat. 10 Nya alai, orang Judah madah ngagai lelaki ke udah gerai nya: “Seharitu, Hari Sabat. Nuan ngelanggar Adat laban nuan mai tikai nya.” 11 Tang lelaki nya nyaut sida: “Orang ke ngeraika aku ke madah ngagai aku, ‘Bai tikai nuan lalu bejalai.’” 12 Sida nanya iya: “Sapa orang ke madah ngagai nuan, ‘Bai tikai nuan lalu bejalai’?” 13 Tang iya enda nemu sapa ke ngeraika iya, laban ba dia bisi mayuh orang, lalu Jesus udah nyelitka diri ba entara orang mayuh.

14 Udah nya, Jesus betemu enggau lelaki nya ba Rumah Sembiang, lalu bejaku ngagai iya: “Nuan diatu udah gerai. Anang agi bedosa ngambika utai ti jai agi enda nyadi ba nuan.” 15 Lelaki nya mupuk lalu madah ngagai orang Judah, Jesus meh ke ngeraika iya. 16 Nya alai, orang Judah berengkah ngelaban Jesus, laban iya ngereja utai nya maya Hari Sabat. 17 Tang Jesus madah ngagai sida: “Apai aku agi gawa nyentuk ke diatu. Lalu aku pan agi gawa.” 18 Ketegal nya, orang Judah bebendar agi deka munuh iya, laban iya ukai aja ngelanggar Adat maya Hari Sabat, tang mega madahka Petara, Apai iya, lalu ngumbai diri sebaka enggau Petara.

19 Nya alai, Jesus madah ngagai sida: “Enggau bendar aku madahka: Anak enda ulih ngereja nama-nama utai nitihka peneka diri, tang semina ngereja utai ke dipeda iya kereja Apai. Nama utai ke dikereja Apai, nya meh utai ke dikereja Anak. 20 Apai rinduka Anak, lalu mandangka semua utai ti dikereja Iya ngagai Anak. Iya deka mandangka utai ti besai agi ari tu ngagai Anak, ngambika semua kita alit ati. 21 Baka Apai ke ngidupka orang ari mati, Anak mega deka ngidupka barang sapa ke dikedekaka iya ari mati. 22 Apai enda ngakim, tang Iya meri semua kuasa kena ngakim ngagai Anak Iya, 23 ngambika semua orang bebasaka Anak, baka sida ke bebasaka Apai. Orang ke enda bebasaka Anak, enda bebasaka Apai ke udah ngirumka iya. 24 Enggau bendar aku madah ngagai kita: Orang ke ninga jaku aku lalu arapka Iya ti udah ngirumka aku, bulih pengidup ti meruan belama iya. Iya enda diakim, tang iya udah mindah ari pemati, lalu bulih pengidup.

25 “Enggau bendar aku madah ngagai kita: Maya deka datai, indah maya nya udah datai, alai orang ke mati deka ninga nyawa Anak Petara. Orang ke ninga sereta ngasi deka idup. 26 Apai bisi kuasa kena meri pengidup, lalu Iya mega meri kuasa nya ngagai Anak. 27 Apai udah meri kuasa ngagai iya kena ngakim orang, laban iya Anak Mensia. 28 Anang tekenyit ketegal utai tu, laban maya deka datai alai semua orang ke ba dalam kubur* deka ninga nyawa iya, 29 lalu pansut. Orang ke ngereja utai ti manah deka diangkatka idup baru lalu bulih pengidup ti meruan belama iya, tang orang ke ngereja utai ti jai deka diangkatka idup baru lalu diakim. 30 Aku enda ulih ngereja nama-nama utai nitihka peneka aku empu. Aku ngakim orang nitihka utai ke udah dipadahka Apai ngagai aku. Aku ngakim orang enggau lurus, laban aku enda nitihka peneka aku empu, tang nitihka peneka Iya ke udah ngirumka aku.

31 “Enti semina aku ke besaksi pasal aku empu, saksi ke diberi aku ukai saksi ti bendar. 32 Tang bisi siku agi ke meri saksi pasal aku, lalu aku nemu, saksi ke diberi iya pasal aku nya endang bendar. 33 Kita udah nganjung orang ngagai John, lalu John udah meri saksi ti bendar. 34 Kebendar iya, aku enda begunaka saksi ke diberi mensia, tang aku nyebut pekara tu ngambika kita ulih selamat. 35 John baka lampu kelita ke ditungkun sereta mancharka penampak, lalu kita ingin deka gaga ati dalam penampak iya enda lama. 36 Tang aku bisi meri saksi ke besai agi ari saksi ke diberi John, laban aku ngereja pengawa ke udah diberi Apai aku, lalu pengawa nya nyadi saksi ke nunjukka aku udah dikirum Apai. 37 Apai ke ngirumka aku mega udah meri saksi pasal aku. Semua kita bedau kala ninga nyawa Iya tauka meda mua Iya. 38 Jaku Iya nadai ba dalam kita, laban kita enda arapka orang ke udah dikirumka Iya.

39 “Kita mansik Bup Kudus, laban kita ngumbai enti kita ngereja nya, kita deka bulih pengidup ti meruan belama iya. Kebendar nya, Bup Kudus meri saksi pasal aku. 40 Tang semua kita enggai datai ngagai aku ngambika bulih pengidup. 41 Aku enda nerima mulia ari mensia. 42 Tang aku nemu, ba dalam ati kita, kita nadai pengerindu ke Petara. 43 Aku datai dalam nama Apai aku, tang kita enda nerima aku. Tang enti sema orang datai dalam nama diri empu, kita nerima orang nya. 44 Baka ni ku kita tau arapka aku, enti kita rindu nerima mulia ari pangan diri, lalu enda bebendar ngiga mulia ari Petara ti bendar? 45 Anang ngumbai aku deka nuduh kita ba mua Apai. Iya ke deka nuduh kita nya Moses, orang ke dikearapka kita. 46 Kebendar iya, enti kita arapka Moses, kita tentu arapka aku, laban iya nulis pasal aku. 47 Tang enti kita enda arapka utai ti ditulis iya, baka ni ku kita deka arapka jaku aku?”