Dua Peter

3 Bala menyadi ke dikerindu, tu meh surat ti kedua ke ditulis aku ngagai kita. Baka surat aku ti keterubah, aku deka ngingatka kita pasal sekeda utai ngambika kita berunding enggau serius. 2 Aku ngereja nya ngambika kita ingatka jaku ke udah dulu dipadah bala nabi ti kudus, sereta ingatka pesan ke diberi Tuan enggau Penyelamat kitai ngagai kita nengah bala rasul. 3 Kita patut nemu utai ti penting tu: Ba hari ti penudi, deka bisi orang ke rindu ngeleseka utai ti manah. Sida deka ngereja utai nitihka pengingin diri empu, 4 lalu madahka: “Iya besemaya deka datai,* tang ni iya deh? Kenyau ari aki ini kitai tinduk dalam pemati, semua utai agi sama baka lebuh dunya tu baru digaga.”

5 Sida sengaja enda ibuhka pekara ti amat tu: Kenyau ari suba, nengah jaku Petara, langit endang udah bisi, lalu pia mega bisi tanah ke diseraraka ari ai lalu dikelingi ai. 6 Nengah nya, dunya maya jeman nya udah dipunaska lebuh dunya ampuh laban ai. 7 Tang ngena jaku ti sama, langit enggau dunya ke bisi diatu deka dipunaska ngena api, lalu langit enggau dunya nya deka ditejuka dulu nyentuk ngagai hari orang ke enda bebasaka Petara diukum lalu dipunaska.

8 Taja pia, bala menyadi ke dikerindu, anang enda ingatka pekara tu: Ba Jehovah, sehari baka seribu taun, lalu seribu taun baka sehari. 9 Jehovah enda lubah ngamatka semaya Iya baka ke diperundingka sekeda orang. Tang Iya sabar enggau kita, laban Iya enggai siku pan ari kita dipunaska. Iya deka semua orang nesal ati. 10 Tang hari Jehovah deka datai baka penchuri. Maya nya, langit deka jampat lenyau lalu mansutka bunyi guntur. Semua utai ba langit sereta ba dunya deka luluh ketegal kelalu balat angat, lalu dunya sereta semua utai ke digaga ba dunya deka dipandangka magang.

11 Ketegal semua utai nya deka luluh baka nya, perundingka kita deka nyadi orang ke baka ni. Ulah kita patut kudus, lalu kita patut ngayanka pengawa ke nunjukka kita enda bebagi ati nyembah Petara. 12 Kita patut baka nya lebuh kita nganti sereta seruran berundingka* penatai hari Jehovah. Ba hari nya, langit deka angus ketegal api, lalu semua utai ba langit sereta ba dunya deka luluh ketegal kelalu balat angat. 13 Tang, kitai nganti langit baru enggau dunya baru, baka ke udah disemayaka Petara, lalu ba dia semua utai deka nyadi lurus magang.

14 Nya alai, bala menyadi ti dikerindu, ketegal kita benung nganti semua utai nya, uji meh enggau bebendar ngambika pengujung iya, Petara beratika kita enda bepetik, tuchi, sereta bisi kaul ti manah enggau Iya. 15 Nambahka nya, kita patut ngumbai penyabar Tuan kitai nya peluang ngambika diselamatka, baka ke udah ditulis menyadi ti dikerinduka kitai, Paul, ngagai kita sejalai enggau penemu-dalam ke diberi ngagai iya. 16 Iya bisi nyebut pasal semua nya ba semua surat iya. Taja pia, sekeda utai ke dipadah ba surat iya tusah deka dimeretika. Orang ke enda nemu utai* sereta ke enda tetap runding, mutarbelitka utai ke dipadah ba dia, baka sida ke mutarbelitka begian bukai ba Bup Kudus. Ketegal nya, sida deka dipunaska.

17 Nya alai, bala menyadi ti dikerindu, ketegal kita udah nemu pasal nya, bejimat meh ngambika kita seruran tegap,* lalu enda dibai limpang sama enggau sida ketegal pemula orang ke ngelanggar adat. 18 Terus meh ngulihka mayuh agi pemanah ati ti besai enggau penemu pasal Tuan sereta Penyelamat kitai, Jesus Kristus. Ngarapka iya dimuliaka diatu nyentuk ke belama iya. Amin.