Luke

21 Lebuh Jesus malik ngagai tabung duit, iya meda orang ke kaya nepu pemeri sida ke dalam tabung duit nya. 2 Udah nya, iya meda siku indu ke balu sereta seranta nepuka dua singkap duit seling,* ke mimit amat rega. 3 Lalu ku iya: “Enggau bendar aku madah ngagai kita: Indu balu ke seranta tu udah nepuka mayuh agi ke dalam tabung duit nya ari semua sida ke bukai. 4 Laban sida ti bukai meri laluh pengaya sida, tang indu ke seranta tu udah meri semua utai ti dikemisi iya, semua utai ti dikena iya beridup.”

5 Udah nya, beberapa iku orang bejaku pasal Rumah Sembiang ke diias ngena batu ti manah sereta bemacham pemeri ke Petara. 6 Ku Jesus madahka: “Maya deka datai alai semua utai ke dipeda kita tu deka diruntuhka. Nadai sigi batu pan deka mengkang betusun ba atas pangan diri.” 7 Udah nya, sida nanya Jesus: “Pengajar, kemaya semua utai tu deka nyadi? Lalu nama tanda ti nunjukka semua utai tu deka nyadi?” 8 Ku iya nyaut: “Bejimat kita, enggaika orang nesatka kita. Mayuh orang deka datai dalam nama aku. Ku sida, ‘Aku tu Kristus!’ Sida mega madahka, ‘Maya ti udah ditetapka nyau semak.’ Anang nitihka sida. 9 Nambahka nya, lebuh kita ninga munyi perang sereta penyarut ke nyadi, anang takut, laban semua utai nya endang patut nyadi dulu. Taja pia, pengujung bedau datai tekala nya.”

10 Udah nya, iya madah ngagai sida: “Bansa siti deka beperang ngelaban bansa siti, lalu perintah siti deka beperang ngelaban perintah siti. 11 Tanah berenyang ti balat deka nyadi. Lapar pungkang enggau penyakit berampit mega deka nyadi ba mayuh bengkah endur. Lalu orang deka meda utai ti ngenakutka sereta tanda ti nyelai ba langit.

12 “Tang sebedau semua utai nya nyadi, orang deka nangkap sereta merinsaka kita. Kita deka dibai ngagai balai gempuru ngambika diakim lalu dijil. Kita deka dibai ngagai raja enggau gabenor ketegal nama aku. 13 Tu deka nyadika peluang alai kita meri saksi. 14 Nya alai, kita patut mutuska dalam ati kita ngambika enda belatih dulu pasal chara kita deka ngetanka diri. 15 Laban aku deka meri kita penemu-dalam sereta utai ke patut disebut kita. Enggau nya, taja pan semua orang ke ngelaban kita begempung, sida enda ulih ngelaban tauka mantah jaku kita. 16 Kelimpah ari nya, indah apai indai, diri menyadi, kaban belayan, enggau bala kaban deka nyerahka kita ngagai munsuh. Sida mega deka munuh sekeda ari kita. 17 Lalu semua orang deka begedika kita ketegal nama aku. 18 Tang selambar pan nadai meh buk kita deka lenyau. 19 Enti kita betan, kita deka mengkang idup.

20 “Tang lebuh kita meda Jerusalem dikelulung bala soldadu, tu reti iya nengeri nya deka dirusakka enda lama da agi. 21 Maya nya, awakka orang ke diau ba Judea rari ngagai bukit. Sida ke ba Jerusalem patut pansut ari nengeri nya, lalu sida ke ba genturung pendiau enda patut tama ngagai nengeri nya. 22 Laban nya meh maya Petara ngenataika ukum* Iya ngambika semua utai ke ditulis dikeamatka. 23 Naka meh penusah indu ke ngandung enggau bala indai ke nusuka anak maya nya! Laban nengeri tu deka napi penusah ti balat, lalu bansa tu deka diukum. 24 Sida deka dibunuh ngena pedang, lalu sekeda deka ditabanka nyadi orang tangkap ngagai mayuh bengkah nengeri bukai. Jerusalem deka diindik bansa bukai* nyentuk ke timpuh ke diberi ngagai bansa bukai* nya udah abis.

25 “Kelimpah ari nya, tanda deka dipeda ba mata panas, bulan, enggau bintang. Bemacham bansa ba dunya deka balat merinsa lalu enda nemu chara ngelepaska diri ketegal pemalat bunyi segum tasik ti begelumbang. 26 Lebuh orang nganti utai ti deka nyadi ba serata dunya, sida deka luput laban takut ketegal kuasa ti ba langit deka begegar. 27 Udah nya, orang deka meda Anak Mensia datai dalam remang ngena kuasa enggau mulia ti besai. 28 Tang lebuh utai tu belabuh nyadi, bediri rurus lalu angkatka pala kita, laban pengelepas kita nyau semak.”

29 Udah nya, Jesus madahka jaku sempama tu ngagai sida: “Peratika pun kayu ara enggau semua pun kayu ti bukai. 30 Lebuh kita meda semua pun kayu nya belabuh bedaun, kita nemu musin panas nyau semak. 31 Pia mega, lebuh kita meda semua utai tu nyadi, kita patut nemu Perintah Petara nyau semak. 32 Enggau bendar aku madah ngagai kita: Rebak tu enda mati seagi-agi semua utai tu bedau nyadi. 33 Langit enggau dunya deka lenyau, tang jaku aku deka mengkang meruan belama iya.

34 “Bejimat kita enggaika ati kita kelalu balat ditekan ketegal kelalu bendar makai enggau ngirup sereta irauka pengidup, nyentukka hari nya ngenyit ninggang kita 35 baka panjuk. Laban hari nya deka ninggang semua orang ke diau ba serata dunya. 36 Nya alai, seruran bejaga sereta suah bebendar minta ngagai Petara ngambika kita ulih diselamatka ari semua utai ke patut nyadi tu, lalu kita ulih bediri ba mua Anak Mensia.”

37 Maya siang hari, Jesus ngajar ba Rumah Sembiang. Tang maya malam hari, iya pansut lalu bemalam ba siti bukit ke dikumbai Bukit Kana. 38 Maya tumu pagi, semua orang datai ngagai Rumah Sembiang laban deka mendingka iya.