Jude

1 Surat tu ari Jude, ke nyadi ulun Jesus Kristus, sereta mega menyadi James. Nuju sida ke dikangau sereta dikerinduka Petara, Apai kitai, lalu dijaga ketegal sida enggi Jesus Kristus.

2 Awakka kita nerima mayuh agi pengasih, pengelantang, enggau pengerindu.

3 Bala menyadi ti dikerindu, aku keran amat deka nulis pasal pengelepas ke dikembuan semua kitai. Tang diatu, aku ngasaika aku patut nulis jaku lalau tu ngagai kita. Kita patut bebendar ngetanka pengarap ti udah diberi ngagai nembiak Petara ti kudus. Pengarap nya diberi sekali lalu ulih tan belama iya. 4 Tuju aku nulis surat tu laban sekeda orang udah belalai tama ngagai raban kita, tang kita enda nemu pasal sida. Kenyau ari menya, Bup Kudus nentuka sida deka diukum. Sida enda bebasaka Petara kitai. Sida ngambi ulih ari pemanah ati Iya ti besai, lalu enda malu ngereja utai ti jai.* Sida enda tetap ati ngagai Tuan kitai ke siku aja, sereta iya ke ngempu kitai, Jesus Kristus.

5 Kita endang udah nemu semua tu. Tang aku deka ngingatka kita, taja pan Jehovah* kala nyelamatka nembiak Iya ari Ejip, tang Iya ngemunaska sida ke enda arapka Iya. 6 Iya mega nanchang bala melikat ke ninggalka pengawa sereta endur diau sida ti asal. Bala melikat nya ditanchang ba endur ti balat petang nyentuk ngagai maya sida diakim. 7 Pia mega orang ba Sodom enggau Gomorah sereta orang ba nengeri ke semak sida, majak ngereja ulah seks ti kamah* lalu ngemuaska pengingin tubuh ti salah. Sida diukum ngena api ke enda nemu padam, lalu tu nyadika tangkan ngagai kitai.

8 Pia mega enggau sida ke belalai tama ngagai raban kita. Sida selalu ngambarka utai ti jai ba runding sida, ngereja ulah ti kamah,* enda bebasaka sida ke megai kuasa, sereta nyebut utai ti balat jai pasal orang ti dimuliaka Petara. 9 Tang lebuh tuai melikat, Mikael, belaban jaku enggau Sitan* pasal bangkai Moses, Mikael enda berani ngakim Sitan ngena jaku jai. Iya semina nyebut: “Awakka Jehovah ngerara nuan.” 10 Tang sida nyebut utai ti jai pasal semua pekara ti enda dimeretika sida. Sida suah ngereja utai baka jelu ti enda nemu berunding, lalu tu ngerusak pendiau sida.

11 Tulah meh sida. Sida nitihka singkang Kain, lalu sida beguai nitihka jalai Balam ti tesat ketegal deka ngulihka upah. Sida udah dipunaska, laban baka Korah, sida ngelaban orang ke bisi kuasa atas sida ngena jaku! 12 Lebuh sida beserumpu makai enggau kita,* sida baka batu besai ti tajam ke enda ulih dipeda dalam ai; sida baka pengibun bedus ti enda nemu malu, lalu semina berundingka diri empu aja;* sida baka remang ti dipuputka ribut kin kia, tang nadai mai ujan; sida baka kayu ti nadai buah lebuh musin ruruh, ke endang sigi udah mati* sereta udah dichabut enggau urat iya sekali; 13 baka pupu gelumbang ba tasik, sida mantaika ulah diri ti enda nemu malu; sida baka bintang ke enda nitihka pejalai ti udah ditetapka, lalu sida deka diengkah ba endur ti pemadu petang belama iya.

14 Enok, serak ketujuh ari Adam, mega benabi pasal sida: “Peda kita! Jehovah enggau bepuluh ribu bala melikat Iya ti kudus datai 15 ngakim semua orang, sereta ngukum sida ke bedosa ti enda bebasaka Petara. Petara ngereja nya, ketegal sida udah ngereja mayuh macham penyalah ti besai, lalu nyebut jaku ti balat jai kena ngelaban Iya.”

16 Sida tu seruran mutap lalu enda puas ati enggau utai ti dikemisi diri; sida nurutka pengingin diri, muji diri, lalu ngelangkungka orang kena sida ngambi ulih ba orang nya.

17 Tang kita, menyadi ti dikerindu, kingatka meh jaku benabi ti udah disebut bala rasul Tuan Jesus Kristus kitai. 18 Sida suah madah ngagai kita: “Ba maya ti penudi, deka bisi orang ke rindu ngeleseka utai ti ngena, sereta ke nurutka pengingin diri ti jai.” 19 Sida tu meh orang ke ngachau penyerakup, ngayanka ulah baka jelu, sereta enda nitihka iring kuasa kudus* Petara. 20 Kita menyadi ti dikerindu, tegapka pengarap kita ti pemadu kudus lalu besampi nitihka iring kuasa kudus Petara, 21 ngambika kita meruan dalam pengerindu Petara, lebuh kita nganti pengasih Tuan Jesus Kristus kitai, ti deka nulung kita bulih pengidup ti meruan belama iya. 22 Pia mega, anang ngetu ngayanka pengasih ngagai sida ke kakang ati. 23 Tarit sida ari api kena nyelamatka sida. Terus meh kasihka orang bukai, tang kita patut bejimat lebuh ngereja nya. Kita patut begedika ulah* sida ti udah kamah ketegal dosa.

24 Petara ti bemulia ulih nyaga kita ari ngereja dosa. Iya ulih ngasuh kita gaga ati sereta mengkang tuchi ba mata Iya. 25 Petara udah nyelamatka kitai nengah Tuan kitai, Jesus Kristus. Petara meh ke patut nerima puji, mulia, pengering, enggau kuasa, kenyau ari dulu kelia nyentuk ngagai diatu enggau ke belama iya. Amin.