Luke

6 Nyadi sekali kena Hari Sabat, Jesus bejalai nengah ladang gandum. Maya bejalai nengah ladang nya, bala murid iya matahka tangkai gandum, ngusuk iya ngena jari, lalu makai igi gandum. 2 Nya alai, sekeda orang Parisi bejaku: “Nama kebuah kita ngereja utai ti enda diasuh Adat lebuh Hari Sabat?” 3 Tang ku Jesus nyaut sida: “Kati kita nadai kala macha pasal utai ti dikereja David, lebuh iya enggau bala iya lapar? 4 Endaka iya tama ngagai Rumah Sembiang, nerima roti ti udah diberi ngagai Petara, lalu makai iya, lalu udah nya meri roti nya ngagai bala iya? Kebendar iya, nadai orang tau makai roti nya, tang semina bala imam aja ke tau.” 5 Udah nya, Jesus bejaku ngagai sida: “Anak Mensia, Tuan ke bisi kuasa atas Hari Sabat.”

6 Maya Hari Sabat ti bukai, iya tama ngagai balai gempuru lalu berengkah ngajar. Ba dia, bisi siku lelaki ke mati jari kanan.* 7 Bala penulis Adat enggau orang Parisi bendar beratika Jesus. Sida deka meda sekalika iya deka ngeraika orang ba Hari Sabat tauka enda, ngambika sida ulih ngiga kebuah kena nuduh iya. 8 Tang Jesus nemu utai ke diperunding sida. Nya alai, iya bejaku ngagai lelaki ke mati jari sepiak nya: “Angkat lalu bediri ba tengah.” Lelaki nya pan angkat lalu bediri ba dia. 9 Udah nya, Jesus bejaku ngagai sida: “Aku nanya kita: Nama patut digaga kitai maya Hari Sabat? Ngereja utai ti manah tauka utai ti jai? Munuh tauka ngidupka nyawa?” 10 Jesus merening ngagai semua sida, lalu bejaku ngagai lelaki ke mati jari sepiak nya: “Unjurka jari nuan.” Lelaki nya ngunjurka jari iya, lalu jari iya gerai. 11 Tang sida balat ringat, lalu baum pasal utai ti deka dikereja sida ngagai Jesus.

12 Bisi sekali, iya niki ngagai bukit, deka besampi. Semalam-malam nya, iya besampi ngagai Petara. 13 Pengudah hari nyau tawas, iya ngangauka bala murid iya. Iya milih 12 iku ari sida, lalu ngumbai sida nya rasul. 14 Tu nama sida: Simon ke mega dikumbai iya Peter, Andrew menyadi Simon, James, John, Philip, Bartolomew, 15 Matthew, Thomas, James anak Alfius, Simon ke dikumbai “iya ti ransing,” 16 Judas anak James, enggau Judas Iskariot ke udah nya nyerahka Jesus ngagai munsuh.

17 Udah nya, Jesus nurun ari bukit enggau sida, lalu bediri ba endur ti rata. Ba dia, bisi mayuh murid iya sereta mayuh orang ke datai ari serata menua Judea enggau Jerusalem. Bisi mega ke datai ari Tirus enggau Sidon, ke semak enggau tebing tasik. Sida datai laban sida deka mendingka iya sereta ngarapka penyakit sida digeraika. 18 Indah orang ke dikachau melikat ti jai mega digeraika. 19 Semua sida deka negu iya, laban kuasa pansut ari iya lalu ngeraika semua sida.

20 Jesus malik ngagai bala murid iya lalu berengkah bejaku:

“Gaga ati meh kita ke seranta, laban Perintah Petara endang enggi kita.

21 “Gaga ati meh kita ke benung lapar, laban kita deka dikenyangka.

“Gaga ati meh kita ke benung nyabak, laban kita deka ketawa.

22 “Gaga ati meh kita lebuh orang begedika kita, enggai begulai enggau kita, ngeleseka kita, sereta ngenyaika nama kita ketegal Anak Mensia. 23 Ba hari nya, gaga sereta lantang ati meh kita, laban kita bisi upah ti besai ba serega. Indah aki ini sida mega merinsaka bala nabi ngena chara ti sama.

24 “Tang tulah meh kita ke kaya, laban kita udah ngasaika pengidup ti nyamai enggau pengabis iya.

25 “Tulah meh kita ke udah kenyang diatu, laban kita deka lapar.

“Tulah meh kita ke ketawa diatu, laban kita deka tusah ati sereta nyabak.

26 “Tulah meh kita enti semua orang muji kita, laban aki ini sida mega muji bala nabi pelesu.

27 “Tang aku madah ngagai kita ke mending: Anang ngetu rinduka munsuh kita, kereja utai ti manah ngagai sida ke begedika kita, 28 sebut utai ti manah pasal* sida ke nyumpah kita, sereta besampi meh ke sida ke ngeleseka kita. 29 Enti orang nampar kuyu kita sepiak, awakka iya nampar kuyu kita sepiak agi. Enti orang ngambi gari luar kita, awakka iya mega ngambi gari dalam kita. 30 Enti orang minta utai ari kita, beri utai nya ngagai iya, lalu enti orang ngambi barang kita, anang minta barang nya dipulaika baru.

31 “Pia mega, kereja ngagai orang baka ke dikedekaka kita kereja orang ngagai kita.

32 “Enti kita semina rinduka orang ke rinduka kita, kati kita patut dipuji? Orang ke bedosa pan rinduka orang ke rinduka sida. 33 Enti kita semina manah enggau orang ke manah enggau kita, kati kita patut dipuji? Orang ke bedosa pan ngereja utai ti sama. 34 Kelimpah ari nya, enti kita nyali duit* ngagai orang, lalu ngarapka iya mayar ngagai kita, kati kita patut dipuji? Orang ke bedosa pan nyali duit ngagai orang ke bedosa, lalu ngarapka semua duit nya deka dipulaika baru. 35 Tang kita anang ngetu rinduka munsuh kita. Kereja utai ti manah ngagai orang bukai. Lebuh nyali utai ngagai orang, anang ngarapka orang malas kita ngena nama-nama utai. Enti kita ngereja nya, kita deka bulih upah ti besai, lalu nyadi anak Petara ti Pemadu Tinggi, laban Iya manah ati indah ngagai orang ke enda beterima kasih sereta ngagai orang ke jai. 36 Anang ngetu kasihka orang, baka Apai kita ti pengasih.

37 “Badu agi ngakim orang bukai, ngambika kita enda diakim. Badu agi ngutuk orang bukai, ngambika kita enda dikutuk. Seruran ngampunka orang bukai, ngambika kita deka diampun. 38 Anang ngetu meri utai ti dikemisi kita ngagai orang, lalu orang deka meri utai ke dikemisi sida ngagai kita. Sida deka nuangka mayuh utai ke dalam kantung ba gari* kita. Sida mega ngusak lalu ngenyak iya. Taja pia, agi meh utai nya penuh melumpa,* laban takar ti dikena kita nakar, deka dikena nakar kita.”

39 Udah nya, iya mega madahka sida siti jaku sempama: “Orang ke buta enggai nyadi ngiring orang ke buta, enda pia? Enti iya ngereja nya, endaka seduai iya sama labuh ngagai lubang? 40 Nadai murid ke manah agi ari pengajar iya, tang tiap iku orang ke diajar enggau chukup manah* deka nyadi baka pengajar iya. 41 Nyadi, nama kebuah kita meda repik kayu ba mata menyadi* kita, tang enda meda lumpung kayu ba mata kita empu? 42 Baka ni ku kita tau nyebut ngagai menyadi* kita, ‘Menyadi, awakka aku muai repik kayu ari mata nuan,’ tang kita enda meda lumpung kayu dalam mata kita empu. Kita tu orang ke pura-pura ngapa! Buai dulu lumpung kayu ari mata kita empu, nya baru mata kita lansik, lalu kita ulih muai repik kayu ari mata menyadi kita.

43 “Pun kayu ti galak enggai nyadi mansutka buah ti enda manah. Lalu pun kayu ti enda galak, enggai nyadi mansutka buah ti manah, 44 laban tiap iti pun kayu dikelala ari buah iya. Ambika chunto, orang enda ngumpul buah anggur tauka buah ara ari madang duri. 45 Orang ke manah mansutka utai ti manah ke disimpan dalam ati iya, lalu orang ke jai mansutka utai ti jai ke disimpan dalam ati iya. Laban utai ti disebut orang datai ari ati.

46 “Nama kebuah kita ngangauka aku ‘Tuan! Tuan!’ tang kita enda nitihka jaku aku? 47 Baka tu meh gaya tiap orang ke datai ngagai aku, ke mendingka jaku aku sereta nitihka iya: 48 Iya baka siku lelaki ke deka ngaga rumah. Iya numbak lubang ti dalam lalu nudukka pugu rumah iya ba atas batu. Maya ai bah nyadi, lalu ai sungai mangka rumah nya, rumah nya enda beguyat, laban iya udah digaga enggau tegap. 49 Tang barang sapa ke mendingka jaku aku tang nadai ngereja nama-nama utai, baka siku lelaki ke ngaga rumah ti nadai pugu. Lebuh ai sungai mangka rumah nya, rumah nya lalu rubuh. Naka meh pemalat rumah nya rusak.”