Matthew

26 Pengudah Jesus nyebut semua utai nya, iya bejaku ngagai bala murid iya: 2 “Kita nemu, Pengerami Paska deka belabuh dua hari da agi, lalu Anak Mensia deka diserahka ngagai munsuh ngambika diukum bunuh ba tiang.”

3 Udah nya, bala tuai imam enggau bala tuai bansa orang Judah begelumu ba laman rumah imam besai, ke benama Kaiapas. 4 Sida baum deka ngena pemula ngambika ulih nangkap Jesus lalu munuh iya. 5 Tang ku sida: “Anang nangkap iya maya pengerami, enggaika orang begau.”

6 Lebuh Jesus ba Betani, ba rumah Simon ke kala sakit lan,* 7 siku indu datai ngagai iya mai sebutul* minyak wangi ti mar rega. Indu nya nuang minyak wangi nya ba pala Jesus, lebuh Jesus benung makai. 8 Lebuh bala murid iya meda nya, sida pedis ati. Ku sida: “Nama kebuah masau minyak wangi nya? 9 Enti dijual, mar rega minyak wangi nya, lalu duit nya ulih diberi ngagai orang ke seranta.” 10 Jesus nemu utai ke disebut sida, lalu bejaku ngagai sida: “Nama kebuah kita ngasuh indu tu tusah ati? Iya udah ngereja utai ti manah ke aku. 11 Orang ke seranta deka seruran bisi enggau kita, tang aku enda seruran bisi enggau kita. 12 Lebuh iya nuang minyak wangi nya ba tubuh aku, iya nyediaka aku ke deka dikubur. 13 Enggau bendar aku madah ngagai kita: Enda ngira ba dini alai Berita Manah ditusui ba serata dunya, utai ke udah digaga indu tu pan deka ditusui, kena ngingatka iya.”

14 Udah nya, siku ari 12 iku rasul Jesus, ke benama Judas Iskariot, betemu enggau bala tuai imam. 15 Ku iya: “Nama utai ti deka diberi kita ngagai aku enti aku nyerahka Jesus ngagai kita?” Sida lalu besemaya deka meri iya 30 singkap duit pirak. 16 Nya alai, berengkah ari nya, Judas seruran begigaka peluang kena nyerahka Jesus ngagai sida.

17 Ba hari ti keterubah Pengerami Roti ti Enda Beragi, bala murid datai ngagai Jesus lalu bejaku: “Dini nuan deka kami nyediaka pemakai ke nuan kena ngintu Pengerami Paska?” 18 Ku iya: “Alai kita ngagai Jerusalem lalu betemu enggau siku lelaki. Padahka tu ngagai iya: ‘Ku Pengajar: “Maya ke ditetap ke aku udah semak; aku enggau bala murid aku deka ngintu Pengerami Paska ba rumah nuan.”’” 19 Nya alai, bala murid Jesus ngereja utai ti diasuh iya, lalu nyediaka pemakai ke Pengerami Paska.

20 Lebuh hari nyau lemai, iya duduk lalu makai ba mija enggau 12 iku murid iya. 21 Lebuh sida benung makai, Jesus bejaku: “Enggau bendar aku madah ngagai kita: Siku ari kita deka nyerahka aku ngagai munsuh.” 22 Bala murid Jesus tusah amat ati ninga nya. Lalu sida siku-siku belabuh nanya iya: “Ukai aku ku nuan nya, Tuan?” 23 Disaut Jesus: “Orang ke ngambi pemakai ari mangkuk ti sama enggau aku, nya meh ke deka nyerahka aku ngagai munsuh. 24 Anak Mensia endang deka mati munyi ti udah ditulis, tang tulah meh orang ke deka nyerahka Anak Mensia ngagai munsuh! Manah agi enti orang nya enda ada.” 25 Judas, ke deka nyerahka iya ngagai munsuh, lalu bejaku: “Ukai aku ku nuan nya, Rabbi?”* Disaut Jesus: “Nuan empu nemu saut iya.”

26 Lebuh sida benung makai, Jesus ngambi roti. Pengudah iya besampi meri terima kasih,* iya mechahka roti nya lalu nyuaka roti nya ngagai bala murid iya. Ku iya bejaku: “Ambi lalu empa. Roti tu ngambarka tubuh aku.” 27 Udah nya, iya ngambi mangkuk. Pengudah iya besampi meri terima kasih, iya nyuaka mangkuk nya ngagai bala murid iya. Ku iya: “Irup tu, semua kita. 28 Wain dalam mangkuk tu ngambarka darah aku, iya nya ‘darah ti nanggam sempekat Petara,’ ti deka dituang kena ngampunka dosa orang mayuh. 29 Tang aku madah ngagai kita: Aku enda agi ngirup wain, datai ngagai maya aku ngirup wain ti baru enggau kita ba dalam Perintah Apai aku.” 30 Pengudah belagu meri puji,* sida mupuk ngagai Bukit Kana.

31 Ku Jesus madah ngagai sida: “Malam tu, semua kita deka ninggalka aku magang,* ketegal utai ke deka nyadi ba aku. Laban endang udah ditulis: ‘Aku deka nyerang pengibun bedus, lalu raban bedus iya deka pambar.’ 32 Tang pengudah aku diidupka baru, aku deka mupuk dulu ari kita ngagai Galili.” 33 Peter lalu bejaku ngagai iya: “Taja pan semua sida ke bukai deka ninggalka nuan,* ketegal utai ke deka nyadi ba nuan, tang aku enda sekali-kali deka ninggalka nuan!”* 34 Ku Jesus bejaku ngagai Peter: “Enggau bendar aku madah ngagai nuan: Malam tu, sebedau manuk engkukuk, nuan deka tiga kali madahka diri enda ngelala aku.” 35 Ku Peter bejaku: “Enti sema aku patut mati enggau nuan, enda meh aku madahka diri enda ngelala nuan.” Bala murid ke bukai mega nyebut utai ti sama.

36 Udah nya, Jesus mupuk enggau sida ngagai siti endur ke dikumbai Getsemani. Ku iya bejaku ngagai sida: “Duduk ditu. Aku deka kin lalu besampi.” 37 Iya mai Peter enggau dua iku anak Sebedi. Ati iya balat tusah sereta balat irau. 38 Udah nya, iya bejaku ngagai sida: “Ati aku balat tusah, asai ke deka mati. Nganti ditu lalu mengkang bejaga enggau aku.” 39 Pengudah iya bejalai jauh mimit, iya nyungkurka diri lalu besampi: “Apai, enti ulih, ambi meh mangkuk* tu ari aku. Taja pia, anang nitihka peneka aku, tang nitihka peneka Nuan.”

40 Lebuh iya pulai ngagai bala murid iya, iya meda sida benung tinduk. Ku iya bejaku ngagai Peter: “Iga ga kita enda ulih bejaga enggau aku sejam? 41 Anang ngetu bejaga sereta seruran besampi, ngambika kita enda alah laban penguji. Ati amat ransing, tang tubuh* lemi.” 42 Iya mupuk baru kedua kali, lalu besampi: “Apai, enti mangkuk tu enda ulih diambi ari aku, lalu aku patut ngirup ari mangkuk tu, awakka peneka Nuan nyadi.” 43 Sekali agi, iya pulai baru lalu meda sida benung tinduk, laban sida balat ngantuk. 44 Nya alai, iya ninggalka sida baru, lalu mupuk besampi ketiga kali, nyebut utai ti sama. 45 Udah nya, iya pulai baru ngagai sida, lalu bejaku: “Ba maya ke baka tu pan agi ga kita ka tinduk sereta belelak! Peda kita! Jam nyau semak alai Anak Mensia deka diserahka ngagai orang ke bedosa. 46 Angkat, aram kitai mupuk. Peda kita! Orang ke deka nyerahka aku nyauka datai.” 47 Lebuh Jesus benung bejaku, siku ari 12 iku rasul Jesus ke benama Judas, datai. Mayuh amat orang ke bebaika pedang enggau pemalu datai enggau iya. Sida dianjung bala tuai imam enggau bala tuai bansa orang Judah.

48 Orang ke deka nyerahka Jesus udah madah ngagai sida siti tanda. Ku iya: “Orang ke disium aku, nya meh iya. Tangkap iya.” 49 Iya mansang ngagai Jesus, lalu bejaku: “Tabi, Rabbi!” lalu nyium iya. 50 Tang ku Jesus bejaku ngagai iya: “Nama kebuah nuan kitu?” Sida mansang lalu nangkap Jesus. 51 Enda mukai-mukai, siku orang ke enggau Jesus nyintak* pedang iya. Iya nyerang ulun imam besai lalu mutuska pending ulun nya. 52 Jesus lalu bejaku ngagai iya: “Selitka pedang nuan. Semua orang ke ngena pedang deka mati laban pedang. 53 Kati kita ngumbai aku enda ulih minta Apai aku ngirumka lebih ari 12 raban* soldadu melikat tekala tu? 54 Enti pia, baka ni ku ayat Bup Kudus ti madahka utai tu patut nyadi, deka dikeamatka?” 55 Udah nya, Jesus bejaku ngagai raban orang nya: “Kati aku tu perumpak alai kita bebaika pedang enggau pemalu mansang nangkap aku? Tiap hari aku duduk ngajar dalam Rumah Sembiang, tang enda ga kita nangkap aku. 56 Taja pia, semua utai tu nyadi kena ngamatka jaku ti udah ditulis bala nabi.” Udah nya, semua murid iya rari ninggalka iya.

57 Orang ke nangkap Jesus mai iya ngagai rumah Imam Besai Kaiapas. Bala penulis Adat enggau bala tuai bansa orang Judah udah begempuru ba dia. 58 Tang Peter nitihka Jesus ari jauh, nyentuk ngagai laman rumah imam besai. Iya tama lalu nudukka diri enggau bala ulun ba dia, deka meda nama utai ke nyadi.

59 Nyadi bala tuai imam enggau semua Raban Kunsil Orang Judah nguji ngiga bukti pelesu kena nuduh Jesus, ngambika sida ulih munuh iya. 60 Taja pan mayuh saksi pelesu datai, tang sida nadai tetemuka jaku tuduh ti ngena. Udah nya, dua iku orang mansang ke mua, 61 lalu bejaku: “Orang tu udah nyebut, ‘Aku ulih ngerubuh Rumah Sembiang Petara, lalu nirika iya baru dalam tiga hari.’” 62 Imam besai bediri lalu bejaku ngagai Jesus: “Nama kebuah nuan enda nyaut? Kati nuan enda ninga jaku tuduh sida ngagai nuan?” 63 Tang Jesus enda bemunyi. Imam besai lalu bejaku baru ngagai iya: “Aku ngasuh nuan besumpah dalam nama Petara ti idup, padahka ngagai kami enti nuan nya Kristus, Anak Petara!” 64 Ku Jesus bejaku ngagai iya: “Nuan empu udah meri saut. Tang aku madah ngagai kita: Berengkah ari diatu, kita deka meda Anak Mensia duduk ba sepiak kanan Iya ti bekuasa, lalu datai ba atas remang.”* 65 Imam besai lalu nyarikka gari luar diri, lalu bejaku: “Iya udah bejaku ngelaban Petara. Enti pia, nama kebuah kitai begunaka saksi bukai? Kita empu udah ninga iya bejaku ngelaban Petara. 66 Nama runding kita?” Sida lalu nyaut: “Iya patut mati.” 67 Sida lalu ngeludah mua iya sereta numbuk iya. Sekeda orang nampar iya, 68 lalu bejaku: “O Kristus, enti nuan amat nabi, padahka ngagai kami, sapa ke malu nuan?”

69 Lebuh Peter duduk ba laman rumah, siku ulun indu datai lalu bejaku ngagai iya: “Nuan tu pan sama enggau Jesus, orang Galili nya!” 70 Tang Peter enggai ngaku, lalu ku iya: “Nadai aku nemu utai ku nuan.” 71 Lebuh Peter pansut ngagai jalai penama laman rumah, siku agi ulun indu meda iya lalu bejaku ngagai bala orang ke ba dia: “Iya tu orang ke begulai enggau Jesus, orang Nasaret nya.” 72 Sekali agi, iya enggai ngaku, lalu besumpah: “Aku enda ngelala orang nya!” 73 Enda lama udah nya, sida ke bediri ba dia datai ngagai Peter lalu bejaku: “Nuan tentu siku ari sida, laban chara nuan bejaku baka orang ari Galili.” 74 Peter lalu besumpah: “Tulah meh aku enti aku bula! Aku enda ngelala orang nya!” Tekala nya manuk lalu engkukuk. 75 Peter lalu teingatka utai ke dipadah Jesus ngagai iya: “Sebedau manuk engkukuk, nuan deka tiga kali madahka diri enda ngelala aku.” Peter pansut lalu duie-duie nyabak.