Pemansut

12 Jehovah bejaku ngagai Moses enggau Aron ba menua Ejip: 2 “Tiap taun, bulan tu deka nyadi bulan ti keterubah ba kalendar kita. 3 Padahka tu ngagai semua orang Israel: ‘Kena hari ke-10 bulan tu, tiap iku kita mesti milih siku bedus ke ruang bilik kita. Tiap iti ruang bilik patut bisi siku bedus. 4 Tang, enti ruang bilik kita kelalu mit lalu enda ulih ngabiska siku bedus, kita patut bekunsi makai nya ba rumah kita begulai enggau jiran kita ti pemadu semak. Tentuka penyampau ke deka diempa tiap iku orang. 5 Kita ulih milih jelu bedus tauka kambin ti lelaki. Jelu nya mesti beumur setaun sereta nadai penimpang. 6 Kita mesti nyaga jelu nya sampai hari ke-14 bulan tu. Tiap iti ruang bilik patut munuh jelu nya maya lemai hari.* 7 Pechikka mimit darah jelu nya ba begian kiba, begian kanan, enggau begian atas bingkai pintu rumah endur kita makai jelu nya.

8 “‘Kita mesti makai dagin nya malam nya. Dagin nya patut dipanggang, lalu diempa enggau roti ti enda beragi sereta sayur ti pait. 9 Jelu nya patut dipanggang, nyengkaum pala iya, betis iya, enggau begian dalam tubuh iya. Dagin nya enda tau diempa mata tauka direbus. 10 Kita enda tau ngalau dagin nya sampai pagi hari siti. Tang enti bisi dagin ke enda abis diempa, dagin nya patut ditunu. 11 Maya kita makai, kita mesti udah ngena tali pinggang, selipar, sereta megai tungkat. Kita patut makai enggau jampat. Nya meh Pengerami Paska ke Aku, Jehovah. 12 Malam nya, Aku deka mansang ngagai menua Ejip, lalu munuh tiap iku anak tuai ba Ejip, enda ngira mensia tauka jelu. Aku deka ngukum semua petara orang Ejip. Aku tu meh Jehovah. 13 Darah nya deka nyadi tanda ba rumah kita. Lebuh Aku meda darah nya, Aku enda tama ke rumah kita, tang semina mansa aja. Penulah nya enda ninggang kita lebuh Aku ngukum menua Ejip.

14 “‘Kita enggau bala peturun kita mesti ingatka hari nya, lalu ngintu pengerami ke Aku, Jehovah. Nya deka nyadi adat ti tetap. 15 Pengelama tujuh hari, kita mesti makai roti ti enda beragi. Ba hari ti keterubah, adunan tepung ke beragi mesti dibuai ari rumah kita. Dalam timpuh tujuh hari nya, enti bisi orang makai nama-nama utai ke beragi, orang nya mesti dibunuh. 16 Ba hari ti keterubah enggau ba hari ti ketujuh, kita mesti begempuru nyembah Petara. Ba hari nya, kita enda tau gawa. Kita semina ulih nyediaka pemakai ke tiap iku orang.

17 “‘Kita mesti ngintu Pengerami Roti ti Enda Beragi, laban ba hari nya, Aku deka mai bala kita ti mayuh* pansut ari menua Ejip. Kita enggau peturun kita mesti ingatka hari nya. Nya deka nyadi adat ti tetap. 18 Dalam bulan ti keterubah, berengkah ari malam hari ke-14, kita mesti makai roti ti enda beragi nyentuk ngagai malam hari ke-21. 19 Adunan tepung ke beragi enda tau disimpan ba rumah kita pengelama tujuh hari, laban enti bisi orang makai nama-nama utai ke beragi, orang nya mesti dibunuh, enda ngira iya orang asing tauka orang Israel. 20 Kita enda tau makai nama-nama utai ke beragi. Kita semina ulih makai roti ti enda beragi ba rumah kita.’”

21 Moses lalu terus ngangauka bala tuai orang Israel lalu madahka sida: “Alai kita mupuk, lalu pilih bedus tauka kambin ti biak ke tiap iti ruang bilik kita. Udah nya, sayat jelu nya nyadika korban Paska. 22 Sepuhka tangkai hisop* ba darah ke ba dalam bisin. Pechikka darah nya ba begian kiba, begian kanan, enggau begian atas bingkai pintu rumah. Nadai siku pan orang tau pansut ari rumah sampai pagi. 23 Jehovah deka datai ngagai Ejip mai penulah kena ngukum orang Ejip. Lebuh Jehovah meda darah ba begian kiba, begian kanan, enggau begian atas bingkai pintu rumah, Iya deka mansa rumah nya, lalu kita enda mati ditinggang penulah.

24 “Kita mesti ngintu pengerami tu. Tu deka nyadi adat ti tetap ke kita enggau bala peturun kita. 25 Kita mega mesti ngintu pengerami tu lebuh kita tama ngagai menua ke deka diberi Jehovah ngagai kita, baka ke udah dipadahka Iya. 26 Lebuh bala anak kita nanya: ‘Nama kebuah kitai ngintu pengerami tu?’ 27 kita patut nyaut: ‘Kitai nyerahka korban Paska ngagai Jehovah, laban lebuh Iya mai penulah ngagai orang Ejip, Iya mansa rumah orang Israel, lalu Iya nyelamatka ruang bilik kitai.’”

Udah nya, orang Israel pan besugang. 28 Orang Israel pan ngereja semua nya. Sida ngereja semua utai, sama baka ke udah dipadahka Jehovah ngagai Moses enggau Aron.

29 Udah nya, ba tengah malam, Jehovah munuh tiap iku anak tuai ba serata menua Ejip, berengkah ari anak tuai Firaun ke duduk ba kerusi diraja, nyentuk ngagai anak tuai orang ke dijil. Tiap iku anak tuai jelu tupi mega dibunuh magang. 30 Malam nya, Firaun, semua bala pegawai iya, enggau semua orang Ejip tedani magang. Ba serata menua Ejip, orang bekerauh nyabak, laban ba tiap iti rumah bisi orang mati. 31 Malam nya mega, Firaun lalu terus ngangauka Moses enggau Aron. Ku iya madah: “Mupuk kita! Pansut seduai enggau semua orang Israel ari menua aku. Alai meh kita nyembah Jehovah baka ke dipinta kita. 32 Bai jelu tupi kita baka ke dikedekaka kita. Tang asuh Petara merekatka aku.”

33 Orang Ejip pan ngansak orang Israel pansut ari menua sida enggau jampat, lalu ku sida madah: “Enti kita enda mupuk, semua kami deka mati!” 34 Orang Israel lalu mai adunan tepung ti enda beragi enggau mangkuk ke dikena ngaga adunan tepung. Utai nya dibungkus sida ngena kain lalu disan sida. 35 Orang Israel ngereja utai ke diasuh Moses. Sida minta utai ke digaga ari pirak, utai ke digaga ari emas, sereta minta gari ari orang Ejip. 36 Jehovah ngasuh orang Ejip ngayanka pemanah ati ngagai orang Israel. Nya alai, sida meri utai ke dipinta orang Israel. Orang Israel pan nabanka reta orang Ejip.

37 Udah nya, orang Israel mupuk ari Rameses ngagai Sukot. Bala sida ke lelaki ke bejalai kaki bisi kira-kira 600,000 iku, enda nyengkaum anak mit. 38 Mayuh macham bansa orang* mega mupuk enggau sida. Sida mega mai mayuh amat jelu tupi, nyengkaum bedus enggau sapi. 39 Ba rantau jalai, sida manggang adunan tepung ke dibai ari Ejip. Roti ti segala nya enda dichampur ragi, ketegal sida enda sempat nyediaka roti ti beragi enggau pemakai ke bukai, laban sida diburu ari Ejip enggau ngenyit.

40 Lebuh orang Israel pansut ari Ejip, sida udah diau ba menua orang asing pengelama 430 taun.* 41 Ba hari nya, ba pengujung 430 taun nya, semua nembiak Jehovah ti mayuh* pansut ari Ejip. 42 Malam nya, Jehovah mai orang Israel pansut ari Ejip. Nya alai, sida enggau peturun sida mesti ngintu pengerami ke Jehovah kena ngingatka utai ke nyadi malam nya.

43 Udah nya, Jehovah bejaku ngagai Moses enggau Aron: “Tu meh adat Pengerami Paska: Orang asing enda tau makai korban Paska. 44 Tang, enti kita bisi meli ulun, iya ulih begulai enggau kita makai korban Paska nya enti iya udah disunat. 45 Orang ke diau enda lama enggau kita sereta orang gaji kita enda tau makai korban Paska nya. 46 Kita semina ulih makai korban Paska nya ba dalam rumah. Kita enda tau mai dagin nya pansut, lalu kita enda tau matahka tulang iya. 47 Semua orang Israel mesti ngintu pengerami tu. 48 Enti bisi orang asing ke diau enggau kita deka ngintu Pengerami Paska ke Aku, Jehovah, tiap iku lelaki ke ba ruang bilik iya mesti disunat. Nya baru iya ulih enggau ngintu pengerami nya, lalu iya mega deka dikumbai baka orang Israel. Tang, lelaki ke enda disunat enda tau makai korban Paska. 49 Kita enggau orang asing ke diau enggau kita patut nitihka adat ti sama.”

50 Orang Israel pan ngereja semua nya. Sida ngereja semua utai, sama baka ke udah dipadahka Jehovah ngagai Moses enggau Aron. 51 Ba hari nya, Jehovah mai semua orang Israel* pansut ari Ejip.