Matthew

27 Pagi siti, semua tuai imam enggau tuai bansa orang Judah baum. Sida begigaka chara deka munuh Jesus. 2 Pengudah nanchang jari Jesus, sida nyerahka iya ngagai Pilate, gabenor Judea.

3 Pengudah nemu Jesus deka diukum bunuh, Judas, ke nyerahka Jesus ngagai munsuh, nesal ati. Nya alai, iya mulaika 30 singkap duit pirak ngagai bala tuai imam enggau tuai bansa orang Judah. 4 Ku iya: “Aku udah bedosa laban nyerahka orang* ke nadai penyalah ngagai kita!” Tang ku sida nyaut: “Pekara nya nadai kaul enggau kami. Nya pekara nuan empu!” 5 Nya alai, iya muai duit nya ba Rumah Sembiang. Udah nya, iya mupuk lalu ngantung diri. 6 Tang bala tuai imam ngumpul duit pirak nya, lalu ku sida: “Kitai enda tau nyimpan duit tu ba endur nyimpan reta Rumah Sembiang, laban tu rega nyawa* orang.” 7 Pengudah berandau, sida ngena duit nya meli tanah,* nyadika endur alai nguburka orang ari menua bukai. 8 Nya kebuah tanah nya dikumbai, “Tanah Darah” nyentuk ngagai seharitu. 9 Utai tu nyadi kena ngamatka jaku ti udah disebut nengah Nabi Jeremiah: “Sida ngambi 30 singkap duit pirak nya. Nya meh rega ti ditetapka sekeda orang Israel ke iya. 10 Sida ngena duit nya meli tanah,* nitihka pesan Jehovah ngagai aku.”

11 Jesus bediri ba mua gabenor, lalu gabenor nanya iya: “Kati nuan Raja orang Judah?” Disaut Jesus: “Nuan empu udah meri saut.” 12 Tang lebuh bala tuai imam enggau bala tuai bansa orang Judah nuduh iya, iya enda nyaut. 13 Udah nya, Pilate bejaku ngagai iya: “Kati nuan enda ninga jaku tuduh sida ngagai nuan?” 14 Tang Jesus seleka jaku pan enda nyaut. Nya alai, Gabenor Pilate balat amat alit ati.

15 Tiap kali maya Pengerami Paska, Gabenor Pilate endang selalu ngelepaska siku orang ke dijil, nitihka pinta orang mayuh. 16 Maya nya, bisi siku orang ke dijil benama Barabas. Iya orang ti balat jai sereta tebilang. 17 Lebuh orang mayuh udah begempuru, Pilate lalu nanya sida: “Sapa patut dilepaska aku ke kita? Barabas tauka Jesus ke dikumbai Kristus?” 18 Laban Pilate nemu sida kepapaska Jesus, nya alai sida nyerahka Jesus ngagai iya. 19 Lebuh Pilate benung duduk ba kerusi hakim, bini iya ngirumka pesan ngagai iya: “Anang bisi sangkut-paut enggau pekara orang ke lurus nya, laban aku bisi mimpi pasal iya, lalu mimpi nya ngasuh aku balat merinsa.” 20 Tang bala tuai imam enggau bala tuai bansa orang Judah ngasut* orang mayuh minta Pilate ngelepaska Barabas, tang munuh Jesus. 21 Gabenor Pilate nanya sida baru: “Sapa ari seduai tu ke patut dilepaska aku?” Sida lalu nyaut: “Barabas!” 22 Pilate lalu bejaku: “Enti pia, nama patut digaga aku ngagai Jesus ke dikumbai Kristus?” Semua sida nyaut: “Pantang* iya ba tiang!” 23 Pilate lalu nanya: “Nama kebuah? Nama penyalah iya?” Tang sida manjung inggar agi: “Pantang iya ba tiang!”

24 Pilate nemu diri enda ulih ngereja nama-nama utai, lalu orang mayuh nyau majak begau. Nya alai iya ngambi ai, lalu masu jari diri ba mua orang mayuh, lalu bejaku: “Aku enda besalah atas pemati* lelaki tu! Kita meh ke besalah!” 25 Semua orang mayuh lalu nyaut: “Awakka kami enggau bala anak kami besalah atas pemati iya!”* 26 Nya alai, Pilate ngelepaska Barabas ke sida. Tang iya ngasuh Jesus disipat, lalu nyerahka iya ngambika iya diukum bunuh ba tiang.

27 Udah nya, bala soldadu Gabenor Pilate mai Jesus ngagai rumah gabenor. Semua soldadu diasuh begelumu ngelingi Jesus. 28 Sida muka baju jubah iya, lalu ngerasukka gari ti mirah redam ba iya. 29 Sida ngaga makota ari duri, ngengkahka makota nya ba pala iya, lalu ngengkahka sebatang kayu ba jari kanan iya. Sida besugang ba mua iya, lalu ngeleseka iya. Ku sida: “Tabi ke nuan, Raja orang Judah!” 30 Udah nya sida ngeludah iya, ngambi batang kayu nya ari iya, lalu malu pala iya. 31 Pengudah ngeleseka iya, sida muka gari ti mirah redam ari iya, lalu ngerasukka baru baju jubah iya. Udah nya sida mai iya pansut, ngambika dipantang ba tiang.

32 Lebuh sida pansut ari nya, sida betemu enggau siku lelaki ke benama Simon, ari Sairin. Sida mejal iya ngesan tiang perinsa* Jesus. 33 Udah nya, sida datai ba endur ke dikumbai Golgota, reti nya, “Endur Kerubung Pala.”* 34 Sida meri Jesus wain ke dichampur enggau utai pait. Tang pengudah iya ensepi ai nya, iya enggai ngirup. 35 Pengudah mantang iya ba tiang, sida bechabut undi bebagika gari luar iya. 36 Udah nya, sida duduk ngemataka iya. 37 Ba atas pala iya, sida ngengkahka siti papan ti madahka jaku tuduh pasal iya. Tu utai ke ditulis ba papan nya, “Tu Jesus, Raja orang Judah.”

38 Dua iku perumpak diukum bunuh ba tiang sama enggau Jesus. Siku ba sepiak kanan iya, lalu siku ba sepiak kiba iya. 39 Orang ke mansa ngeleseka iya sereta ngilikka pala sida. 40 Ku sida bejaku: “Gamal nuan nya ke deka ngerubuh Rumah Sembiang lalu nirika iya baru dalam tiga hari. Idupka diri empu dulu! Enti nuan amat anak Petara, nurun nuan ari tiang perinsa* nya.” 41 Bala tuai imam, bala penulis Adat, enggau bala tuai bansa orang Judah, mega ngeleseka iya. Ku sida: 42 “Orang bukai ulih diselamatka iya, tang diri empu enda ulih! Endaka iya Raja orang Israel? Awakka iya nurun kediri empu ari tiang perinsa* nya diatu. Nya baru kitai pechayaka iya. 43 Iya arapka Petara. Awakka Petara meh ngelepaska iya, enti Petara deka nerima iya. Laban iya udah nyebut: ‘Aku tu Anak Petara.’” 44 Indah perumpak ke diukum bunuh ba tiang sama enggau iya mega ngeleseka iya.

45 Ari pukul 12 tengah hari* nyentuk ngagai pukul 3 ngalih hari,* semua dunya petang magang. 46 Ba urung pukul tiga ngalih hari, Jesus ngangau enggau nyawa ti inggar: “Eli, Eli, lama sabakhtani?” reti nya, “Petara aku, Petara aku, nama kebuah Nuan ninggalka aku?” 47 Lebuh orang ke bediri ba dia ninga iya, sida lalu bejaku: “Iya ngangauka Elijah!” 48 Siku ari bala sida lalu belanda tekala nya, ngambi kapuk* lalu nyepuhka kapuk nya ngagai ai wain ti masam. Iya ngengkahka kapuk nya ba kayu, lalu nuatka iya ngagai Jesus ngambika diirup Jesus. 49 Tang ku sida ke bukai bejaku: “Anang kiruhka iya! Aram kitai meda sekalika Elijah deka datai nyelamatka iya tauka enda.” 50 Jesus ngangau baru enggau nyawa ti inggar, lalu ngapuska seput iya.

51 Maya nya, kain tirai ke digantung dalam Rumah Sembiang charik belah dua ari atas ke baruh. Tanah berenyang nyadi lalu batu tebelah. 52 Kubur mega tebuka, lalu mayuh bangkai nembiak Petara ke udah nadai,* tempalung pansut ari kubur, 53 lalu mayuh orang meda bangkai sida. (Pengudah Jesus diidupka baru, mayuh orang ke mansa kubur tama ngagai nengeri ti kudus.*) 54 Lebuh pemesai soldadu enggau sida ke sama enggau iya ngemataka Jesus, meda tanah berenyang enggau semua utai bukai ke nyadi, sida balat takut. Ku sida: “Iya amat Anak Petara!”

55 Sida ke indu pan mayuh ba dia, meda utai ke nyadi ari jauh. Sida tu udah nitihka Jesus ari Galili, ngambika ulih nulung iya. 56 Bala sida nya nyengkaum Maria Magdalin, Maria indai James seduai Joses, enggau indai bala anak Sebedi.

57 Lebuh hari nyau lemai, siku lelaki ke kaya ari Arimatea datai. Nama iya Josep. Iya mega murid Jesus. 58 Iya betemu enggau Pilate, lalu minta bangkai Jesus. Pilate lalu ngasuh soldadu nyerahka bangkai Jesus ngagai iya. 59 Josep ngambi bangkai Jesus, lalu malut bangkai nya ngena kain linin ti alus sereta beresi. 60 Iya ngengkahka bangkai Jesus dalam kubur ti baru, ke enggi iya empu. Kubur nya udah ditebuk iya ba bukit batu. Pengudah iya maringka sigi batu ti besai kena nutup lubang kubur nya, iya mupuk ari endur nya. 61 Tang Maria Magdalin enggau Maria ke siku da agi, agi ba dia duduk nunga kubur nya.

62 Semua nya nyadi ba hari ke dikena nyediaka Hari Sabat. Hari siti, bala tuai imam enggau orang Parisi begempuru lalu betemu enggau Pilate. 63 Ku sida: “Tuan, kami ingatka utai ti udah disebut penipu nya, lebuh iya agi idup. Ku iya: ‘Pengudah tiga hari, aku deka diidupka baru.’ 64 Nya alai, asuh soldadu nuan nyaga kubur nya nyentuk ngagai hari ti ketiga, enggaika bala murid iya ngambi bangkai iya, lalu madah ngagai orang: ‘Iya udah diidupka baru ari mati!’ Enti pia, pemula ti penudi tu deka nyadi balat agi ari pemula ti keterubah.” 65 Ku Pilate bejaku enggau sida, “Bai meh seraban soldadu, lalu jaga kubur nya enggau naka ulih kita.” 66 Sida mupuk ngagai kubur nya, lalu nentuka batu ke dikena nutup kubur nya ditutup rat sereta dijaga bala soldadu.