Mark

1 Tu pun Berita Manah pasal Jesus Kristus, Anak Petara: 2 Baka ke udah ditulis Nabi Isaiah: “(Aku deka ngasuh siku orang ke mai pesan Aku bejalai dulu ari nuan, lalu iya deka nyediaka jalai ke nuan.) 3 Siku orang ngangau enggau nyawa ti inggar ba menua puang: ‘Sediaka jalai ke Jehovah!* Gaga jalai Iya rurus.’” 4 Nyadi, John Pemaptisa ba menua puang, ngerembaika berita pasal orang patut dibaptisa,* kena nunjukka sida udah nesal ati ke dosa sida. Enggau nya, dosa sida deka diampun. 5 Semua orang ari serata menua Judea enggau semua orang ari Jerusalem datai ngagai iya. Sida ngaku dosa diri ba mua orang mayuh, lalu John maptisa* sida ba Sungai Jordan. 6 John ngena gari ke digaga ari bulu unta, lalu belulang iya digaga ari kulit jelu. Iya beridup makai buntak enggau ai manyi. 7 Iya nusui berita tu: “Iya ke datai dudi ari aku bekuasa agi ari aku. Indah meremi* muka tali kasut* iya deh, aku enda layak. 8 Aku maptisa kita ngena ai, tang iya deka maptisa kita ngena kuasa kudus.”*

9 Maya nya, Jesus datai ari Nasaret ba menua Galili, lalu iya dibaptisa John ba Sungai Jordan. 10 Sepengudah Jesus pansut ari ai, iya meda langit tebuka, lalu kuasa kudus Petara ke baka burung achang nurun ngagai iya. 11 Udah nya, nyawa ari serega bejaku: “Nuan Anak ke dikesayauka Aku. Aku gaga ati ke nuan.”

12 Udah nya, kuasa kudus Petara terus ngiring Jesus ngagai menua puang. 13 Iya mengkang ba menua puang pengelama 40 hari, lalu diuji Sitan. Iya diau begulai enggau jelu babas, tang bala melikat ngintu iya.

14 Pengudah John ditangkap, Jesus mupuk ngagai Galili nusui Berita Manah ari Petara. 15 Ku Jesus bejaku: “Maya ti ditetapka udah datai, lalu Perintah Petara nyau semak. Nesal ati meh ke dosa kita, lalu arapka Berita Manah.”

16 Lebuh Jesus bejalai ba tebing Danau Galili, iya tepedaka Simon enggau menyadi Simon, ke benama Andrew. Seduai iya orang berikan. Maya nya, seduai iya benung nibarka jala. 17 Ku Jesus bejaku ngagai seduai iya: “Aram enggau aku. Aku deka ngajar seduai chara ngiga orang, baka seduai ke begigaka ikan.” 18 Tekala nya, seduai iya lalu ninggalka jala lalu nitihka Jesus. 19 Pengudah iya bejalai jauh mimit ari nya, iya tepedaka James anak Sebedi enggau menyadi iya John. Seduai iya benung ngaduka jala dalam perau. 20 Jesus lalu ngangauka seduai iya. Nya alai, seduai iya ninggalka apai seduai iya Sebedi, enggau bala pekereja iya ba dalam perau, lalu nitihka Jesus. 21 Udah nya, sida ngagai Kapernaum.

Lebuh Hari Sabat baru berengkah, iya tama ngagai balai gempuru lalu berengkah ngajar. 22 Orang ba dia alit bendar ati enggau chara iya ngajar. Iya enda ngajar sida baka bala penulis Adat, laban utai ke diajar iya datai ari Petara.* 23 Maya nya, ba balai gempuru bisi siku lelaki ke dirasuk melikat ti jai. Iya merakka nyawa bejaku: 24 “Jesus orang Nasaret, nama kebuah nuan kitu? Kati nuan datai deka ngemunaska kami? Aku nemu sapa nuan ke bendar. Nuan nya Nembiak ti Kudus ke dianjung Petara!” 25 Jesus lalu ngerara melikat ti jai nya: “Anang bejaku. Pansut ari iya!” 26 Melikat ti jai nya lalu ngasuh lelaki nya getar-getar sereta kejut-kejut. Udah nya, melikat ti jai nya nyerauh enggau balat inggar lalu pansut ari lelaki nya. 27 Semua orang balat alit ati lalu belabuh betanya ngagai pangan diri: “Nama utai tu? Tu ajar ti baru! Iya bisi kuasa ngerara melikat ti jai, lalu sida ngasika iya.” 28 Nya alai, cherita pasal iya ngelekai enggau jampat ngagai serata menua Galili.

29 Udah nya, sida mupuk ari balai gempuru ngagai rumah Simon enggau Andrew. James enggau John mega enggau sida. 30 Maya nya, mentua indu Simon gali ba peninduk, laban sakit chelap angat. Nya alai, sida madahka pasal iya ngagai Jesus. 31 Jesus mansang ngagai mentua indu Simon, megai jari iya, lalu nulung iya angkat. Iya gerai lalu nyediaka pemakai ke sida.

32 Lemai nya, lebuh mata panas padam, orang mai ngagai Jesus semua orang ke sakit enggau orang ke dirasuk melikat ti jai. 33 Semua orang ba nengeri nya begelumu ba mua pintu rumah nya. 34 Iya ngeraika mayuh orang ke sakit laban mayuh macham pemedis. Iya mega muru mayuh melikat ti jai, tang iya enda ngasuh bala melikat ti jai nya bejaku, laban sida nemu iya nya Kristus.*

35 Tumu pagi hari siti, lebuh hari agi petang, Jesus angkat lalu pansut. Iya ngagai siti endur ti sunyi, lalu berengkah besampi. 36 Tang Simon enggau bala murid ke bukai bendar amat begigaka iya. 37 Lebuh sida udah tetemuka iya, sida lalu bejaku: “Semua orang ngiga nuan.” 38 Tang ku iya nyaut: “Aram kitai ngagai endur bukai, ngagai nengeri ke enda jauh ari tu, ngambika aku mega ulih nusui Berita Manah ba din. Laban nya meh tuju aku datai.” 39 Iya pan mupuk ngagai serata menua Galili, ngambika nusui Berita Manah ba balai gempuru sereta muru melikat ti jai.

40 Siku lelaki ke sakit lan* besugang ba mua iya, lalu minta kasih ari iya. Ku lelaki nya: “Enti nuan deka, nuan ulih ngeraika aku.”* 41 Jesus kasihka iya. Jesus ngunjurka jari lalu negu orang nya. Ku iya: “Aku deka! Gerai* meh nuan.” 42 Tekala nya, penyakit lan nya nadai agi ba iya. Iya lalu nyadi tuchi.* 43 Sebedau ngasuh iya mupuk, Jesus bebendar nangkan iya. 44 Ku Jesus: “Anang madahka tu ngagai orang, tang mansang nuan ngagai imam. Udah nya, beri pemeri baka ke diasuh ba Adat Moses kena mandangka ngagai bala imam, nuan udah gerai.” 45 Tang pengudah lelaki nya mupuk, iya majak nusui pasal utai ke nyadi nya ba serata endur. Ketegal nya, Jesus enda ulih agi ngayanka diri lebuh iya tama ngagai nengeri. Tang iya diau ba luar, ba endur ti sunyi. Taja pia, agi meh orang datai ngagai iya ari semua endur.