Hebrew

2 Nya meh kebuah kitai patut bebendar agi beratika utai ke udah didinga kitai ngambika kitai enda anyut. 2 Enti pesan* ke ditusui bala melikat nya endang amat tau dikearapka, lalu tiap iku orang ke ngereja penyalah sereta ke enda ngasi diukum enggau lurus, 3 baka ni ku kitai ulih ngerarika diri enti kitai enda ibuhka pengelepas ti besai nya? Tuan kitai meh keterubah iya nusui pasal pengelepas nya lalu orang ke ninga nya udah nunjukka ngagai kitai pesan nya amat. 4 Kelimpah ari nya, Petara meri saksi ngena tanda, kereja ajih, enggau bemacham pengawa ke ngalitka ati. Iya mega meri saksi lebuh Iya bebagika kuasa kudus* Iya nitihka peneka Iya.

5 Petara nadai ngasuh bala melikat merintah dunya ti deka datai, iya nya dunya ke benung dikerandauka kitai. 6 Tang bisi siku saksi kala nulis: “Sapa mensia nyentukka Nuan ingatka sida? Tauka sapa anak mensia nyentukka Nuan nyaga iya? 7 Nuan ngaga iya baruh mimit ari bala melikat. Nuan meri iya mulia enggau basa sereta milih iya ngemataka asil ari pengawa jari Nuan. 8 Nuan udah ngasuh semua utai nunduk ba baruh kaki iya.” Ketegal Petara udah nundukka semua utai ngagai iya, nadai utai ke enda diperintah iya. Tang diatu kitai bedau agi meda iya merintah semua utai. 9 Taja pia, kitai meda Jesus ke digaga baruh mimit ari bala melikat udah diberi mulia enggau basa, ketegal iya udah merinsa nyentukka iya mati. Nengah pemanah ati Petara ti besai, iya ngasaika pemati ke penguntung tiap iku orang.

10 Semua utai bisi ketegal* Petara sereta ke mulia Iya. Nya alai, Iya endang patut ngaga Ketuai kitai nyadi sempurna nengah pemerinsa, ngambika mayuh bala anak ulih dimuliaka sereta diselamatka nengah Ketuai nya. 11 Jesus ke nguduska mensia enggau mensia ke dikuduska iya, datai ari Apai ti sama. Nya kebuah iya enda malu ngangauka sida bala menyadi iya. 12 Iya madahka: “Aku deka nusui nama Nuan ngagai bala menyadi aku. Aku deka belagu muji Nuan ba bala raban gempuru.”* 13 Iya mega madahka: “Aku deka pechayaka Iya.” Ku iya agi: “Peda! Aku enggau bala anak ke biak ti diberi Jehovah* ngagai aku.”

14 Ketegal bala “anak ke biak” nya ngembuan darah enggau isi, iya mega ngembuan darah enggau isi ngambika nengah pemati iya, iya ulih ngemunaska Sitan* ke ulih mai pemati. 15 Lalu iya mega ulih ngelepaska semua sida ke nyadi ulun seumur idup ketegal sida takutka pemati. 16 Kebendar nya, iya ukai nulung bala melikat, tang iya nulung bala peturun Abraham. 17 Nya alai, ba semua pekara, iya patut nyadi baka “menyadi” iya, ngambika iya ulih nyadi imam besai ti pengasih sereta tetap ati lebuh gawa ke Petara, sereta ngambika iya ulih nyerahka pemeri kena nutup dosa orang,* awakka sida ulih bebaik baru enggau Petara. 18 Laban iya empu kala merinsa lebuh diuji, nya alai iya ulih nulung orang ke benung diuji.