Luke

10 Udah nya, Tuan Jesus milih 70 iku murid iya ke bukai, lalu ngasuh sida bejalai dua iku dua iku. Sebedau iya ngagai sebuah nengeri tauka endur, bala murid iya nya deka mansang kin dulu. 2 Udah nya, iya bejaku ngagai sida: “Utai ti diketau endang mayuh, tang orang ke ngetau mimit. Nya alai, minta ngagai Orang ke bempu ladang ngambika ngirum mayuh agi orang ngetau. 3 Mupuk meh kita! Kingatka, aku ngasuh kita bejalai baka bedus ngagai raban serigala. 4 Anang mai kambut duit tauka kambut pemakai tauka kasut, lalu anang meri jaku tabi* ngagai orang ke ditemu kita ba rantau jalai. 5 Lebuh kita tama ngagai siti rumah, sebut dulu: ‘Awakka kita lantang senang.’ 6 Enti orang ke rinduka pengelantang bisi dalam rumah nya, pengelantang kita deka mengkang ba orang nya. Enti enda, pengelantang nya deka pulai baru ngagai kita. 7 Nya alai, diau meh ba rumah nya. Empa sereta irup meh utai ke udah disediaka sida, laban siku pekereja endang patut nerima gaji iya. Anang suah mindah ari rumah siti ngagai rumah siti.

8 “Lebuh kita tama ngagai sebuah nengeri lalu orang ba dia nerima penatai kita, empa meh utai ke disediaka. 9 Geraika orang ke sakit ba nengeri nya lalu padahka ngagai sida: ‘Perintah Petara nyau semak.’ 10 Tang enti orang enggai nerima kita lebuh kita tama ngagai sebuah nengeri, mansang kita ngagai jalai besai lalu padahka: 11 ‘Indah debu ari nengeri kita ke lekat ba kaki kami deka ditesai kami nyadika tangkan ke kita. Tang kingatka, Perintah Petara nyau semak.’ 12 Aku madah ngagai kita: Ukum ke ninggang Sodom deka lempung agi ari ukum ke ninggang nengeri nya.

13 “Tulah meh nuan, Korasin! Tulah meh nuan, Betsaida! Laban enti kereja ajih ti dikereja ba kita, udah dikereja ba Tirus enggau Sidon, orang ba dia tentu lama udah nesal ati, lalu ngerasukka kain guni sereta duduk ba atas amau. 14 Ketegal nya, ukum ke ninggang Tirus enggau Sidon deka lempung agi ari ukum ke ninggang kita. 15 Lalu nuan, Kapernaum, kati nuan deka diangkatka ke serega? Enda! Nuan deka dibuai ngagai Kubur.*

16 “Barang sapa ningaka jaku kita, ningaka jaku aku mega. Barang sapa ke enggai nerima kita, enggai nerima aku mega. Lalu barang sapa ke enggai nerima aku, enggai mega nerima Iya ke ngirum aku.”

17 Udah nya, 70 iku murid Jesus pulai baru. Sida amat gaga ati lalu madahka: “Tuan, indah bala melikat ti jai pan ngasika kami lebuh kami ngena nama nuan.” 18 Nya alai, Jesus madah ngagai sida: “Aku meda Sitan udah labuh ari langit baka kilat. 19 Dinga kita! Aku udah meri kita kuasa kena ngindik ular enggau kala sereta ngalahka semua kuasa munsuh lalu nadai utai deka ngemediska kita. 20 Taja pia, anang gaga ati ketegal bala melikat ti jai ngasika kita. Tang kita patut gaga ati ketegal nama kita udah ditulis ba serega.” 21 Tekala nya, kuasa kudus Petara ngasuh Jesus balat gaga ati. Iya lalu bejaku: “Aku muji Nuan ba mua orang mayuh Apai, Tuan ke merintah dunya enggau serega, laban Nuan udah ngelalaika utai nya ari orang ke bepenemu-dalam sereta pandai, tang mandangka utai nya ngagai anak mit. Nya meh peneka Nuan, Apai. 22 Semua utai udah diberi Apai ngagai aku. Nadai orang ngelala Anak kelimpah ari Apai, lalu nadai orang ngelala Apai kelimpah ari Anak. Nadai orang ulih ngelala Apai enti Anak enda ngajar sida pasal Apai.”

23 Udah nya, lebuh nadai orang bukai ba dia, iya bejaku ngagai bala murid iya: “Gaga ati meh orang ke meda utai ke dipeda kita. 24 Laban aku madah ngagai kita: Mayuh nabi enggau raja ingin meda utai ti dipeda kita, tang sida enda ulih meda utai nya. Sida ingin deka mendingka utai ti dipendingka kita, tang sida enda ulih ninga utai nya.”

25 Udah nya, siku lelaki ke landik pasal Adat deka nguji Jesus. Iya bediri lalu bejaku: “Pengajar, nama utai ke patut dikereja aku ngambika aku tau bulih pengidup ti meruan belama iya?” 26 Ku Jesus nyaut: “Nama utai ke ditulis ba Adat? Nama utai ke dimeretika nuan ari nya?” 27 Lelaki nya nyaut: “‘Kita patut rinduka Jehovah, Petara kita, enggau pengabis ati kita, enggau pengabis pengidup* kita, enggau pengabis pengering kita, sereta enggau pengabis runding kita.’ Kelimpah ari nya, ‘kita patut rinduka orang bukai baka kita ke rinduka diri empu.’” 28 Ku Jesus madah ngagai iya: “Betul saut nuan nya. Anang ngetu ngereja nya, lalu nuan deka bulih pengidup ti meruan belama iya.”

29 Tang ketegal lelaki nya deka nunjukka diri lurus, iya nanya Jesus: “Sapa kebendar iya orang ke patut dikerinduka aku?” 30 Ku Jesus nyaut: “Siku lelaki mansang ngagai Jeriko ari Jerusalem. Ba rantau jalai, bala perumpak nyerang iya. Sida ngambi gari iya sereta semua utai ke dikemisi iya. Sida malu iya lalu ninggalka iya setengah mati. 31 Maya nya, siku imam nengah jalai ti sama. Tang lebuh iya meda lelaki nya, iya ngelaung ke seberai lalu neruska pejalai iya. 32 Pia mega, lebuh siku orang Lewi datai ba dia lalu tepedaka lelaki nya, iya ngelaung ke seberai lalu neruska pejalai iya. 33 Tang udah nya, bisi siku orang Samaria nengah jalai nya. Lebuh iya tepedaka lelaki nya, iya kasihka lelaki nya. 34 Iya pan mansang ngagai lelaki nya, nuangka minyak enggau wain ba abi bakal lelaki nya, lalu malut abi nya. Iya ngangkatka lelaki nya ngagai keledai iya, mai lelaki nya ngagai siti endur bemalam lalu ngintu iya. 35 Ba hari siti, orang Samaria nya meri dua denari* ngagai orang ke bempu endur nya lalu bejaku: ‘Intu iya. Enti sema nuan ngena belanja lebih agi ari tu, aku deka mayar nuan maya aku pulai kitu baru.’ 36 Ba runding nuan, sapa entara sida tiga tu ke ngayanka pengerindu ngagai lelaki ke kena rumpak nya?” 37 Ku iya nyaut: “Orang ke kasihka iya.” Jesus madah ngagai iya: “Enti pia, kereja meh utai ti sama.”

38 Jesus enggau bala murid iya neruska pejalai sida lalu tama ngagai siti genturung pendiau. Ba dia, bisi siku indu ke benama Marta mai Jesus ngagai rumah iya. 39 Iya mega bisi siku menyadi indu ke benama Maria. Maria duduk ba semak kaki Tuan Jesus, lalu majak ningaka utai ke disebut Jesus. 40 Tang Marta limpang, laban kiruh ngereja mayuh pengawa. Nya alai, iya mansang ngagai Jesus lalu bejaku: “Tuan, peda nuan. Menyadi aku ngelakka aku ngereja utai kediri. Asuh iya nulung aku.” 41 Ku Tuan Jesus nyaut iya: “Marta, Marta, nuan kelalu irau sereta kiruhka mayuh utai. 42 Kebendar iya, enda mayuh utai ke diguna kitai tauka semina siti aja pan chukup. Maria udah milih utai ti pemadu manah lalu utai nya enda diambi ari iya.”