Mark

10 Jesus mupuk ari endur nya, lalu bejalai ngagai adan menua Judea, ba seberai Sungai Jordan. Sekali agi, mayuh amat orang datai ngagai iya. Lalu baka selama, iya ngajar sida. 2 Maya nya, orang Parisi datai lalu deka nguji Jesus. Sida nanya iya enti laki tau nyarakka bini. 3 Iya nyaut sida, “Nama pesan Moses ngagai kita?” 4 Ku sida: “Moses ngemendarka laki ke deka nyarakka bini iya meri surat sarak ngagai bini iya.” 5 Tang ku Jesus madah ngagai sida, “Moses nulis pesan nya ke kita, laban kita kieh.* 6 Tang kenyau ari penumbuh dunya, ‘Petara ngaga mensia lelaki enggau indu. 7 Ketegal nya, lelaki deka ninggalka apai enggau indai iya, 8 lalu seduai iya deka nyadi siti tubuh.’ Nya alai, seduai iya ukai dua iku agi, tang siku. 9 Nya kebuah, nadai orang tau nyeraraka utai ti udah ditampilka Petara.”* 10 Lebuh sida pulai baru ke rumah, bala murid nanya iya pasal pekara nya. 11 Ku iya bejaku ngagai sida: “Barang sapa nyarakka bini iya lalu jadi enggau indu bukai, iya butang.* 12 Lalu enti indu nyarakka laki iya, lalu jadi enggau lelaki bukai, iya butang.”

13 Udah nya, orang berengkah mai anak mit ngagai Jesus, ngambika iya negu sida. Tang bala murid Jesus nganu bala orang nya. 14 Lebuh Jesus meda nya, iya pedis ati lalu bejaku ngagai bala murid iya: “Awakka anak mit datai ngagai aku. Anang nagang sida, laban Perintah Petara deka diempu orang ke baka sida. 15 Enggau bendar aku madah ngagai kita: Barang sapa ke enda nerima Perintah Petara baka anak mit, iya enda ulih tama ngagai Perintah nya.” 16 Iya lalu merap semua anak mit nya, ngengkahka jari iya atas sida, lalu merekatka sida.

17 Lebuh Jesus neruska pejalai iya, siku lelaki belanda datai lalu besugang ba mua iya, lalu nanya: “Pengajar ti Manah, nama pengawa ke patut dikereja aku, ngambika aku tau bulih pengidup ti meruan belama iya?” 18 Ku Jesus bejaku ngagai iya: “Nama kebuah nuan ngumbai aku manah? Nadai orang ke manah. Semina Petara siku aja ke manah. 19 Nuan nemu pesan tu: ‘Anang munuh orang, anang butang, anang ngenchuri, anang besaksi bula, anang nipu orang, sereta bebasaka apai indai nuan.’” 20 Disaut lelaki nya: “Pengajar, semua pesan nya udah dititihka aku magang kenyau ari aku agi biak.” 21 Jesus merening ngagai iya enggau penuh pengerindu, lalu bejaku ngagai iya: “Siti utai ke bedau dikereja nuan. Mupuk nuan lalu jual semua reta tengkira nuan, lalu beri duit nya ngagai orang ke seranta. Lalu nuan deka bisi reta ba serega. Udah nya, aram nyadi murid aku.” 22 Lebuh lelaki nya ninga saut nya, iya tusah ati lalu mupuk ari endur nya, laban iya bisi mayuh reta tengkira.

23 Jesus malik kiba kanan, lalu bejaku enggau bala murid iya: “Orang ke kaya endang tusah deka tama ngagai Perintah Petara!” 24 Tang bala murid Jesus tekenyit ninga nya. Nya alai, Jesus bejaku ngagai sida: “Anak, endang amat tusah deka tama ngagai Perintah Petara! 25 Jelu unta senang agi tama nengah lubang jarum, ari orang ke kaya tama ngagai Perintah Petara.” 26 Sida majak alit ati, lalu ku sida bejaku ngagai iya:* “Enti pia, sapa ulih diselamatka?” 27 Jesus merening ngagai sida, lalu bejaku: “Ba mensia, utai tu enda ulih, tang ba Petara ukai baka nya. Laban ba Iya, semua utai ulih magang.” 28 Peter bejaku ngagai iya: “Kami udah ninggalka semua utai lalu nitihka nuan.” 29 Ku Jesus bejaku: “Enggau bendar aku madah ngagai kita: Barang sapa ke udah ninggalka rumah, tauka menyadi lelaki, tauka menyadi indu, tauka indai, tauka apai, tauka anak, tauka tanah, ketegal nama aku enggau ketegal Berita Manah, 30 deka nerima 100 kali lipat mayuh agi ba jeman tu, iya nya mayuh agi rumah, menyadi lelaki, menyadi indu, indai, anak, enggau tanah, taja pan kena perinsa. Lalu jemah ila,* iya deka bulih pengidup ti meruan belama iya. 31 Tang mayuh orang ke dulu deka nyadi dudi, lalu orang ke dudi deka nyadi dulu.”

32 Lebuh sida benung ba rantau jalai mansang ngagai Jerusalem, Jesus bejalai dulu ari sida. Bala murid Jesus alit ati, tang orang bukai ke nitihka sida belabuh takut. Sekali agi, Jesus mai 12 iku rasul iya ke tisi, lalu belabuh madah ngagai sida utai ti deka nyadi ba iya. 33 “Dinga kita, kitai benung mupuk ngagai Jerusalem. Anak Mensia deka diserahka ngagai bala tuai imam enggau ngagai bala penulis Adat. Sida deka ngasuh iya diukum bunuh. Udah nya, sida deka nyerahka iya ngagai orang bansa bukai. 34 Bala orang nya deka ngeleseka iya, ngeludah iya, nyipat iya, lalu munuh iya. Tang pengudah tiga hari, iya deka diidupka baru.”

35 Udah nya James seduai John, anak Sebedi, datai ngagai Jesus, lalu bejaku: “Pengajar, kami duai deka nuan meri nama-nama utai ke dipinta kami ari nuan.” 36 Iya lalu nanya seduai iya: “Nama utai ti dipinta seduai?” 37 Disaut seduai iya: “Awakka kami duai duduk enggau nuan lebuh nuan dimuliaka. Siku ba sepiak kanan nuan, lalu siku ba sepiak kiba nuan.” 38 Tang ku Jesus madah ngagai seduai iya: “Seduai enda nemu utai ti dipinta diri. Kati seduai ulih ngirup ari mangkuk* ti deka diirup aku, tauka dibaptisa ngena baptisa ti dikena maptisa aku?” 39 Seduai iya nyaut: “Ulih.” Ku Jesus bejaku: “Seduai endang deka ngirup ari mangkuk ke diirup aku, lalu seduai deka dibaptisa ngena baptisa ti dikena maptisa aku. 40 Tang sapa ke duduk ba sepiak kanan tauka kiba aku, ukai aku ke nentuka nya. Apai aku udah nentuka sapa ke duduk ba dia.”

41 Lebuh 10 iku murid ke bukai ninga nya, sida lalu pedis ati ngagai James seduai John. 42 Nya alai, Jesus ngangauka sida lalu bejaku: “Kita nemu, orang ke dikumbai pemerintah enggau bala tuai ke merintah orang bansa bukai bekuasa sereta nekan pengidup rayat sida. 43 Tang kita enda tau baka nya. Barang sapa deka nyadi lebih agi ba bala kita, iya patut ngintu kita. 44 Lalu barang sapa ke deka nyadi dulu ba bala kita, iya patut nyadi ulun kita. 45 Laban indah Anak Mensia datai pan ukai minta diri diintu, tang iya datai laban deka ngintu orang bukai, lalu nyerahka nyawa diri nyadika tebus ke orang mayuh.”

46 Sida lalu datai ba Jeriko. Tang lebuh Jesus enggau bala murid iya mupuk ari Jeriko sama enggau orang mayuh, bisi siku lelaki ke buta minta sedekah ba tisi jalai. Nama lelaki nya Bartimius anak Timius. 47 Lebuh iya ninga Jesus orang Nasaret bisi mansa ba dia, iya lalu ngangau enggau nyawa ti inggar: “Jesus, Anak David, kasihka aku!” 48 Bala orang mayuh ngerara iya, lalu ngasuh iya badu agi ragak. Tang iya ngangau inggar agi: “Anak David, kasihka aku!” 49 Nya alai, Jesus ngetu lalu bejaku: “Kangauka iya kitu.” Sida lalu ngangauka lelaki ke buta nya. Ku sida bejaku ngagai iya: “Anang takut! Angkat nuan, iya ngangauka nuan.” 50 Lelaki ke buta nya lalu muai gari luar iya, engkejuk angkat lalu mansang ngagai Jesus. 51 Jesus nanya iya: “Nuan deka aku ngereja nama ke nuan?” Iya nyaut: “Rabboni,* awakka aku ulih meda.” 52 Ku Jesus bejaku ngagai iya: “Mupuk nuan. Pengarap nuan udah ngeraika nuan.” Tekala nya, iya lalu ulih meda, lalu nitihka Jesus ba jalai.