Mark

11 Lebuh Jesus enggau bala murid iya nyau semak Jerusalem, sida ngagai Betpagi enggau Betani, ba Bukit Kana. Jesus bejaku enggau dua iku murid iya. 2 Ku iya: “Alai mupuk ngagai genturung pendiau ba mua nyin. Sepengudah datai ba din, seduai deka tetemuka siku anak keledai ke ditanchang. Anak keledai nya nadai kala ditepan orang. Buka tali jelu nya, lalu bai iya kitu. 3 Enti orang bisi bejaku ngagai seduai: ‘Nama kebuah seduai ngelepaska keledai tu?’ sebut aja, ‘Tuan begunaka keledai tu, lalu deka mulaika iya baru kitu enggau jampat.’” 4 Seduai iya mupuk, lalu tetemuka siku anak keledai ditanchang ba pintu sebuah rumah, ba tisi jalai. Lebuh seduai iya muka tali keledai nya, 5 sekeda orang ke bediri ba dia lalu nanya: “Nama kebuah seduai muka tali anak keledai nya?” 6 Seduai iya lalu madahka jaku Jesus ngagai sida. Sida lalu nejuka seduai iya mupuk.

7 Seduai iya lalu mai anak keledai nya ngagai Jesus, lalu ngelempaika gari luar seduai iya ba belakang jelu nya. Jesus pan nepan jelu nya. 8 Pia mega, mayuh orang nganchau gari luar sida ba jalai. Lalu sida ke bukai nganchau dan kayu ke dijarau sida ari tisi jalai. 9 Orang ke bejalai dulu ari iya enggau ke entudika iya manjung: “Kami besampi,* selamatka iya! Beberekat meh iya ke datai dalam nama Jehovah! 10 Diberekat meh Perintah ti deka datai, Perintah David, apai kami! Awakka Petara ke ba endur ti pemadu tinggi nyelamatka iya!”* 11 Jesus tama ngagai Jerusalem, mansang ngagai Rumah Sembiang lalu meda semua utai ba dia. Tang ketegal hari udah lemai, iya enggau 12 iku rasul iya mansang ngagai Betani.

12 Hari siti, lebuh sida mupuk ari Betani, Jesus berasai lapar. 13 Ari jauh, iya tepedaka sepun kayu ara ti bedaun. Iya mansang ngagai pun kayu nya, deka ngiga buah ba pun kayu nya. Lebuh iya datai ba kayu nya, iya nadai tetemuka buah tang semina daun aja laban maya nya endang ukai musin buah ara. 14 Iya lalu bejaku ngagai pun kayu nya: “Awakka orang nadai agi makai buah nuan.” Bala murid iya ninga iya bejaku munyi nya.

15 Udah nya, sida datai ba Jerusalem. Jesus tama ngagai Rumah Sembiang, lalu belabuh muru semua orang ke bejual-bebeli dalam Rumah Sembiang. Iya nungkupka mija orang ke penukar duit enggau bangku orang ke nyual burung achang. 16 Iya mega enda ngemendarka orang mai nama-nama utai nengah Rumah Sembiang. 17 Iya ngajar orang lalu madah ngagai sida: “Endaka udah ditulis, ‘Rumah Aku deka dikumbai rumah endur besampi ke semua bansa.’ Tang kita ngaga iya nyadi sarang perumpak.” 18 Tang, lebuh bala tuai imam enggau bala penulis Adat ninga Jesus bejaku munyi nya, sida belabuh ngiga chara kena munuh iya. Tang sida takutka Jesus, laban mayuh orang alit ati enggau ajar iya.

19 Lebuh hari nyau lemai, iya enggau bala murid iya pansut ari nengeri nya. 20 Tumu pagi hari siti lebuh sida mansa, sida meda pun kayu ara nya udah mati nyentuk ngagai urat. 21 Peter teingatka utai ke nyadi lalu bejaku ngagai Jesus: “Rabbi,* peda nya! Pun kayu ara ti disumpah nuan udah mati.” 22 Jesus lalu bejaku ngagai sida: “Arapka Petara. 23 Enggau bendar aku madah ngagai kita: Barang sapa nyebut ngagai bukit tu, ‘Angkat nuan lalu buai diri empu ngagai tasik,’ pekara tu sigi deka nyadi enti iya arap sereta enda kakang ati pasal utai ke disebut iya nya deka nyadi. 24 Nya kebuah aku madah ngagai kita, sebarang utai ti dipinta kita ngena sampi, kita patut arap kita deka nerima utai nya. Enggau nya, kita tentu deka nerima iya. 25 Lebuh kita bediri besampi, ampunka penyalah ti dikereja orang ngagai kita, ngambika Apai kita ti ba serega mega ngampun penyalah kita.” 26* ——

27 Sekali agi, sida datai ba Jerusalem. Lebuh Jesus bejalai ba Rumah Sembiang, bala tuai imam, bala penulis Adat, enggau bala tuai bansa orang Judah datai ngagai iya, 28 lalu nanya iya: “Ari ni nuan bulih kuasa? Sapa ke meri nuan kuasa ngereja utai tu?” 29 Disaut Jesus: “Aku bisi siti tanya ke kita. Saut aku, lalu aku deka madah ngagai kita sapa ke meri aku kuasa ngereja semua utai tu. 30 Sapa ke nganjung John maptisa orang? Petara ke ba serega tauka mensia? Saut aku.” 31 Sida lalu berandau enggau pangan diri. Ku sida: “Enti kitai nyebut, ‘Petara,’ iya deka nyebut ngagai kitai, ‘Enti pia, nama kebuah kita enda arapka iya deh?’ 32 Tauka kati kitai berani deka nyebut, ‘Mensia?’” Tang sida takut nyebut munyi nya laban orang mayuh ngumbai John nya endang nabi. 33 Nya alai sida nyaut Jesus: “Enda kami nemu.” Jesus bejaku ngagai sida: “Enti pia, aku pan enggai madah ngagai kita sapa ke meri aku kuasa ngereja semua utai tu.”