Luke

19 Jesus tama ngagai Jeriko lalu bejalai nengah nengeri nya. 2 Ba dia, bisi siku lelaki ke kaya ke benama Sakius. Iya ketuai bala pengumpul chukai. 3 Iya nguji deka meda Jesus tang iya enda ulih, laban ba dia bisi mayuh orang. Pia mega, iya pandak. 4 Nya alai, iya belanda dulu ari orang mayuh lalu niki pun kayu ara,* ngambika iya ulih meda Jesus ke deka mansa. 5 Lebuh Jesus datai ba endur nya, iya malik ke atas lalu bejaku: “Sakius, jampat nurun. Seharitu aku patut diau ba rumah nuan.” 6 Nya alai, Sakius beguai-guai nurun lalu ngelaluka Jesus ngagai rumah iya enggau ati ti gaga. 7 Semua orang ke meda nya lalu mut-mut. Ku sida bejaku: “Iya diau ba rumah orang ke bedosa.” 8 Tang Sakius bediri lalu madah ngagai Tuan Jesus: “Tuan, aku deka meri setengah ari reta aku ngagai orang ke seranta, lalu duit orang ke diambi aku enggau chara nipu deka dipulaika aku ngagai sida empat kali lipat.” 9 Nya alai, Jesus bejaku: “Seharitu, Petara udah nyelamatka lelaki tu enggau ruang bilik iya, laban iya mega peturun Abraham. 10 Laban Anak Mensia datai deka ngiga lalu nyelamatka orang ke tesat.”

11 Lebuh bala murid Jesus benung mendingka iya bejaku, iya madahka siti da agi jaku sempama, laban iya nyauka datai ba Jerusalem, lalu sida ngumbai Perintah Petara deka jampat datai. 12 Ku Jesus bejaku: “Siku orang ke ari ruang bilik raja mupuk ngagai endur ti jauh, laban iya deka nyadi raja lalu udah nya, iya deka pulai baru. 13 Sebedau mupuk, iya ngangauka 10 iku ulun iya lalu meri sida 10 mina.* Iya madah ngagai sida, ‘Alai kita bedagang ngena duit tu nyentukka aku pulai.’ 14 Tang orang ba nengeri nya begedika iya. Sida nganjung bala pengari ngambika madah ngagai iya, ‘Kami enggai nuan nyadi raja kami.’

15 “Pengudah nyadi raja, iya pan pulai. Iya ngangauka bala ulun ke udah diberi iya duit pirak nya, laban iya deka nemu untung ke diulih sida ari bedagang. 16 Ulun ti keterubah datai lalu madahka, ‘Tuan, aku bulih untung 10 mina ari satu mina ke diberi nuan.’ 17 Ku iya madah ngagai ulun iya, ‘Manah nya. Nuan ulun ti manah! Laban nuan tetap ati ba pekara ti mit amat, aku deka ngasuh nuan merintah 10 iti nengeri.’ 18 Ulun ti kedua datai lalu madahka, ‘Tuan, aku bulih untung lima mina ari satu mina ke diberi nuan.’ 19 Iya mega madah ngagai ulun nya, ‘Aku deka ngasuh nuan merintah lima iti nengeri.’ 20 Tang udah nya, siku da agi ulun datai lalu madahka, ‘Tuan, tu duit mina nuan. Aku udah ngelalaika iya dalam kain. 21 Nuan nemu, aku takutka nuan laban nuan orang ke amat terit. Nuan ngambi duit ari bank taja pan nuan enda nyimpan iya, lalu nuan ngetau taja pan nuan enda nanam.’ 22 Iya bejaku ngagai ulun nya, ‘Nuan tu ulun ke jai. Aku deka ngakim nuan nitihka utai ke disebut nuan. Nuan nemu aku tu orang ke amat terit. Aku ngambi duit ari bank taja pan aku enda nyimpan iya, lalu aku ngetau taja pan aku enda nanam. 23 Nya alai, nama kebuah nuan enda nyimpan duit pirak aku dalam bank, ngambika lebuh aku datai, aku ulih nerima duit nya enggau bungai iya?’

24 “Udah nya, iya bejaku ngagai sida ke bediri ba dia, ‘Ambi duit mina nya ari iya, lalu beri ngagai ulun ke bisi 10 mina.’ 25 Tang ku sida bejaku ngagai iya, ‘Tuan, iya udah bisi 10 mina.’ 26 Ku iya nyaut, ‘Aku madah ngagai kita: Genap iku orang ke bisi utai, deka diberi mayuh agi. Tang orang ke nadai utai, indah utai ke dikemisi iya deh, deka diambi ari iya. 27 Diatu, bai kitu bala munsuh ke enggai nerima aku nyadi raja sida, lalu bunuh sida ba mua aku.’”

28 Pengudah Jesus madahka jaku sempama nya, iya neruska pejalai iya ngagai Jerusalem. 29 Lebuh Jesus nyauka datai ba Betpagi enggau Betani ba Bukit Kana, Jesus bejaku enggau dua iku murid iya. 30 Ku iya: “Alai seduai mupuk ngagai genturung pendiau ba mua nyin. Ba din, seduai deka tetemuka siku anak keledai ke ditanchang. Anak keledai nya nadai kala ditepan orang. Buka tali jelu nya lalu bai iya kitu. 31 Tang enti orang bisi nanya seduai, ‘Nama kebuah seduai ngelepaska keledai tu?’ Seduai patut nyebut, ‘Tuan begunaka keledai tu.’” 32 Seduai iya pan mupuk lalu tetemuka anak keledai nya baka ke dipadah Jesus. 33 Tang lebuh seduai iya benung ngelepaska anak keledai nya, orang ke bempu jelu nya nanya: “Nama kebuah seduai ngelepaska anak keledai tu?” 34 Seduai iya nyaut: “Tuan begunaka keledai tu.” 35 Udah nya, seduai iya mai anak keledai nya ngagai Jesus, lalu ngelempaika gari luar seduai iya ba belakang jelu nya. Jesus pan nepan jelu nya.

36 Lebuh Jesus mansa, mayuh orang nganchau gari luar sida ba jalai. 37 Lebuh iya nyauka datai ba jalai ke nurun ari Bukit Kana, semua murid iya balat gaga ati lalu muji Petara enggau nyawa ti inggar, ketegal semua kereja ajih ti udah dipeda sida. 38 Ku sida: “Beberekat meh Raja ke datai dalam nama Jehovah! Awakka pengelantang bisi ba serega, lalu mulia diberi ngagai Petara ke bisi ba endur ti pemadu tinggi!” 39 Tang beberapa iku orang Parisi ke bisi enggau bala orang mayuh nya bejaku ngagai Jesus: “Pengajar, rara meh bala murid nuan.” 40 Tang ku iya nyaut sida: “Aku madah ngagai kita: Enti sida enda bemunyi, batu tu deka manjung.”

41 Lebuh iya nyauka datai ba Jerusalem, iya merening nengeri nya lalu nyabak. 42 Ku iya madahka: “Naka meh pemanah enti nuan nemu utai ke ulih mai pengelantang. Tang diatu, utai nya udah dilalaika ari mata nuan. 43 Maya deka datai, alai bala munsuh nuan deka ngujakka kayu ti tajam ngelingi nuan. Sida deka ngelulung nuan lalu ngansak nuan ari semua endur. 44 Sida deka ngempaska nuan enggau bala anak nuan ke tanah, lalu sida enda nejuka sigi batu pan deka mengkang betusun ba atas pangan diri, laban Petara udah datai ngakim nuan tang nuan enda sedarka nya.”

45 Udah nya, Jesus tama ngagai Rumah Sembiang lalu muru orang ke bejual ba dia. 46 Ku iya bejaku ngagai sida: “Endang udah ditulis, ‘Rumah Aku deka dikumbai rumah endur besampi,’ tang kita ngaga iya nyadi sarang perumpak.”

47 Ninting hari iya ngajar ba Rumah Sembiang. Taja pan bala tuai imam, bala penulis Adat, enggau bala tuai bansa orang Judah ngiga chara kena munuh iya, 48 tang sida enda ulih ngereja nya, laban semua orang majak nitihka iya ngambika ulih ningaka jaku ajar iya.