Mark

14 Dua hari sebedau Pengerami Paska enggau Pengerami Roti ti Enda Beragi, bala tuai imam enggau bala penulis Adat ngiga jalai deka ngena pemula, ngambika ulih nangkap Jesus lalu munuh iya. 2 Ku sida: “Anang nangkap iya maya pengerami, enggaika orang begau.”

3 Lebuh Jesus ba Betani, makai ba rumah Simon ke kala sakit lan,* siku indu datai mai sebutul* minyak wangi, iya nya minyak nard* ti tulin sereta mar amat rega. Iya muka butul nya, lalu nuangka minyak wangi nya ba pala Jesus. 4 Sekeda orang ke bisi dia pedis ati meda nya, lalu bejaku enggau pangan diri: “Nama kebuah masau minyak wangi nya? 5 Enti dijual, rega minyak wangi nya lebih 300 denari,* lalu duit nya ulih diberi ngagai orang ke seranta!” Sida lalu nganu* indu nya. 6 Tang ku Jesus bejaku: “Anang ngachau iya. Nama kebuah kita ngasuh indu tu tusah ati? Iya udah ngereja utai ti manah ke aku. 7 Orang ke seranta deka seruran bisi enggau kita, lalu kita ulih nulung sida sebarang maya, tang aku enda seruran bisi enggau kita. 8 Iya ngereja utai ke ulih iya. Iya nuang minyak wangi nya ba tubuh aku, kena nyediaka aku ke deka dikubur. 9 Enggau bendar aku madah ngagai kita: Enda ngira ba dini alai Berita Manah ditusui ba serata dunya, utai ke udah digaga indu tu pan deka ditusui, kena ngingatka iya.”

10 Udah nya, Judas Iskariot, siku ari 12 iku rasul Jesus, betemu enggau bala tuai imam. Iya deka nulung sida nangkap Jesus. 11 Lebuh sida ninga nya, sida gaga amat lalu besemaya deka meri iya duit pirak. Nya alai, Judas lalu belabuh begigaka peluang kena nyerahka Jesus ngagai sida.

12 Ba hari ti keterubah Pengerami Roti ti Enda Beragi, mayuh orang munuh jelu kena Pengerami Paska baka selama. Bala murid nanya Jesus: “Dini nuan deka kami nyediaka pemakai ke nuan kena ngintu Pengerami Paska?” 13 Nya alai, iya nganjung dua iku murid iya, lalu ku iya: “Alai seduai ngagai Jerusalem, lalu siku lelaki ke mai kebuk* ai deka betemu enggau seduai. Titihka iya 14 ngagai rumah ti endur iya tama. Udah nya, sebut ngagai orang ke bempu rumah nya: ‘Pengajar nanya: “Dini alai bilik temuai endur aku ulih makai maya Pengerami Paska enggau bala murid aku?”’ 15 Lalu iya deka nunjukka seduai, siti bilik besai ba tingkat atas, ke udah disedia lalu tau dikena. Sediaka pemakai Pengerami Paska ke kitai ba dia.” 16 Nya alai, dua iku murid nya mupuk ngagai Jerusalem, lalu beratika semua utai amat nyadi baka ke dipadah Jesus ngagai seduai iya. Udah nya, seduai iya nyediaka pemakai ke Pengerami Paska.

17 Pengudah hari nyau lemai, Jesus datai enggau 12 iku rasul iya. 18 Lebuh sida duduk makai ba mija, ku Jesus bejaku: “Enggau bendar aku madah ngagai kita: Siku ari kita ke benung makai enggau aku, deka nyerahka aku ngagai munsuh.” 19 Bala murid Jesus tusah ati ninga nya, lalu sida siku-siku belabuh nanya iya: “Ukai aku ku nuan nya?” 20 Disaut Jesus: “Iya siku ari kita ke 12 iku ke ngambi pemakai ari mangkuk ti sama enggau aku. 21 Laban Anak Mensia endang deka mati munyi ti udah ditulis, tang tulah meh orang ke deka nyerahka Anak Mensia ngagai munsuh! Manah agi enti orang nya enda ada.”

22 Lebuh sida benung makai, Jesus ngambi roti lalu besampi meri terima kasih.* Iya mechahka roti nya, lalu nyuaka roti nya ngagai bala murid iya. Ku iya bejaku: “Ambi lalu empa. Roti tu ngambarka tubuh aku.” 23 Udah nya, iya ngambi mangkuk. Pengudah iya besampi meri terima kasih, iya nyuaka mangkuk nya ngagai bala murid iya. Lalu semua sida bela ngirup ari mangkuk nya. 24 Ku iya bejaku ngagai sida: “Wain dalam mangkuk tu ngambarka darah aku, iya nya ‘darah ti nanggam sempekat Petara,’ ti deka dituang ke orang mayuh. 25 Enggau bendar aku madah ngagai kita, aku enda agi ngirup wain, datai ngagai maya aku ngirup wain ti baru enggau kita ba dalam Perintah Petara.” 26 Pengudah belagu meri puji,* sida mupuk ngagai Bukit Kana.

27 Ku Jesus madah ngagai sida: “Semua kita deka ninggalka aku magang.* Laban endang udah ditulis: ‘Aku deka nyerang pengibun bedus, lalu raban bedus iya deka pambar.’ 28 Tang pengudah aku diidupka baru, aku deka mupuk dulu ari kita ngagai Galili.” 29 Tang ku Peter bejaku ngagai iya: “Taja pan semua sida ke bukai deka ninggalka nuan,* tang aku enda ninggalka nuan.”* 30 Ku Jesus bejaku ngagai iya: “Enggau bendar aku madah ngagai nuan: Malam tu, sebedau manuk engkukuk dua kali, nuan deka tiga kali madahka diri enda ngelala aku.” 31 Tang Peter bebendar madahka: “Enti sema aku patut mati enggau nuan, enda meh aku madahka diri enda ngelala nuan.” Bala murid ke bukai mega nyebut utai ti sama.

32 Sida datai ba endur ke dikumbai Getsemani. Ku Jesus bejaku ngagai sida: “Duduk ditu. Aku deka besampi dulu.” 33 Iya mai Peter, James, enggau John. Maya nya, ati iya balat tusah sereta balat irau. 34 Iya bejaku ngagai sida: “Ati aku balat tusah, asai ke deka mati. Nganti ditu lalu mengkang bejaga.” 35 Iya bejalai jauh mimit ari sida, nyungkurka diri ke tanah, lalu besampi ngagai Petara, minta pemerinsa nya dijauhka ari iya, enti ulih. 36 Ku iya besampi: “Abba,* Apai, ba Nuan semua utai ulih magang. Ambi meh mangkuk* tu ari aku. Taja pia, anang nitihka peneka aku, tang nitihka peneka Nuan.” 37 Lebuh iya pulai, iya meda sida benung tinduk. Ku iya bejaku ngagai Peter: “Simon, nama kebuah nuan tinduk? Iga ga kita enda ulih bejaga enggau aku sejam? 38 Anang ngetu bejaga sereta seruran besampi, ngambika kita enda alah laban penguji. Ati amat ransing, tang tubuh* lemi.” 39 Iya mupuk lalu besampi baru, nyebut utai ti sama. 40 Sekali agi, iya pulai baru lalu meda sida benung tinduk, laban sida balat ngantuk. Nya alai, sida enda nemu baka ni deka nyaut Jesus. 41 Udah nya, iya pulai baru ketiga kali, lalu bejaku ngagai sida: “Ba maya ke baka tu pan agi ga kita ka tinduk sereta belelak! Umbas nya! Peda kita! Jam udah datai alai Anak Mensia deka diserahka ngagai orang ke bedosa. 42 Angkat, aram kitai mupuk. Peda kita! Orang ke deka nyerahka aku nyauka datai.”

43 Lebuh Jesus benung bejaku, siku ari 12 iku rasul Jesus ke benama Judas, datai. Mayuh amat orang ke bebaika pedang enggau pemalu datai enggau iya. Sida dianjung bala tuai imam, bala penulis Adat, enggau bala tuai bansa orang Judah. 44 Orang ke deka nyerahka Jesus udah madah ngagai sida siti tanda. Ku iya: “Orang ke disium aku, nya meh iya. Tangkap iya. Bai iya lalu tentuka iya enda ngerarika diri.” 45 Lebuh Judas datai, iya mansang ngagai Jesus, lalu bejaku: “Rabbi!”* lalu nyium iya. 46 Udah nya sida lalu nangkap Jesus. 47 Enda mukai-mukai, siku orang ke bediri semak dia nyintak* pedang iya. Iya nyerang ulun imam besai, lalu mutuska pending ulun nya. 48 Tang Jesus bejaku ngagai sida: “Kati aku tu perumpak alai kita bebaika pedang enggau pemalu mansang nangkap aku? 49 Tiap hari aku begulai enggau kita lebuh aku ngajar dalam Rumah Sembiang, tang enda ga kita nangkap aku. Taja pia, semua utai tu nyadi kena ngamatka jaku ba Bup Kudus.”

50 Udah nya, semua murid iya rari ninggalka iya. 51 Taja pia, siku lelaki ti agi biak ke ngena gari luar ti digaga ari kain linin ti alus, nitihka Jesus enda jauh ari belakang. Orang mayuh nguji deka nangkap iya. 52 Tang iya ninggalka gari luar nya, lalu rari semina ngena gari dalam aja.*

53 Sida lalu mai Jesus ngagai imam besai. Semua bala tuai imam, bala tuai bansa orang Judah, enggau bala penulis Adat, begempuru ba dia. 54 Tang Peter nitihka Jesus ari jauh, nyentuk ngagai laman rumah imam besai. lya duduk bekindu* enggau bala ulun ba dia. 55 Nyadi bala tuai imam enggau semua Raban Kunsil Orang Judah nguji ngiga bukti kena nuduh Jesus, ngambika sida ulih munuh iya. Tang sida nadai tetemuka bukti. 56 Mayuh orang datai meri saksi pelesu, tang utai ke disebut sida enda sejalai enggau pangan diri. 57 Bisi mega sekeda orang bediri meri saksi pelesu pasal iya. Ku sida: 58 “Kami bisi ninga iya nyebut, ‘Aku deka ngerubuh Rumah Sembiang ke digaga ngena jari mensia, lalu dalam tiga hari aku deka nirika siti da agi Rumah Sembiang ke enda digaga ngena jari mensia.’” 59 Tang indah ba pekara tu deh, bukti ke diberi sida enda sejalai enggau pangan diri.

60 Udah nya, imam besai bediri ba tengah-tengah sida, lalu nanya Jesus: “Nama kebuah nuan enda nyaut? Kati nuan enda ninga jaku tuduh sida ngagai nuan?” 61 Tang Jesus enda bemunyi, lalu enda nyaut sida seleka jaku. Imam besai lalu nanya iya baru: “Kati nuan tu Kristus, Anak Iya ti Kudus?” 62 Ku Jesus nyaut: “Au, aku meh nya, lalu kita deka meda Anak Mensia duduk ba sepiak kanan Iya ti Bekuasa, lalu datai ba atas remang!”* 63 Imam besai lalu nyarikka gari diri, lalu bejaku: “Enti pia, nama kebuah kitai begunaka saksi bukai? 64 Kita empu udah ninga iya bejaku ngelaban Petara. Nama pemutus kita?”* Semua sida bela madahka iya patut diukum bunuh. 65 Sekeda sida belabuh ngeludah iya, mampul mua iya lalu numbuk iya. Ku sida bejaku: “Enti nuan amat nabi, padahka ngagai kami sapa ke malu nuan!” Bala pemesai ari kot nampar iya, lalu mai iya pansut.

66 Lebuh Peter ba baruh, ba laman rumah, siku ulun indu imam besai datai. 67 Lebuh iya meda Peter bediri semak api, iya merening ngagai Peter, lalu bejaku: “Nuan tu pan sama enggau Jesus, orang Nasaret nya.” 68 Tang Peter enggai ngaku, lalu ku iya: “Nadai aku ngelala iya. Nadai aku nemu utai ku nuan.” Udah nya, Peter pansut ngagai jalai penama laman rumah. 69 Ba dia, ulun indu nya meda iya baru, lalu bejaku ngagai sida ke bediri semak dia: “Iya tu siku ari bala murid Jesus.” 70 Tang sekali agi Peter enggai ngaku. Enda lama udah nya, sida ke bediri ba dia bejaku ngagai Peter baru: “Nuan tentu siku ari sida, laban nuan pan orang Galili.” 71 Peter lalu besumpah: “Tulah meh aku enti aku bula. Aku enda ngelala orang ke disebut kita nya!” 72 Tekala nya manuk lalu engkukuk kedua kali. Peter lalu teingatka utai ke dipadah Jesus ngagai iya: “Sebedau manuk engkukuk dua kali, nuan deka tiga kali madahka diri enda ngelala aku.” Peter enda ulih ngenatka penusah ati diri, lalu duie-duie nyabak.