Kolosi

3 Enti kita diidupka baru sama enggau Kristus, anang ngetu ngiga utai ba serega, endur Kristus duduk ba sepiak kanan Petara. 2 Terus meh berundingka utai ba serega, ukai utai ba dunya. 3 Nya ketegal kita udah mati, lalu sejalai enggau peneka Petara, pengidup kita udah dilalaika begulai enggau Kristus. 4 Lebuh Kristus ke mai pengidup nyadi nyata, kita mega deka nyadi nyata sama enggau iya, lalu bulih mulia enggau iya.

5 Nya alai, buai abis* pengingin perengka tubuh kita, pengingin ngereja ulah seks ti kamah,* pengingin ke utai ti kamah, pengingin seks ke enda ditagang, pengingin ti jai, enggau pengamu, ti sama enggau pengawa nyembah engkeramba. 6 Semua nya ngasuh Petara ringat. 7 Suba, kita pan kala ngereja utai ke baka nya. 8 Tang diatu, kita patut muai semua utai tu ari kita: Ati ti pedis, ati ti ngeransi, penyai, enggau jaku ti kasar, lalu jaku ke enda senunuh enda patut pansut ari mulut kita. 9 Anang bula enggau pangan diri. Buai pendiau kita* ti lama sereta pengawa ke biasa dikereja kita suba. 10 Tang, rasukka diri ngena pendiau* ti baru ke diberi Petara. Nengah penemu ti betul, pendiau* nya terus digaga nyadi baru ngambika ngambarka pendiau* Petara. 11 Nitihka pendiau* ti baru tu, sekalika orang nya orang Gerika tauka orang Judah, orang ke besunat,* orang ke enda besunat, orang asing, orang Skitia,* ulun tauka orang ke bibas, semua nya enda penting. Kristus meh ke nyadi semua utai lalu semua kitai beserakup enggau iya.

12 Nya alai, kita ke nyadi nembiak ke dipilih Petara, ti kudus sereta dikerinduka, rasukka meh ati ti siru, ti manah, ti baruh, ti nelap, sereta sabar. 13 Terus meh liat ati enggau pangan diri sereta ngampunka pangan diri ari ati, taja pan kita bisi kebuah enda nyamai ati. Baka Jehovah ke ngampunka kita ari ati, kita mega patut ngereja nya. 14 Kelimpah ari semua nya, rasukka meh pengerindu, laban pengerindu ulih nyerakupka semua orang enggau sempurna.

15 Ngarapka pengelantang ari Kristus bekuasa dalam ati kita, laban kita udah dikangau ngambika bulih pengelantang nya nyadi siti tubuh. Nya alai, ayanka diri beterima kasih. 16 Ngarapka pesan Kristus ngemenuhka kita lalu meri kita semua penemu-dalam. Terus meh ngajar sereta meransang* pangan diri ngena masmur, jaku puji ngagai Petara, sereta lagu sembah ngagai Petara enggau ati ti beterima kasih.* Belagu meh ngagai Jehovah ari ati kita. 17 Nama-nama utai ke disebut sereta digaga kita, kereja semua nya dalam nama Tuan Jesus. Nengah iya, beterima kasih meh ngagai Petara ti Apai kitai.

18 Kita ke bini, nunduk ngagai laki kita, laban nya utai ti ngena ba mata Tuan. 19 Kita ke laki, terus meh rinduka bini kita, lalu anang balat ringat ngagai* sida. 20 Kita ke anak, ngasika apai indai kita dalam semua pekara, laban nya ngelantangka ati Tuan. 21 Kita ke apai, anang ngasuh anak kita pedis ati,* ngambika sida enda lemi semengat.* 22 Kita ke ulun, ngasi meh ke tuan kita ba dunya tu dalam semua pekara. Anang semina ngasika sida lebuh sida ngemataka kita ketegal deka ngelantangka ati mensia. Tang ngasika sida ari ati sereta enggau ati ti nangika Jehovah. 23 Nama-nama utai ke digaga kita, kereja nya enggau pengabis ati sereta pengering* kita ke Jehovah, ukai ke mensia. 24 Laban kita nemu, kita deka bulih pesaka ari Jehovah nyadika upah kita. Gawa meh nyadi ulun ke Tuan kitai, Kristus. 25 Orang ke ngereja penyalah tentu deka dibalas setipak enggau penyalah iya, laban Petara enda berat sepiak.